Kuddchoddem : Konknni mollavelo udeto borovpi
ani ‘Amcho Avaz’ satallean ‘Fulto Sahityik
Puroskar bhettoilolo Edvin Fernandes tumche
mukhar gheun yeta aplo poiloch kovitam jhelo
‘Novi Dixa’. Hea pustokacho uzvaddavnnie dobazo
16 Setembr 2018 disa sanje 4 vorancher
Kuddchoddechea Xelvona ganvant Fatima
Saibinnichea Kopelachea vosreant zatolo. Hea
dobajeak Mukhel Soiro mhunn Kuddchoddechie
Guardian Angel Firgojecho Padr Vigar Fr. Vital
Miranda hajir astolo. Tache borabor Dalgado
Konknni Akademicho Odheokx Tomazinho Cardozo ani
Chittnis Vincy Quadros hajir astole. Hem pustok
Dalgado Konknni Akademichie 'Kombri Yeuzonn'-e
khala chhaplam.
Borovpiachi thoddi vollokh :
Edvin Fernandes halinchea kallavelo udeto ani
umedi borovpi. Kuddchoddechea Xelvona ganvchea
Milagres & Sorg. Minguelina Fernandes hea
zoddpiacho to put, Basilya Travasso-cho ghorkar
zalear Mylee Fernandes-acho bapui.
Podvi meren xiklolea Edvinan 2004 vorsak sorkari
vachopghorant nokri dhorli ani vingodd vingodd
prokarchim pustokam vachpachi taka sond mell’lli.
Sabar vorsam thaun to veg-vegllea nemalleamni
boroita, tantuntlim kaim nemallim oxim asat :
Jivit, Uzvadd, Zaag, Vauraddeancho Ixtt, Gulab,
Bimb, Bhangar Bhuim, Rakhnno Boddvo, Amcho Avaz,
Konnkan Divo, Fuddari, Gõycho Pormoll ani her.
38 vorsam pirayecho Edvin, borovpa xivai aplea
suvadik tallean kazarank saudichim kantaram
gaita, vaddea velea Fatima Saibinnichea Kopelak
apli seva dita, kednaim karnavalachea khelleamni
bhumika korta, porikxok mhunn vaur polleta ani
veg-vegllea prokaranchea karyavollinche
sutrsonchealon korta. Tannem 30 voir nattkulim
boroun veg-vegllea somoyar machier haddleant hi
ek dokhol ghevpa sarki gozal. He xivai tannem
2018 vorsa karnavalak svota khell-tiatr boroilo.
Edvin Fernandesachi umed ani sahityik kollaxi
polleun ‘Amcho Avaz’ satallean 2016 vorsacho
‘Fulto Sahityik Puroskar’ diun tacho bhouman
kela
Bhatmi: Vinsi Kvaddros |