![]() |
|
ಸಂಪಾದಕೀಯ್
- 18.
ಮಿಸಾಂವ್,
ತೆಸಾಂವ್, ಪಾಶಾಂವ್, ಮ್ಹಳ್ಳೆಂ ತೆಂತೆಸಾಂವ್ |
|
ಆಮ್ಚಾ ಭಾಗೆವಂತ್ ಕ್ರಿಸ್ತಾಂವ್
ಸಮಾಜೆಚ್ಯಾ ಲೊಕಾಂಕ್ ಮಾತಾಳ್ಯಾಚೆರ್ ದಿಸ್ಚ್ಯಾ ಸಭ್ದಾಂಚೆರ್ ಕಿತ್ಲಿ
ಜಾಣ್ವಾಯ್ ಆಸಾ ಪಳೆಯಾತ್;
ಮಿಸಾಂವ್ ಮ್ಹಳ್ಯಾರ್ ವರ್ಸಾನ್ ವರಸ್ ಇಗರ್ಜೆಥಾವ್ನ್ ಮೆಳ್ಚೊ ಏಕ್
ಕಂರ್ಡೊ ಆನಿ ತ್ಯಾ ಕಂರ್ಡ್ಯಾಂತ್ ತವಳ್ ತವಳ್ ನಾಣಿಂ ಜಮೊ ಕರುನ್ ಎಕಾ
ನಮ್ಯಾರ್ಲೆಲ್ಯಾ ದಿಸಾ ತೊ ನಾಣ್ಯಾಂನಿ ಭರ್‌ಲ್ಲೊ ಕಂರ್ಡೊ ವರುನ್
ಇಗರ್ಜೆಕ್ ಪಾಂವಂವ್ಚೊ ಆನಿ ಅಶೆಂ ಎಕೆಕಾ ಘರಾಥಾವ್ನ್ ಆಯಿಲ್ಲೆ
ಕಂರ್ಡೆಂ ಉಗ್ತೆ ಕರುನ್ ತಾಂತ್ಲಿಂ ನಾಣಿಂ ಜಮವ್ನ್ ಏಕ್ ಐವಜ್ ಕರುನ್
ತಿ ಇಗರ್ಜ್ ದಿಯೆಸೆಜಿಕ್ ಧಾಡ್ತಾ ಆನಿ ಉಪ್ರಾಂತ್ ಕಿತೆಂ ಜಾತಾ
ಮ್ಹಳ್ಳೆಂ ಚಿಂತ್ಚೆಂನಾಕಾ ತೆಂ ಪಾತಕ್.
ತೆಸಾಂವ್ ಮ್ಹಳ್ಯಾರ್ ಕರೆಜ್ಮಾವೆಳಾರ್ ಇಗರ್ಜೆಚ್ಯಾ ವಣದಿಂನಿ
ಉಮ್ಕಳಾಯಿಲ್ಲ್ಯಾ ಚೊವ್ದಾ ಪಾಯ್ನಲಾಂಮುಕಾರ್ ಆಮಿ ಕರ್ಚೊ ಭಕ್ತೆಚೊ
ಡೋಂಗ್.
ಪಾಶಾಂವ್ ಮ್ಹಳ್ಯಾರ್ ಕರೆಜ್ಮಾಚ್ಯಾ ಕಾಳಾರ್ ಹರ್ಯೆಕಾ
ಕ್ರಿಸ್ತಾಂವಾನ್ ಕಡ್ಡಾಯ್ ಜಾವ್ನ್ ಕರುಂಕ್ ಜಾಯ್ ಆಸ್ಚೊ ಅನ್ಯೇಕ್
ಡೋಂಗ್; ಖಾಡ್ ವ್ಹಾಡಂವ್ಚೊ, ಮಾಸ್-ಮಾಸ್ಳಿ ಖಾಯ್ನಾಸ್ತಾಂ ರಾಂವ್ಚೊ..
ಹಾಚ್ಯಾಕೀ ಚಡ್ತಿಕ್ ಆಮ್ಚ್ಯಾ ಚಡ್ತಾವಾಂಚ್ಯಾ ಕಟ್ಟ್ಯಾಂತ್ ಕಿತೆಂಯ್
ಆಸಾ ಮ್ಹಣುನ್ ಸಾಂಗ್ಚೆಂ ಧಯ್ರ್ ಮ್ಹಾಕಾ ತರ್‌ಯೀ ನಾ.
ಹೆಂ ತೆಂತೆಸಾಂವ್ ನ್ಹಯ್ ತರ್ ಆನಿ ಕಿತೆಂ? ಜಿವಿತ್ ಮ್ಹಳ್ಯಾರ್
ಆಮ್ಕಾಂ ಕಳಿತ್ ಆಸ್ಚೆಂ ಇತ್ಲೆಂಚ್; ಖಾಂವ್ಚೆಂ, ನಿದ್ಚೆಂ ಆನಿ
ಹಾಗ್ಚೆಂ, ಕಾಂಯ್ ಇಲ್ಲೊ ವೇಳ್ ಮೆಳ್ಳ್ಯಾರ್ ಹೆರಾಂಚ್ಯೊ ಚುಕಿ/ಗುನ್ಯಾಂವ್/ಅಪ್ರಾದೆವಿಶಿಂ
ಉಲಂವ್ಕ್ ಜೀಬ್ ವಾರ್‍ಯಾರ್ ಘಾಲ್ಚಿ. ಆಮ್ಚಿ ಶಿಕ್ಪಾಚಿ, ಆಮ್ಚ್ಯಾ
ಸಮ್ಜಣೆಚಿ ಪರಿಧಿಚ್ ಹಿ; ಆಮ್ಚಿ ನದರ್ ಆಮ್ಚೆಚ್ ತಳ್ಹಾತ್ ಉತ್ರೊನ್
ವಚುಂಕ್ ಸಕಾನಾಸ್ಚಿ. ಆನಿ ತ್ಯಾ ಜೆಂವ್ಚ್ಯಾ/ನಿದ್ಚ್ಯಾ/ಹಾಗ್ಚ್ಯಾ
ಕರ್ನೆಭಾಯ್ರ್ ಕಿತೆಂಯ್ ಜಾತಾ ತರ್ ತೆಂ ಫಕತ್ ವೊಮ್ತೆಂ ಪಡ್ಚೆಂ; ಎಕ್‌ಚ್
ಆಲ್ತಾರ್/ಇಮಾಜೆಸಮೊರ್ ವಾ ಆಪಾಪ್ಲ್ಯಾ ಘರಾಂನಿ. ಆನಿ ಹ್ಯಾ ಸಂಸಾರಾಕ್
ಆಮಿ ಆಯಿಲ್ಲ್ಯಾಂವ್ ಹೆಚ್ಚ್ ಖಾತಿರ್ ಮ್ಹಳ್ಳೆಂ ಚಿಂತಪ್ ವೆಗ್ಳೆಂ.
ದೆಕುನ್ ಹ್ಯಾ ಸಂಸಾರಾಂತ್ ಆಮಿ ಆಯಿಲ್ಲ್ಯಾ ಶೆವೊಟಾಚಿ ಮಾಪ್ಣಿ
ಜಾಂವ್ಚಿ ಆಮಿ ಕಿತ್ಲಿಂ ಭುರ್ಗಿಂ ಕೆಲ್ಯಾಂತ್ ಮ್ಹಳ್ಳ್ಯಾಚೆರ್. ಆನಿ
ಹೆಚ್ಚ್ ಚಿಂತ್ಪಾಚಿಂ ಭುರ್ಗಿಂಯೀ ಹೆಂಚ್ ಮುಖಾರುನ್ ವರ್ತೆಲಿಂ
ಮ್ಹಳ್ಳೆಂ ನಖ್ಖೆಂ.
ದೆಕುನ್ ಆಮಿ ದಿಸಾಕ್ ಆಮಿ ವೊರಾಂಗಟ್ಲೆ ಆಮೊರಿ/ತೇರ್ಸ್, ಮೀಸ್/ರಜಾರ್
ಕರ್ತಾಂವ್ ತರ್‌ಯೀ ಆಮ್ಚಿ ಆಧ್ಯಾತ್ಮಿಕ್ ಚಿಂತಪ್ ಕಸಲೆಂ? ತಾಂತುಂ
ಚಿಂತಪ್ ಆಸಾಗಿ ವಾ ಶೆಣ್ ಆಸಾ?
