|
ಸಂಪಾದಕೀಯ್
-
10. ಡೈವರ್ಶನ್ಸ್,
ಯೂ ಟರ್ನ್ ಆನಿ ಲೈಫ್ |
ಆಧ್ಲ್ಯಾ ವರ್ಸಾಪರಿಂಚ್ ಹ್ಯೇ ಪಾವ್ಟಿಂಯೀ ಮ್ಹಜ್ಯಾ ಪರ್ನ್ಯಾ
ಘರ್ಚ್ಯಾ ಪರ್ನ್ಯಾ ವೊಣದಿಚೆರ್
ಪರ್ನ್ಯಾ ಖಿಳ್ಯಾಚೆರ್ ನವೆಂಚ್
ಕ್ಯಾಲೆಂಡರ್ ಉಮ್ಕಳಾಯ್ಲಾಂ, ಹಾಂವೆ ಸಯ್ತ್ ನವಿ ಮುಸ್ತಾಯ್ಕಿ
ಹಾಡ್ಲ್ಯಾ ಪುಣ್ ಅಪುಟ್ ಕೊಂಕ್ಣೆಂತ್ ಬರಯಿಲ್ಲೆಂ ಮಾತಾಳೆಂ ವಾಚುನ್
ಹಾಂವ್ ಕಾಂಯ್ ನವ್ಯಾ ಬೊತ್ಲಿಂತ್ಲೆಂ ಪಿಯೆಲಾಂ ಮ್ಹಣ್ ಎದೊಳ್ಚ್ಚ್
ತುವೆಂ ನಿರ್ಣಯ್ ಕೆಲೊಯ್ ತರ್ ಹೆಂ ಪುರ್ತೆಂ ಲೇಖನ್ ತುಜೆಪಾಸತ್
ಬರಯಿಲ್ಲೆಂ ಜಾವ್ನಾಸಾ.
ನವೆಂ ವರಸ್ ಮ್ಹಜ್ಯಾ ಕ್ಯಾಲೆಂಡರಾಂತ್ ಮಾತ್ರ್ ಪುಣ್ ಮ್ಹಜ್ಯಾ
ಜಿಣ್ಯೆಂತ್, ಮ್ಹಜ್ಯಾ ಚಿಂತ್ಪಾಂತ್ ಕಿತ್ಲೆಂ ನವೆಂಸಾಂವ್ ಜಾಲಾಂ ವಾ
ಜಾಂವ್ಚೆಂ ಸಾಧ್ಯ್? ಮ್ಹಾಕಾ ಮೆಳ್ಚೊ ಸಾಂಭಾಳ್ ತೊಚ್ಚ್, ಮ್ಹಾಕಾ
ಕಾಮಾಕ್ ವಚುಂಕ್ ತೆಂಚ್ ಬಸ್ಸ್/ಆಟೊ/ಟ್ರೇಯ್ನ್ ಧರುಂಕ್ ಆಸಾ, ತೆಂಚ್
ಆಫಿಸ್, ತೊಚ್ಚ್ ಬೊಸ್ ಆನಿ ತೆಚ್ಚ್ ಸಮಸ್ಸೆ. ಉಪ್ರಾಂತ್ ಹಫ್ತೊ
ಅಖೇರ್ ಜಾತಾನಾ ತಿಚ್ಚ್ ಇಗರ್ಜ್, ತೆಚ್ಚ್ ಇಶ್ಟ್, ತಿಂಚ್ ಮಿಟಿಂಗಾಂ
ಆನಿ ಸಕ್ಕಡ್ ತೆಂಚ್ ತರ್ ’ನವೆಂ ಕಾಂಯ್ ವಾಲಿರ್ ಜಾಂವ್ಚಿಂ ಗೊಂಯ್ಟಾಂ?’.
