![]() |
|
ಸಂಪಾದಕೀಯ್
-
12.
ಜಿಣಿ,
ಸಂವೇದನ್ ಆನಿ ಸಾಹಿತ್ಯ್ |
|
ಹ್ಯಾ
ಸಂಸಾರಾಂತ್ ಜಲ್ಮೊನ್ ಆಯಿಲ್ಲ್ಯಾ ಹರ್ಯೆಕಾಕ್ ’ಜಿಣಿ’ ಮ್ಹಣುನ್
ಆಸ್ತಾ, ಆನಿ ತ್ಯಾ ಜಿಣಿ ಮ್ಹಳ್ಳೆ ಆವ್ದೆಂತ್ ತೊ ಕೊಣಾಕ್ ಪರ್ಕಿ/ಅಪ್ಲೊ/ಪೆಲೊ
ಜಾತಾ, ಕಾಂಯ್ ಥೊಡೆಂ ಹೆರಾಂಲಾಗಿಂ ಅಭಿವ್ಯಕ್ತಿ ಕರ್ತಾ, ಕಾಂಯ್
ಇಲ್ಲೆಂ ಹೆರಾಂ ಥಾವ್ನ್ ಆಯ್ಕತಾ, ಸಮ್ಜತಾ ವಾ ಶಿಕ್ತಾ. ಆಜ್‌ಕಾಲ್
ಹೆಂಚ್ ಕಾಮ್ ಮನ್ಶಾನ್ ರಚ್‌ಲ್ಲೆಂ ರೊಬಾಟ್ ಸಯ್ತ್ ಕರ್ತಾ ದೆಕುನ್,
ರೊಬಾಟ್ ಆನಿ ಮನ್ಶಾಕ್ ಕಾಂಯ್ ಫರಕ್ ಆಸ್ತಾ? ಮನ್ಶಾಕ್ ಕಾಳಿಜ್ ಆಸಾ,
ಬರೆಂ/ವಾಯ್ಟ್ ಮ್ಹಳ್ಳೆಂ ಚಿಂತ್ಚಿ ಸಕತ್ ಆಸಾ, ಆನಿ ಕಾಳ್ಜಾಂತ್ ಬರೆಂ/ವಾಯ್ಟ್
ಮ್ಹಣುನ್ ಸಾಂಗ್ಚಿ ಏಕ್ ಬೋಬ್ ಆಸಾ. ತರ್ ಸಮಾಜೆಂತ್ ಎಕಾ ಸಾಹಿತಿಕ್
ತಶೆಂಚ್ ಎಕಾ ಮನ್ಶಾಕ್ ತಫಾವತ್ ಅಸಾ?
ಹರ್ ಏಕ್ ಸಾಹಿತಿ ಏಕ್ ಮನಿಸ್ ಪುಣ್ ಹರ್ ಏಕ್ ಮನಿಸ್ ಸಾಹಿತಿ ನ್ಹಯ್.
ತರ್ ಸಾಹಿತಿ ಮ್ಹಳ್ಯಾರ್ ಕೊಣ್?
ಪುಣ್ ಹಾಚ್ಯಾಧಿಂ ಸಾಹಿತ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳೆಂ ಆಮಿ
ಸಮ್ಜುಂಚಿ ಗರ್ಜ್. ಜ್ಯೆ ಕಿತೆಂ ಬರ್ಪಾನಿಶಿಂ ಆಸಾ ತೆಂ ಸಾಹಿತ್
ಮ್ಹಣ್ ಜಾಯ್ತೆ ವಾದ್ ಮಾಂಡ್ತಿತ್, ಹೆಂ ಸತ್ ಆಸ್ತೆಂ ತರ್
’ಅಜಂತಾ-ಎಲ್ಲೋರಾಚ್ಯೊ ಮೊನ್ಯೊ ಫಾತ್ರಾ ಪುತ್ಳ್ಯೊ ಆಜ್ ಸಂಸಾರಾಕ್
ಕವಿತಾ ಜಾತ್ಯೊನಾಂತ್’ ನ್ಹಯ್?, ತರ್ ಸಾಹಿತ್ ಮ್ಹಳ್ಯಾರ್ ಕಿತೆಂ?
ಏಕ್ ಅಭಿವ್ಯಕ್ತಿ, ಜಿ ಎಕಾ ಮನ್ಶಾಚ್ಯಾ ಸಮ್ಜೊಣೆಂತ್ ವಾ
ಜಾಣ್ವಾಯೆಂತ್ ಮಿಸ್ಳೊನ್, ಜೆಮೆಂವ್ಚ್ಯಾ ಸಮಾಜೆಚ್ಯಾ ಸಂವೇದನಾಂಕ್
ಸ್ಪಂದನ್ ಕರ್ಚೆಂ ಬರವ್ಪ್. ಹೆಂ ಸಂವೇದನ್ ಕಸಲೇಂಯ್ ಆಸ್ಯೆತಾ,
ದಯಾ-ಭಿರ್ಮತ್ ಆಸ್ಯೆತಾ, ಜಾಗ್ವಣ್-ತಿದ್ವಣ್ ಆಸ್ಯೆತಾ, ಏಕ್
ಸಿದ್ದಾಂತಿಕ್ ವಾಟ್ ಆಸ್ಯೆತಾ ವಾ ಏಕ್ ವೈಚಾರಿಕ್ ದಿಶ್ಟಾವೊ ಆಸ್ಯೆತಾ,
ಪುಣ್ ಖಂಚ್ಯಾಯ್ ಎಕಾ ಸಾಹಿತಿಕ್ ಆಸುಂಕ್ ಜಾಯ್ ಜಾಲ್ಲಿ ಮುಳಾವಿ
ಅರ್ಹತಾ ಜಾವ್ನಾಸಾ; ಹೆರಾಂಚ್ಯಾ ದುಃಖಿಕ್ ಸಮ್ಜುಂಚೆಂ ಆನಿ ತ್ಯಾ
ದುಃಖಿಕ್ ಸ್ಪಂದನ್ ಕರ್ಚೆಂ.