ಆಮಿ ಖಾಣ್/ವ್ಹಖ್ತಾಂ ಘೆತಾಂವ್ ಪುಣ್ ಆಮ್ಚ್ಯಾ ಕುಡಿಪರಿಂಚ್ ಮತಿಚಿ/ಅತ್ಮ್ಯಾಚಿ
ಭಲಾಯ್ಕಿ ಕಶಿ ಆಸಾ ಮ್ಹಣುನ್ ಚಿಂತಾಂವ್?
ಹಲೋ!.. ಹಾಂವ್ ಹಾಂಗಾ ಮಾನಸಿಕ್ ಚಿಕಿತ್ಸೆವಿಶಿಂ ಉಲಯ್ನಾ, ಆಮ್ಚ್ಯಾ
ವೈಚಾರಿಕ್ ಭಲಾಯ್ಕೆವಿಶಿಂ ಉಲಯ್ತಾಂ. ಕಿತ್ಲೆಶೆ ಆಮಿ ’ಗುಂಪುಡ್
ಗೋವಿಂದ’ ಸಂಯ್ಬಾಚೆ ನ್ಹಯ್? ಹೆಂ ಆಮ್ಕಾಂಚ್ ಕಳಿತ್ ನಾ ದೆಕುನ್ ಆಮಿ
ಪಯ್ಸಿಲ್ಯಾ ಕೊಲ್ಯಾಂನಿ ಬೊಬೊ ಘಾಲುಂಕ್ ಲಾಗ್ತಾನಾ ಹೆರ್
ಕೊಲ್ಯಾಂನಿಂಯೀ ತಾಳೆ ಮೆಳಂವ್ಚೆಪರಿಂಚ್ ಚಿಂತಾಂವ್, ಉಲಯ್ತಾಂವ್ ಆನಿ
ಪಾತ್ಯೆತಾಂವ್. ಆಮ್ಚೆಲಾಗಿಂ ವಿಚಾರ್ ಕರ್ಚಿ ಶ್ಯಾಥಿ ನಾ. ಮತ್‌ಚ್ಚ್
ಭಾಡ್ಯಾಕ್ ದಿಲ್ಯಾ (ವ ನಾ) ತರ್ ವಿಚಾರ್ ಕಶೆ ಯೆತೆಲೆ ನ್ಹಯ್?
ಥೊಡ್ಯಾ ವರ್ಸಾಧಿಂ ಹಾಂವ್ ಯುರೊಪಾಂತ್ ಕಾಮ್ ಕರುನ್ ಆಸ್ಚೆವೆಳಾರ್,
ಸಾಂಜೆರ್ ಥೊಡಿಂ ಆಪಾಪ್ಲ್ಯಾ ಘರ್ಚ್ಯಾ ಪೆಟ್ಯಾಂಕ್ ಭಂವ್ಡಾಂವ್ಕ್
ವ್ಹರ್ತಾಲಿಂ, ಆನಿ ಹರೆಕ್ಲ್ಯಾಚ್ಯಾ ಹಾತಾಂನಿ ಪ್ಲಾಸ್ಟಿಕಾಚೆ
ಗ್ಲಾವ್ಜ್ ಆಸ್ತಾಲೆ ತೆಂ ಹಾಂವ್ ಆತುರಾಯೆನ್ ಪಳೆತಾನಾ ಏಕ್ ಪಾವ್ಟಿಂ
ಎಕಾ ಪ್ರಾಯೆಸ್ತ್ ಬಾಯ್ಲೆನ್ ಆಪ್ಲ್ಯಾ ಪೆಟ್ಯಾಚೊ ಪಾಟ್ಲಾವ್ ಕೆಲೊ,
ಆನಿ ಜೆದ್ನಾಂ ತ್ಯಾ ಪೆಟ್ಯಾನ್ ಉಗ್ತ್ಯಾ ಜಾಗ್ಯಾರ್ ಹಾಗುಂಕ್ ಧರ್ಲೆಂ,
ತೆದ್ನಾಂ ತಿ ಬಾಯ್ಲ್ ಥಂಯ್ ಉಭಿ ರಾವುನ್ ಪಳೆತಾಲಿ, ಉಪ್ರಾಂತ್ ತ್ಯಾ
ಪೆಟ್ಯಾಚೊ ಗೂ ತ್ಯಾ ಗ್ಲಾವ್ಜಾಂನಿ ವಿಂಚುನ್ ಬಗ್ಲೆನ್ ದವರ್‌ಲ್ಲ್ಯಾ
ಖಚ್ರ್ಯಾಚ್ಯಾ ಡಬ್ಬ್ಯಾಂಕ್ ಘಾಲುನ್ ಗೆಲಿ. ಸ್ವೀಡನಾಂತ್ ಹೆಂ
ಸಾಮಾನ್ಯ್ ಸಂಗತ್, ಪುಣ್ ಮ್ಹಾಕಾ ವಿಶೇಸ್ ದಿಸ್ಲೆಂ. ಕಾರಣ್
ಇತ್ಲೆಂಚ್ - ಆಮಿಂ ಅಜೂನ್ ಮಾರ್ಕ್ ಬೇಸ್ಡ್ ಸಿಸ್ಟಮಾಚೆ ಗುಲಾಮ್
ಶಿವಾಯ್ ವ್ಯಾಲ್ಯು ಬೇಸ್ಡ್ ಚಿಂತ್ಪಾಚೆ ನ್ಹಯ್. (We are still
marks based system, and not
value based system)
ಆಮ್ಚ್ಯಾ ಕ್ಲಾಶಿಂನಿ ಸಯ್ತ್ ಚಡ್ ಮಾರ್ಕ್ ಮೆಳ್ಳೆಲಿಂ ಬುಧ್ವಂತ್ ಆನಿ
ಉಣೆಂ ಮಾರ್ಕ್ ಮೆಳ್ಳೆಲಿಂ ಬುದ್ದು ವಾ ದಾಡ್ಡಿಂ. ಮೆಳ್‌ಲ್ಲ್ಯಾ
ಮಾರ್ಕಾಂಚೆರ್ ಎಕಾ ವೆಕ್ತಿಚೆಂ ವೆಕ್ತಿತ್ವ್ ಮೆಜ್ಚಿ ಕಾಲೆತ್
ಆಮ್ಚ್ಯಾ ಸಮಾಜೆಚಿ ದೆಕುನ್ ಹರೆಕ್ಲ್ಯಾಕ್ ಚಡಿತ್ ಮಾರ್ಕ್ ಘೆಂವ್ಚೊ
ಶೆವೊಟ್ ಮಾತ್ರ್ ಶಿವಾಯ್ ತೆ ಮಾರ್ಕ್ ಕಶೆ ಆಪ್ಣಾಂವ್ಚೆಂ ವಾ ಶಿಕಪ್
ಮ್ಹಳ್ಯಾರ್ ಕಿತೆಂ ಮ್ಹಳ್ಳಿ ಪ್ರಜ್ನಾ ಆಸಾನಾ. ಹೆಚ್ಚ್ ಚಿಂತ್ಪಾಚೆ
ಮುಕಾರ್ ವಚುನ್ ದೊತೊರ್, ವಕೀಲ್, ಫುಡಾರಿ, ಪೊಲಿಸ್, ಜಡ್ಜ್,
ಧಾರ್ಮಿಕ್ ಮುಖೆಲಿ ಜಾತಾ. ಆನಿ ಹಾಚೊ ಪರಿಣಾಮ್ ಆಮಿ ಭಗುನ್ ಆಸಾಂವ್;
ದೊತೊರ್ ಜಾಲ್ಲೆ ಒಪರೇಶನಾಚ್ಯಾ ನಾಂವಾಂನಿ ಚೊರ್ತಾ, ವಕೀಲ್ ಆನಿ
ಜಡ್ಜ್ ಮೆಳೊನ್ ಕಾನುನಾಚೊ ಸೊಲ್ಲೊ (ಡೀಲ್) ಕರ್ತಾ, ಫುಡಾರಿ ಅಪ್ಲೊ
ದೇಸ್‌ಚ್ ವಿಖುಂಕ್ ಆಯ್ತೊ ಜಾತಾ, ಪೊಲಿಸ್ ಕಾಯ್ದ್ಯಾಚಿಂ ನಿಬಾಂ
ಘೆವ್ನ್ ಫಾರ್ತಾ ಆನಿ ಧಾರ್ಮಿಕ್ ಮುಖೆಲಿ ಭಾಂದ್ಪಾಂ ಭಾಂದುನ್
ಲೊಕಾಂಕ್ ಸೊಲ್ತಾ. ಹೆಂ ಚಲುನ್ ಆಯ್ಲಾಂ, ಚಲುನ್ ಆಸಾ ಆನಿ ಚಲುನ್
ಆಸ್ತೆಲೆಂ ಜೆದೊಳ್ ಪರ್ಯಾಂತ್ ಆಮ್ಚ್ಯಾ ಮತಿಭಿತರ್ ಶೆಣ್ ಭರುನ್
ಆಸ್ತಾ ತೆದೊಳ್ ಪರ್ಯಾಂತ್ ಚಲ್ತೆಲೆಂ ಆನಿ ಪಯ್ಲೆಂಯ್ ಹಾಂತುಂ
ಸಲ್ವಲ್ಲೊ, ಆತಾಂಯ್ ಸಲ್ವೊಂಚೊ ಆನಿ ಫುಡೆಂಯ್ ಸಲ್ವೊಂಚ್ಯಾರ್ ಆಸ್ಚೊ
ಸಾದೊ ಲೋಕ್ ಮ್ಹಳ್ಳೆಂ ಅಢೂಕ್ ಸತ್ ಆಮಿಂ ಕೆದಿಂಚ್ ಸಮ್ಜನಾಂವ್ ನ್ಹಯ್?
