[ಪಯ್ಣಾ ಸಾಹಿತ್ಯ್] ಪವಿತ್ರ್ ಜಾಗ್ಯಾಚೆಂ ಪಯ್ಣ್

ಪವಿತ್ರ್ ಜಾಗೊ ರೋಮಾಕ್ ಬೆಟ್ ದಿಂವ್ಚೆ ಮಜೆಂ ಸ್ವಪಾಣ್ ಅಖ್ರೇಕ್ ತರೀ ಜ್ಯಾರಿ ಜಾಲೆಂ.

ರೋಮ್ ಇಟಲಿಚೆಂ ರಾಜದಾನಿ ಜಾವ್ನಾಸಾ. ಅನಿಂ ಹ್ಯಾ ರೋಮಾ ಬಿತರ್ ವ್ಯಾಟಿಕನ್ ಮುಳ್ಳೊ ಅನ್ಯೇಕ್ ಲಾನ್ಸೊ ದೇಶ್ ಅಸಾ. ಹೊ ಸಂಸಾರಾಂತ್ಲ್ಯಾ ಸರ್ವ್ ದೇಶಾಂ ಪ್ರಾಸ್ ಲ್ಹಾನ್ ದೇಶ್. ರೋಮಾಚೊ ಅನಿಂ ವ್ಯಾಟಿಕನಾಚೊ ಆಡಳ್ತೆದಾರ್ ಅಮ್ಚೊ ಪಾಪ್ ಸಾಯ್ಬ್ ಜಾವ್ನಾಸಾ.

ವ್ಯಾಟಿಕನ್ ದೇಶಾ ಬಿತರ್ ಅಸ್ಚೆ ಪ್ರಮುಖ್ ಜಾಗೆ ಸಾಂ ಪೆದ್ರುಚಿ ಬೆಸಿಲಿಕಾ, ಸಿಸ್ಟೇನ್ ಚಾಪೆಲ್ ಅನಿಂ ವ್ಯಾಟಿಕನ್ ಮ್ಯುಸಿಯಮ್. ಹ್ಯಾ ತೀನ್ ಜಾಗ್ಯಾನಿಂ ಸಂಸಾರಾಂತ್ಲೆಂ ಅತ್ಯುನ್ನತ್ ಇಮಾಜೆ, ಪೈಂಟಿಂಗ್ ಅನಿಂ ಆರ್ಟ್ ವರ್ಕ್ ಪಳೆಂವ್ಕ್ ಮೆಳ್ತಾತ್. ಮ್ಯುಸಿಯಮ್ ಅನಿಂ ಬೆಸಿಲಿಕಾಚ್ಯಾ ವೊಣ್ತಿನಿಂ ವಿಶಿಶ್ಟ್ ಕಲಾ ಪಳೆಂವ್ಕ್ ಮೆಳ್ತಾ. ಮೈಕಲ್ ಅಂಜೆಲೊ, ಡೋನಾಟೆಲ್ಲೊ, ಲಿಯೊನಾರ್ಡೊ ಅನಿಂ ರಫಾಯೆಲ್ ಹ್ಯಾ ಚಾರ್ ಪ್ರಸಿದ್ದ್ ಕಲಾಕಾರಾನಿಂ ರೋಮಾಚೆ ತಶೆಂಚ್ಚ್ ವ್ಯಾಟಿಕನಾಚೆ ಕೊನ್ಶೆ ಕೊನ್ಶೆ ಸೊಬಯ್ಲ್ಯಾತ್.

ಸಾಂ ಪೆದ್ರುಚ್ಯಾ ಬೆಸಿಲಿಕಚೆಂ ಬಾಂದಾಪ್ ಸುರ್ವಾತ್ ಲ್ಲೆಂ ಪಾಪ್ ಸಾಯ್ಬ್ ನಿಕೊಲಸ್ ಪಾಂಚ್ವೊ ಅನಿಂ ಪಾಪ್ ಸಾಯ್ಬ್ ಜುಲಿಯಸ್ ದುಸ್ರೊ ಹಾಣಿಂ. ಪರ್ನಿ ಬೆಸಿಲಿಕಾ ಮೋಡ್ನ್ ನವಿ ಬೆಸಿಲಿಕಾ ಉಬಾರ್ಲಿ ಚೊವ್ತ್ಯಾ ಸೆಂಚುರಿಚ್ಯಾ ರೋಮನ್ ಎಂಪರರ್ ಕೊನ್ಸ್ಟಂಟೈನ್ ದ ಗ್ರೇಟ್ ಮುಳ್ಳ್ಯಾ ಮಾನೆಸ್ತಾನ್. ಹೆಂ ಬಾಂದಾಪ್ ಸುರ್ವಾತ್ಲೆಂ ಎಪ್ರಿಲಾಚ್ಯಾ ಅಟ್ರಾ 1506ಂತ್ ಅನಿಂ ನವೆಂಬರ್ ಅಟ್ರಾ 1626ಂತ್ ಸಂಪ್ಲೆಂ. ಉತ್ರಾನಿಂ ವರ್ಣುಂಕ್ ಅಸಾದ್ಯ್ ಅಸ್ಚೆಂ ವಾಸ್ತುಕಲಾ ಡಿಸೈನ್ ಕೆಲ್ಲೆಂ ಡೊನಾಟೊ ಬ್ರಾಮ್ಟೆ, ಮೈಕಲ್ ಅಂಜೆಲೊ,ಕಾರ್ಲೊ ಮೊಡರ್ನೊ ಅನಿಂ ಗಿಯನ್ ಲೊರೆನ್ಜೊ ಬರ್ನಿನಿ ಹಾಣಿಂ. ಬಿತರ್ಲ್ಯಾ ಮಾಪಾ ಪರ್ಮಾಣೆಂ ಹಿ ಸಂಸಾರಾಂತ್ಲ್ಯಾ ಇಗರ್ಜಾಂ ಪಯ್ಕಿ ವಡ್ಲಿ ಇಗರ್ಜ್ ಜಾವ್ನಾಸಾ.

ಸಾಂ ಪೆದ್ರುಚಿ ನಿರ್ಜೀವ್ ಕೂಡ್ ನಿಕೆಪಿಲ್ಲ್ಯಾ ಜಾಗ್ಯಾ ವಯ್ರ್ ವ್ಯಾಟಿಕನ್ ಬೆಸಿಲಿಕಾಚಿ ಪ್ರಮುಖ್ ಅಲ್ತಾರ್ ಉಬಾರ್ಲ್ಯಾ. “ಬೊಗ್ಸಾಣ್ಯಾಚಿ ಅಲ್ತಾರ್” ಮುಣ್ ಹ್ಯಾ ಜಾಗ್ಯಾಕ್ ನಾಂವ್ ಅಸಾ. ಹ್ಯಾ ಇಗರ್ಜೆ ಬಿತರ್ಲಿ ಕಲಾ ಪಳೆಂವ್ಕ್ ದೋನ್ ದೊಳೆ ಪಾವಾನಾಂತ್.