ಆಗುಸ್ತೊ ಕ್ಯೂರಿಚಿಂ ಉತ್ರಾಂ
ಯಾದಿಕ್ ಯೆತಾತ್; "Sensitive people suffer more, but
they love more and dream more."
ಸಂವೇದನ್‌ಶೀಲತಾ (Sensitivity) ಕೊಣಾಕ್ ಅಸ್ಕತ್ಕಾಯ್ ಮ್ಹಣ್
ದಿಸುಂಕ್ ಪುರೊ ಕೊಣಾಕ್ ಹೆರ್ ಕಿತೆಂ. ಪುಣ್ ಜೊ ಕೊಣ್ ಸಂವೇದನ್‌ಶೀಲತಾ
ಸಾಂಡುನ್ ಬರಯ್ತಾ, ತೊ ಕಿತ್ಲೊಯ್ ಪ್ರತಿಭಾವಂತ್ ಅಸುಂದಿ, ಪುಣ್
ನೈತಿಕ್ ಸಂಸಾರಾಂತ್ ತೊ ಪೊಕೊಳ್.
ಏಕ್ ಕವಿ ಸಯ್ತ್ ಎಕಾ ರಿತಿಚೊ ಸಾಹಿತಿ, ಜೆದ್ನಾಂ ತೊ ಸಮಾಜಿಕ್
ಸ್ಪಂದನ್ ಕರ್ತಾ, ಸಮಾಜಿಕ್ ಜವಾಭ್ದಾರಿ ಘೆತಾ ತೆದ್ನಾ ತೊ ಸಾಹಿತಿ
ಜಾತಾ ಶಿವಾಯ್, ಫಕತ್ತ್ ಉತ್ರಾಂ ಗುಂತುನ್ ಕವಿತಾ ಸಜಂವ್ಕ್ ಜೆದ್ನಾಂ
ಹೆರಾಂಚೊ ಮಾನ್ ಗಳ್ಸಿತಾ ತೊ ಫಕತ್ತ್ ಏಕ್ ’ಕಾಗ್ದಾಚೆಂ ಫುಲ್’
ಮಾತ್ರ್ ಜಾತಾ, ಫಕತ್ತ್ ಧಾಖವ್ಪ್ ಶಿವಾಯ್ ತಾಂತುಂ ಕಸ್ಲೊಚ್ಚ್
’ಸ್ವಾದ್/ಪರ್ಮಳ್’ ಮ್ಹಳ್ಳೊ ಆಸಾನಾ.
ಕವಿ ಕೆದ್ನಾಂಯ್ ವೆಗ್ಳೊಚ್ಚ್ ಜಾವ್ನಾಸ್ತಾ, ಜಮ್ಯಾಂತ್ ಸಯ್ತ್ ತೊ
ಎಕ್ಸುರೊಚ್, ಆನಿ ಎಕ್ಸುರೊ ಜಾವ್ನ್‌ಯೀ ತೊ ಜಮ್ಯಾಕ್ ದೆಖ್ತಾ; "The
solitude of the poet is the uniqueness of his
experience, and the particularity of his sensitivity and
imagination" (ಕವಿಚೆಂ ಏಕಾಂತ್‌ಪಣ್ ಅಪ್ಲ್ಯಾ ಅನ್ಭೋಗಾಚಿ
ಎಕೀನ್‌ಪಣ್ ಜಾವ್ನಾಸಾ; ತಶೆಂಚ್ ತಾಚಿ ಸಂವೇದನ್‌ಶೀಲತಾ ಆನಿ
ಕಲ್ಪನಾಂಚಿ ವಿಶೇಷತಾ ಜಾವ್ನಾಸಾ.) ಮ್ಹಳ್ಳಿಂ - ಖ್ಯಾತ್ ಪೋಲಿಶ್ ಕವಿ
ಎಮ್. ಜಾಸ್ತ್ರುನಾಚಿಂ ಉತ್ರಾಂ ಯಾದಿಕ್ ಯೆತಾತ್.
ಜಿಣ್ಯೆ ಪಯ್ಣಾಂತ್ ಜಾಯ್ತೆಂ ಬರೆಂ/ವಾಯ್ಟ್ ಆಮಿಂ ಪಳೆತಾಂವ್,
ಆಯ್ಕತಾಂವ್, ಅನ್ಭೋಗ್ ಕರ್ತಾಂವ್. ಥೊಡೆಂ ಆಮ್ಕಾಂ ಗರ್ಜೆಚ್ಯಾಕೀ ಚಡ್
ಸಮ್ಜತಾ ತರ್ ಥೊಡೆಂ ಆಮ್ಕಾಂ ಸಮ್ಜತಾನಾ ವೇಳ್ ಉತರ್ತಾ. ಹೊಚ್ಚ್
ಜಿಣ್ಯೆಚೊ ಮಿಸ್ತೆರ್ ನ್ಹಯ್‌ಗೀ?.