ಸಮಾಜೆಂತ್ ಆಮ್ಚೆಂ ವ್ಹಡ್‌ಪಣ್ ಧಾಖಂವ್ಕ್ ಆಮ್ಚಿಂ ಘರಾಂ
ರಾವ್ಳೆರಾಪರಿಂ ಸಜಯ್ತಾಂವ್, ವ್ಹಣದಿಂನಿ ರಂಗಾಳ್ ಪೇಂಯ್ಟ್
ಕಾಡಯ್ತಾಂವ್, ಘರಾಂಸಮೊರ್ ಫುಲಾಂಚಿ ಝಡಾಂ ಲಾಯ್ತಾಂವ್ ಪುಣ್ ಆಮ್ಚ್ಯಾ
ಕುಡಿಭಿತರ್ ಆಸ್ಚ್ಯಾ ಮತಿಕ್ ಕಿತ್ಲೆಂ ಖಾಣ್ ದಿತಾಂವ್? ದೆಕುನ್
ಸಮಾಜೆಂತ್ ಅಜೂನ್ ಆಮಿ ಜಮ್ಯಾರ್ ಆಸುನ್‌ಯೀ ಎಕ್ಸುರೆಚ್ ಜಾವ್ನ್
ಜಿಯೆತಾಂವ್. ಆಮ್ಚಿ ಸಮಾಜಿಕ್ ಪ್ರಜ್ನಾ ರಿತಿ ವಾ ಖಾಲಿ. ಸಮಾಜಿಕ್
ಪ್ರಜ್ನಾ ಮ್ಹಳ್ಳಿಚ್ ನಾ ತರ್ ಸಮಾಜಿಕ್ ಕಾಳ್ಜಿ ಕಶಿ ಉದೆತೆಲಿ?
ಖಂಯ್ಚ್ಯಾಯ್ ಜಾತ್/ಭಾಸೆಚೊ ಲೋಕ್ ವ್ಹಾಡ್ತಾ ಫಕತ್ತ್ ವಯ್ಚಾರಿಕ್
ವ್ಹಾಡಾವಳೆಂತ್. ದೆಕುನ್ ಆಮ್ಕಾಂ ಭಕ್ತ್ ಆಸುಂಕ್ ಜಾಯ್ ಪುಣ್ ಆಮ್ಚಿ
ಭಾಸ್, ಆಮ್ಚಿ ಸಂಸ್ಕೃತಿ, ಆಮ್ಚಿ ಕಲಾ, ಆನಿ ಪ್ರಮುಕ್ ಜಾವ್ನ್ ಆಮ್ಚೆಂ
ಸಾಹಿತ್ ಭೋವ್ ಮಹತ್ವಾಚೆಂ. ಹಾಂಗಾ ಆತಾಂ ಆಮಿ ಸಗ್ಳ್ಯಾಂನಿ ಕಾಣ್ಯೊ,
ಕವಿತಾ ಬರಂವ್ಕ್ ಸುರು ಕರ್ಚೆಂ ಮ್ಹಣ್ ಸಾಂಗ್ಚೊ ಮ್ಹಜೊ ಇರಾದೊ ನ್ಹಯ್.
ಸಾಹಿತ್ ಮ್ಹಳ್ಯಾರ್ ತಿತ್ಲೆಂಚ್ ನ್ಹಯ್, ಆಮ್ಚೆ ವಿಚಾರ್ ಕಿತ್ಲೆ
ಗುಂಡಾಯೆನ್ ಆಸಾತ್ ಮ್ಹಳ್ಳೆಂ ಪಳೆಂವ್ಚೆಂ ಪಾರ್ಕುಂಚೆಂ.
ಜೆದ್ನಾಂ ಮ್ಹಜೆಸವೆಂ ಶಿಕುನ್/ಕಾಮ್ ಕರುನ್ ಆಸ್‌ಲ್ಲೆ ತಾಂಚ್ಯಾ
ವೆವೆಗ್ಳ್ಯಾ ಶೆವೊಟಾಕ್ ಪಾವ್ತಾನಾ ಹಾಂವ್ ಸಾಹಿತ್ಯಾತೆವ್ಶಿನ್
ಚಮ್ಕಲೊಂ. ಸಂಸಾರಾಂತ್ ಜಯ್ತ್ ಮ್ಹಳ್ಯಾರ್ ’ಪುಂಜಾಯಿಲ್ಲೆಂ/ಕಮಾಯಿಲ್ಲೆಂ
ಧನ್/ದಿರ್ವೆಂ ಮಾತ್ರ್’ ಮ್ಹಣ್ ಚಿಂತ್ಚ್ಯಾ ಸಮಾಜೆಕ್ ಮ್ಹಜೊ ಶೆವೊಟ್
ಪಿಸೊ ಮ್ಹಣ್ ದಿಸತ್. ಹಾಂವ್ ತಸಲ್ಯಾಂಚೆರ್ ಭಿರ್ಮತ್ ಪಾವ್ತಾಂ ಆನಿ
ತಸಲ್ಯಾಂಚ್ಯಾ ಪಿಡೆಸ್ತ್ ಚಿಂತ್ಪಾಕ್ ಬದ್ಲುಂಕ್ ದೆವಾಲಾಗಿಂ ಮಾಗ್ತಾಂ.
