|
ಎಚ್ಚೆಮಾಚ್ಯಾ
ದುಸ್ರ್ಯಾ ಮಟ್ವ್ಯಾ ಕಾಣಿಯಾಂಚ್ಯಾ ಜಮ್ಯಾಕ್ ’ಬೀಗ್ ಆನಿ
ಬಿಗಾತ್’ 2018 ಇಸ್ವೆಚೊ ’ಅತ್ಯುತ್ತಮ್ ಬೂಕ್’ ಜಾವ್ನ್
ವಿಶ್ವ ಕೊಂಕಣಿ ಕೇಂದ್ರ್ ಥಾವ್ನ್ ’ವಿಮಲಾ ವಿ. ಪೈ.’
ಪುರಸ್ಕಾರ್ ಲಾಭ್ಲಾ. ಕಿಟಾಳ್.ಕೊಮ್ ಚೊ ಸಂಪಾದಕ್
ಜಾವ್ನಾಸ್ಚೊ ಕವಿ, ವಿಮರ್‍ಶಕ್, ಚಿಂತ್ಪಿ, ಕಾಣಿಯೆಗಾರ್
ಎಚ್ಚೆಮ್ ಪ್ರಸ್ತುತ್ ಮಂಗ್ಳುರಾಂತ್ ವಸ್ತಿ ಕರುನ್ ಆಸಾ.
ಕೊಚ್ಚಿಚೊ ನಾಮ್ಣೆಚೊ
ಕವಿ ಶರತ್‌ಚಂದ್ರ ಶೆಣಯ್ ಹಾಚ್ಯಾ ’ಇದಮ್ ನ ಮಮ’
ಕವಿತಾ ಜಮೊ ಅತ್ಯುತ್ತಮ್ ಕವಿತಾಜಮೊ ಜಾವ್ನ್ ವಿಂಚೊನ್
ಆಯ್ಲಾ.
ತಶೆಂಚ್ ವಿಶ್ವನಾಥ್ ಎಮ್ ಶೇಟ್ ಹಾಕಾ ವಿಮಲಾ ವಿ.
ಪೈ. ವಿಶ್ವ ಕೊಂಕಣಿ ಜಿಣ್ಯೆಅವ್ದೆಚೊ ಪುರಸ್ಕಾರ್ ಲಾಭ್ಲಾ.
ನವೆಂಬರ್ 18 ತಾರಿಕೆರ್
ಮಂಗ್ಳುರಾಂತ್ ಜಾಂವ್ಕ್ ಆಸ್ಚ್ಯಾ ಕಾರ್ಯಾಂತ್ ತಿನ್‌ಯೀ
ಇನಾಮಾಂಕ್ ಎಕೇಕ್ ಲಾಕ್ ರುಪಯ್ ನಗದ್ ತಶೆಂಚ್ ಮಾನ್‌ಪತ್ರ್
ದಿವುನ್ ಸನ್ಮಾನ್ ಮೆಳ್ತಲೊ.
ಎಚ್ಚೆಮ್ ಪೆರ್ನಾಲ್:
ಎಚ್ಚೆಮ್ ಮ್ಹಳ್ಳೆ ನಾಂವಾರ್ ಬರಂವ್ಚೊ ಹೆನ್ರಿ ಮೆಂಡೊನ್ಸಾ,
ಪೆರ್ನಾಲ್ ಫಿರ್ಗಜೆಚೊ. ಪತಿಣ್ ಸ್ಟೆಲ್ಲಾ ಆನಿ ಭುರ್ಗಿಂ
ರೂತ್ ಆನಿ ರಿಯಾಸವೆಂ ಮಂಗ್ಳುರಾಂತ್ ವಸ್ತಿ ಕರುನ್ ಆಸಾ.