ಅಜೀಕ್ ಕಾಂಯ್ ಪಂಚ್ವೀಸ್ ವರ್ಸಾಧಿಂ, ಮಂಗ್ಳುರಾಂತ್ಲ್ಯಾ ಸಾಂ|ಲುವಿಸ್
ಕೋಲೆಜಿಂತ್ ಪಿ.ಜಿ.ಡಿ.ಸಿ.ಎ (PGDCA) ಶಿಕೊನ್, ಜೊಕ್ತೆಂ ಕಾಮ್ ಮೆಳ್
ಮೆಳುಂಕ್ನಾ ದೆಕುನ್ ಯುರೇಕಾ ಫೋರ್ಬ್‌ಸ್ ಮ್ಹಳ್ಳ್ಯಾ ಎಕಾ ಕಂಪ್ಣೆಂತ್
ಘರಾನ್‌ಘರ್ ವಚುನ್ ’ವ್ಯಾಕ್ಯೂಮ್ ಕ್ಲೀನರ್’ ವಿಖ್ಚೆಂ ಕಾಮ್ ಧರ್ಲೆಂ.
ಮ್ಹಾಕಾ ಶಿವ್‌ಮೊಗ್ಗಾಂತ್ ಕಾಮ್ ಕರುಂಕ್ ಧಾಡ್ಲೊ. ಪೆಂಟೆಂತ್ಲ್ಯಾ
ಎಕಾ ಲಾಡ್ಜಾಂತ್ ದಿಸಾಕ್ ವೀಸ್ ರುಪಯಾಂಚೆಂ ರೂಮ್ ಭಾಡ್ಯಾಕ್ ಕರ್ನ್
ರಾವ್ಲೊಂ. ಕಾಮ್ ವೆಳಾನುಸಾರ್ ಜಾಂವ್ಕ್ ಆಸ್ಲೆಂ;
ಸಕಾಳಿಂ ಸಾರ್ಕೆ ಸಾತ್ ವೊರಾಂಕ್ ಮೀಟಿಂಗ್ ಆಸ್ಲೆಂ; ಆನಿ ತ್ಯಾ
ಮಿಟಿಂಗಾಕ್ ಹಾಜರ್ ಜಾವ್ನ್, ಆಜ್ ಹಾಂವ್ ಖಂಚ್ಯಾ ಗಾಂವಾಕ್ ವೆಚ್ಯಾರ್
ಆಸಾಂ, ಕಿತ್ಲಿಂ ಮಿಶಿನಾಂಚೊ ಡೆಮೋ ಆಸಾ, ಕಿತ್ಲಿಂ ಮಿಶಿನಾಂ ವಿಖ್ಚಿ
ಸಾಧ್ಯತಾ ಆಸಾ ಮ್ಹಣ್ ಸಾಂಗುಂಕ್ ಆಸಾ, ತೆಂ ಸರ್ವ್ ಆಮ್ಚೊ ಬೋಸ್
ಅಪ್ಲ್ಯಾ ಡಾಯ್ರಿಂತ್ ಬರವ್ನ್ ಘೆತಾಲೊ. ಫಕತ್ತ್ ಧಾ ಮಿನುಟಾಂಚೆಂ
ಮಿಟಿಂಗ್, ಉಪ್ರಾಂತ್ ಆಮಿ ಎಕೆಕ್ಲೆ ಎಕೆಕಾ ಗಾಂವಾತೆವ್ಶಿನ್
ಭಂವ್ತಾಲ್ಯಾಂವ್. ತಶೆಂಚ್ ಸಾಂಜೆರ್ ಸಾರ್ಕೆಂ ೮ ವೊರಾರ್ ಪರತ್ ಏಕ್
ಮಿಟಿಂಗ್ ಆಸ್ಲೆಂ, ಆನಿ ತ್ಯಾ ಮಿಟಿಂಗಾಂತ್, ಸಕಾಳಿಂ ದಿಲ್ಲ್ಯಾ
ಪಟ್ಟೆಕ್ ಅನುಸಾರ್ ಕಾಮ್ ಕೆಲಾಂಗಿ ವ ನಾಂಗಿ ಮ್ಹಳ್ಳಿ ಜವಾಬ್
ದಿಲ್ಯಾರ್ ಜಾಲೆಂ.