ನವೆಂ ಮ್ಹಳ್ಯಾರ್ ಖಂಚ್ಯಾ ಸಾಂತಾ/ಸಾಂತಿಣಿನ್ ಸಂಸಾರಾಕ್ ಹಾಡುನ್
ಯೇಂವ್ಕ್ ಜಾಯ್ ಆಸ್ಲೆಂ? ಹಾಡುನ್ ಆಯ್ಲ್ಯಾರೀ ಕೊಣೆಂ ಆಮ್ಕಾಂ ಪಾವಿತ್
ಕರುಂಕ್ ಜಾಯ್ ಆಸ್ಲೆಂ? (ಮಾಫ್ ಕರಾ - ಆಮಿ ಜಾಂವ್ನ್ ಕಿತೆಂಚ್
ಕರಿನಾಂವ್, ಆಮ್ಕಾಂ ಹೆರಾಂನಿಂಚ್ ಕಿತೆಂಯ್ ಕರಿಜಾಯ್ ಮ್ಹಳ್ಳೆ
ಚಿಂತಪ್ ಆಮ್ಚ್ಯಾ ಕಟ್ಟ್ಯಾಂತ್ ಭರುನ್ ಗೆಲ್ಲೆ ಆಮಿ ದೆಕುನ್ ಸಾಂಗ್ತಾಂ)
ಆಮ್ಚ್ಯಾ ಘರಾಂತ್ಲ್ಯಾ ಮೆಜಾಂನಿ ಬೊತ್ಲ್ಯೊ ನವ್ಯೊ ಯೆತಿತ್ ಪುಣ್
ಆಮ್ಚೆ ದೀಸ್ಪಡ್ತೆ ವಿಚಾರ್ ಬದಲ್ನಾಂತ್, ಆಮ್ಚ್ಯಾ ಬಾಲ್ಕನಿಂತ್ಲ್ಯೊ
ಚಟ್ಟ್ಯೊ ಬದಲ್ತಿತ್ ಪುಣ್ ಆಮ್ಚ್ಯಾ ಚಿಂತ್ಪಾಚಿ ದಿಶಾ ಬದಲ್ನಾ,
ಆಮ್ಕಾಂ ಸರ್ವಾಂಕ್ ಬದ್ಲಾವಣ್ ಜಾಯ್ ಪುಣ್ ಆಮಿ ಜಾವ್ನ್ ಬದ್ಲುಂಕ್
ಸಕಾನಾಂವ್. ದೆಕುನ್ ದಿಸಾನ್ದೀಸ್ ಆಮ್ಚ್ಯಾ ಚಿಂತ್ಪಾಚ್ಯಾ ಶೆಳೆರ್ಪಣಾಚೊ
ಪರಿಣಾಮ್ ಭಗುನ್ ಆಸಾಂವ್.
ಆತಾಂ ಮ್ಹಾಕಾ ವಿಚಾರ್ಯೆತಾ ’ಹ್ಯಾ ಲೇಖನಾಚೆಂ ಮಾತಾಳೆಂ ಖಂಚ್ಯಾ
ಅರ್ಥಾನ್ ಅಪುಟ್ ಕೊಂಕ್ಣಿ ಭಾಸೆಚ್ಯಾ ಉತ್ರಾಂನಿ ಬರಯಿಲ್ಲೆಂ?’,
ಹೆಂಚ್ ಸವಾಲ್ ಹಾಂವ್ಯೀ ಚಿಂತುನ್ ಆಸಾಂ, ಕೊಂಕ್ಣಿ ಮ್ಹಳ್ಯಾರ್ ಕಿತೆಂ,
ಕೊಂಕ್ಣಿ ಕೊಣಾಕ್ ಆನಿ ಕಿತ್ಯಾಕ್ ಪಡೊನ್ ಗೆಲಾಂ? ವಿಚಾರಾ ’ಸೌತ್
ಕೆನರಾ ಕೊಂಕಣಿ ಅಸೋಸಿಯೇಶನ್’, ವಾ ’ಮ್ಯಾಂಗಲೋರ್ ಕೊಂಕಣಿ ವೆಲ್ಫೇರ್
ಅಸೋಸಿಯೇಶನ್’, ವ ’ಯುನಾಯ್ಟೆಡ್ ಕೊಂಕಣಿ ರೈಟರ್ಸ್ ಅಸೋಸಿಯೇಶನ್’
ಹಾಂತುಂ ಕೊಂಕ್ಣಿ ಖಂಯ್ ಆಸಾ? ಫಕತ್ತ್ ಕೊಂಕ್ಣಿ ಸಭ್ದ್ ವಾಪಾರ್
ಕೆಲ್ಯಾರ್ (ಘಾಸುಂಕ್/ಪುಸುಂಕ್) ಕೊಂಕ್ಣಿ ಜಾತಾ? ತ್ಯೇ ಅರ್ಥಾನ್
ಹಾಂವೆಂ ವಾಪರ್ ಕೆಲ್ಲ್ಯಾ ಮಾತಾಳ್ಯಾರ್ ’ಆನಿ’ ಮ್ಹಳ್ಳೊ ಸಭ್ದ್
ಅಪುಟ್ ಕೊಂಕ್ಣೆಚೊ.