ಪಾಂಗ್ಳಾ ಜಲ್ಮಾಲ್ಲ್ಯಾ, ಬೊಳಿಯೆ ಫಿರ್ಗಜೆಂತ್ ಸಹಾಯಕ್ ವಿಗಾರ್ ಜಾವ್ನ್ ವಾವ್ರ್ ಕೆಲ್ಲ್ಯಾ ಫಾ! ಜಿತೇಶಾಚಿ ರೋಮಾಂತ್ ಬೆಟ್ ಜಾಲಿ. ಇಟಲಿಂತ್ ಇಟಲಿಯನ್ ಬಾಸ್ ಯೇನಾತ್ಲ್ಯಾನ್ ಜಿಯೆಂವ್ಚಿ ಕಶ್ಟಾಂಚಿ ಗಜಾಲ್. ಫಾ! ಜಿತೇಶಾನ್ ಅಪ್ಲ್ಯಾ ಪ್ರವಾಹಿ ಇಟಲಿಯನ್ ಉಲವ್ಪಾ ದ್ವಾರಿಂ ಅಮ್ಕಾಂ ವಾಂಚಯ್ಲೆಂ. ಅಮ್ಕಾಂ ಮ್ಯುಸಿಯಮ್, ಸಿಸ್ಟೇನ್ ಚಾಪೆಲ್ ಅನಿಂ ಬೆಸಿಲಿಕಾಕ್ ಬೊಂವ್ಡಾವ್ನ್ ಹಾಂಚಿ ಪ್ರಾಮುಖ್ಯತಾ ವಿವರ್ಸಿಲಿ. ಚಲೊನ್ ಚಲೊನ್ ಥಕ್ ಲ್ಲ್ಯಾ ಪಾಯಾಂಕ್ ನಿಮಾಣೆಂ ಟ್ರೆವಿ ಫವಾರ್ರ್ಯಾನ್ ಪುರಾಸಣ್ ಥಾಂಬಯ್ಲಿ. ಹಾಂತು ಚಿಲ್ಲರ್ ಪಯ್ಶೆ ಉಡಯ್ಲ್ಯಾರ್ ಪರತ್ ರೋಮಾಕ್ ಬೆಟ್ ದಿತಾಲ್ಯಾತ್ ಮುಳ್ಳಿ ಸಾಂಗ್ಣಿ ಅಸಾ. ಥೊಡೊ ವೇಳ್ ಬಸೊನ್ ಥಂಡ್ ಜೆಲಾಟೊ (ಐಸ್ ಕ್ರೀಮ್) ಚಾಕೊನ್ ಪರತ್ ಚಲೊಂಕ್ ಲಾಗ್ಲ್ಯಾಂವ್.

ಬೆಸಿಲಿಕಾ ಬಿತರ್ ಪಾಪ್ ಸಾಯ್ಬಾಂಕ್ ನಿಕೆಪಿಲ್ಲ್ಯಾ ಸುವಾತೆಕ್ “ಕೆಟಾಕೂಂಬ್” ಮುಣ್ ಆಪಯ್ತಾತ್. ಥಂಯ್ಸರ್ ಸಬಾರ್ ಚಾಪೆಲಾಂ ಅಸಾತ್. ದುಸ್ರೊ ದೀಸ್ ಆಯ್ತಾರ್ ಜಾಲ್ಯಾನ್ ಫಾ! ಜಿತೇಶಾನ್ ಅಮ್ಚ್ಯಾ ಖಾತಿರ್ ಎಕಾ ಚಾಪೆಲಾ ಬಿತರ್ ಖಾಸ್ಗಿ ಮೀಸ್ ಬೆಟಯ್ಲೆಂ ಅನಿಂ ಸಮೇಸ್ತಾಂ ಖಾತಿರ್ ಮಾಗ್ಲೆಂ. ವ್ಯಾಟಿಕನಾಂತ್ಲ್ಯಾ ಸಾಂ ಪೆದ್ರುಚ್ಯಾ ಬೆಸಿಲಿಕಾ ಬಿತರ್ ಮೀಸ್ ಅಯ್ಕೊಂವ್ಚೆ ಅಮ್ಚೆಂ ಭಾಗ್ ಚ್ ಮುಣ್ಯೆತ್. ಪಾ! ಜಿತೇಶಾನ್ ಹೆಂ ಅಮ್ಚೆಂ ಸ್ವಪಾಣ್ ಯ್ ಜ್ಯಾರಿ ಕೆಲೆಂ. ತಾಚೊ ಅಮಿಂ ಅಭಾರ್ ಮಾನ್ತಾಂವ್.

ರೋಮಾಚೊ ಇತಿಹಾಸ್ ಲಿಖುಂಕ್ ಲಾಗ್ಲ್ಯಾರ್ ತಿಂತೆರಾಂತ್ಲೆಂ ತೀಂತ್ ಸಂಪ್ತೆಲೆಂ ಪೂಣ್ ಇತಿಹಾಸ್ ಲಿಖುನ್ ಸಂಪ್ಚೊ ನಾಂ. ತಶೆಂಚ್ಚ್ ವ್ಯಾಟಿಕನಾಚ್ಯಾ ಕೊನ್ಶ್ಯಾ ಕೊನ್ಶ್ಯಾಚಿ ಸೊಬಾಯ್ ಚಾಕೊನ್ ದೋಳೆ ಥಕ್ತೆಲೆ ಪೂಣ್ ಸೊಬಾಯ್ ವರ್ಣುಂಕ್ ಶಬ್ದ್ ಕೋಶಾಂತ್ ಸಬ್ದ್ ಉಣೆಂ ಪಡ್ತಾಲೆ.

ದುಸ್ರ್ಯಾ ದಿಸಾ ಬಾರಾ ಅಪೊಸ್ತಲಾಂಚ್ಯಾ ಇಗರ್ಜೆಕ್ ಬೆಟ್ ದಿಲಿ. ಸತ್ರಾವ್ಯಾ ಶತಮಾನಾಂತ್ ಪೋಪ್ ಕ್ಲೆಮೆಂಟ್ ಇಕ್ರಾವ್ಯಾನ್ ಹ್ಯಾ ಇಗರ್ಜಿಕ್ ನವೆಂ ರೂಪ್ ದಿಲ್ಲೆಂ. ಕಾರ್ಲೊ ಫೊಂಟಾನಾನ್ ಹಾಚೆಂ ಇಂಟಿರಿಯರ್ ಡಿಸೈನ್ ಕೆಲ್ಲೆಂ. ಥಂಯ್ಚ್ ಲಾಗಿಂ ಜೆಜುನ್ ಚಡ್'ಲ್ಲಿಂ ಮೆಟಾಂ ಅಸಾತ್ ಅನಿಂ ಜೆಜುಚೆಂ ರಗಾತ್ ಯ್ ಅಸಾ. ತ್ಯಾ ಮೆಟಾನಿಂ ದಿಂಬಿಯೆರ್ ಚಡ್ಲ್ಯಾರ್ ಪಾತ್ಕಾಂ ಭೊಗ್ಸಾತಾತ್ ಮುಳ್ಳಿ ಸಾಂಗ್ಣಿ ಅಸಾ ದೆಕುನ್ ಹಾಂವೆ ಪಾತ್ಕ್ಯಾನ್ ದಿಂಬಿಯೆರ್ ತಿಂ ಮೆಟಾಂ ಚಡೊನ್ ಮಜ್ಯಾ ಪಾತ್ಕಾಂಚೆಂ ಭೊಗ್ಸಾಣೆಂ ಮಾಗ್ಲೆಂ. ತ್ಯಾ ಇಗರ್ಜಿಚ್ಯಾ ಉಜ್ವ್ಯಾ ಬಗ್ಲೆಕ್ ಎಕ್ ದಾರ್ ಅಸಾ. ತೆಂ ದಾರ್ ಪಂಚ್ವೀಸ್ ವರ್ಸಾಕ್ ಏಕ್ ಪಾವ್ಟಿಂ ಉಘಡ್ತಾತ್. ಅನಿಂ ಹಾಂತ್ಲ್ಯಾನ್ ಬಿತರ್ ರಿಗ್ ಲ್ಲೊ ಹರ್ಯೇಕ್ ಮನಿಸ್ ಸರ್ಗಾಕ್ ವೆತಾ ಮುಳ್ಳಿ ಸಾಂಗ್ಣಿ ಅಸಾ ಮುಣ್ ಪ್ರೆಸ್ಸಿ ಬಾಯೆನ್ ವಿವರಣ್ ದಿಲೆಂ. ಬೊಳಿಯೆಚಿ ಪ್ರೆಸ್ಸಿ ಬಾಯ್ ಸುಮಾರ್ ತೀಸ್ ವರ್ಸಾಂ ಥಾವ್ನ್ ರೋಮಾಂತ್ ಅಪ್ಲ್ಯಾ ಕುಟ್ಮಾ ಸಂಗಿ ವಸ್ತಿ ಕರ್ನ್ ಅಸಾ. ಮಜ್ಯಾ ನೊವ್ರ್ಯಾಚಿ ಕ್ಲಾಸ್ ಮೇಟ್ ತಿ ಜಾವ್ನಾಸ್ ಲ್ಲಿ.

