|
Borounk Vell kaddunk zai :
Willy Goes
Ponnje : Devan soglleank eksarko vell dila,
tacho boro upiog korun borovpiamni borovpak vell
kaddunk zai ani ‘time management’ xikonk zai,
oxe udgar mhalgoddo borovpi Willy Goes hannem
kaddle. To Dalgado Konknni Akademin kadombori
borovpachie kar’yaxallechea ugtavonn suvalleak
Mukhel Soiro mhonn uloitalo. Tache borabor
Sahitya akademi puroskar zoitivont N. Shivdas
DKA-cho Odheokx Tomazinho Cardozo, Chittnis
Vincy Quadros ani Bhanddari Celso Fernandes
machier asle. Hi kar’yaxalla 23 ani 24 Mars 2019
hea don disant Sant Juze Vaz Novsornniechem
Kendr, Cruz de Milage vosreant Old Goa zali.
Willyn mukhar sanglem, apnnem jednam kadombori
borounk survat keli tednam apnnakui borioch
oddchonni ailolio kiteak aichie bhoxen tednam
kar’yaxalla sarkio souloti naslio. Konn
chhaptolo, konn vachtolo oxie duvidhent astanam
Bonaventure D’ Pietro hachea sol’lea velean
Dalgado Konknni Akademin apli kadombori chhapli.
Kadombori hem bhaxechem ek girest ang dekun
fuddlea sov mhoineant 10 tori kadombori nirmann
zavpachi tannem ast ballgili.
Poilea sotrant N. shivdasan margdorxon kelem ani
aplo onnbhov sangun kadomborichim borinch angam
hajir asloleam mukhar manddlim. Poilem sotr
somple uprant ugti bhasabhas zali tantunt
sogllea borovpiamni kadombori vixim aple vichear
manddle ani vachpi toyar korpacher chodd bhor
diunk DKA-k vinonti keli.
Dusrea disa mhalgoddo kadomborikar Bonaventure
D’ Pietro zannem sumar 15 kadombori boroileat
tannem margdorxon kelem. Hajir asloleamni tache
koddem sonvad sadlo ani apnnache prosn tache
mukhar manddle. Tannem aplo onnbhov sanglo ani
bore bhasabhaxent kadombori koxi fulon yeta tem
tannem suttavem korun sanglem.
DKA-cho odheokx Tomazinho Cardozon aple onnbhov
sangtanam apunnui kadombori borovpak sodtam
mhonn sanglem ani fuddlea sov mhoineant panch
tori kadombori DKA-n chhapunk mellchio mhonn ast
ballgili. Jerry Jenkins hea Inglez
kadomborikache vichear Chittnis Vincy Quadrosan
hajir asloleank dile. To mhunntta, kadombori
borounk poilim vichear (vixoi) toyar korunk zai,
magir ek nokaso vo ‘outline’ borounk zai. Mukhel
patr adinch yeuzop chodd gorjechem. Te uprant
aplie manddavollicher sodvaur korunk zai.
Borovpiak kitem sangonk zai hem tharaunk zai.
Vachpiachem mon vollkhun mukhel patranchio
oddi-oddchonni sodun kaddunk zai ani ek ‘climax’
toyar korunk zai. Nim’nnem, vachpi khuxal zatolo
hachi borovpian zotnai gheunk zai.
Hie kar’yaxallent Daniel F. de Souza, Michelle
Coutinho, Anthony Menezes, William Fernandes,
Selza Lopes, Sonia Gomes, Sara M Braganza, Irene
Cardozo, Victoria de. Souza, Afonso Braganza,
Willy Goes, Menino Mario Araujo, Paiety M
D’Costa, Mathew D’Costa, Savio Pinto, Menino
Almeida, Vassalo Carvalho, Dr. Anselmo Fernandes,
Alvaro Gomes, Jerome Succor Alphonso, Filomena
Quadros, Joyce Fernandes, Pio Esteves, Celso
Fernandes, Tomazinho Cardozo ani Vincy Quadros
hea borovpiamni vantto ghetlo.
Nim’anne kodden hajir asloleank promannpotram
bhettoilim ani Bhanddari Celso Fernandesan
soglleanche upkar mandle.
- Vincy Quadros |