[ಮಾಫ್ ಕರಾ, ಹೆಂ ಹಾಂವೆಂ ಖಂಚ್ಯಾಯ್ ಎಕಾ
ನಿರ್ದಿಶ್ಟ್ ಸಂಘಟನಾಕ್ ಉದ್ದೇಶುನ್ ಬರಯಿಲ್ಲೆಂ ನ್ಹಯ್, ಪುಣ್ ಆಮಿ
ಆಪ್ಣಾಯಿಲ್ಲ್ಯಾ ಚಿಂತ್ಪಾಚೆರ್ ಮಾತ್ಸೊ ಉಜ್ವಾಡ್ ಫಾಂಕಂವ್ಚಾ
ಇರಾದ್ಯಾನ್ ಥೊಡಿಂ ನಾಂವಾಂ ಧಾಖ್ಲ್ಯಾಕ್ ಘೆತ್ಲ್ಯಾಂತ್]
ಮಾತಾಳೆಂ ಆಸುಂ ಆತಾಂ ’ಬ್ಯುರೋಕ್ರಾಸಿ’ ಪಳೆಯಾಂ, ಕೊಂಕ್ಣಿ ಲೊಕಾಕ್
ವರ್ಸಾನ್ ವರಸ್ ಏಕ್ ಕಾರ್ಯೆಂ (ಸಾಂಸ್ಕೃತಿಕ್) ಆಸಾ ಕರ್ಚ್ಯಾ
ಎಕಾಚ್ಚ್ ಶೆವೊಟಾಂತ್ ಆಸ್ಚಿಂ ಅಸಲಿಂ ಡೊಂಬರಾಟ ಕೊಂಕ್ಣಿ ಸಂಘಟನಾಂ
ಅಮ್ಚ್ಯಾ ಕೊಂಕ್ಣೆಂತ್ ಕಿತ್ಲಿಂ ನಾಂತ್? ಆನಿ ವರ್ಸಾಕ್ ಏಕ್
ಸಾಂಸ್ಕೃತಿಕ್ ಕಾರ್ಯೆಂ ಕರ್ಚೆಂ ಕಾಂಯ್ ಇಗರ್ಜ್ ಮಾತೆಚೊ ನವೊ
ಉಪಾದೆಸ್ ಮ್ಹಳ್ಳೆಪರಿಂ ಭರ್ವಸುನ್, ತ್ಯೇ ಪಾಸತ್ ಥೊಡ್ಯಾ ಬೊಡಾಂಕ್
ಎಕ್ಟಾಂವ್ನ್ ಹುದ್ದೆ/ಪದ್ವಿ/ಅಧಿಕಾರ್ ಆಪ್ಣಾಂವ್ಕ್ ಎಕಾಥರಾಚೊ
’ದೊರಿ ವೊಡ್ಚೊ ಸ್ಪರ್ಧೊ’ ಕಾಂಯ್ ನವೊ?. ತೊ ಆಸ್ಲ್ಯಾರ್ ಹಾಂವ್ ನಾ,
ಹಾಂವ್ ಆಸ್ಲ್ಯಾರ್ ಅನಿ ಕೊಣ್ ನಾ ಮ್ಹಳ್ಳೆಂ ಚಿಂತಪ್ ನವೆಂ? ಪುಣ್
ಹೆಂ ಕಿತ್ಯಾಕ್ ಮ್ಹಳ್ಳೆಂ ಸವಾಲ್ ಕೊಣೆಂಯ್ ಕೆಲಾಂ? ಕೊಣೆಂಯ್ ಸೊಡ್ಯಾಂ
ತುವೆಂ ಕೆಲಾಂಯ್?
