Bhas borounk zai tednanch
ti girest zata : Fr. Alfred Vaz
Ponnje : Dor ek bhas borounk zai tednanch ti
girest zata ani tantuntuch tichem vhoddponn asa
oxem mot Se Cathedral Firgojecho Padr Vigar ani
Konknni Borovpi Fr. Alfred Vaz hannem ugtailem.
To Dalgado Konknni Akademin (DKA) ghoddoun
haddlolea ‘Utrak-Utram’ hea pustok
uzvaddavnniechea dobajeak Mukhel Soiro mhonn
uloitalo. Tache borabor pustokacho Borovpi
Michael Fernandes, Sompadok Vincy Quadros,
DKA-cho Odheokx Tomazinho Cardozo ani Bhanddari
Celso Fernandes machier hajir asle. Ho dobazo 24
Febrer 2019 disa Art & Culture Khateachea
Multipurpose Hall-ant Ponnje zalo.
Fr. Alfredan mukhar sanglem, amchie bhaxent
veg-veglle prokar asat. Hem ‘Utrak-Utram’ pustok
amchea borovpiak faideachem thartolem aplea
borpant tannim veg-vegllim utram vaprunk. Hem
pustok borovpiankuch nhoi tor ulovpiankui girest
korotolem oso tannem aunddo ballgilo ani hea
borea vaura khatir Michael Fernandes ani Vincy
Quadros hankam porbim bhettoilim.
Je lok songita sarkea dusrea prokarant bhaxecho
upiog kortat tancheai vaurachi dokhol gheunk Fr.
Alfredan DKA-k vinonti keli ani Chrisperry-chi
dekh diun sanglem ki tannem mogachim upatt gitam
rochlim, him gitam khorem mhollear mogachio
kovita asat. Tannem gitam vorvim mogak
sorginchea rajyant pavoilo toso aichea
borovpiamni mogachea kovitancho anikui kholayen
obheas korunk ulo marlo.
Tachea motan amchi bhaxen anik dorzo yeunk zai.
kiteak jea borovpiamni ti sambhall’lli te xikonk
nasle. Atam bhurgim xiktat tannim aplo obheas
herui vachpiam meren pavounk ani bhas girest
korunk tannem tornatteank ulo marlo ani tankam
nett diunk zai mhonn sanglem.
Hea vellar ‘Utrak-Utram’ pustokacho borovpi
Michael Ferandes ani Sompadok Vincy Quadros
hannim aple vichear manddle. DKA-cho odheokx
Tomazinho Cardozo hannem yeukar dilo zalear
Bhanddari Celso Fernandes hannem soglleanchem
upkar mandle. DKA-chi Vavurpi Somitichi Vangddi
Sonia Gomes hinnem Mukhel Soireachi vollokh
korun dili zalear dusri vangddi Selza Lopes
hinnem sutrsonchealon kelem.
Raxttrgit mhunnon dobazo somplo.
- Vincy Quadros |