DKA-che Dalgado Puroskar 2018 bhettoile
Ponnje : Jednam Bhag. Pap Saib Joao Paul
Dusro Gõyant ailo tednam taka Romi lipint boroun
dilolem tem tannem rokddench vachlem ani oxem
udgarlo, “Sonvsarachea sogllea bhasanchea lipim
poros Romi lipint vachunk ekdom' sompem. Amcho
adlo Patriark saib Dom Jose Alvernazak Dokxinn
Indiechie bhaxent don utram ulounchim poddlim
tednam taka Romi lipichea adharan ulounk sompem
zalem. Dekun Romi lipi sambhallunk zai oso ulo
Pilar Songit Akademicho Director, Fr. Peter
Cardozo hannem marlo. Dalgado Konknni Akademin (DKA)
ghoddoun haddlolea Dalgado Puroskar 2018
bhettvonn suvalleak Mukhel Soiro mhunn to hajir
aslo. Tache borabor DKA-cho Odheokx Tomazinho
Carodozo, Up-odheokx Fr. Conceicai D’Silva,
Chittnis Vincy Quadros, Bhanddari Celso
Fernandes ani satui puroskar zoitivont hajir
asle.
Fr. Peteran mukhar sanglem ki amchem Gõy
sobit, zhaddamni, maddamni surngailolem Gõy.
Jednam Gõycho Saib Bhagevont Francis Xavier
Mandovi nodichie deger pavlo tednam tannem
mhunnlem, “Sobit Gõy – Coisa para ver.” Zaite
amche Gõykar bhav-bhoinni Konknni uloitat ani
boroitat tem polleun zaitea Konknni mogiank
khuxalkai bhogta. Amche mande, dulpodam, tiatr,
kantaram ani Konknni gitam zaun asat amchea
Gõychi sonskrutayechi girestkai. Ami Gõykaramni
amchea ghoramni zata titli konknni bhas ulounk
ani borounk proyotn korunk zai. Oxem kelearuch
amchi Konknni bhas jivi urtoli mhunn tannem
sanglem. Tiatr boroinnarachim ani Kristi
sevadhormik kendrachi ani zaitim masikam
nemallim uzvaddaitat tanchi tannem tokhnnai keli.
DKA sthapon korpiancho ul’lekh korun Romi
lipintli Konknni sambhallun ekdom faideachem
zalam ani Romi lipint boroit zalear
sonvsarantlea khuincheai vachpiak vachunk sompem
zata oxem tannem mhunnlem.
Tacheach hatantlean Dalgado Puroskar 2018
bhettoile te oxe : Dalgado Sahityik Puroskar -
Ashok R. Chodankar ; Dalgado Konknni Seva
Puroskar – Fr. Jose Antonio Da Costa ; Dalgado
Sonskrutik Puroksar – Fr. Santana Carvalho ;
Joel D’ Souza Daiz Puroskar – Kanta Gaude ; Fr.
Freddy J. Da Costa Potrkarita Puroskar – Anthony
Correia Pienkar ; Dalgado Sonstha Puroskar –
Konkani Kala Kendr, Merces ani Dalgado Tornatto
Puroskar – Fr. Myron Jeson Barretto. Hea sogllea
puroskar zoitivontanchie votin Ashok R.
Chodankar hannem vichear manddle ani DKA-che
upkar atthoile.
Odheokx Tomazinho Cardozon Puroskar zoitivontank
porbim dilim ani tanche vixim odik mahiti dili.
Celso Fernandes-an Mukhel Soireachi vollokh keli
zalear Vassalo Carvalho, Sonia Gomes, Mathew D’
Costa, Irene Cardozo, Afonso Branganza, Violet
D’ Souza ani Mathew De Souza hannim manpotram
vachlim.
Up-odheokx Fr. Conceicao D’ Silvan yeukar dilo
zalear Chittnis Vincy Quadros-an soglleanche
upkar mandle. DKA Somiti Vangddi Selza Lopes-an
sutrsonchealon kelem. Survatek Johny B Gud
hachea sangata Violet D’ Souza, Jennifer D’
Souza ani Cipriano D’ Souza hannim sonskrutik
karyavollint vantto ghetlo.
Bhatmi: Vinsi Kvaddros |