(ನವೆಂಬರ್ 4, ಮರೋಲ್): ಮೆಲ್ವಿನ್ ರೊಡ್ರಿಗಸಾಚ್ಯಾ ಮುಖೇಲ್ಪಣಾಖಾಲ್
ಕವಿತಾ ಟ್ರಸ್ಟಾನ್ ’ಅಖಿಲ್ ಭಾರತೀಯ್ ಮಟ್ಟಾಚೆರ್’
ಚಲಂವ್ಚ್ಯಾ ಕೊಂಕಣಿ ಕವಿತಾಸಾದರಾಚಿ ಚವ್ತಿ ಸರ್ತಿ ನವೆಂಬರ್
4 ತಾರಿಕೆರ್, ಆಯ್ತಾರಾ ಸಕಾಳಿಂ 11:00 ಥಾವ್ನ್ 12:30 ಪರ್ಯಾಂತ್,
ಆಶಾವಾದಿ ಪ್ರಕಾಶನ್ ಆನಿ ಸಾಂ ಜುಂವಾಂವ್ ಕೊಂಕಣಿ ಸಮುದಾಯ್
(ಮರೋಲ್) ಹಾಣಿಂ ಮಾಂಡುನ್ ಹಾಡ್ಲಿ.
ವೀಜ್ ಕೊಂಕಣಿ ಪತ್ರಾಚೊ
ಸಂಪದಕ್ ಡಾ|ಆಸ್ಟಿನ್ ಡಿ’ಸೋಜ್ ಪ್ರಭು ಮುಖೆಲ್ ಸಯ್ರೊ
ಜಾವ್ನ್ ಹಾಜರ್ ಆಸ್ಲೊ.
ಸಾಂ ಜುಂವಾವ್ ಕೊಂಕಣಿ ಸಮುದಾಯಾಚೊ ಅಧ್ಯಕ್ಷ್ ಮಾನೆಸ್ತ್
ಆಗೊಸ್ತಿನ್ ಸುವಾರಿಸ್ ಆನಿ ಮಾನೆಸ್ತಿಣ್ ಸುನಿತಾ ಸುವಾರಿಸ್
ಹಾಣಿಂ ಮಾಗ್ಣ್ಯಾಂತ್ ಸುರ್ವಾತ್ ಕರ್ತಚ್, ಮುಖೆಲ್ ಸಯ್ರೊ
ಜಾವ್ನ್ ಹಾಜರ್ ಆಸ್ಚ್ಯಾ ಡಾ| ಆಸ್ಟಿನ್ ಡಿ’ಸೋಜ್ ಪ್ರಭು
ಆನಿ ಸ್ಪರ್ಧ್ಯಾಚೆ ವೊರಯ್ಣಾರ್ ಮಾನೆಸ್ತ್ ಹಿಲರಿ
ಡಿ’ಸಿಲ್ವಾ ಆನಿ ವಲ್ಲಿ ಕ್ವಾಡ್ರಸ್ ಹಾಂಕಾಂ ಯೆವ್ಕಾರ್
ಮಾಗ್ಲೊ. ಆಮಯ್ರಾ ಕಾರ್ಡೋಜಾ ಆನಿ ಆರನ್ ಡಿ’ಸೋಜ್ ಹಾಣಿಂ
ಸ್ವಾಗತ್ ಗೀತ್ ಗಾಯ್ಲೆಂ. ಕವಿತಾಸಾದರ್ ಸ್ಪರ್ದ್ಯಾಚ್ಯೊ
ರೆಗ್ರೊ ವಲ್ಲಿ ಕ್ವಾಡ್ರಸಾನ್ ಮಟ್ವ್ಯಾನ್ ಸಾಂಗ್ತಚ್.
ಪ್ರಾಯೆನ್ ಪಂದ್ರಾ ವರ್ಸಾಂ ಸಕಯ್ಲಿಂ ತಶೆಂಚ್ ಪಂದ್ರಾ
ವರ್ಸಾಂ ವಯ್ಲ್ಯಾಂನಿ ಕವಿ ಬಾಬ್ ಮೆಲ್ವಿನ್ ರೊಡ್ರಿಗಸ್,
ಬಾಬ್ ಉದಯ್ ಮ್ಹಾಂಬ್ರೊ, ಬಾಯ್ ಸುನೇತ್ರಾ ಜೋಗ್, ಮಾ.ಬಾ.
