[ಖಬರ್:] ಜೆರಿಮೆರಿಂತ್ ಕೊಂಕಣಿ ಕವಿತಾಸಾದರ್ ಸರ್ತ್

  ಮೆಲ್ವಿನ್ ರೊಡ್ರಿಗಸಾಚ್ಯಾ ಮುಖೇಲ್‌ಪಣಾಖಾಲ್ ಕವಿತಾ ಟ್ರಸ್ಟಾನ್ ಚಲಂವ್ಚ್ಯಾ ಕೊಂಕಣಿ ಕವಿತಾಸಾದರ್ ಸರ್ತೆಚಿ ಮುಂಬಯ್ಚಿ ತಿಸ್ರಿ ಸರ್ತ್ ಆಶಾವಾದಿ ಪ್ರಕಾಶನಾಚ್ಯಾ ಮುಖೇಲ್‌ಪಣಾಖಾಲ್, ಕೊಂಕಣ್ ತಾರಾಂ ಜೆರಿಮೆರಿ ಹಾಂಚ್ಯಾ ಸಹಯೋಗಾಖಾಲ್ ಜೆರಿಮೆರಿಚ್ಯಾ ಇಗರ್ಜೆಚ್ಯಾ ಸಭಾಸಾಲಾಂತ್ ಅಕ್ತೋಬರ್ 6 ತಾರಿಕೆಚ್ಯಾ ಆಯ್ತಾರಾ ದನ್ಪಾರಾಂ 3 ಥಾವ್ನ್ 5 ಪರ್‍ಯಾಂತ್ ಚಲ್ಲಿ.

ಕೊಂಕಣ್ ತಾರಾಂಚೊ ಮುಖೆಲಿ ಲಿಯೋ ಫೆರ್ನಾಂಡಿಸಾನ್ ಕವಿತಾಸಾದರ್ ಸರ್ತೆಚ್ಯಾ ವೊರಯ್ಣರಾಂಕ್ ತಶೆಂಚ್ ನವಿಮುಂಬಯ್ ಥಾವ್ನ್ ಸ್ಪರ್ಧಿಕಾಂಕ್ ಘೆವ್ನ್ ಆಯಿಲ್ಲ್ಯಾ ಕೊಂಕಾಣ ಸಂಘಟನಾಚ್ಯಾ ಮುಖೆಲಿಕ್ ರಿಚಾರ್ಡ್ ಡಿ’ಸೋಜಾಕ್ ಸ್ವಾಗತ್ ಕರ್ತಚ್ ಬಾಯ್ ಫ್ಲೋರಾ ಡಿ’ಸೋಜಾ ಕಲ್ಮಾಡಿಚ್ಯಾ ಮುಖೇಲ್‌ಪಣಾಖಾಲ್ ಭುರ್ಗಿಂ (15 ವರ್ಸಾಂ ಸಕಯ್ಲಿಂ) ತಶೆಂಚ್ ಯುವಜಣಾಂ (15 ಥಾವ್ನ್ 30 ಪರ್ಯಾಂತ್ಲಿ) ಅಶೆಂ ದೋನ್ ವಿಭಾಗಾಂನಿ ಕವಿತಾಸಾದರ್ ಸರ್ತ್ ಚಲವ್ನ್ ವ್ಹೆಲಿ.

ಭುರ್ಗ್ಯಾಂಚ್ಯಾ ವರ್ಗಾಂತ್ ಪಯ್ಲೆಂ ತೀನ್ ಸ್ಥಾನ್ ಆಪ್ಣಾಯಿಲ್ಲಿಂ;