ಆತಾಂ ’ದೇವ್’ ಸಬ್ಧ್ ವ್ಹಾಪಾರ್ಲೊ ದೆಕುನ್ ಹ್ಯಾ ಸಭ್ದಾಚೆಂ ಹಕ್ಕ್
(copyrights) ಆಸ್ಚೆ ಭಾಗೆವಂತ್ ವಿಜ್ಮಿತ್ ಪಾವಾನಾಕಾತ್,
ಹಾಂವ್‌ಯೀ ದೆವಾಕ್ ಮಾಂದ್ತಾಂ, ಮ್ಹಾಕಾಯ್ ಭಕ್ತ್ ಆಸಾ (ತುಮ್ಚ್ಯಾಕೀ
ಚಡಿತ್ ಆಸಾ, ಪುಣ್ ತುಮ್ಕಾಂ ನಿಘಂಟ್ ಕರುಂಕ್ ಮ್ಹಾಕಾ ನಾಕಾ). ಪುಣ್
ಹರೇಕ್ಲೆ ಆಪಾಪ್ಲೆ ಶೆವೊಟ್ ಧರುನ್ ಚಮ್ಕಲೆ ಆನಿ ಹಾಂವ್ ಮ್ಹಜ್ಯಾ
ಶೆವೊಟಾಂತ್ ಚಮ್ಕಲೊಂ. ಕೊಣ್ ಕಿತೆಂ ಕರ್ತಾ? ಕಿತ್ಯಾಕ್ ಕರ್ತಾ? ಕಿತೆಂ
ಕರಿಜಾಯ್ ಆಸ್ಲೆಂ? ಕಿತ್ಯಾಕ್ ಕರಿನಾಂತ್? ಕಶೆಂ ಕರ್ಚೆಂ? ಕೆದಾಳಾ
ಕರ್ಚೆಂ? ಹೆಂ ಸವಾಲ್ ಹೆರಾಂಕ್ ಹಾಂವ್ ಕರ್ಚೆಪ್ರಾಸ್ ಹಾಂವ್
ಮ್ಹಾಕಾಚ್ ಕರ್ತಾಂ ಆನಿ ಖಿಣಾನ್ ಸಂಸಾರ್ ಬದಲ್ಚ್ಯಾ ಪಿಶ್ಯಾ
ಚಿಂತ್ಪಾಚಿ ಸಾವ್ಳಿ ಸಯ್ತ್ ಮ್ಹಜ್ಯಾ ಮತಿಂತ್ ಮಯ್ಲಾಪಯ್ಸ್ ಸಯ್ತ್
ನಾಂ. ಪುಣ್ ಏಕ್ ಪ್ರಾಮಾಣಿಕ್ (ಮ್ಹಜ್ಯಾ ಕೊಶೆಡ್ದಾಪ್ರಕಾರ್) ಚಿಂತಪ್
ಆಸಾ, ಕೊಂಕಣಿ ಮ್ಹಜಿ ಆವಯ್‌ಭಾಸ್, ಆನಿ ಆಪ್ಲ್ಯಾ ಆವಯ್ಕ್ ಆಶ್ರಮಾಂತ್
ಲೊಟ್ಚಾ ಲೊಕಾಂಕ್ ಆವಯ್‌ಭಾಸ್ ಮ್ಹಳ್ಳೆಂ ಕಿತೆಂ ಪಡುನ್ ಗೆಲಾಂ ನ್ಹಯ್?,
ಪುಣ್ ಹಾಂವ್ ತರ್‌ಯೀ ತಸಲ್ಯಾಂಚ್ಯಾ ಪಂಗ್ತೆರ್ ಆಸುಂಕ್ ನ್ಹಜೊ,
ಹಾಂವೆಂ ಮ್ಹಜ್ಯಾ ತಾಂಕಿಚೆಂ ಕಾಂಯ್ ಚಿಲ್ಲರ್ ಕಾಮ್ ಕರುಂಕ್ ಜಾತಾ
ತರ್ ಕರ್ಚೆಂ ಮ್ಹಳ್ಳೆ ಚಿಂತ್ಪಾನ್ (ಬಜಾರಿ ಚಿಂತ್ಪಾಚ್ಯಾನಿ ಹಾಕಾ
ಪಿಶೆಂ ಮ್ಹಣ್ಯೆತ್) ಅಜೀಕ್ ಚೊವ್ದಾ ವರ್ಸಾಧಿಂ; ಮ್ಹಣ್ಜೆ 2004
ಇಸ್ವೆಂತ್, ತೆಂಯ್ ಪರ್ಕಿ ಕುವೆಯ್ಟಾಂತ್ ಸುರು ಕೆಲ್ಲೆಂ ’ಕೊಂಕಣಿ
ಅಭಿಯಾನ್ ಸಮಿತಿ’, ಆನಿ ಹ್ಯಾ ಮಿಸಾಂವಾಚೊ ಉದ್ದೇಶ್ ಫಕತ್ ಏಕ್ -
ಕೊಂಕಣಿ ವಿಸ್ತಾರುಂಚಿ. ಕೊಂಕಣಿ ಪತ್ರಾಂ, ಕೊಂಕಣಿ ಬೂಕ್, ಕೊಂಕಣಿ
ಕೊವ್ಳ್ಯೊ ವರುನ್ ಘರಾನ್ ಘರ್ ವಚುನ್ ಕೊಂಕಣಿ ಲೊಕಾಕ್ ಪಾವಂವ್ಚಿಂ.
ಪುಣ್ ಹಾಂಗಾಸರ್ ಏಕ್ ಪಯ್ಸೊ ಸಯ್ತ್ ಆಮ್ಕಾಂ ನಾಕಾ ಮ್ಹಣುನ್
ಕೊಶೆಡ್ದಾಖಾಲ್ ಸತ್ ಉಚಾರುಂಕ್ ಮ್ಹಾಕಾ ತರ್‌ಯೀ ಕಸಲಿಚ್ ಭಿರಾಂತ್
ನಾ. ಆನಿ ತ್ಯಾ ಅಭಿಯಾನಾಂತ್ ಮ್ಹಜೆಸವೆಂ ವಾವ್ರ್ ಕೆಲ್ಲೆ ಜಾಯ್ತೆ
ಪ್ರಾಮಾಣಿಕ್ ಕೊಂಕಣಿ ಸಾಂದೆ ಆಸಾತ್, ಆನಿ ಹ್ಯೇವಿಶ್ಯಾಂತ್ ತೆಚ್
ಕಾಂಯ್ ಗೊವಾಯ್ ದಿತಿತ್. 2004 ಇಸ್ವೆಂತ್ ಸುರು ಜಾಲ್ಲ್ಯಾ ಹ್ಯಾ
ಅಭಿಯಾನಾಂತ್ 2005 ಇಸ್ವೆಂತ್ ಮುಖಾರಿಲೆಂ, ಆನಿ 2005 ಇಸ್ವೆಚ್ಯಾ
ಕೊಂಕಣಿ ಅಭಿಯಾನ್ ಸಮಿತಿಚೆಂ ಉಗ್ತಾವಣ್ ಕರುಂಕ್ ಆಯಿಲ್ಲೊ ಆಮ್ಚೊ
ಕೊಂಕಣಿ ಪಾದ್ರಿ ಮಾ|ಮೆಲ್ವಿನ್ ಡಿ’ಕುನ್ಹಾ ತವಳ್ ಕುವೆಯ್ಟಾಂತ್
ಆಸ್ಲೊ, ತಾಣೆಂ ಭಾಸ್ ದಿಲಿ; ’ವಲ್ಲಿ, ಹಾಂವ್ ಸಯ್ತ್
ಕುವೆಯ್ಟಾಂತ್ಲ್ಯಾ ಹೆರ್ ಇಗರ್ಜ್/ಕೊಪೆಲಾಂನಿ ಕೊಂಕಣಿ ಮೀಸ್ ಸುರು
ಕರ್ತಲೊಂ’, ಆನಿ ವೆಗಿಂಚ್ ತಾಣೆಂ ಸಾಲ್ಮಿಯಾ, ಅಹ್ಮದಿಂತ್ ಸಯ್ತ್
ಕೊಂಕಣಿ ಮೀಸ್ ಸುರು ಕೆಲೆಂ, ಆಜ್ ಸಯ್ತ್ ಕೊಂಕಣಿ ಮಿಸಾಂಕ್ ಲೋಕ್
ಭರುನ್ ಭರುನ್ ಯೆತಾ ಮಾತ್ರ್ ನ್ಹಯ್, ಆತಾಂ ಕುವೆಯ್ಟಾಂತ್ಲೆಂ
ಮಾಲ್ಘಡೆಂ ಕೊಂಕಣಿ ಸಂಘಟನ್ ’ಕೆ.ಸಿ.ಡಬ್ಲ್ಯೂ.ಎ’ (ಕುವೇಯ್ಟ್ ಕೊಂಕಣಿ
ವೆಲ್‌ಫೇರ್ ಅಸೋಸಿಯೇಶನ್) ಹಾಣಿಂ ಕುವೆಯ್ಟಾಂತ್ ’ಕೊಂಕಣಿ ಕ್ಲಾಶಿ
ಸುರು ಕರ್ಚೆಂ ಮಿಸಾಂವ್’ ಹಾತಿಂ ಧರ್ಲಾಂ. ಹಿ ಜಾವ್ನಾಸಾ ಆಮ್ಚಿ ಆವಯ್‌ಭಾಸೆಚಿ
ಕಾಳ್ಜಿ.