ಉಪ್ರಾಂತ್ ತಿಣೆಂ ಅಮ್ಕಾಂ ಜೆರುಜಲೆಮ್ ಇಗರ್ಜೆಕ್ ಆಪವ್ನ್ ವೆಲೆಂ. ಥಂಯ್ ಜೆಜುಕ್ ಖುರ್ಸಾಯ್ತಾನಾ ನೆಸಯ್ಲೆಲೆಂ ವಸ್ತುರ್, ಖಿಳಾಯ್ಲೆಲ್ಲೆ ಖಿಳೆ ಅನಿಂ ಖುರ್ಸಾರ್ ಆಸ್ ಲ್ಲೊ ಹೆಡ್ ಬೋರ್ಡ್ ಯ್ ಅಸಾ. ಥಂಯ್ ಥಾವ್ನ್ ಪ್ರೆಸ್ಸಿ ಬಾಯೆನ್ ಅಮ್ಕಾಂ ಸಾಂ ಲೊರೆಸಾಚ್ಯಾ ಇಗರ್ಜಿಚಿ ಬೆಟ್ ಕರಯ್ಲಿ. ಥಂಯ್ಸರ್ ಸಾಂ ಲೊರೆಸಾಕ್ ಬಾಜ್ ಲ್ಲಿ ಕಾಯ್ಲ್ ಅಜೂನ್ ದಿಶ್ಟಿಕ್ ಪಡ್ತಾ. ಉಪ್ರಾಂತ್ ಅಮಿಂ ದರ್ಣಿ ಪಂದ್ಲ್ಯಾ ಮೆಟ್ರೊ ಟ್ಯೂಬಾರ್ ರಿಗೊನ್ ಕೊಲೊಸ್ಸಿಯಮಾಕ್ ಪಾವ್ಲ್ಯಾಂವ್.

ಕೊಲೊಸ್ಸಿಯಮ್ ಸಂಸಾರಾಂತ್ಲೆಂ ಭೊವ್ ವಡ್ಲೆಂ ಉಗ್ತೆಂ ಪ್ರದರ್ಶನ್ ಥಳ್. ಹೆಂ ಬಾಂದ್ ಲ್ಲೆಂ 80 ADಂತ್ ಬಾಂದ್ಪಿ ವೆಸ್ಪಸಿಯನ್ ಟೈಟಸ್. ಬುಂಯ್ಕಾಂಪಾಂತ್ ಎಕ್ ದೇಗ್ ಕೊಸ್ಳೊನ್ ಪಡ್ ಲ್ಲಿ ದಿಸೊನ್ ಯೆತಾ. ಹೆಂ ಕಟ್ವಣ್ ವರ್ಸಾಂ ಗೆಲ್ಲೆಬರಿಂಚ್ಚ್ ವೆವೆಗ್ಳ್ಯಾ ಗರ್ಜಾಂಕ್ ಉಪ್ಯೊಗ್ಸಿತಾಲೆ. ಎಕಾ ತೆಂಪಾರ್ ಚಾಪೆಲ್ ಜಾಲ್ಯಾರ್ ಅನ್ಯೇಕಾ ತೆಂಪಾರ್ ಝುಜಾಂತ್ ಸಲ್ವಲ್ಯಾಂಕ್ ವಯ್ರ್ ಥಾವ್ನ್ ಲೊಟುನ್ ಘಾಲ್ನ್ ಸಕಯ್ಲ್ ವಾಗಾಂಕ್ ಸೊಡ್ತೆಲೆ. ಉಪ್ರಾಂತ್ ಥೊಡೊ ತೇಂಪ್ ಸಿಮೆಸ್ರ್ತ್ ಜಾವ್ನ್ ವಾಪಾರ್ಲಿ. ಉಪ್ರಾಂತ್ ಥೊಡೊ ತೇಂಪ್ ಡಕಾಯಿತಾಂಚೊ ಬಂಗ್ಲೊ ಜಾಂವ್ಕ್ ಪಾವ್ಲೊ. ಅತಾಂ ಕೇವಲ್ ಏಕ್ ಪಯ್ಣಾರಿ ಆಕರ್ಶಣ್ ಜಾವ್ನ್ ಉರ್ಲಾಂ. ಕೊಲೊಸ್ಸಿಯಮ್ ಸಂಸಾರಾಂತ್ಲ್ಯಾ ನವ್ಯಾ ಸಾತ್ ವಂಡರಾಂ ಪಯ್ಕಿಂ ಏಕ್ ಜಾವ್ನಾಸಾ. ಉಪ್ರಾಂತ್ ಅಮಿಂ ಸಾಂಜೆಚ್ಯಾ ಜೆವ್ಣಾಕ್ ಇಟಲಿಯನ್ ಪಿಜ್ಜಾಚಿ ಅನಿಂ ವೈನಾಚಿ ರೂಚ್ ಚಾಕೊನ್ ಪರ್ತಾಲ್ಯಾಂವ್ ಪಾಟಿಂ ಅಮ್ಚ್ಯಾ ಹೊಟೆಲಾಕ್.

ತಿಸ್ರ್ಯಾ ದಿಸಾ ರಿಗ್ಲ್ಯಾಂವ್ ಪ್ಯಾಂತಿಯೋನ್ ಮುಳ್ಳ್ಯಾ ಅನ್ಯೇಕಾ ಜಯ್ತ್ ಕಟ್ವಣಾ ಬಿತರ್. ಪಯ್ಲೆಂ ಹೆಂ ರೋಮನ್ ದೀವ್ಳ್ ಜಾವ್ನಾಸ್ ಲ್ಲೆಂ. 609 AD ಉಪ್ರಾಂತ್ ಕಥೊಲಿಕ್ ಇಗರ್ಜ್ (ಬೆಸಿಲಿಕಾ ದಿ ಸಾಂಟಾ ಮರಿಯಾ) ಜಾವ್ನ್ ಬದಲ್ಲೆಂ. ಇಟೆಲಿಚ್ಯಾ ಸುರ್ಯಾಚ್ಯಾ ದಾವೆಕ್ ಕರ್ಪಾಲ್ಲ್ಯಾ ಅಮ್ಕಾಂ ಥಂಯ್ಚ್ ಲಾಗ್ಸಾರ್ ಅಸ್ ಲ್ಲ್ಯಾ ಫವಾರ್ರ್ಯಾನ್ ಥಂಡಾಯ್ ಲಾಬಯ್ಲಿ. ಉಪ್ರಾಂತ್ ಅಮಿಂ ಜೆಜುಚ್ಯಾ ಇಗರ್ಜೆಕ್ (church of Gesu) ಪಾವ್ಲ್ಯಾಂವ್. ಹಿ ಇಗರ್ಜ್ ಬಾಂದ್ ಲ್ಲಿ 1568ಂತ್ ಅನಿಂ 1580ಂತ್ ಬಾಂದ್ಪಾಚೆಂ ಕಾಮ್ ಸಂಪ್ ಲ್ಲೆಂ. ತ್ಯಾ ಇಗರ್ಜಿಚೆಂ ಪೆಂಯ್ಟಿಂಗ್ ಪಳೆವ್ನ್ ಬಸ್ಲ್ಯಾರ್ ಉಟ್ಚೆಂಚ್ಚ್ ನಾಕಾಶೆಂ ದಿಸ್ತಾ. ಥಂಯ್ಸರ್ ಗೊಯಾಂ ಥಾವ್ನ್ ಹಾಡ್ ಲ್ಲೊ ಸಾಂ ಫ್ರಾನ್ಸಿಸ್ ಸಾವೆರಾಚೊ ಉಜ್ವೊ ಹಾತ್ ಅಸಾ. ತಾಚ್ಯಾ ಖಾತಿರ್ ಚ್ಚ್ ಏಕ್ ಸೊಬಿತ್ ಅಲ್ತಾರ್ ರುತಾ ಕೆಲ್ಯಾ. ತ್ಯಾ ಇಗರ್ಜಿಚಿ ವಾಸ್ತುಕಲಾ ವರ್ಣುಂಕ್ ಸಬ್ದ್ ಉಣೆಂ ಪಡ್ತಾತ್. ಥೊಡೊ ವೇಳ್ ಥಂಯ್ಚ್ ಬಸೊನ್ ಮಾಗ್ಣೆಂ ಕರ್ನ್ ತ್ಯಾ ಕಲೆಚೊ ಆನಂದ್ ಚಾಕ್ಲೊ. ಉಪ್ರಾಂತ್ ರೊಮಾಂತ್ಲ್ಯಾ ಪ್ರಸಿದ್ದ್ ರೆಸ್ಟೊರೆಂಟಾಂತ್ ದೊಳ್ಯಾಂ ಮುಖಾರ್ ತಯಾರ್ ಕೆಲ್ಲ್ಯಾ ಇಟೆಲಿಯನ್ ಪ್ಯಾಸ್ಟಾಚಿ ರೂಚ್ ಚಾಕ್ಲಿ.