2002 ಇಸ್ವೆಂತ್ ಹಾಚೊ ಪಯ್ಲೊ ಮಟ್ವ್ಯಾ ಕಾಣಿಯಾಂಚೊ ಜಮೊ
’ದೆವಾಕ್ ಸೊಡ್‌ಲ್ಲೊ ಪಾಡೊ’ ಪರ್‍ಗಟ್ ಜಲ್ಲೊ. 2006
ಇಸ್ವೆಂತ್ ಪರ್ಗಟ್‌ಲ್ಲ್ಯಾ ’ಬೀಗ್ ಆನಿ ಬಿಗಾತ್’ ಬುಕಾಂತ್
ಭಾರಾ ಮಟ್ವ್ಯೊ ಕಾಣಿಯೊ ಆಸಾತ್. ಮುಂಬಯ್ ಶೆರಾಂತ್ ವಸ್ತಿ
ಕರುನ್ ಆಸ್ಲೆವೆಳಾರ್ ಅನ್ಭವ್ ಕೆಲ್ಲ್ಯಾ ವಿಶ್ಯಾಂಚೆರ್
ವಿಣ್‌ಲ್ಲ್ಯೊ ಮಟ್ವ್ಯೊ ಕಾಣಿಯೊ ಹಾಂತುಂ ಆಸಾತ್.
ದಾಯ್ಜ್.ಕೊಮ್‌ಚೆರ್
ಚಲ್‌ಲ್ಲ್ಯಾ ಸಾಹಿತಿಕ್ ಸ್ಪರ್ಧ್ಯಾಂನಿ ಎಚ್ಚೆಮಾನ್ ಜೊಡ್‌ಲ್ಲಿಂ
ಇನಾಮಾಂ;
ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2005:
ಮಟ್ವಿಕಾಣಿ: ನಶಿಬಾಚಿ ರಾತ್ (ಪಯ್ಲೆಂ ಇನಾಮ್)
ಕವಿತಾ: ಮಾತ್ಯೆಚೆಂ ರುದಾನ್ (ಪಯ್ಲೆಂ ಇನಾಮ್)
ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2006:
ಕವಿತಾ: ಸುಮಂಗಳೆಚೊ ಸ್ವಗತ್ (ದುಸ್ರೆಂ ಇನಾಮ್)
ದಾಯ್ಜ್ 2006 ವರ್ಸಾಚೊ ಕವಿ
ತಿಂತೆರಾಂತ್ ಪಿಂತುರಾಂ: ಪಯ್ಲೊ ಮಯ್ನ್ಯಾಚೊ ಕವಿ
(ವಿಶಯ್: ಭುಕ್ ಆನಿ ಸೊಧ್ನಾಂ)
ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2007:
’ಬೀಗ್ ಆನಿ ಬಿಗಾತ್’ ಕಾಣಿ ’ದಾಯ್ಜ್ ಸಾಹಿತಿಕ್
ಸ್ಪರ್ಧೊ 2007’ ಚೆರ್ ಇನಾಮ್ ಜೊಡ್‌ಲ್ಲಿ ಮಟ್ವಿಕಾಣಿ.
ಹಾಚೆ ತೀನ್ ಕವಿತಾಜಮೆ; ’ಚಲ್ಯಾಂಕ್ ಚತ್ರಾಯ್
(1999) ’, ’ಕಯ್ದ್ಯಾಚ್ಯೊ ಕವಿತಾ (2004), ’ಬಾಮುಣಾಂಚೆಂ
ಚೆಡುಂ (2006)’ ಪರ್‍ಗಟ್ಲ್ಯಾತ್.
’ಆರ್‍ಸೊ’ ಪತ್ರಾಚೊ ಸ್ಥಾಪಕ್ ಸಂಪಾದಕ್ ಜಾವ್ನಾಸ್ಚೊ
ಎಚ್ಚೆಮ್ ಏಕ್ ವಿಮರ್‍ಶಕ್, ಚಿಂತ್ಪಿ ಆನಿ ಸಂವೇದನ್‌ಶೀಲ್
ತಸೊಚ್ ಪ್ರಗತಿಶೀಲ್ ಕೊಂಕಣಿ ಬರವ್ಪಿ ಜಾವ್ನಾಸಾ.
ಖಬರ್: ಆಮ್ಚೊ ಭಾತ್ಮಿ |