ಕುವೆಯ್ಟಾಂತ್ ಹಾಂವ್ ಪಯ್ಣಾರಿ, ಆನಿ ಆತಾಂ ಮುಂಬಯಾಂತ್‌ಯೀ ಹಾಂವ್
ಪಯ್ಣಾರಿಚ್. ಪುಣ್ ಜಿವಿತ್‌ಚ್ ಏಕ್ ಪಯ್ಣ್ ಮ್ಹಣ್ತಾನಾ ಹೆಂ ಪಯ್ಣ್
ಕಾಂಯ್ ವೆಗ್ಳೆಂ ನ್ಹಯ್. ಆತಾಂ ಮುಂಬಯಾಂತ್ ಸಯ್ತ್ ಜಾಯ್ತೊ ಕೊಂಕಣಿ
ಲೋಕ್ ಆಸಾ, ಮಾಯ್‌ಭಾಸೆಚೊ ಹುಸ್ಕೊ ಆನಿ ಕಾಳ್ಜಿ ತಾಂಕಾಂ ಆಸಾ, ಆಮಿ
ಮುಂಬಯಾಂತ್ ಎಕ್ವಟಿತ್ ಜಾವ್ನ್ ಕೊಂಕಣಿ ವಾವ್ರ್ ಕರುಯೆತಾ. ಎಕ್ವಟಿತ್
ಮ್ಹಳ್ಯಾರ್ ಏಕ್ ಸಂಘಟನ್ ಮ್ಹಣ್ ಚಿಂತಿನಾಕಾತ್, ಏಕ್ ಚಿಂತಾಪ್ -
ಜ್ಯೆಂ ಭೀಂ ಆಮಿಂ ವೊಂಪ್‌ಲ್ಲೆಂ ಆಧ್ಲೆವರ್ಸಾ; ’ಕೊಂಕಣಿ
ಎಕ್ವಟ್ 2017’, ಆನಿ ಹೆಂ ಮುಕಾರುನ್ ಆಮಿ ಮುಂಬಯಾಂತ್ಲ್ಯಾ
ಕೊಂಕಣಿ ತಾಲೆಂತಾಕ್ ಮುಕಾರ್ ಹಾಡುಂಕ್ ಏಕ್ ಮೇಟ್ ಕಾಡ್ಲೆಂ ಆನಿ
ಆಟೆಪನ್ನಾಸ್ ಭುರ್ಗ್ಯಾಂನಿ ಅಖಿಲ್ ಭಾರತೀಯ್ ಕೊಂಕಣಿ ಕವಿತಾಸರ್ತೆಂತ್
ವಾಂಟೊ ಘೆತ್ಲೊ. ಆನಿ ಹ್ಯಾ ವರ್ಸಾಂ ಆಮಿ ’ಕೊಂಕಣಿ ಅಭಿಯಾನ್ ಸಮಿತಿ’
ಮುಂಬಯಾಂತ್ ಸಯ್ತ್ ಸುರು ಕರ್ಚಿಂ ಮೆಟಾಂ ಕಾಡುನ್ ಆಸಾಂವ್,
ಮುಂಬಯಾಂತ್ಲ್ಯಾ ವೆವೆಗ್ಳ್ಯಾ ವೀಸ್ ಫಿರ್ಗಜೆಚ್ಯಾ ವೀಸ್
ಉರ್ಭೆವಂತಾಂಕ್ ಆಮಿ ವಿಂಚ್ಲಾ, ಕೊಂಕಣಿಕ್ ತಾಂಚೆಮುಖಾಂತ್ರ್ ಘರಾನ್
ಘರ್ ಆಮಿ ಆಬಿಯಾನ್ ಚಲಯ್ತೆಲ್ಯಾಂವ್ ಆನಿ ಭೋವ್ ಅಭಿಮಾನಾನ್ ಆನಿ
ಗವ್ರವಾನ್ ಚಲಯ್ತೆಲ್ಯಾಂವ್.
ಆಮ್ಕಾಂ ತರ್‌ಯೀ ಆಮ್ಚ್ಯಾ ಆವಯ್‌ಭಾಸೆಚೆರ್ ಅಭಿಮಾನ್ ಆಸಾ ಆನಿ
ಆಸ್ತಲೊ. ಆನಿ ತೊ ಅಭಿಮಾನ್ ಕೊಣ್ ತಾಂತಾಂಚ್ಯಾ ಮತಿಚ್ಯಾ
ಭಲಾಯ್ಕೆಪರಿಂಚ್ ಚಿಂತುಂದಿತ್, ಆಮ್ಕಾಂ ತೆಂ ಪಡುನ್ ಗೆಲ್ಲೆಂ ನಾ,
ಪುಣ್ ಹೆಂ ಆಮ್ಚೆಂ ಮಿಸಾಂವ್ ಮ್ಹಣಾ, ತೆಸಾಂವ್ ಮ್ಹಣಾ, ಪಾಶಾಂವ್
ಮ್ಹಣಾ ವಾ ತೆಂತೆಸಾಂವ್ ಮ್ಹಣಾ, ಪುಣ್ ಆಮ್ಚೊ ಶೆವೊಟ್ ಇತ್ಲೊಚ್;
’ಕೊಂಕಣಿ ಉಲಯ್, ಕೊಂಕಣಿ ಉರಯ್,
ಕೊಂಕಣಿ ಆಮ್ಚಿ ಆವಯ್’
ದೇವ್ ಬರೆಂ ಕರುಂ,
- ವಲ್ಲಿ ಕ್ವಾಡ್ರಸ್
[ಸೆವಕ್, ಕೊಂಕಣಿ] -
ಎಪ್ರಿಲ್ 2018 |
|
|
|
|
|
|
 |
|
|
|
valleyquadros@gmail.com |
ವಲ್ಲಿ ಕ್ವಾಡ್ರಸ್: 1984 ಇಸ್ವೆ ಥಾವ್ನ್
ಕೊಂಕ್ಣೆಂತ್ ಮಟ್‌ವ್ಯೊ ಕಾಣ್ಯೊ, ಕಾದಂಬರಿ, ಕವಿತಾ,
ಲೇಖನಾಂ ಬರವ್ನ್ ಆಯಿಲ್ಲೊ, 2004 ಥಾವ್ನ್ 2011 ಮ್ಹಣಾಸರ್
ದಾಯ್ಜ್.ಕೊಮ್ ಜಾಳಿಜಾಗ್ಯಾಚೊ ಸಂಪಾದಕ್ ಜಾವ್ನ್ ವಾವ್ರ್
ಕೆಲಾ. ಕಾಣಿಕ್, ಉದೆವ್, ಆಮ್ಚೊ ಯುವಕ್ ಪತ್ರಾಚ್ಯಾ
ಸಂಪಾದಕೀಯ್ ಮಂಡಳಿಂತ್ ವಾವ್ರ್ ಕೆಲ್ಲ್ಯಾ ಹಾಣೆಂ ’ಕುವೇಯ್ಟ್‌ಗಾರಾಂಚೊ
ಝೆಲೊ ವಿಶೇಸ್ ಅಂಕೊ’, ’ದಿವೊ-ದಾಯ್ಜ್’, ’ಮಿತ್ರ್-ದಾಯ್ಜ್’,
ತಶೆಂಚ್ ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚ್ಯಾ ’ಶೆಕ್ಡ್ಯಾಚ್ಯೊ
ಮಟ್‌ವ್ಯೊ ಕಾಣ್ಯೊ’ ಬುಕಾಚೆಂ ಸಂಪಾದನ್ ಕೆಲಾಂ. ’ಮೊಳ್ಬಾವಯ್ಲಿಂ
ಸ್ವಪ್ಣಾಂ (2006)’ ಆನಿ ’ಮುಖಾಮುಖಿ
(2011)’ ಹಾಚೆ ಪರ್ಗಟ್ ಜಾಲ್ಲೆ ಸಂಪಾದಕೀಯಾಂಚೆ ದೋನ್ ಜಮೆ. |
|
संपादकीय
- १८. मिसांव, तेसांव, पाशांव, म्हळ्ळें
तेंतेसांव |
|
आमचा
भागेवंत क्रिसतांव समाजेच्या लोकांक माताळ्याचेर दिसच्या
सभदांचेर कितली जाण्वाय आसा पळेयात;
मिसांव म्हळ्यार वर्सान वरस इगर्जेथावन मेळचो एक कंर्डो आनी
त्या कंर्ड्यांत तवळ तवळ नाणीं जमो करून एका नम्यारलेल्या
दिसा तो नाण्यांनी भरल्लो कंर्डो वरून इगर्जेक पांवंवचो
आनी अशें एकेका घराथावन आयिल्ले कंर्डें उग्ते करून तांतलीं
नाणीं जमवन एक ऐवज करून ती इगर्ज दियेसेजीक धाडता आनी
उपरांत कितें जाता म्हळ्ळें चिंतचेंनाका तें पातक.
तेसांव म्हळ्यार करेज्मावेळार इगर्जेच्या वणदिंनी
उमकळायिल्ल्या चोवदा पायनलांमुकार आमी कर्चो भक्तेचो डोंग.
पाशांव म्हळ्यार करेज्माच्या काळार हऱ्येका क्रिसतांवान
कड्डाय जावन करुंक जाय आसचो अन्येक डोंग; खाड व्हाडंवचो,
मास-मासळी खायनासतां रांवचो..
हाच्याकी चडतीक आमच्या चडतावांच्या कट्ट्यांत कितेंय आसा
म्हणून सांगचें धयर म्हाका तरयी ना.