ಶಿವ್‌ಮೊಗ್ಗಾಂತ್ ಕೊಣಾಚ್‌ಯೀ ವಳೊಕ್ ನಾತ್‌ಲ್ಲಿ ದೆಕುನ್ ಟೆಲಿಫೋನ್
ಡೈರೆಕ್ಟರಿಂತ್ ಆಸ್ಚ್ಯಾ ನಂಬ್ರಾಂಕ್ ವಿಂಚುನ್ ಎಕೆಕ್ಲ್ಯಾಕ್ ಫೋನ್
ಕರುನ್, ತಾಂಚೆಂ ಅಪೋಂಯ್ಟ್‌ಮೆಂಟ್ ಘೆಂವ್ಕ್ ಆಸ್ಲೆಂ. ತಾಂತುಂ ಎಕ್ಲೊ
ಆಸ್ಲೊ ಕೊಲೆಜಿಚೊ ಪ್ರೊಫೆಸ್ಸರ್; ಪ್ರೊ|ಆನಂದ್. ತಾಚ್ಯಾ ಘರಾ ವಚುನ್
ವ್ಯಾಕ್ಯೂಮ್ ಕ್ಲೀನರಾಚೊ ಡೆಮೋ ದಿತಾನಾ, ತಾಣೆಂ ಮ್ಹಜೆವಿಶಿಂ,
ಮ್ಹಜ್ಯಾ ಶಿಕ್ಪಾವಿಶಿಂ ಸವಾಲ್ ಕೆಲೆಂ. ಹಾಂವೆಂ ತಾಕಾ ಸತ್‌ಚ್ಚ್
ಸಾಂಗ್ಲೆಂ ದೆಕುನ್ ತಾಣೆಂ ಏಕ್ ಸಲ್ಹಾ ದಿಲಿ; ’ತುಂ ಪಿ.ಜಿ. ಶಿಕೊನ್
ಹೆಂ ಕಾಮ್ ಕರ್ತಾಯ್? ತುಕಾ ಆಸಕ್ತ್ ಆಸಾ ತರ್, ತುಕಾ ಎಕಾ ಕಂಪ್ಯೂಟರ್
ಶಿಕಂವ್ಚಾ ಕ್ಲಾಸಿಂತ್ ಶಿಕಂವ್ಚೆಂ ಕಾಮ್ ದಿತಾಂ, ಪಾರ್ಟ್-ಟಾಯ್ಮ್
ಕಾಮ್’ ಮ್ಹಣಾಲೊ.
ಸಕಾಳಿಂ ಸಾತ್ ಥಾವ್ನ್ ನೋವ್ ವೊರಾ ಪರ್ಯಾಂತ್ ಶಿಕಂವ್ಕ್ ಆಸ್ಲೆಂ;
ಕಾಂಯ್ ಇಕ್ರಾ-ಭಾರಾ ವಿಧ್ಯಾರ್ಥಿಂ ಆಸ್ಲಿಂ. ಮ್ಹಾಕಾಯ್ ಶಿಕಂವ್ಚಿ
ಉರ್ಭಾ ಆಸ್ಲಿ ದೆಕುನ್ ವೆಳಾರ್ ಸಕ್ಕಡ್ ಕಾಮ್ ಕರುಂಕ್ ಆಸ್ಲೆಂ.
ಸಕಾಳಿಂ ಹಾಂವ್ ಸಾಡೆ ಪಾಂಚ್ ವೊರಾಂಕ್ ಉಟ್ತಾಲೊಂ, ಆನಿ ಸಾತಾಚೆಂ
ಮಿಟಿಂಗ್ ಅಖೆರ್ ಜಾತಚ್ಚ್ ಸವಾಯ್ ಸಾತಾಂಕ್ ಕ್ಲಾಸ್ ಘೆಂವ್ಕ್ ಯೆತಾಲೊಂ,
ಪುಣ್ ಎಕ್ಲೊ ತರ್ನಾಟೊ ಸದಾಂಯ್ ಮ್ಹಜ್ಯಾಕೀ ತಡವ್ ಕರ್ನ್ ಕ್ಲಾಸಿಕ್
ಯೆತಾಲೊ. ಥೊಡೆ ದೀಸ್ ಗೆಲ್ಲೆಪರಿಂಚ್ ಹಾಂವೆಂ ’ವೆಳಾರ್ ಕ್ಲಾಸಿಕ್
ಯೇನಾತ್ಲ್ಯಾರ್ ಅಪುಣ್ ಕ್ಲಾಸಿಕ್ ಘೆಂವ್ಚೊನಾ’ ಮ್ಹಣುನ್ ತಾಕಾ
ಚತ್ರಾಯ್ ದಿಲಿ. ತರ್‌ಯೀ ತೊ ತಡವ್ ಕರ್ನ್ ಯೆತಾಲೊ ದೆಕುನ್ ಎಕಾ ದಿಸಾ
ತಾಕಾ ಹಾಂವೆಂ ಕ್ಲಾಸಿಂತ್ಲೊ ಭಾಯ್ರ್ ಘಾಲೊ.