ಜೊ. ಸಿ. ಸಿದ್ದಕಟ್ಟೆ ಆನಿ ಹೆರ್ ಕವಿಂಚ್ಯೊ ಕವಿತಾ ಸಾದರ್
ಕೆಲ್ಯೊ.
ಮಾನೆಸ್ತಿಣ್ ಸುನಿತಾ ಸುವಾರಿಸಾಚ್ಯಾ ಮುಖೇಲ್ಪಣಾಖಾಲ್ ಚಲ್ಲ್ಲ್ಯಾ
ಹ್ಯಾ ಸರ್ತೆಂತ್ ಲಗ್ಬಗ್ ಇಕ್ರಾ ಸ್ಪರ್ಧಿಕಾಂನಿ ಭಾಗ್
ಘೆತ್ಲೊ, ಆನಿ ಹ್ಯಾ ಚ್ಯಾರ್ ಸ್ಪರ್ಧಿಕಾಂಕ್, ನವೆಂಬರ್ 25
ತಾರಿಕೆರ್ ’ಆತ್ಮ ದರ್ಶನ’ ಂತ್ ಚಲುಂಕ್ ಆಸ್ಚ್ಯಾ ಫೈನಲಾಂತ್
ವಾಂಟೊ ಘೆಂವ್ಕ್ ವಿಂಚ್ಲೊ.
15 ವರ್ಸಾಂ ಸಕಯ್ಲಿಂ (ಜ್ಯೂನಿಯರ್ಸ್)
ಪಯ್ಲೆಂ ಸ್ಥಾನ್: ಪ್ರಿನ್ಸಿಯಾ ಡಿ’ಸಿಲ್ವಾ
(ಕವಿತಾ: ಕಿತೆಂಚ್ ದಿಸ್ಲೆಂನಾ, ಕವಿ: ಬಾಬ್
ವಲ್ಲಿ ಕ್ವಾಡ್ರಸ್)
ದುಸ್ರೆಂ ಸ್ಥಾನ್: ಸಿಯೋನಾ ಸಾರಂಗಪಾಣಿ (ಕವಿತಾ:
ಸುತ್, ಕವಿ: ಬಾಬ್ ವಲ್ಲಿ ಕ್ವಾಡ್ರಸ್)
ತಿಸ್ರೆಂ ಸ್ಥಾನ್: ಆರೊನ್ ಡಿ’ಸಿಲ್ವಾ (ಕವಿತಾ:
ಕಸ್ಲೊಚ್ ಸಂಬಂಧ್ ನಾ, ಕವಿ: ಬಾಬ್ ವಲ್ಲಿ
ಕ್ವಾಡ್ರಸ್)
15 ವರ್ಸಾಂ ವಯ್ಲಿಂ (ಸೀನಿಯರ್)
ಪಯ್ಲೆಂ ಸ್ಥಾನ್: ಇವಾನಿಕಾ ಪಿಂಟೊ (ಕವಿತಾ:
ಕಸ್ಲೊಚ್ ಸಂಬಂಧ್ ನಾ, ಕವಿ: ಬಾಬ್ ವಲ್ಲಿ
ಕ್ವಾಡ್ರಸ್)
ಮುಖೆಲ್ ಸಯ್ರೊ ಜಾವ್ನ್ ಹಾಜರ್ ಆಸ್ಲ್ಲ್ಯಾ ಡಾ|ಆಸ್ಟಿನ್
ಡಿ’ಸೋಜಾ ಪ್ರಭುನ್ ಆಪ್ಲ್ಯಾ ಉಲವ್ಪಾಂತ್, ಆಜ್ಕಾಲ್ ಮಾಂಯ್ಗಾಂವಾಂತ್
ಸಯ್ತ್ ಕೊಂಕಣಿ ಭಾಸ್ ಉಲಂವ್ಕ್ ನರ್ಗತೆಲ್ಯಾಂಕ್ ಮುಂಬಯ್
ತಸಲ್ಯಾ ಶೆರಾಂತ್ ಭುರ್ಗಿಂ ಇತ್ಲೆ ಸುಡಾಳ್ ರಿತಿನ್ ಕೊಂಕಣಿ
ಕವಿತಾಸಾದರ್ ಕರ್ಚೆಂ ಪಳೆವ್ನ್ ಹಾಂವ್ ವಿಜ್ಮಿತ್ ಪಾವ್ಲೊಂ.