ಚೊವ್ತ್ಯಾ ದಿಸಾ ಫ಼್ಲೊರೆನ್ಸ್ ಮುಳ್ಳ್ಯಾ ಇಟೆಲಿಂತ್ಲ್ಯಾ ಅನ್ಯೇಕಾ ಜಾಗ್ಯಾಕ್ ಪಾವ್ಲ್ಯಾಂವ್. ಹೊ ಅನ್ಯೇಕ್ ಇಟೆಲಿಚೊ ಸೊಬಿತ್ ಗಾಂವ್ ಕೆಥೆಡ್ರಲಾಂಕ್, ಮ್ಯುಸಿಯಮಾಂಕ್ ಕಲೆಕ್ ಪ್ರಸಿದ್ದ್ ಜಾಲಾ. ಸಾಂಟಾ ಮರಿಯಾ ನೊವೆಲ್ಲಾ ಅನಿಂ ಸಾಂಟಾ ಕ್ರೋಸ್ ಇಗರ್ಜೆಂಕ್ ಬೆಟ್ ದಿಲಿ. ಫ಼್ಲೊರೆನ್ಸ್ ಗಾಂವಾಚ್ಯಾ ಮದ್ಲ್ಯಾನ್ ಆರ್ನೊ ನಂಯ್ ವಾಳ್ತಾ. 1966 ಆಯಿಲ್ಲ್ಯಾ ಆವ್ರಾಕ್ ಫ಼್ಲೊರೆನ್ಸಾಂತ್ಲೆಂ ಮೊಲಾದಿಕ್ ಕಲಾ ಅನಿಂ ದಿರ್ವೆಂ ಸಗ್ಳೆಂ ನಾಸ್ ಜಾಲ್ಲೆಂ ಅನಿಂ ಹಜಾರಾಂಗಟ್ಲ್ಯಾನ್ ಲೋಕ್ ಮರಣ್ ಪಾವ್ ಲ್ಲೊ. ಉರ್ ಲ್ಲ್ಯಾ ಲೊಕಾನಿಂ ಉರ್ ಲ್ಲ್ಯಾಂತ್ಲೆಂ ಪುಂಜಾವ್ನ್ ನವೆಂ ಫ಼್ಲೊರೆನ್ಸ್ ಬಾಂದ್ಲೆಂ.

ಪಾಂಚ್ವ್ಯಾ ದಿಸಾ ಸೈಟ್ ಸೀಯಿಂಗ್ ಬಸ್ಸಾರ್ ಸಗ್ಳೆಂ ಫ್ಲೊರೆನ್ಸ್ ಬೊಂವ್ಲ್ಯಾಂವ್. ಮೈಕಲ್ ಅಂಜೆಲೊ ಗುಡ್ಯಾರ್ ಅಸ್ಲ್ಯಾ ವಿವ್ ಪೋಂಯ್ಟಾರ್ ಬಸೊನ್ ಸಗ್ಳ್ಯಾ ಫ್ಲೊರೆನ್ಸಾಚಿ ಸೊಬಾಯ್ ಚಾಕ್ಲಿ. ಉಪ್ರಾಂತ್ ಪಯ್ಣ್ ಮುಂದರುನ್ ಬರ್ರ್ಯಾ ಬರ್ರ್ಯಾ ಜಾಗ್ಯಾನಿಂ ದೆಂವೊನ್ ಥಂಯ್ಚೊ ಇತಿಹಾಸ್ ವಾಚುನ್ ಉಗ್ಡಾಸಾಕ್ ಥೊಡೆ ಫೊಟೆ ಕಾಡ್ನ್ ಪಯ್ಣ್ ಮುಂದರ್ಸಿತೆಲ್ಯಾಂವ್. ಅಖ್ರೇಕ್ ಪಾವ್ಲ್ಯಾಂವ್ ಟಸ್ಕನಿ ಗುಡ್ಯಾರ್ ವೆಗ್ಳೊಚ್ ಅನುಭವ್ ಜೊಡ್ಲೊ. ವಯ್ರ್ ಗುಡ್ಯಾರ್ ಥಾವ್ನ್ ದಾಕಾಚಿಂ ಶೆತಾಂ ದಿಸ್ಟಿಕ್ ಪಡ್ತಾತ್. ತಾಂತುನ್ ಇಟೆಲಿಚೊ ರುಚಿಕ್ ವೈನ್ ತಯಾರ್ ಜಾತಾ.

ಸವ್ಯಾ ದಿಸಾ ಪಾವ್ಲ್ಯಾಂವ್ ಉದ್ಕಾ ವಯ್ರ್ ಉಪ್ಯೆಂವ್ಚ್ಯಾ ವೆನಿಸ್ ಗಾಂವಾಕ್. ಹ್ಯಾ ಗಾಂವಾಚ್ಯಾ ಸೊಬಾಯೆಚೆಂ ವರ್ಣನ್ ಕರುಂಕ್ ಉತ್ರಾಂ ಮೆಳಾನಾಂತ್. ಹೊ ಗಾಂವ್ 118 ಲ್ಹಾನ್ ದ್ವೀಪಾನಿಂ ರೂಪಿತ್ ಜಾಲಾ. ಹಾಂಗಾಸರ್ ರಸ್ತೆ ಉಣೆಂ ಅನಿಂ ಉದ್ಕಾ ರಸ್ತೆ ಚಡ್ ಅಸಾತ್. ಎಕಾ ಜಾಗ್ಯಾ ಥಾವ್ನ್ ಅನ್ಯೇಕಾ ಜಾಗ್ಯಾಕ್ ವಚೊಂಕ್ ಉದ್ಕಾ ಟ್ಯಾಕ್ಸಿ ವಾಪರ್ತಾತ್. ಹೊ ಗಾಂವ್ ವರ್ಸಾಕ್ 1ಥಾವ್ನ್ 2 ಮಿಲಿಮೀಟರ್ ಬುಡೊನ್ ಯೆತೇ ಅಸಾ. ಹಾಂಗಾಚೊ ಜನಸಂಖೊ ಉಣೊ ಜಾಯಿತ್ತ್ ಯೆತೇ ಅಸಾ. ಗೆಲೆತ್ಯಾ ಪನ್ನಾಸ್ ವರ್ಸಾಂ ಥಾವ್ನ್ 120,000 ಥಾವ್ನ್ 60,000 ಕ್ ದೆವ್ಲಾ. ತರೀ ಹಾಂಗಾಸರ್ ಯೆಂವ್ಚ್ಯಾ ಪಯ್ಣಾರ್ಯಾಂಚೊ ಸಂಖೊ ಉಣೊ ಜಾಂವ್ಕ್ ನಾಂ. ಹೊ ಗಾಂವ್ ಅಜೂನ್ ಸಂಸಾರಾಂತ್ಲ್ಯಾ ಸೊಬಿತ್ ಗಾಂವಾ ಪಯ್ಕಿಂ ಏಕ್ ಜಾವ್ನಾಸಾ.