ಪಯ್ಲೆಂ ಇನಾಮ್: ಸ್ವೀಡಲ್ ರೊಡ್ರಿಗಸ್ (ಕವಿತಾ: ಎಕಾ ಭಾತ್ಯಾ ತುಪೆಂ, ಕವಿ: ಬಾಬ್ ಚಾ.ಫ್ರಾ.ದೆ’ಕೋಸ್ತಾ)
ದುಸ್ರೆಂ ಇನಾಮ್: ಅಲಿಟಾ ಪಿರೇರಾ (ಕವಿತಾ: ಅಬೊಲ್ಯಾ ತುಜೊ ರಂಗ್ ಉಜೊಗೊ, ಕವಿ: ಬಾಬ್ ಚಾ.ಫ್ರಾ.ದೆ’ಕೋಸ್ತಾ)
ತಿಸ್ರೆಂ ಇನಾಮ್: ಮೆಲಿಶಾ ಡಿ’ಸೋಜಾ (ಕವಿತಾ: ದೇವ್ ಕಸೊ ದಿಸ್ತಾ, ಕವಿ: ಬಾಬ್ ಪ್ರಸನ್ನ್ ನಿಡ್ಡೋಡಿ)

ವ್ಹಡಾಂಚ್ಯಾ ವಿಭಾಗಾಂತ್

ಪಯ್ಲೆಂ ಇನಾಮ್: ಪ್ರಿನ್ಸಿಯಾ ಫೆರ್ನಾಂಡಿಸ್ (ಕವಿತಾ: ಮನ್ಶಾಚೆಂ ಮಟನ್, ಕವಿ: ಬಾಬ್ ದೀಪ್‌ರಾಜ್ ಗೊಂಯೆ)
ದುಸ್ರೆಂ ಇನಾಮ್: ಲೆವಿನ್ ಫೆರ್ನಾಂಡಿಸ್ (ಕವಿತಾ: ನ್ಹೆಸ್ ಚೆಡ್ವಾ ಆಂಗ್‌ಭರ್, ಕವಿ: ಬಾಬ್ ಲಿಯೋ ಫೆರ್ನಾಂಡಿಸ್)
ತಿಸ್ರೆಂ ಇನಾಮ್: ರೋಯ್ಡನ್ ಮಿನೇಜಸ್ (ಕವಿತಾ: ಮ್ಹಜಿ ಕೊಂಕಣಿ, ಕವಿ: ಉರ್ಜಿತಾ ಭೊಬೆ ಗೊಂಯೆ)

    ವೊರಯ್ಣಾರ್ ಬಾಯ್ ಫಿಲೋಮೆನಾ ಸಾಂಫ್ರಾನ್ಸಿಸ್ಕೊನ್ ಆಪ್ಲೆ ವಿಚಾರ್ ಪರ್ಗಟುನ್ ಭುರ್ಗ್ಯಾಂಕ್ ಉಲ್ಲಾಸ್ ಪಾಟವ್ನ್, ಕೊಂಕಣಿ ಭಾಸೆಥಂಯ್ ಭುರ್ಗ್ಯಾಂಚಿ ವೋಡ್ ಅಶಿಚ್ ಮುಕಾರುನ್ ವ್ಹರುಂಕ್ ವ್ಹಡಿಲಾಂಕ್ ಉಲೊ ದಿಲೊ. ದುಸ್ರೊ ವೊರಯ್ಣಾರ್ ವಲ್ಲಿ ಕ್ವಾಡ್ರಸಾನ್ ಇನಾಮಾಂ ಜೊಡ್ಲೆಲ್ಯಾಂಚಿಂ ನಾಂವಾಂ ವಾಚುನ್ ಸಾಂಗ್ಲಿಂ.

[ಪಯ್ಲೆಂ ತಶೆಂಚ್ ದುಸ್ರೆಂ ಇನಾಮ್ ಜೊಡ್ಲೆಲಿಂ, 2020 ಇಸ್ವೆಚ್ಯಾ ಜನೆರಾಂತ್ ಗೊಯಾಂತ್ ಚಲುಂಕ್ ಆಸ್ಚ್ಯಾ ಅಖಿಲ್ ಭಾರತೀಯ್ ಹಂತಾಚ್ಯಾ ಸ್ಪರ್ಧ್ಯಾಂತ್ ವಾಂಟೊ ಘೆತಲಿಂ]

ಕಾರ್ಯೆಂ ನಿರ್ವಾಹಣ್ ಕೆಲ್ಲ್ಯಾ ಲೀಯೊ ಫೆರ್ನಾಂಡಿಸಾನ್ ಧಿನ್ವಾಸ್ ಪಾಟಯ್ಲೆ.

- ಭಾತ್ಮಿ