ಪ್ರಸ್ತುತ್ ಕಾಳಾರ್ ಕೊಂಕ್ಣಿ ಕಾರ್ಯಿಂ ಮ್ಹಳ್ಯಾರ್ ಸಂಪ್ಯಾನ್
ವ್ಯಾಖ್ಯಾನ್ ದಿತಾಂ; ’ಕಾಂಯ್ ಏಕ್-ದೋನ್ ಪತ್ರಾಂನಿ ಕಾರ್ಯಾಚಿ
ಕಳವ್ಣಿ ಧಾಡ್ಚಿ, ಗರ್ಜ್ ಪಡ್ಲ್ಯಾರ್ ಜಾಹೀರಾತ್ ದೀವ್ನ್ ತಿ ಕಳವ್ಣಿ
ಪರ್ಗಟ್ಚಿ (ಕಿತ್ಯಾಕ್ ಮ್ಹಳ್ಯಾರ್ ಜಾಹೀರಾತ್ ದಿಲ್ಯಾರ್ ಸಂಪಾದಕಾಂಕ್
ಬೊಲ್ಸಾಂತ್ ಘಾಲ್ಲೆಪರಿಂ, ದೆಕುನ್ ಕೊಣಾಯ್ಚಿಯ್ ಠಿಕಾ ಪರ್ಗಟ್
ಜಾಯ್ನಾ) ಆನಿ ನಮ್ಯಾರ್ಲೆಲ್ಯಾ ದಿಸಾ ತ್ಯಾ ಕಾರ್ಯಾಕ್ ಯೆತೆಲೆ ಧಾ-ಪಂದ್ರಾ
ಬೊಡಾಂ, ಆನಿ ತಾಂತುಂ ಭಾರಾ-ತೆರಾ (ಚೊವ್ದಾ ಆಸುಂಕ್ಯೀ ಪುರೊ)
ಜಣಾಂಕ್ ವೆದಿಚೆರ್ ಬಸಂವ್ಚೆಂ ಆನಿ ತಸ್ವೀರೊ ಕಾಡ್ಚ್ಯೊ, ಮೆಳ್ಲ್ಲ್ಯಾ
ಮೆಳ್ಲ್ಲ್ಯಾಕ್ ವೆದಿಚೆರ್ ಆಪವ್ನ್ ಫುಲ್ ದಿವ್ನ್ ಉಪ್ರಾಂತ್
ಪತ್ರಾಂನಿ ’ಮಾನ್ ಕೆಲೊ’ ಮ್ಹಣ್ ಗಾಜಂವ್ಚೆಂಚ್ ಕೊಂಕ್ಣಿ ಕಾರ್ಯಿಂ
ಜಾಲ್ಯಾಂತ್. ಆನಿ ಅಸಲ್ಯಾ ಕಾರ್ಯಾಕ್ ಕೊಂಕ್ಣಿ ಲೋಕ್ ಯೇನಾ ಮ್ಹಣ್
ರುದಾನ್. ಆತಾಂ ಸಾಂಗಾ - ಹಾಂತುಂ ಕಾಂಯ್ ನವೆಸಾಂವ್ ಆಸಾ? ಹಿಚ್ಚ್
ಸಂಸ್ಕೃತಿ/ಪರಂಪರಾ ಮುಖಾರುನ್ ವೆತಾ, ಲಾದ್ರು ಧಾ ವರ್ಸಾಂ ಅಧ್ಯಕ್ಷ್,
ಪೆದ್ರು ಪಂದ್ರಾ ವರ್ಸಾ ಅಧ್ಯಕ್ಷ್, ಉಪ್ರಾಂತ್ ದುಮ್ಗಾ, ಕಯ್ತಾನ್
ಮ್ಹಣುನ್ ಕೊಂಕ್ಣೆಚೆಂ ಸತ್ತ್ಯಾನಾಸ್. ಪುಣ್ ಹಾಂಗಾಸರ್ ಹಾಂಕಾಂ
ಕೊಂಕ್ಣಿ ಕಲಾಕಾರ್ ಕೊಣ್ ಮ್ಹಳ್ಳೆಂ ಕಳಿತ್ ನಾ, ಕೊಂಕ್ಣಿ ಭಾಶಾ
ಮಂಡಳ್ ಮ್ಹಳ್ಳ್ಯಾ ಸಂಸ್ಥ್ಯಾಚಿ ವರ್ದಿ (ಮಿನುಟ್) ಸಯ್ತ್
ಇಂಗ್ಲಿಶಾಂತ್ ಜಾತಾ - ಹಾಚ್ಯಾಕೀ ವರ್ತಿ ಕೊಂಕ್ಣೆಚಿ ಖೆಳ್ಕುಳಾಯ್
ಆನಿ ಖಂಯ್ಚರ್ ಆಸಾ ಸಾಂಗಾ.