ಸಾತ್ವ್ಯಾ ದಿಸಾ ಅಮಿಂ ಉದ್ಕಾ ಟ್ಯಾಕ್ಸಿ ದರ್ನ್ ದೋನ್ ದ್ವೀಪ್ ಬೊಂವ್ಲ್ಯಾಂವ್. “ಮುರಾನೊ” ಮುಳ್ಳ್ಯಾ ದ್ವೀಪಾಂತ್ ಗ್ಲಾಸಾಚಿ ಫ಼ೆಕ್ಟರಿ ಅಸಾ. ಥಂಯ್ಸರ್ ಗ್ಲಾಸ್ ತಯಾರ್ ಜಾತಾನಾ ಲ್ಲಾಬ್ಚೊ ಅನ್ಬೋಗ್ ವೆಗ್ಳೊಚ್. ಥಂಯ್ಚ್ಯಾ ದುಖಾನಾನಿಂ ಅಸ್ಚೆ ಗ್ಲಾಸಾಂತ್ ತಯಾರ್ ಕೆಲ್ಲೆ ವಸ್ತು ಪಳೆಯ್ತಾನಾ. ಸಗ್ಳೆಂ ಮೊಲಾಕ್ ಘೆವ್ಯಾಶೆಂ ಭೊಗ್ತಾ.

ಉಪ್ರಾಂತ್ ಪಾವ್ಲ್ಯಾಂವ್ “ಬುರಾನೊ” ಮುಳ್ಳ್ಯಾ ದ್ವೀಪಾಕ್. ಥಂಯ್ಚಿ ರಂಗೀನ್ ಘರಾಂ ಪಳೆವ್ನ್ ಕ್ಯಾಮರಾ ಬಂದ್ ಕರ್ಚೊಚ್ ನಾಕಾ ಮುಣ್ ಭೊಗ್ಲೆಂ. ಥಂಯ್ಚ್ಯಾ ಲೋಕಾಕ್ ಘರ್ಚ್ಯಾ ಬಾಯ್ರ್ ದುಸ್ರೊ ಪೈಂಟ್ ಕಾಡುಂಕ್ ಅನುಮತಿ ನಾಂ ಕಂಯ್. ಕಿತ್ಯಾಕ್ ಮುಳ್ಯಾರ್ ಹ್ಯಾ ರಂಗೀನ್ ಘರಾಂಕ್ ಲಾಗೊನ್ಂಚ್ ಮಸ್ತ್ ಪಯ್ಣಾರಿ ತ್ಯಾ ದ್ವೀಪಾಕ್ ಪಯ್ಣ್ ಕರ್ತಾತ್. ಥಂಯ್ಚೊ ಲೋಕ್ ದುಬ್ಳೊ. ತಾಂಚಿ ಪೇಜ್ ಪಯ್ಣಾರ್ರ್ಯಾಂ ಥಾವ್ನ್ ಚ್ ಶಿಜ್ತಾ.

ಅಟ್ವೊ ಅನಿಂ ನವೊ ದೀಸ್ ವೆನಿಸಾಚೆಂ ಅನ್ವೇಶಣ್ ಕರ್ಚ್ಯಾಂತ್ ಸಂಪ್ಲೊ. ವೆನಿಸಾಂತ್ಲ್ಯಾ ಅಮ್ಚ್ಯಾ ಹೊಟೆಲಾಚ್ಯಾ ಮುಳಾಂತ್ ಚ್ ಅಸ್ಲೆಂ ಪಿಜ್ಜಾಚೆಂ ದುಕಾನ್. “ಟೊರ್ಟುಗಾ 2.0” ಎದೋಳ್ ಪರ್ಯಾಂತ್ ಖೆಲ್ಯಾ ಪಿಜ್ಜಾ ಪ್ರಾಸ್ ಹಾಚಿ ರೂಚ್ ವಿಂಗಡ್ ಜಾವ್ನಾಸ್ ಲ್ಲಿ. ಬುಕ್ ಲಾಗಾನಾತ್ಲ್ಯಾರೀ ದೋನ್ ಕುಡ್ಕೆ ಪಿಜ್ಜಾ ಘಡ್ಯೆ ಬಿತರ್ ಪೊಟಾ ಬಿತರ್ ಲಿಪ್ತಾಲೊ. ಅಮ್ಕಾಂ ಪಯ್ಸ್ ರೆಸ್ಟೊರೆಂಟಾ ಸೊದುನ್ ವಚಾಜಯ್ ಮುಳ್ಳಿ ಗರ್ಜ್ ಚ್ ಪಡೊಂಕ್ನಾ.

ರೋಮಾಂತ್ ಮೇಟ್ ದವ್ರುಂಕ್ ಅಸಾದ್ಯ್ ಜಾಲ್ಲ್ಯಾಂಕ್ ತುಮ್ಕಾಂ ಹಾಂವೆ ಪಿಂತುರಾಂ ದ್ವಾರಿಂ ರೋಮ್ ದಾಕಂವ್ಚೆಂ ಪ್ರಯತನ್ ಕೆಲಾಂ. ಸಾದ್ಯ್ ತರ್ ತುಮಿಂ ಜಿವಿತಾಂತ್ ಏಕ್ ಪಾವ್ಟಿಂ ರೋಮಾಚಿ ಬೆಟ್ ಕರಿಜಯ್. ಥಂಯ್ಚ್ಯಾ ಕಲೆಚೊ ತುಮ್ಚ್ಯಾ ದೊಳ್ಯಾನಿಂ ತುಮಿಂ ಆನಂದ್ ಘೆಂವ್ಕ್ ಜಾಯ್. ಮಜಿಂ ಪಿಂತುರಾಂ ಖಂಡಿತ್ ಜಾವ್ನ್ ತ್ಯಾ ಶ್ರೇಶ್ಟ್ ಕಲೆಕ್ ನ್ಯಾಯ್ ದೀಂವ್ಕ್ ಸಕಾನಾಂತ್.

ದೊಳೆ ದಾಂಪುನ್ ಉಗ್ತೆ ಕರ್ಚ್ಯಾ ಬಿತರ್ ಅಮ್ಚಿ ಧಾ ದಿಸಾಂಚಿ ರಜಾ ಮುಗ್ದಾಲ್ಲಿ ಅನಿಂ ಮಾರ್ಕೊ ಪೊಲೊ ಎರ್ ಪೋರ್ಟಾಂತ್ ಅಮ್ಚೆಂ ವಿಮಾನ್ ಅಮ್ಕಾಂ ಘೆವ್ನ್ ಪಾಟಿಂ ಉಬೊಂಕ್ ರಾಕೊನ್ ಅಸ್ಲೆಂ.

- ಮೊನಿಕಾ ಡೆ’ಸಾ ಮಥಾಯಸ್, ಡಬ್ಲಿನ್ (ಜ್ಯೂನ್, 2023)

[पयणा साहित्य] पवित्र जाग्याचें पयण

पवित्र जागो रोमाक बेट दिंवचे मजें स्वपाण अखरेक तरी ज्यारी जालें.