ನೋವ್ ವೊರಾಂಚೆರ್ ಕ್ಲಾಸ್ ಸಂಪವ್ನ್ ಹಾಂವ್ ಭಾಯ್ರ್ ಯೆತಾನಾ ತೊ
ತರ್ನಾಟೊ ಅಪ್ರಾಧಿ ಜೀನ್ಸಾರ್ ಮ್ಹಾಕಾಚ್ಚ್ ರಾಕುನ್ ಆಸ್ಲೊ. ಭೋವ್
ನಮೃತಾಯೆನ್ ಮ್ಹಾಕಾ ಸಮ್ಜಾಯ್ಲಾಗ್ಲೊ; ತೊ ಆನಿ ತಾಚಿ ಆವಯ್ ಸಕಾಳಿಂ
ಸಾಡೆ ತೀನ್ ವೊರಾಂಕ್ ಉಟೊನ್, ವೀಸ್-ಭಾವೀಸ್ ಮೊಶಿಂಚೆಂ ದೂದ್ ಕಾಡುನ್,
ಉಪ್ರಾಂತ್ ತೆಂ ದೂದ್ ವರುನ್ ಹೊ ತರ್ನಾಟೊ ಹೊಟೆಲಾಂನಿ ವಿಖುನ್
ಕ್ಲಾಶಿಕ್ ಯೆತಾಲೊ, ಪುಣ್ ಹೊಟೆಲ್ ಕೆದ್ನಾಂ ಸಾತಾಂಕ್ ತರ್ ಕೆದ್ನಾಂ
ಧಾ-ವೀಸ್ ಮಿನುಟಾಂ ತಡವ್ ಜಾತಾಲೊ ದೆಕುನ್ ಕ್ಲಾಶಿಕ್ ಯೆತಾನಾ ಸಯ್ತ್
ತರ್ನಾಟ್ಯಾಕ್ ತಡವ್ ಜಾತಾಲೊ.
ಆಯ್ಕುನ್ ಮ್ಹಾಕಾಚ್ಚ್ ಮ್ಹಜೆರ್ ರಾಗ್ ಆಯ್ಲೊ, ತ್ಯೇ ಉಪ್ರಾಂತ್
ಹಾಂವ್ ಮುಂಬಯಾಂತ್ ಸಭಾರ್ ವರ್ಸಾಂ ಶಿಕಯ್ತಾಲೊಂ ದೆಕುನ್ ಹರ್ಯೆಕಾ
ವಿಧ್ಯಾರ್ಥಿವಿಶಿಂ ಪಯ್ಲೆಂ ಸಮ್ಜುಂಚಿ ಮ್ಹಜಿ ಪಯ್ಲಿ ಗರ್ಜ್ ಮ್ಹಣ್
ಸಮ್ಜುನ್ ಆಯಿಲ್ಲೊಂ. ಮ್ಹಜ್ಯಾ ಜಿಣ್ಯೆಂತ್ ಹೊ ತರ್ನಾಟೊ ಎಕ್ ಕವಿತಾ
ಜಾವ್ನ್ ಉದೆಲ್ಲೊ ಆನಿ ಕೆದಿಂಚ್ ವಿಸ್ರುಂಕ್ ಸಕುಂಕ್ ಜಾಯ್ನಾ ತಸ್ಲೊ
ಅನ್ಭೋಗ್ ಜಾವ್ನ್ ಉರ್ಲೊ.
ಶಿಕ್ಚೆಂ ಮನ್ ಆಸ್ಲ್ಯಾರ್ ಫಾತ್ರಾಥಾವ್ನ್‌ಯೀ ಲಿಸಾಂವ್ ಶಿಕ್ಯೆತಾ,
ಪುಣ್ ವೈಚಾರಿಕ್ ಕಾಂಠಾಳೊ ಮತಿಂತ್ ಭರೊನ್ ಗೆಲ್ಲ್ಯಾಂಕ್, ವೇಳ್ ನಾ,
ಸಯ್ರಣ್ ನಾ, ಚಿಂತಾಪ್ ನಾ, ದೆಕುನ್ ಹ್ಯಾ ಸಂಸಾರಾಂತ್ ಜಿಯೆತಾತ್ ತರ್‌ಯೀ
ತಾಂತುಂ ಅಪ್ಲೊಚ್ಚ್ ಮ್ಹಳ್ಳೊ ಸಂಸಾರ್ ಕರುನ್ ಜಿಯೆತಾತ್. ಭೆರೊಯ್
ಬರೊ, ಬರೊಯ್ ಭೆರೊ ಮ್ಹಣ್ತಾನಾ ಖರೆಂಚ್ ಅಸಲೆ ತರ್ ’ಸಾಹಿತಿ/ಕವಿ’
ತರ್, ತ್ಯಾ ಸಾಹಿತಿ/ಕವಿ ಮ್ಹಳ್ಳ್ಯಾ ಸಭ್ದಾಂಕ್‌ಚ್ಚ್ ಕಾಂಠಾಳೊ
ಉಭ್ಜತಾ. ಸಾಹಿತ್ ಆವಾಜ್ ಕರಿನಾ, ಸಾಹಿತ್ ಮೌನ್. ಸಾಹಿತ್ ಪಂಗಡ್
ಭಾಂದಿನಾ, ಸಾಹಿತ್‌ಚ್ಚ್ ಏಕ್ ಜಮೊ. ಪುಣ್ ಕುಂಡೊಚ್ಚ್ ’ಉಂಡೊ’
ಮ್ಹಣ್ತೆಲ್ಯಾಂಕ್ ಕಿತೆಂ ಪಡೊನ್ ಗೆಲಾಂ ಕೊಣ್ ಬರೊ ಕೊಣ್ ಭೆರೊ
ಮ್ಹಣುನ್?