ಕೊಂಕ್ಣಿ ಕಾರ್ಯಿಂ ಜಾಲ್ಯಾರ್ ಆನಿ ತಾಕಾ ಟಿಕೆಟ್ ಆಸಾ ಜಾಲ್ಯಾರ್
ತಾಚೊ ಭೊಂಗೊಸ್ತೊಳ್ ಅನ್ಯೇಕ್ ದುರಂತ್, ಮಾಹೆತ್ ಪತ್ರಾಂ (ಲೀಫ್-ಲೆಟಾಂ)
ತಯಾರ್ ಜಾಂವ್ಚಿ ಇಂಗ್ಲಿಶಾಂತ್, ಕಳವ್ಣಿ/ವರ್ದಿ ಜಾಂವ್ಚಿ
ಇಂಗ್ಲಿಶಾಂತ್. ಉಪ್ರಾಂತ್ ಖಬ್ರೆವರ್ದಿ ಸಯ್ತ್ ’ಇಂಗ್ಲಿಶಾಂತ್’,
ಕೊಣಾಕ್ ಕೊಂಕ್ಣಿ ಜಾಯ್, ತೆ ಬಸೊನ್ ಜಾಯ್ ಜಾಲ್ಯಾರ್ ತರ್ಜಣ್ ಕರಾ,
ಪರ್ಗಟ್ ಕರಾ ವಾ ಫೊಂಡಾಂತ್ ಪಡೊನ್ ಮೊರಾ ಮ್ಹಳ್ಳೆಂ ಚಿಂತಾಪ್
ಚಿಂತೆಲೆ ಕೊಂಕ್ಣಿ ಕಾರ್ಭಾರಿ. ಆನಿ ಕೊಂಕ್ಣಿ ಉದ್ದಾರ್ ಜಾಯ್ತ್?
ಥೊಡ್ಯಾಂಕ್ ಧಾಂವ್ಣೆಂತ್ ಜಿಕುಂಕ್ ಆಸಾ ದೆಕುನ್ ’ಮಾಂಡ್ ಕುರ್ಪೊಣ್’
ಮ್ಹಳ್ಳ್ಯಾ ವಸ್ತುಕ್ ಸಯ್ತ್ ದೊಡ್ಯಾ ಅರ್ಥಾಚ್ಯಾ ಸಂಭಾಶಣಾಂನಿ
ಪ್ರದರ್ಶನ್ ಕರುನ್ ’ಧಾಖ್ಲೊ ಕೆಲಾ’ ಮ್ಹಣ್ ದಾಂಗ್ರೊ ಮಾರ್ತಾತ್.