हें तेंतेसांव न्हय तर आनी कितें? जिवीत म्हळ्यार आमकां
कळीत आसचें इतलेंच; खांवचें, निदचें आनी हागचें, कांय इल्लो
वेळ मेळ्ळ्यार हेरांच्यो चुकी/गुन्यांव/अपरादेविशीं उलवंक
जीब वारयार घाल्ची. आमची शिकपाची, आमच्या समजणेची परिधीच
ही; आमची नदर आमचेच तळहात उत्रोन वचुंक सकानासची. आनी त्या
जेंवच्या/निदच्या/हागच्या कर्नेभायर कितेंय जाता तर तें
फकत वोमतें पडचें; एकच आल्तार/इमाजेसमोर वा आपापल्या
घरांनी. आनी ह्या संसाराक आमी आयिल्ल्यांव हेच्च खातीर
म्हळ्ळें चिंतप वेगळें. देकून ह्या संसारांत आमी आयिल्ल्या
शेवोटाची मापणी जांवची आमी कितलीं भुर्गीं केल्यांत
म्हळ्ळ्याचेर. आनी हेच्च चिंत्पाचीं भुर्गिंयी हेंच
मुखारून वर्तेलीं म्हळ्ळें नख्खें.
देकून आमी दिसाक आमी वोरांगटले आमोरी/तेर्स, मीस/रजार
कर्तांव तरयी आमची आध्यात्मीक चिंतप कसलें? तांतूं चिंतप
आसागी वा शेण आसा?
आमी खाण/व्हख्तां घेतांव पूण आमच्या कुडिपरिंच मतिची/अत्म्याची
भलायकी कशी आसा म्हणून चिंतांव?
हलो!.. हांव हांगा मानसीक चिकित्सेविशीं उलयना, आमच्या
वैचारीक भलायकेविशीं उलयतां. कितलेशे आमी ’गुंपूड गोविंद’
संयबाचे न्हय? हें आमकांच कळीत ना देकून आमी पयसिल्या
कोल्यांनी बोबो घालुंक लाग्ताना हेर कोल्यांनिंयी ताळे
मेळंवचेपरिंच चिंतांव, उलयतांव आनी पात्येतांव. आमचेलागीं
विचार कर्ची श्याथी ना. मतच्च भाड्याक दिल्या (व ना) तर
विचार कशे येतेले न्हय?
थोड्या वर्साधीं हांव युरोपांत काम करून आसचेवेळार, सांजेर
थोडीं आपापल्या घर्च्या पेट्यांक भंवडावंक व्हर्तालीं, आनी
हरेकल्याच्या हातांनी प्लासटिकाचे ग्लावज आसताले तें हांव
आतुरायेन पळेताना एक पावटीं एका प्रायेसत बायलेन आपल्या
पेट्याचो पाटलाव केलो, आनी जेदनां त्या पेट्यान उग्त्या
जाग्यार हागुंक धरलें, तेदनां ती बायल थंय उभी रावून
पळेताली, उपरांत त्या पेट्याचो गू त्या ग्लावजांनी विंचून
बगलेन दवरल्ल्या खचऱ्याच्या डब्ब्यांक घालून गेली.
स्वीडनांत हें सामान्य संगत, पूण म्हाका विशेस दिसलें.
कारण इतलेंच - आमीं अजून मार्क बेस्ड सिसटमाचे गुलाम शिवाय
व्याल्यू बेस्ड चिंत्पाचे न्हय.
(We are still marks based system, and not
value based system) आमच्या क्लाशिंनी सयत
चड मार्क मेळ्ळेलीं बुध्वंत आनी उणें मार्क मेळ्ळेलीं
बुद्दू वा दाड्डीं. मेळल्ल्या मार्कांचेर एका वेक्तिचें
वेक्तित्व मेजची कालेत आमच्या समाजेची देकून हरेकल्याक
चडीत मार्क घेंवचो शेवोट मात्र शिवाय ते मार्क कशे आपणांवचें
वा शिकप म्हळ्यार कितें म्हळ्ळी प्रजना आसाना. हेच्च
चिंत्पाचे मुकार वचून दोतोर, वकील, फुडारी, पोलीस, जडज,
धार्मीक मुखेली जाता. आनी हाचो परिणाम आमी भगून आसांव;
दोतोर जाल्ले ओपरेशनाच्या नांवांनी चोर्ता, वकील आनी जडज
मेळोन कानुनाचो सोल्लो (डील) कर्ता, फुडारी अपलो देसच
विखुंक आयतो जाता, पोलीस कायद्याचीं निबां घेवन फार्ता आनी
धार्मीक मुखेली भांदपां भांदून लोकांक सोल्ता. हें चलून
आयलां, चलून आसा आनी चलून आसतेलें जेदोळ पऱ्यांत आमच्या
मतिभितर शेण भरून आसता तेदोळ पऱ्यांत चल्तेलें आनी पयलेंय
हांतूं सलवल्लो, आतांय सलवोंचो आनी फुडेंय सलवोंच्यार आसचो
सादो लोक म्हळ्ळें अढूक सत आमीं केदिंच समजनांव न्हय?
समाजेंत आमचें व्हडपण धाखवंक आमचीं घरां रावळेरापरीं
सजयतांव, व्हणदिंनी रंगाळ पेंयट काडयतांव, घरांसमोर फुलांची
झडां लायतांव पूण आमच्या कुडिभितर आसच्या मतीक कितलें खाण
दितांव? देकून समाजेंत अजून आमी जम्यार आसूनयी एक्सुरेच
जावन जियेतांव. आमची समाजीक प्रजना रिती वा खाली. समाजीक
प्रजना म्हळ्ळीच ना तर समाजीक काळजी कशी उदेतेली?
खंयच्याय जात/भासेचो लोक व्हाडता फकत्त वयचारीक
व्हाडावळेंत. देकून आमकां भक्त आसुंक जाय पूण आमची भास,
आमची संसकृती, आमची कला, आनी प्रमूक जावन आमचें साहीत भोव
महत्वाचें. हांगा आतां आमी सगळ्यांनी काणयो, कविता बरवंक
सुरू कर्चें म्हण सांगचो म्हजो इरादो न्हय. साहीत म्हळ्यार
तितलेंच न्हय, आमचे विचार कितले गुंडायेन आसात म्हळ्ळें
पळेंवचें पार्कुंचें.
जेदनां म्हजेसवें शिकून/काम करून आसल्ले तांच्या वेवेगळ्या
शेवोटाक पावताना हांव साहित्यातेवशीन चमकलों. संसारांत जयत
म्हळ्यार ’पुंजायिल्लें/कमायिल्लें धन/दिर्वें मात्र’ म्हण
चिंतच्या समाजेक म्हजो शेवोट पिसो म्हण दिसत. हांव
तसल्यांचेर भिर्मत पावतां आनी तसल्यांच्या पिडेसत चिंत्पाक
बदलुंक देवालागीं माग्तां. आतां ’देव’ सब्ध व्हापारलो
देकून ह्या सभदाचें हक्क (copyrights) आसचे भागेवंत
विज्मीत पावानाकात, हांवयी देवाक मांदतां, म्हाकाय भक्त
आसा (तुमच्याकी चडीत आसा, पूण तुमकां निघंट करुंक म्हाका
नाका). पूण हरेकले आपापले शेवोट धरून चमकले आनी हांव
म्हज्या शेवोटांत चमकलों. कोण कितें कर्ता? कित्याक कर्ता?