रोम इटलिचें राजदानी जावनासा. अनीं ह्या रोमा बितर व्याटिकन मुळ्ळो अन्येक लान्सो देश असा. हो संसारांतल्या सर्व देशां प्रास ल्हान देश. रोमाचो अनीं व्याटिकनाचो आडळतेदार अमचो पाप सायब जावनासा.

व्याटिकन देशा बितर असचे प्रमूख जागे सां पेद्रुची बेसिलिका, सिसटेन चापेल अनीं व्याटिकन म्युसियम. ह्या तीन जाग्यानीं संसारांतलें अत्युन्नत इमाजे, पैंटिंग अनीं आर्ट वर्क पळेवंक मेळतात. म्युसियम अनीं बेसिलिकाच्या वोणतिनीं विशिश्ट कला पळेवंक मेळता. मैकल अंजेलो, डोनाटेल्लो, लियोनार्डो अनीं रफायेल ह्या चार प्रसिद्द कलाकारानीं रोमाचे तशेंच्च व्याटिकनाचे कोनशे कोनशे सोबयल्यात.

सां पेद्रुच्या बेसिलिकचें बांदाप सुर्वात ल्लें पाप सायब निकोलस पांचवो अनीं पाप सायब जुलियस दुस्रो हाणीं. पर्नी बेसिलिका मोडन नवी बेसिलिका उबारली चोवत्या सेंचुरिच्या रोमन एंपरर कोन्सटंटैन द ग्रेट मुळ्ळ्या मानेसतान. हें बांदाप सुर्वातलें एपरिलाच्या अट्रा १५०६ंत अनीं नवेंबर अट्रा १६२६ंत संपलें. उत्रानीं वर्णुंक असाद्य असचें वासतुकला डिसैन केल्लें डोनाटो ब्रामटे, मैकल अंजेलो,कारलो मोडर्नो अनीं गियन लोरेनजो बर्निनी हाणीं. बितरल्या मापा पर्माणें ही संसारांतल्या इगर्जां पयकी वडली इगर्ज जावनासा.

सां पेद्रुची निर्जीव कूड निकेपिल्ल्या जाग्या वयर व्याटिकन बेसिलिकाची प्रमूख अल्तार उबारल्या. “बोगसाण्याची अल्तार” मूण ह्या जाग्याक नांव असा. ह्या इगर्जे बितरली कला पळेवंक दोन दोळे पावानांत.

पांगळा जल्माल्ल्या, बोळिये फिर्गजेंत सहायक विगार जावन वावर केल्ल्या फा! जितेशाची रोमांत बेट जाली. इटलिंत इटलियन बास येनातल्यान जियेंवची कश्टांची गजाल. फा! जितेशान अपल्या प्रवाही इटलियन उलवपा द्वारीं अमकां वांचयलें. अमकां म्युसियम, सिसटेन चापेल अनीं बेसिलिकाक बोंवडावन हांची प्रामुख्यता विवर्सिली. चलोन चलोन थक ल्ल्या पायांक निमाणें ट्रेवी फवारऱ्यान पुरासण थांबयली. हांतू चिल्लर पयशे उडयल्यार परत रोमाक बेट दिताल्यात मुळ्ळी सांगणी असा. थोडो वेळ बसोन थंड जेलाटो (ऐस क्रीम) चाकोन परत चलोंक लागल्यांव.

बेसिलिका बितर पाप सायबांक निकेपिल्ल्या सुवातेक “केटाकूंब” मूण आपयतात. थंयसर सबार चापेलां असात. दुस्रो दीस आयतार जाल्यान फा! जितेशान अमच्या खातीर एका चापेला बितर खासगी मीस बेटयलें अनीं समेसतां खातीर मागलें. व्याटिकनांतल्या सां पेद्रुच्या बेसिलिका बितर मीस अयकोंवचे अमचें भाग च मुण्येत. पा! जितेशान हें अमचें स्वपाण य ज्यारी केलें. ताचो अमीं अभार मानतांव.
रोमाचो इतिहास लिखुंक लागल्यार तिंतेरांतलें तींत संप्तेलें पूण इतिहास लिखून संपचो नां. तशेंच्च व्याटिकनाच्या कोनश्या कोनश्याची सोबाय चाकोन दोळे थक्तेले पूण सोबाय वर्णुंक शब्द कोशांत सब्द उणें पडताले.
दूसऱ्या दिसा बारा अपोसतलांच्या इगर्जेक बेट दिली. सत्राव्या शतमानांत पोप क्लेमेंट इक्राव्यान ह्या इगर्जीक नवें रूप दिल्लें. कारलो फोंटानान हाचें इंटिरियर डिसैन केल्लें. थंयच लागीं जेजून चड ल्लीं मेटां असात अनीं जेजुचें रगात य असा. त्या मेटानीं दिंबियेर चडल्यार पात्कां भोगसातात मुळ्ळी सांगणी असा देकून हांवे पात्क्यान दिंबियेर तीं मेटां चडोन मज्या पात्कांचें भोगसाणें मागलें. त्या इगर्जिच्या उज्व्या बगलेक एक दार असा. तें दार पंचवीस वर्साक एक पावटीं उघडतात. अनीं हांतल्यान बितर रीग ल्लो हऱ्येक मनीस सर्गाक वेता मुळ्ळी सांगणी असा मूण प्रेस्सी बायेन विवरण दिलें. बोळियेची प्रेस्सी बाय सुमार तीस वर्सां थावन रोमांत अपल्या कुटमा संगी वसती कर्न असा. मज्या नोवऱ्याची क्लास मेट ती जावनास ल्ली.

उपरांत तिणें अमकां जेरुजलेम इगर्जेक आपवन वेलें. थंय जेजूक खुर्सायताना नेसयलेलें वसतूर, खिळायलेल्ले खिळे अनीं खुर्सार आस ल्लो हेड बोर्ड य असा. थंय थावन प्रेस्सी बायेन अमकां सां लोरेसाच्या इगर्जिची बेट करयली. थंयसर सां लोरेसाक बाज ल्ली कायल अजून दिश्टीक पडता. उपरांत अमीं दर्णी पंदल्या मेट्रो ट्यूबार रिगोन कोलोस्सियमाक पावल्यांव.

कोलोस्सियम संसारांतलें भोव वडलें उग्तें प्रदर्शन थळ. हें बांद ल्लें ८० ADंत बांदपी वेस्पसियन टैटस. बुंयकांपांत एक देग कोसळोन पड ल्ली दिसोन येता. हें कटवण वर्सां गेल्लेबरिंच्च वेवेगळ्या गर्जांक उप्योगसिताले. एका तेंपार चापेल जाल्यार अन्येका तेंपार झुजांत सलवल्यांक वयर थावन लोटून घालन सकयल वागांक सोडतेले. उपरांत थोडो तेंप सिमेस्र्त जावन वापारली. उपरांत थोडो तेंप डकायितांचो बंगलो जावंक पावलो. अतां केवल एक पयणारी आकर्शण जावन उरलां. कोलोस्सियम संसारांतल्या नव्या सात वंडरां पयकीं एक जावनासा. उपरांत अमीं सांजेच्या जेवणाक इटलियन पिज्जाची अनीं वैनाची रूच चाकोन पर्ताल्यांव पाटीं अमच्या होटेलाक.