ಅಶೆಂ ಮ್ಹಣ್ತಾಸ್ತಾಂ ಅಜೀಕ್ ಇಕ್ರಾ ವರ್ಸಾಧಿಂ ಬರಯಿಲ್ಲ್ಯಾ ದೋನ್
ವೊಳಿಂಚೊ ಉಡಾಸ್ ಜರೂರ್ ಯೆತಾ;
’ಸತ್ ಸಾಂಗುಂಕ್ ಜಾಯ್ನಾಂಗಾ ದೆಕುನ್
ಮಾಂಕೊಡ್ ಜಾಲಾ ವಾಗ್‌ಗಾ
ರಾಯ್ ಜಾವ್ನ್‌ಚ್ಚ್ ಉರ್ತಾಂ, ರಿತ್ಯಾ ಪೊಟಾರ್‌ಚ್ಚ್ ಮೊರ್ತಾಂ,
ಫಿಕಿರ್ ಕೊಣಾಕ್ ಕಿತ್ಯಾಕ್?
- ವಲ್ಲಿ ಕ್ವಾಡ್ರಸ್ [ಮಾರ್ಚ್, , 2017] |
|
|
|
| |
|
|
|
|
|
 |
|
|
|
valleyquadros@gmail.com |
ವಲ್ಲಿ
ಕ್ವಾಡ್ರಸ್:
1984 ಥಾವ್ನ್ ಕೊಂಕ್ಣೆಂತ್ ಮಟ್ವ್ಯೊ ಕಾಣ್ಯೊ,
ಕಾದಂಬರಿ, ಕವಿತಾ, ಲೇಖನಾಂ ಬರವ್ನ್ ಆಯಿಲ್ಲೊ, 2004
ಥಾವ್ನ್ 2011 ಮ್ಹಣಾಸರ್ ದಾಯ್ಜ್.ಕೊಮ್ ಅಂತರ್‌ಜಾಳಿಚೊ
ಸಂಪಾದಕ್ ಜಾವ್ನ್ ವಾವ್ರ್ ಕೆಲಾ. ಕಾಣಿಕ್, ಉದೆವ್,
ಆಮ್ಚೊ-ಯುವಕ್ ಪತ್ರಾಚ್ಯಾ ಸಂಪಾದಕೀಯ್ ಮಂಡಳಿಂತ್ ವಾವ್ರ್
ಕೆಲ್ಲ್ಯಾ ಹಾಣೆ ’ಕುವೇಯ್ಟ್‌ಗಾರಾಂಚೊ ಝೆಲೊ ವಿಶೇಸ್ ಅಂಕೊ’,
’ದಿವೊ-ದಾಯ್ಜ್’, ’ಮಿತ್ರ್-ದಾಯ್ಜ್’ ತಶೆಂಚ್ ಕರ್ನಾಟಕ್
ಸಾಹಿತ್ಯ್ ಅಕಾಡೆಮಿಚ್ಯಾ ’ಶೆಕ್ಡ್ಯಾಚ್ಯೊ ಮಟ್ವ್ಯೊ
ಕಾಣ್ಯೊ’ ಬುಕಾಂಚೆಂ ಸಂಪಾದನ್ ಕೆಲಾಂ. MBA
ಪದ್ಯುತ್ತರ್ ಸನದ್ ಜೊಡ್ಲಲೊ, ಪ್ರಸ್ತುತ್ IBM ಕಂಪ್ಣೆಂತ್
ಗ್ಲೋಬಲ್ ಟ್ರಾನ್ಸಿಶನ್ ಪ್ರೋಜೆಕ್ಟ್ ಮ್ಯಾನೆಜರ್ ಜಾವ್ನ್
ವಾವ್ರ್ ಕರುನ್ ಆಸಾ. |
|
संपदकीय
१२: जिणि, संवॆदन आनी साहित्य |
|
ह्या
संसारांत जल्मोन आयिल्ल्या हर्येकाक ’जिणि’ म्हणुन आस्ता,
आनी त्या जिणि म्हळ्ळे आव्देंत तो कोणाक परकि/अपलो/पेलो
जाता, कांय थोडें हेरांलागिं अभिव्यक्ति करता, कांय इल्लें
हेरां थाव्न आय्कता, सम्जता वा शिक्ता. आज्काल हेंच
काम मन्शान रच्ल्लें रोबाट सय्त करता देकुन, रोबाट आनी
मन्शाक कांय फरक आस्ता? मन्शाक काळिज आसा, बरें/वाय्ट
म्हळ्ळें चिंत्चि सकत आसा, आनी काळ्जांत बरें/वायट
म्हणुन सांग्चि ऎक बॊब आसा. तर समाजेंत एका साहितिक तशेंच
एका मन्शाक तफावत असा?
हर ऎक साहिति ऎक मनिस पुण हर ऎक मनिस साहिति न्हय. तर
साहिति म्हळ्यार कोण?
पुण हाच्याधिं साहित म्हळ्यार कितें म्हळ्ळें आमि सम्जुंचि
गर्ज. ज्ये कितें बरपानीशिं आसा तें साहित म्हण जाय्ते वाद
मांड्तित, हें सत आस्तें तर ’अजंता-एल्लॊराच्यो मोन्यो
फात्रा पुत्ळ्यो आज संसाराक कविता जात्योनांत’ न्हय?, तर
साहित म्हळ्यार कितें?