कितें करिजाय आसलें? कित्याक करिनांत? कशें कर्चें? केदाळा
कर्चें? हें सवाल हेरांक हांव कर्चेपरास हांव म्हाकाच कर्तां
आनी खिणान संसार बदल्च्या पिश्या चिंत्पाची सावळी सयत
म्हज्या मतिंत मयलापयस सयत नां. पूण एक प्रामाणीक (म्हज्या
कोशेडदापरकार) चिंतप आसा, कोंकणी म्हजी आवयभास, आनी आपल्या
आवयक आश्रमांत लोटचा लोकांक आवयभास म्हळ्ळें कितें पडून
गेलां न्हय?, पूण हांव तरयी तसल्यांच्या पंग्तेर आसुंक
न्हजो, हांवें म्हज्या तांकिचें कांय चिल्लर काम करुंक जाता
तर कर्चें म्हळ्ळे चिंत्पान (बजारी चिंत्पाच्यानी हाका पिशें
म्हण्येत) अजीक चोवदा वर्साधीं; म्हणजे २००४ इस्वेंत, तेंय
पर्की कुवेयटांत सुरू केल्लें ’कोंकणी अभियान समिती’, आनी
ह्या मिसांवाचो उद्देश फकत एक - कोंकणी विसतारुंची. कोंकणी
पत्रां, कोंकणी बूक, कोंकणी कोवळ्यो वरून घरान घर वचून
कोंकणी लोकाक पावंवचीं. पूण हांगासर एक पयसो सयत आमकां नाका
म्हणून कोशेडदाखाल सत उचारुंक म्हाका तरयी कसलीच भिरांत
ना. आनी त्या अभियानांत म्हजेसवें वावर केल्ले जायते
प्रामाणीक कोंकणी सांदे आसात, आनी ह्येविश्यांत तेच कांय
गोवाय दितीत. २००४ इस्वेंत सुरू जाल्ल्या ह्या अभियानांत
२००५ इस्वेंत मुखारिलें, आनी २००५ इस्वेच्या कोंकणी अभियान
समितिचें उग्तावण करुंक आयिल्लो आमचो कोंकणी पाद्री
मा|मेलवीन डी’कुन्हा तवळ कुवेयटांत आसलो, ताणें भास दिली;
’वल्ली, हांव सयत कुवेयटांतल्या हेर इगर्ज/कोपेलांनी कोंकणी
मीस सुरू कर्तलों’, आनी वेगिंच ताणें साल्मिया, अह्मदिंत
सयत कोंकणी मीस सुरू केलें, आज सयत कोंकणी मिसांक लोक भरून
भरून येता मात्र न्हय, आतां कुवेयटांतलें मालघडें कोंकणी
संघटन ’के.सी.डबल्यू.ए’ (कुवेयट कोंकणी वेलफेर असोसियेशन)
हाणीं कुवेयटांत ’कोंकणी क्लाशी सुरू कर्चें मिसांव’ हातीं
धरलां. ही जावनासा आमची आवयभासेची काळजी.
कुवेयटांत हांव पयणारी, आनी आतां मुंबयांतयी हांव पयणारीच.
पूण जिवीतच एक पयण म्हणताना हें पयण कांय वेगळें न्हय. आतां
मुंबयांत सयत जायतो कोंकणी लोक आसा, मायभासेचो हुसको आनी
काळजी तांकां आसा, आमी मुंबयांत एकवटीत जावन कोंकणी वावर
करुयेता. एकवटीत म्हळ्यार एक संघटन म्हण चिंतिनाकात, एक
चिंताप - ज्यें भीं आमीं वोंपल्लें आधलेवर्सा; ’कोंकणी
एकवट २०१७’, आनी हें मुकारून आमी मुंबयांतल्या कोंकणी
तालेंताक मुकार हाडुंक एक मेट काडलें आनी आटेपन्नास
भुर्ग्यांनी अखील भारतीय कोंकणी कवितासर्तेंत वांटो घेतलो.
आनी ह्या वर्सां आमी ’कोंकणी अभियान समिती’ मुंबयांत सयत
सुरू कर्चीं मेटां काडून आसांव, मुंबयांतल्या वेवेगळ्या
वीस फिर्गजेच्या वीस उर्भेवंतांक आमी विंचला, कोंकणीक
तांचेमुखांत्र घरान घर आमी आबियान चलयतेल्यांव आनी भोव
अभिमानान आनी गवरवान चलयतेल्यांव.
आमकां तरयी आमच्या आवयभासेचेर अभिमान आसा आनी आसतलो. आनी
तो अभिमान कोण तांतांच्या मतिच्या भलायकेपरिंच चिंतुंदीत,
आमकां तें पडून गेल्लें ना, पूण हें आमचें मिसांव म्हणा,
तेसांव म्हणा, पाशांव म्हणा वा तेंतेसांव म्हणा, पूण आमचो
शेवोट इतलोच; ’कोंकणी उलय, कोंकणी उरय, कोंकणी आमची आवय’
देव बरें करूं,
- वल्ली क्वाड्रस
[सेवक, कोंकणी] - एपरील २०१८ |
| |
|
valleyquadros@gmail.com |
वल्ली क्वाड्रस: १९८४ इस्वे थावन कोंकणेंत
मटव्यो काणयो, कादंबरी, कविता, लेखनां बरवन
आयिल्लो, २००४ थावन २०११ म्हणासर दायज.कोम
जाळिजाग्याचो संपादक जावन वावर केला. काणीक,
उदेव, आमचो युवक पत्राच्या संपादकीय मंडळिंत
वावर केल्ल्या हाणें ’कुवेयटगारांचो झेलो
विशेस अंको’, ’दिवो-दायज’, ’मित्र-दायज’,
तशेंच कर्नाटक कोंकणी साहित्य अकाडेमिच्या ’शेकड्याच्यो
मटव्यो काणयो’ बुकाचें संपादन केलां. ’मोळबावयलीं
स्वपणां (२००६)’ आनी ’मुखामुखी (२०११)’
हाचे पर्गट जाल्ले संपादकीयांचे दोन जमे. |
|
Sompdoki-i
18: Misamv, Tesamv, Paxamv, Mholl'llem
Tentesamv |
|
Amcha
bhageunt kristamv somajechea lokank matalleacher
dischea sobhdancher kitli zannvai asa polleyat;
misamv mhollear vorsan voros igrjethaun mellcho
ek komrddo ani tea komrddeant toull toull nannim
zomo korun eka nomearolelea disa to nanneamni
bhorl'lo komrddo vorun igrjek pamvomvcho ani
oxem ekeka ghorathaun ayil'le komrddem ugte
korun tantlim nannim zomoun ek oivz korun ti
igrz diesejik dhaddta ani uprant kitem zata
mholl'llem chintchemnaka tem patok.
Tesamv mhollear korejmavellar igrjechea
vonndimni umkollayil'lea chouda painolam'mukar
ami korcho bhoktecho ddong.
Paxamv mhollear korejmachea kallar horyeka
kristamvan kodd'ddai zaun korunk zai ascho onyek
ddong; khadd vhaddomvcho, mas-maslli khainasotam
ramvcho..
Hacheaki choddtik amchea choddtavanchea
kott'tteant kitem-i asa mhonnun sangchem dhoir
mhaka toryi na.
Hem tentesamv nhoi tor ani kitem? jivit mhollear
amkam kollit aschem itlench; khamvchem, nidchem
ani hagchem, kaim il'lo vell mell'llear
herancheo chuki/guneamv/opradevixim ulvonk jib
varyar ghalchi. Amchi xikpachi, amchea
somzonnechi poridhich hi; amchi nodor amchech
tollhat utron vochunk sokanasochi. Ani tea
jemvchea/nidchea/hagchea kornebhair kitem-i zata
tor tem fokot vomtem poddchem; ekcho altar/imajesomor
va apaplea ghoramni. Ani hea somsarak ami
ayil'leamv hechch khatir mholl'llem chintop
vegllem. Dekun hea somsarant ami ayil'lea
xevottachi mapnni zamvchi ami kitlim bhurgim
keleant mholl'lleacher. Ani hechch chintpachim
bhurgimyi hench mukharun vortelim mholl'llem
nokhkhem.
Dekun ami disak ami vorangottole amori/ters, mis/rozar
kortamv toryi amchi adheatmik chintop koslem?
tantum chintop asagi va xenn asa?
ami khann/vhokhtam ghetamv punn amchea
kuddiporinch motichi/otmeachi bholaiki koxi asa
mhonnun chintamv?
holo!.. Hamv hanga mansik chikitsevixim uloina,
amchea voicharik bholaikevixim uloitam. Kitlexe
ami ’gumpudd govind’ somybache nhoi? hem amkanch
kollit na dekun ami poisilea koleamni bobo
ghalunk lagtana her koleamnimyi talle
mellomvcheporinch chintamv, uloitamv ani
patyetamv. Amchelagim vichar korchi xeathi na.
Motchch bhaddeak dilea (vo na) tor vichar koxe
yetele nhoi?
thoddea vorsadhim hamv yuropant kam' korun
aschevellar, sanjer thoddim apaplea ghorchea
petteank bhomvddaunk vhortalim, ani horekleachea
hatamni plasttikache glauz astale tem hamv
aturayen polletana ek pauttim eka prayesot
bailen aplea petteacho pattlavo kelo, ani jednam
tea pettean ugtea zagear hagunk dhorlem, tednam
ti bail thoim ubhi ravun polletali, uprant tea
petteacho gu tea glauzamni vinchun boglen dourl'lea
khochreachea ddobbeank ghalun geli. Sviddnant
hem samany songot, punn mhaka vixes dislem.