ತ್ಯೇ ಪಾಸತ್ ವಾವ್ರ್ ಕರ್ಚ್ಯಾ ಸಮೇಸ್ತ್ ಕೊಂಕಣಿ
ಸಂಘಟನಾಂಕ್ ತಶೆಂಚ್ ಲೊಕಾಕ್ ಉಲ್ಲಾಸ್ ಫಾವೊ ಮ್ಹಣಾಲೊ. ಆಜ್ಕಾಲ್
ಕೊಂಕಣಿ ಭಾಸ್ ಆಳ್ವೊನ್ ವೆಚೆವಿಶಿಂ ಆಯ್ಕೊಂಕ್ ಮೆಳ್ತಾನಾ
ಮುಂಬಯ್ ತಸಲ್ಯಾ ಶೆರಾಂತ್ ಹಿ ಕೊಂಕಣಿ ವೋಡ್ ಕೊಂಕಣಿಕ್
ತ್ರಾಣ್ ದೀಂವ್ಕ್ ಸಕ್ಚೆತಸಲಿ ಮ್ಹಣಾಲೊ.
ನವೆಂಬರ್ 25 ತಾರಿಕೆರ್ ಸಕಾಳಿಂ 10 ವೊರಾಂಚೆರ್
’ಆತ್ಮದರ್ಶನ’ ಂತ್ ಫೈನಲ್ಸ್ ಚಲ್ತಲೆಂ. ತಾಂತುಂ ಜಿಕೊನ್
ಆಯಿಲ್ಲ್ಯಾಂಕ್ 2019 ಜನೆರ್ 13 ವೆರ್ ಮಂಗ್ಳುರಾಂತ್
ಚಲುಂಕ್ ಆಸ್ಚ್ಯಾ ಅಖಿಲ್ ಭಾರತೀಯ್ ಮಟ್ಟಾರ್ ವಾಂಟೊ
ಘೆಂವ್ಕ್ ಆವ್ಕಾಸ್ ಲಾಭ್ತಲೊ.
ಮಾನೆಸ್ತಿಣ್ ಹಿಲ್ಡಾ ಪಿಂಟೊನ್ ಉಪ್ಕಾರ್ ಆಟವ್ಣೆಂತ್
ಸಮೇಸ್ತಾಂಚೊ ಉಪ್ಕಾರ್ ಬಾವುಡ್ಲೊ. ಏಕ್ ಆಂಗ್ಲೊ ಇಂಡಿಯನ್
ಜಾಲ್ಲ್ಯಾನ್ ಅಪ್ಣಾಕ್ ಕೊಂಕಣಿ ಭಾಸ್ ಸಾರ್ಕಿ ಉಲಂವ್ಕ್
ಅಪ್ಣಾಕ್ ಯೇನಾ ತರ್ಯೀ ಅಪ್ಣಾಕ್ ಕೊಂಕಣಿ ಭಾಶೆಚೆರ್
ಅಭಿಮಾನ್ ಆಸಾ ಮ್ಹಣ್ಚೊ ಮಾನೆಸ್ತ್ ಡೆನಿಸ್ ಡಿ’ಸಿಲ್ವಾನ್
ಸಂಗೀತ್ ವಾಜಂತ್ರ್ ವಾಜವ್ನ್ ಭುರ್ಗ್ಯಾಂಕ್ ಉತ್ತೇಜನ್ ದಿಲೆಂ.
ಮಾನೆಸ್ತ್ ಓಲಿಸ್ ಲೋಬೊ ಆನಿ ಮಾನೆಸ್ತಿಣ್ ವಾಯ್ಲೆಟ್
ಲೋಬೊನ್ ಅಪುರ್ಭಾಯೆನ್ ಹೆಂ ಕಾರ್ಯೆಂ ಸಾಂಭಾಳ್ಳೆಂ.
ಮಾಗ್ಣ್ಯಾ ಗೀತಾಂತ್ ಹಿ ಸರ್ತ್ ಅಖೇರ್ ಜಾಲಿ.
ಭಾತ್ಮಿ: ಆಮ್ಚೊ ಭಾತ್ಮಿ |