तीसऱ्या दिसा रिगल्यांव प्यांतियोन मुळ्ळ्या अन्येका जयत कटवणा बितर. पयलें हें रोमन दीवळ जावनास ल्लें. ६०९ AD उपरांत कथोलीक इगर्ज (बेसिलिका दी सांटा मरिया) जावन बदल्लें. इटेलिच्या सूऱ्याच्या दावेक कर्पाल्ल्या अमकां थंयच लागसार अस ल्ल्या फवारऱ्यान थंडाय लाबयली. उपरांत अमीं जेजुच्या इगर्जेक (church of Gesu) पावल्यांव. ही इगर्ज बांद ल्ली १५६८ंत अनीं १५८०ंत बांदपाचें काम संप ल्लें. त्या इगर्जिचें पेंयटिंग पळेवन बसल्यार उटचेंच्च नाकाशें दिसता. थंयसर गोयां थावन हाड ल्लो सां फ्रान्सीस सावेराचो उज्वो हात असा. ताच्या खातीर च्च एक सोबीत अल्तार रुता केल्या. त्या इगर्जिची वासतुकला वर्णुंक सब्द उणें पडतात. थोडो वेळ थंयच बसोन मागणें कर्न त्या कलेचो आनंद चाकलो. उपरांत रोमांतल्या प्रसिद्द रेसटोरेंटांत दोळ्यां मुखार तयार केल्ल्या इटेलियन प्यासटाची रूच चाकली.

चोवत्या दिसा फ಼्लोरेन्स मुळ्ळ्या इटेलिंतल्या अन्येका जाग्याक पावल्यांव. हो अन्येक इटेलिचो सोबीत गांव केथेड्रलांक, म्युसियमांक कलेक प्रसिद्द जाला. सांटा मरिया नोवेल्ला अनीं सांटा क्रोस इगर्जेंक बेट दिली. फ಼्लोरेन्स गांवाच्या मदल्यान आर्नो नंय वाळता. १९६६ आयिल्ल्या आवराक फ಼्लोरेन्सांतलें मोलादीक कला अनीं दिर्वें सगळें नास जाल्लें अनीं हजारांगटल्यान लोक मरण पाव ल्लो. ऊर ल्ल्या लोकानीं ऊर ल्ल्यांतलें पुंजावन नवें फ಼्लोरेन्स बांदलें.

पांचव्या दिसा सैट सीयिंग बस्सार सगळें फ्लोरेन्स बोंवल्यांव. मैकल अंजेलो गुड्यार असल्या वीव पोंयटार बसोन सगळ्या फ्लोरेन्साची सोबाय चाकली. उपरांत पयण मुंदरून बरऱ्या बरऱ्या जाग्यानीं देंवोन थंयचो इतिहास वाचून उगडासाक थोडे फोटे काडन पयण मुंदर्सितेल्यांव. अखरेक पावल्यांव टसकनी गुड्यार वेगळोच अनुभव जोडलो. वयर गुड्यार थावन दाकाचीं शेतां दिसटीक पडतात. तांतून इटेलिचो रुचीक वैन तयार जाता.

सव्या दिसा पावल्यांव उदका वयर उप्येंवच्या वेनीस गांवाक. ह्या गांवाच्या सोबायेचें वर्णन करुंक उत्रां मेळानांत. हो गांव ११८ ल्हान द्वीपानीं रूपीत जाला. हांगासर रसते उणें अनीं उदका रसते चड असात. एका जाग्या थावन अन्येका जाग्याक वचोंक उदका ट्याक्सी वापर्तात. हो गांव वर्साक १थावन २ मिलिमीटर बुडोन येते असा. हांगाचो जनसंखो उणो जायित्त येते असा. गेलेत्या पन्नास वर्सां थावन १२०,००० थावन ६०,००० क देवला. तरी हांगासर येंवच्या पयणाऱ्यांचो संखो उणो जावंक नां. हो गांव अजून संसारांतल्या सोबीत गांवा पयकीं एक जावनासा.

सात्व्या दिसा अमीं उदका ट्याक्सी दर्न दोन द्वीप बोंवल्यांव. “मुरानो” मुळ्ळ्या द्वीपांत ग्लासाची फ಼ेकटरी असा. थंयसर ग्लास तयार जाताना ल्लाबचो अनबोग वेगळोच. थंयच्या दुखानानीं असचे ग्लासांत तयार केल्ले वसतू पळेयताना. सगळें मोलाक घेव्याशें भोग्ता.

उपरांत पावल्यांव “बुरानो” मुळ्ळ्या द्वीपाक. थंयची रंगीन घरां पळेवन क्यामरा बंद कर्चोच नाका मूण भोगलें. थंयच्या लोकाक घर्च्या बायर दुस्रो पैंट काडुंक अनुमती नां कंय. कित्याक मुळ्यार ह्या रंगीन घरांक लागोन्ंच मसत पयणारी त्या द्वीपाक पयण कर्तात. थंयचो लोक दुबळो. तांची पेज पयणारऱ्यां थावन च शिजता.

अटवो अनीं नवो दीस वेनिसाचें अन्वेशण कर्च्यांत संपलो. वेनिसांतल्या अमच्या होटेलाच्या मुळांत च असलें पिज्जाचें दुकान. “टोर्टुगा २.०” एदोळ पऱ्यांत खेल्या पिज्जा प्रास हाची रूच विंगड जावनास ल्ली. बूक लागानातल्यारी दोन कुडके पिज्जा घड्ये बितर पोटा बितर लिप्तालो. अमकां पयस रेसटोरेंटा सोदून वचाजय मुळ्ळी गर्ज च पडोंक्ना.

रोमांत मेट दवरुंक असाद्य जाल्ल्यांक तुमकां हांवे पिंतुरां द्वारीं रोम दाकंवचें प्रयतन केलां. साद्य तर तुमीं जिवितांत एक पावटीं रोमाची बेट करिजय. थंयच्या कलेचो तुमच्या दोळ्यानीं तुमीं आनंद घेवंक जाय. मजीं पिंतुरां खंडीत जावन त्या श्रेश्ट कलेक न्याय दीवंक सकानांत.

दोळे दांपून उग्ते कर्च्या बितर अमची धा दिसांची रजा मुगदाल्ली अनीं मार्को पोलो एर पोर्टांत अमचें विमान अमकां घेवन पाटीं उबोंक राकोन असलें.

- मोनिका डे’सा मथायस, डबलीन (ज्यून, २०२३)

[Poinna Sahity] Povitr Zageachem Poinn

Povitr zago romak bett dimvche mojem svopann okhrek tori jeari zalem.

Rome ittolichem razodani zaunasa. Onim hea roma bitor veattikon mull'llo onyek lanso dex osa. Ho somsarantlea sorv dexam pras lhan dex. Romacho onim veattikonacho addolltedar omcho pap saib zaunasa.

Veattikon dexa bitor osche promukh zage sam pedruchi besilika, sistten chapel onim veattikon myusiyom'. Hea tin zageanim somsarantlem otyun'not imaje, pointting onim artt vork polleunko melltat. Myusiyom' onim besilikachea vonntinim vixixtt kola polleunko mellta. Moikol onjelo, ddonattel'lo, lionarddo onim rofayel hea char prosid'd kolakaranim romache toxenchch veattikonache konxe konxe soboileat.

Sam pedruchea besilikochem bandap survat l'lem pap saib nikolos panchvo onim pap saib zuliyos dusro hannim. Porni besilika moddn novi besilika ubarli choutea senchurichea romon emporor konsttonttoin do grett mull'llea manestan. Hem bandap survatlem eprilachea ottra 1506nt onim novembor ottra 1626nt somplem. Utranim vornnunk osady oschem vastukola ddisoin kel'lem ddonatto bramtte, moikol onjelo,karlo moddorno onim giyon lorenzo bornini hannim. Bitorlea mapa pormannem hi somsarantlea igorzam poiki voddli igorz zaunasa.

Sam pedruchi nirjivo kudd nikepil'lea zagea voir veattikon besilikachi promukh oltar ubarlea. “bogsanneachi oltar” munn hea zageak namv osa. Hea igorje bitorli kola polleunko don dolle pavanant.

Panglla zolmal'lea, bollie firgojent sohaik vigar zaun vaur kel'lea fa! jitexachi romant bett zali. Ittolint ittoliyon bas yenatlean jiemvchi koxttanchi gozal. Fa! jitexan oplea provahi ittoliyon uloupa dvarim omkam vanchoilem. Omkam myusiyom', sistten chapel onim besilikak bomvddaun hanchi pramukhyota vivorsili. Cholon cholon thok l'lea payank nimannem ttrevi fovarrean purasonn thamboili. Hantu chil'lor poixe uddoilear porot romak bett ditaleat mull'lli sangnni osa. Thoddo vell boson thondd jelatto (ois krim') chakon porot cholonk lagleamv.