Karonn itlench - amim ozun mark besdd
sisttomache gulam' xivai vealyu besdd chintpache
nhoi. (We are still marks
based system, and not value based system)
amchea klaximni soit chodd mark mell'llelim
budhvont ani unnem mark mell'llelim bud'du va
dadd'ddim. Melll'lea markancher eka vektichem
vektitv mejchi kalet amchea somajechi dekun
horekleak choddit mark ghemvcho xevott matr
xivai te mark koxe apnnamvochem va xikop
mhollear kitem mholl'lli projna asana. Hechch
chintpache mukar vochun dotor, vokil, fuddari,
polis, zoddoz, dharmik mukheli zata. Ani hacho
porinnam' ami bhogun asamv; dotor zal'le
oprexonachea namvamni chorta, vokil ani zoddoz
mellon kanunacho sol'lo (ddil) korta, fuddari
oplo descho vikhunk aito zata, polis kaideachim
nibam gheun farta ani dharmik mukheli bhandpam
bhandun lokank solta. Hem cholun ailam, cholun
asa ani cholun astelem jedoll poreant amchea
motibhitor xenn bhorun asta tedoll poreant
choltelem ani poilem-i hantum soloul'lo, atam-i
solvoncho ani fuddem-i solvonchear ascho sado
lok mholl'llem oddhuk sot amim kedinch somzonamv
nhoi?
somajent amchem vhoddponn dhakhvonk amchim
ghoram raulleraporim sozoitamv, vhonndimni
rongall pemytt kaddoitamv, ghoramsomor fulanchi
zhoddam laitamv punn amchea kuddibhitor aschea
motik kitlem khann ditamv? dekun somajent ozun
ami zomear asunyi eksurech zaun jietamv. Amchi
somajik projna riti va khali. Somajik projna
mholl'llich na tor somajik kallji koxi udeteli?
khoinchyai zat/bhasecho lok vhaddta fokt't
voicharik vhaddaullent. Dekun amkam bhokt asunk
zai punn amchi bhas, amchi somsokriti, amchi
kola, ani promuk zaun amchem sahit bhovo
mohtvachem. Hanga atam ami soglleamni kannyo,
kovita borvonk suru korchem mhonn sangcho mhozo
irado nhoi. Sahit mhollear titlench nhoi, amche
vichar kitle gunddayen asat mholl'llem
pollemvchem parkunchem.
Jednam mhojesovem xikun/kam' korun asl'le
tanchea vevegllea xevottak pautana hamv
sahiteateuxin chomkolom. Somsarant zoit mhollear
’punzayil'lem/komayil'lem dhon/dirvem matr’
mhonn chintchea somajek mhozo xevott piso mhonn
disot. Hamv tosleancher bhirmot pautam ani
tosleanchea piddesot chintpak bodlunk devalagim
magtam. Atam ’devo’ sobdh vhaparolo dekun hea
sobhdachem hokk
(copyrights) asche bhageunt vijmit
pavanakat, hamvyi devak mandtam, mhakai bhokt
asa (tumcheaki choddit asa, punn tumkam nighontt
korunk mhaka naka). Punn horekole apapole xevott
dhorun chomkole ani hamv mhojea xevottant
chomkolom. Konn kitem korta? kiteak korta? kitem
korizai aslem? kiteak korinant? koxem korchem?
kedalla korchem? hem soval herank hamv
korcheporas hamv mhakach kortam ani khinnan
somsar bodlchea pixea chintpachi saulli soit
mhojea motint moilapois soit nam. Punn ek
pramannik (mhojea koxeddodaporokar) chintop asa,
konknni mhoji auybhas, ani aplea auyk axromant
lottcha lokank auybhas mholl'llem kitem poddun
gelam nhoi?, punn hamv toryi tosleanchea
pongter asunk nhozo, hamvem mhojea tankichem
kaim chil'lor kam' korunk zata tor korchem
mholl'lle chintpan (bozari chintpacheani haka
pixem mhonnyet) ojik chouda vorsadhim; mhonnje
2004 isvent, tem-i porki kuveyttant suru kel'lem
’konknni obhian somiti’, ani hea misamvacho
ud'dex fokot ek - konknni vistarunchi. Konknni
potram, konknni buk, konknni koulleo vorun
ghoran ghor vochun konknni lokak paumvchim. Punn
hangasor ek poiso soit amkam naka mhonnun
koxeddodakhal sot ucharunk mhaka toryi koslich
bhirant na. Ani tea obhianant mhojesovem vaur
kel'le zaite pramannik konknni sande asat, ani
hyevixeant tech kaim gouai ditit. 2004 isvent
suru zal'lea hea obhianant 2005 isvent
mukharilem, ani 2005 isvechea konknni obhian
somitichem ugtaunn korunk ayil'lo amcho konknni
padri ma|melvin ddi’kunha toull kuveyttant aslo,
tannem bhas dili; ’vol'li, hamv soit
kuveyttantlea her igrz/kopelamni konknni mis
suru kortolom’, ani veginch tannem salmia,
ohmodint soit konknni mis suru kelem, az soit
konknni misank lok bhorun bhorun yeta matr nhoi,
atam kuveyttantolem malghoddem konknni songhtton
’ke.Si.Ddoblyu.E’ (kuveytt konknni velfer
ososiexon) hannim kuveyttant ’konknni klaxi suru
korchem misamv’ hatim dhorlam. Hi zaunasa amchi
auybhasechi kallji.
Kuveyttant hamv poinnari, ani atam mumbeantyi
hamv poinnarich. Punn jivitcho ek poinn
mhonntana hem poinn kaim vegllem nhoi. Atam
mumbeant soit zaito konknni lok asa,
maibhasecho husko ani kallji tankam asa, ami
mumbeant ekouttit zaun konknni vaur koruyeta.
Ekouttit mhollear ek songhtton mhonn
chintinakat, ek chintap - jyem bhim amim
vompl'lem adhleursa; ’konknni
ekoutt 2017’, ani hem mukarun ami
mumbeantlea konknni talentak mukar haddunk ek
mett kaddlem ani attepn'nas bhurgeamni okhil
bharti-i konknni kovitasrtent vantto ghetlo. Ani
hea vorsam ami ’konknni obhian somiti’ mumbeant
soit suru korchim mettam kaddun asamv,
mumbeantlea vevegllea vis firgojechea vis
urbheuntank ami vinchla, konknnik tanchemukhantr
ghoran ghor ami abian choloiteleamv ani bhovo
obhimanan ani gourovan choloiteleamv.
Amkam toryi amchea auybhasecher obhiman asa
ani astolo. Ani to obhiman konn tantanchea
motichea bholaikeporinch chintundit, amkam tem
poddun gel'lem na, punn hem amchem misamv
mhonna, tesamv mhonna, paxamv mhonna va
tentesamv mhonna, punn amcho xevott itloch;
’konknni uloi, konknni uroi, konknni amchi auy’
devo borem korum,
Vol'li Kvaddros
[Seuk,
Konkonni]
[April, 2018] |
|
|
|
valleyquadros@gmail.com |
Vol'li Kvaddros: 1984 isve thaun
konknnent mottveo kannyo, kadombori, kovita,
lekhonam boroun ayil'lo, 2004 thaun 2011
mhonnasor daaiz.com' zallizageacho
sompadok zaun vaur kela. Kannik, Udevo, Amcho
Yuvok potrachea sompadoki-i monddollint vaur
kel'lea hannem ’Kuveyttgarancho jhelo vixes
onko’, ’Divo-Daaiz’, ’Mithr-Daaiz’,
toxench kornattok konknni sahity okaddemichea ’Xekddeacheo
Mottveo Kannyo’ bukachem sompadon kelam. ’Mollbauylim
Svopnnam (2006)’ ani ’Mukhamukhi
(2011)’ hache porgott zal'le sompadokiyanche don
zome. |
|
|
|
|
|
|
|
ದಾಯ್ಜ್.ಕೊಮ್ |
|
2004 ಥಾವ್ನ್
2011 ಪರ್ಯಾಂತ್ ಕಾರ್ಯಾಳ್ ಆಸ್‌ಲ್ಲ್ಯಾ
ದಾಯ್ಜ್.ಕೊಮ್ ಚೆರ್
ಪರ್ಗಟ್‌ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ
ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್
ಲಾಭಯ್ತೆಲ್ಯಾಂವ್. | |
| |
![]() |
|