ऎक अभिव्यक्ति, जि एका मन्शाच्या सम्जोणेंत वा जाण्वायेंत
मिस्ळोन, जेमेंव्च्या समाजेच्या संवॆदनांक स्पंदन कर्चें
बरव्प. हें संवॆदन कसलॆंय आस्येता, दया-भिर्मत आस्येता,
जाग्वण-तिद्वण आस्येता, ऎक सिद्दांतिक वाट आस्येता वा
ऎक वैचारिक दिश्टावो आस्येता, पुण खंच्याय एका साहितिक
आसुंक जाय जाल्लि मुळावि अर्हता जाव्नासा; हेरांच्या
दुःखिक सम्जुंचें आनी त्या दुःखिक स्पंदन करचें.
आगुस्तो क्यूरिचिं
उत्रां यादिक येतात; "Sensitive
people suffer more, but they love more and dream
more."
संवॆदन्शीलता (Sensitivity) कोणाक अस्कत्काय म्हण
दिसुंक पुरो कोणाक हेर कितें. पुण जो कोण संवॆदन्शीलता
सांडुन बरय्ता, तो कित्लोय प्रतिभावंत असुंदि, पुण
नैतिक संसारांत तो पोकोळ.
ऎक कवि सय्त एका रितिचो साहिति, जेद्नां तो समाजिक
स्पंदन करता, समाजिक जवाभ्दारि घेता तेद्ना तो
साहिति जाता शिवाय, फकत्त उत्रां गुंतुन कविता
सजंव्क जेद्नां हेरांचो मान गळ्सिता तो फकत्त ऎक
’काग्दाचें फुल’ मात्र जाता, फकत्त धाखव्प शिवाय
तांतुं कस्लोच्च ’स्वाद/पर्मळ’ म्हळ्ळो आसाना.
कवि केद्नांय वेग्ळोच्च जाव्नास्ता, जम्यांत
सय्त तो एक्सुरोच, आनी एक्सुरो जाव्न्यी तो
जम्याक देख्ता; "The
solitude of the poet is the uniqueness of his
experience, and the particularity of his
sensitivity and imagination" (कविचें
ऎकांत्पण अप्ल्या अन्भॊगाचि एकीन्पण जाव्नासा;
तशेंच ताचि संवॆदन्शीलता आनी कल्पनांचि विशॆषता
जाव्नासा.) म्हळ्ळिं - ख्यात पॊलिश कवि एम.
जास्त्रुनाचिं उत्रां यादिक येतात.
जिण्ये पय्णांत जाय्तें बरें/वायट आमिं पळेतांव,
आय्कतांव, अन्भॊग करतांव. थोडें आम्कां गर्जेच्याकी
चड सम्जता तर थोडें आम्कां सम्जताना वॆळ उतर्ता.
होच्च जिण्येचो मिस्तेर न्हय्गी?.
अजीक कांय पंच्वीस वर्साधिं, मंग्ळुरांत्ल्या
सां।लुविस कॊलेजिंत पि.जि.डि.सि.ए (PGDCA) शिकोन,
जोक्तें काम मेळ मेळुंक्ना देकुन युरॆका फॊर्ब्स
म्हळ्ळ्या एका कंप्णेंत घरान्घर वचुन
’व्याक्यूम क्लीनर’ विख्चें काम धर्लें. म्हाका
शिव्मोग्गांत काम करुंक धाड्लो. पेंटेंत्ल्या एका
लाड्जांत दिसाक वीस रुपयांचें रूम भाड्याक कर्न
राव्लों. काम वेळानुसार जांव्क आस्लें;
सकाळिं सार्के सात वोरांक मीटिंग आस्लें; आनी त्या
मिटिंगाक हाजर जाव्न, आज हांव खंच्या गांवाक
वेच्यार आसां, कित्लिं मिशिनांचो डेमॊ आसा, कित्लिं
मिशिनां विख्चि साध्यता आसा म्हण सांगुंक आसा, तें
सर्व आम्चो बॊस अप्ल्या डाय्रिंत बरव्न घेतालो.
फकत्त धा मिनुटांचें मिटिंग, उप्रांत आमि एकेक्ले
एकेका गांवातेव्शिन भंव्ताल्यांव. तशेंच सांजेर
सार्कें ८ वोरार परत ऎक मिटिंग आस्लें, आनी त्या
मिटिंगांत, सकाळिं दिल्ल्या पट्टेक अनुसार काम
केलांगि व नांगि म्हळ्ळि जवाब दिल्यार जालें.
शिव्मोग्गांत कोणाच्यी वळोक नात्ल्लि देकुन
टेलिफॊन डैरेक्टरिंत आस्च्या नंब्रांक विंचुन एकेक्ल्याक
फॊन करुन, तांचें अपॊंय्ट्मेंट घेंव्क आस्लें.
तांतुं एक्लो आस्लो कोलेजिचो प्रोफेस्सर; प्रो।आनंद.
ताच्या घरा वचुन व्याक्यूम क्लीनराचो डेमॊ दिताना,
ताणें म्हजेविशिं, म्हज्या शिक्पाविशिं सवाल केलें.
हांवें ताका सत्च्च सांग्लें देकुन ताणें ऎक सल्हा
दिलि; ’तुं पि.जि. शिकोन हें काम करताय? तुका
आसक्त आसा तर, तुका एका कंप्यूटर शिकंव्चा
क्लासिंत शिकंव्चें काम दितां, पार्ट-टाय्म काम’
म्हणालो.