Besilika bitor pap saibank nikepil'lea suvatek “kettakumb” munn apoitat. Thoimsor sobar chapelam osat. Dusro dis aitar zalean fa! jitexan omchea khatir eka chapela bitor khasgi mis bettoilem onim somestam khatir maglem. Veattikonantlea sam pedruchea besilika bitor mis oykomvche omchem bhag ch munnyet. Pa! jitexan hem omchem svopann y jeari kelem. Tacho omim obhar mantamv.

Romacho itihas likhunk laglear tinterantlem tint somptelem punn itihas likhun sompcho nam. Toxenchch veattikonachea konxea konxeachi sobai chakon dolle thoktele punn sobai vornnunk xobd koxant sobd unnem poddtale.

Dusrea disa bara opostolanchea igorjek bett dili. Sotravea xotomanant pop klementt ikravean hea igorjik novem rup dil'lem. Karlo fonttanan hachem inttiriyor ddisoin kel'lem. Thoinch lagim jezun chodd l'lim mettam osat onim jezuchem rogat y osa. Tea mettanim dimbier choddlear patkam bhogsatat mull'lli sangnni osa dekun hamve patkean dimbier tim mettam choddon mojea patkanchem bhogsannem maglem. Tea igorjichea ujvea boglek ek dar osa. Tem dar ponchvis vorsak ek pauttim ughoddtat. Onim hantlean bitor rig l'lo horyek monis sorgak veta mull'lli sangnni osa munn pressi bayen vivoronn dilem. Bolliechi pressi bai sumar tis vorsam thaun romant oplea kuttma songi vosti korn osa. Mojea noureachi klas mett ti zaunas l'li.

Uprant tinnem omkam jeruzolem' igorjek apoun velem. Thoim jezuk khursaitana nesoilelem vostur, khillailel'le khille onim khursar as l'lo hedd bordd y osa. Thoim thaun pressi bayen omkam sam loresachea igorjichi bett koroili. Thoimsor sam loresak baz l'li kail ozun dixttik poddta. Uprant omim dornni pondlea mettro ttyubar rigon kolossiyomak pauleamv.

Kolossiyom' somsarantlem bhovo voddlem ugtem prodorxon tholl. Hem band l'lem 80 ADnt bandpi vesposiyon ttoittos. Bumykampant ek deg kosllon podd l'li dison yeta. Hem kottvonn vorsam gel'leborinchch vevegllea gorzank upeogsitale. Eka tempar chapel zalear onyeka tempar zhuzant solvoleank voir thaun lottun ghaln sokoil vagank soddtele. Uprant thoddo temp simesrt zaun vaparli. Uprant thoddo temp ddokayitancho bonglo zaunko paulo. Otam keul ek poinnari akorxonn zaun urlam. Kolossiyom' somsarantlea novea sat vonddoram poikim ek zaunasa. Uprant omim sanjechea jeunnak ittoliyon pijzachi onim voinachi ruch chakon portaleamv pattim omchea hottelak.

Tisrea disa rigleamv peantion mull'llea onyeka zoit kottvonna bitor. Poilem hem romon diull zaunas l'lem. 609 AD uprant kotholik igorz (besilika di santta moria) zaun bodol'lem. Ittelichea sureachea davek korpal'lea omkam thoinch lagsar os l'lea fovarrean thonddai laboili. Uprant omim jezuchea igorjek (church of Gesu) pauleamv. Hi igorz band l'li 1568nt onim 1580nt bandpachem kam' somp l'lem. Tea igorjichem pemytting polleun boslear uttchenchch nakaxem dista. Thoimsor goyam thaun hadd l'lo sam fransis saveracho ujvo hat osa. Tachea khatir chch ek sobit oltar ruta kelea. Tea igorjichi vastukola vornnunk sobd unnem poddtat. Thoddo vell thoinch boson magnnem korn tea kolecho anond chaklo. Uprant romantlea prosid'd resttorenttant dolleam mukhar toyar kel'lea itteliyon peasttachi ruch chakli.

Choutea disa fo಼lorens mull'llea ittelintlea onyeka zageak pauleamv. Ho onyek ittelicho sobit gamv ketheddrolank, myusiyomank kolek prosid'd zala. Santta moria novel'la onim santta kros igorjenk bett dili. Fo಼lorens gamvachea modlean arno nom-i vallta. 1966 ayil'lea aurak fo಼lorensantlem moladik kola onim dirvem sogllem nas zal'lem onim hozarangottlean lok moronn pavo l'lo. Ur l'lea lokanim ur l'leantlem punzaun novem fo಼lorens bandlem.

Panchvea disa soitt siying bossar sogllem florens bomvleamv. Moikol onjelo guddear oslea viv pomyttar boson sogllea florensachi sobai chakli. Uprant poinn mundorun borrea borrea zageanim demvon thoincho itihas vachun ugddasak thodde fotte kaddn poinn mundorsiteleamv. Okhrek pauleamv ttoskoni guddear veglloch onubhou zoddlo. Voir guddear thaun dakachim xetam disttik poddtat. Tantun ittelicho ruchik voin toyar zata.

Sovea disa pauleamv udka voir upyemvchea venis gamvak. Hea gamvachea sobayechem vornnon korunk utram mellanant. Ho gamv 118 lhan dvipanim rupit zala. Hangasor roste unnem onim udka roste chodd osat. Eka zagea thaun onyeka zageak vochonk udka tteaksi vaportat. Ho gamv vorsak 1thaun 2 milimittor buddon yete osa. Hangacho zonosonkho unno zayit't yete osa. Geletea pon'nas vorsam thaun 120,000 thaun 60,000 k deula. Tori hangasor yemvchea poinnareancho sonkho unno zaunko nam. Ho gamv ozun somsarantlea sobit gamva poikim ek zaunasa.

Satvea disa omim udka tteaksi dorn don dvip bomvleamv. “murano” mull'llea dvipant glasachi fo಼ekttori osa. Thoimsor glas toyar zatana l'labcho onbog veglloch. Thoinchea dukhananim osche glasant toyar kel'le vostu polleytana. Sogllem molak gheveaxem bhogta.

Uprant pauleamv “burano” mull'llea dvipak. Thoinchi rongin ghoram polleun keamora bond korchoch naka munn bhoglem. Thoinchea lokak ghorchea bair dusro pointt kaddunk onumoti nam kom-i. Kiteak mullear hea rongin ghorank lagon'nch most poinnari tea dvipak poinn kortat. Thoincho lok dubllo. Tanchi pez poinnarream thaun ch xijta.

Ottvo onim novo dis venisachem onvexonn korcheant somplo. Venisantlea omchea hottelachea mullant ch oslem pijzachem dukan. “ttorttuga 2.0” edoll poreant khelea pijza pras hachi ruch vingodd zaunas l'li. Buk laganatleari don kuddke pijza ghoddye bitor potta bitor liptalo. Omkam pois resttorentta sodun vochazoi mull'lli gorz ch poddonkna.

Romant mett dourunk osady zal'leank tumkam hamve pinturam dvarim rom' dakomvchem proiton kelam. Sady tor tumim jivitant ek pauttim romachi bett korizoi. Thoinchea kolecho tumchea dolleanim tumim anond gheunko zai. Mojim pinturam khonddit zaun tea xrextt kolek nyai diunko sokanant.

Dolle dampun ugte korchea bitor omchi dha disanchi roza mugdal'li onim marko polo er porttant omchem viman omkam gheun pattim ubonk rakon oslem.

- Monica DSa Mathais, Dublin (June, 2023)