अशें सकाळिं सात थाव्न नॊव वोरा पर्यांत शिकंव्क
आस्लें; कांय इक्रा-भारा विध्यार्थिं आस्लिं.
म्हाकाय शिकंव्चि उर्भा आस्लि देकुन वेळार सक्कड
काम करुंक आस्लें. सकाळिं हांव साडे पांच वोरांक
उट्तालों, आनी साताचें मिटिंग अखेर जातच्च सवाय
सातांक क्लास घेंव्क येतालों, पुण एक्लो तर्नाटो
सदांय म्हज्याकी तडव कर्न क्लासिक येतालो. थोडे
दीस गेल्लेपरिंच हांवें ’वेळार क्लासिक
यॆनात्ल्यार अपुण क्लासिक घेंव्चोना’ म्हणुन ताका
चत्राय दिलि. तर्यी तो तडव कर्न येतालो देकुन एका
दिसा ताका हांवें क्लासिंत्लो भायर घालो.
नॊव वोरांचेर क्लास संपव्न हांव भाय्र येताना तो
तर्नाटो अप्राधि जीन्सार म्हाकाच्च राकुन आस्लो.
भॊव नमृतायेन म्हाका सम्जाय्लाग्लो; तो आनी ताचि
आवय सकाळिं साडे तीन वोरांक उटोन, वीस-भावीस
मोशिंचें दूद काडुन, उप्रांत तें दूद वरुन हो
तर्नाटो होटेलांनि विखुन क्लाशिक येतालो, पुण
होटेल केद्नां सातांक तर केद्नां धा-वीस मिनुटां
तडव जातालो देकुन क्लाशिक येताना सय्त तर्नाट्याक
तडव जातालो.
आय्कुन म्हाकाच्च म्हजेर राग आय्लो, त्यॆ उप्रांत
हांव मुंबयांत सभार वर्सां शिकय्तालों देकुन
हर्येका विध्यार्थिविशिं पय्लें सम्जुंचि म्हजि
पय्लि गर्ज म्हण सम्जुन आयिल्लों. म्हज्या जिण्येंत
हो तर्नाटो एक कविता जाव्न उदेल्लो आनी केदिंच
विस्रुंक सकुंक जाय्ना तस्लो अन्भॊग जाव्न उरलो.
शिक्चें मन आस्ल्यार फात्राथाव्न्यी लिसांव
शिक्येता, पुण वैचारिक कांठाळो मतिंत भरोन
गेल्ल्यांक, वॆळ ना, सय्रण ना, चिंताप ना, देकुन
ह्या संसारांत जियेतात तर्यी तांतुं अप्लोच्च
म्हळ्ळो संसार करुन जियेतात. भेरोय बरो, बरोय भेरो
म्हण्ताना खरेंच असले तर ’साहिति/कवि’ तर, त्या
साहिति/कवि म्हळ्ळ्या सभ्दांक्च्च कांठाळो उभ्जता.
साहित आवाज करिना, साहित मौन. साहित पंगड भांदिना,
साहित्च्च ऎक जमो. पुण कुंडोच्च ’उंडो’ म्हण्तेल्यांक
कितें पडोन गेलां कोण बरो कोण भेरो म्हणुन?
अशें म्हण्तास्तां अजीक इक्रा वर्साधिं बरयिल्ल्या
दॊन वोळिंचो उडास जरूर येता;
’सत सांगुंक जाय्नांगा
देकुन मांकोड जाला वाग्गा
राय जाव्न्च्च उर्तां, रित्या पोटार्च्च मोर्तां,
फिकिर कोणाक कित्याक?
- वल्लि
क्वाड्रस [मार्च, २०१७] |
| |
|
valleyquadros@gmail.com |
वल्लि
क्वाड्रस: १९८४ थाव्न कोंक्णेंत मट्व्यो काण्यो,
कादंबरि, कविता, लॆखनां बरव्न आयिल्लो, २००४ थाव्न
२०११ म्हणासर दाय्ज.कोम अंतर्जाळिचो संपादक जाव्न
वाव्र केला. काणिक, उदेव, आम्चो-युवक पत्रांनि
संपादकीय वाव्र केल्ल्या हाणे ’कुवॆय्ट्गारांचो
झेलो विशॆस अंको’, ’दिवो-दाय्ज’, ’मित्र-दाय्ज’
तशेंच कर्नाटक कोंक्णी साहित्य अकाडेमिच्या
’शेक्ड्यांच्यो मट्व्यो काण्यो’ बुकाचें संपदन केलां.
MBA शिकाप जोडुन सद्द्याक IBM कंपेनिंत ग्लॊबल
ट्रान्सिशन प्रॊजेक्ट म्यानेजर जाव्न वाव्र करुन
आसा. |
|
|
|
|
|
ದಾಯ್ಜ್.ಕೊಮ್ |
|
2004 ಥಾವ್ನ್
2011 ಪರ್ಯಾಂತ್ ಕಾರ್ಯಾಳ್ ಆಸ್‌ಲ್ಲ್ಯಾ
ದಾಯ್ಜ್.ಕೊಮ್ ಚೆರ್
ಪರ್ಗಟ್‌ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ
ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್
ಲಾಭಯ್ತೆಲ್ಯಾಂವ್. | |
| |
![]() |
|