ಲೋಕ್ ಕಾಂಠಾಳ್ಳಾ ತರ್ಯೀ ತೆಚ್ಚ್ ನಾಟಕಾಂಕ್ ಫಕತ್ತ್ ಪೋಶಕ್
ಮೆಳ್ತಾತ್ ಮ್ಹಣುನ್ ಲೊಕಾಂಕ್ ಧಾಖಯ್ತಾತ್. ಆನಿ ಅಸಲ್ಯಾ ಕೊಂಕ್ಣಿ
ಮತ್ಭಾರಿಂ ಥಾವ್ನ್ ಕೊಂಕ್ಣಿ ಕಿತ್ತುನ್ ಪಾವ್ತಲಿ ಮ್ಹಳ್ಳೆಂ ತುಮಿಂಚ್
ಚಿಂತಾ. ಏಕ್ ನಾಟಕ್ ’ಕ್ವಾಲಿಟಿ (ಗುಣ್ಮಟ್ಟ್) ವರ್ವಿಂ ಚಲುಂಕ್
ಜಾಯ್ ಶಿವಾಯ್ ಸಂಖೊ (ಕ್ವಾಂಟಿಟಿ) ವರ್ವಿಂ ನ್ಹಯ್’. ಆತಾಂ ಎಕಾ
ಸಾಂಗ್ಣೆಚೊ ಉಡಾಸ್ ಯೆತಾ, ಹಾಗ್ತಾನಾ ಎಕ್ಲೊ ಭುರ್ಗೊ ಭಾಕ್ರಿ ಖಾತಾಲೊ
ದೆಕುನ್ ತಾಚ್ಯೆ ಆವಯ್ನ್ ಸಾಂಗ್ಲೆಂ ಖಂಯ್ ’ಅಳೆ ಪುತಾ, ಹಾಗ್ತಾನಾ
ಭಾಕ್ರಿ ಖಾಯ್ನಾಕಾ’, ಆನಿ ಪುತಾನ್ ಜಾಪ್ ದಿಲಿ ಖಂಯ್ ’ಹಾಂವ್
ಬುಡವ್ನ್ ಖಾತಾಂ, ತುಂ ಕಿತೆಂ ಕರ್ತಾಯ್?’, ಆಮ್ಚಾ ಕೊಂಕ್ಣೆಂತ್
ಸಯ್ತ್ ತೆಂಚ್ ಜಾಲಾಂ, ಬುಡವ್ನ್ ಖಾತೆಲೆಚ್ಚ್ ಮುಖೆಲಿ ತರ್, ಲೊಕಾಂ
ಥಾವ್ನ್ ಕಿತೆಂ ಅಪೇಕ್ಶಾ ಕರುಯೆತಾ ಮ್ಹಳ್ಳೆಂ ತುಮಿಂಚ್ ಚಿಂತುನ್
ಪಳೆಯಾ.
ಆತಾಂ ಮ್ಹಾಕಾ
ಚಾ.ಫ್ರಾ.ದೆ’ಕೋಸ್ತಾಚ್ಯಾ ಎಕಾ ಕವಿತೆಂತ್ಲ್ಯಾ ಉತ್ರಾಂಚೊ ಉಡಾಸ್
ಯೆತಾ ’ಗಾಯೆನ್ ಸರ್ಗಾಕ್ ಗೆಲ್ಯಾರಿ
ಕಿತೆಂ ದಿತಲಿ? ಏಕ್ ಥಾಪೊ ಶೆಣ್ ಮಾತ್ರ್ ನ್ಹಯ್?’,
ಹಾಂಗಾಸರ್ ತೆಚ್ಚ್ ಖಾಸ್ತಾಚೆ ಜರ್ ಸಂಘಟನಾಚೆ ಮುಖೆಲಿ ಜಾವ್ನ್,
ಫಕತ್ತ್ ವೆದಿಚಿಂ ಕಾರ್ಯಿಂ (ಲೊಕಾಕ್ ಜಮಂವ್ಚೆಂ ಆನಿ ಅಪ್ಣಾನ್
ವೆದಿಚೆರ್ ಬೊಸ್ಚೆಂ, ಉಪ್ರಾಂತ್ ಪತ್ರಾಂನಿ ಖಬ್ರೊ ಪರ್ಗಟ್ಚೆಂ, ಫೇಸ್ಬುಕಾಂನಿ,
ವಾಟ್ಸಾಪಾನಿ ವಾಂಟ್ಚೆಂ) ಮ್ಹಣ್ ಚಿಂತ್ಚೆ ಹೆಚ್ಚ್ ’ಗಾಯೆಚ್ಯಾ
ಚಿಂತ್ಪಾಚ್ಯಾನಿ’
ನವೆಂ ವರಸ್ ಕೊಣಾಕ್ ನವೆಂಸಾಂವ್ ಹಾಡುಂ ಕೊಣಾಕ್ ನಾ ಹಾಡುಂ ಪುಣ್
ತುಕಾ ಆನಿ ಮ್ಹಾಕಾ ಪುಣಿಂ ಕಾಂಯ್ ಇಲ್ಲೆಂ ನವೆಂಸಾಂವ್ ಹಾಡುಂ
ಮ್ಹಣುನ್ ಅಶೆತಾಂ, ತುಕಾ ಆನಿ ತುಜ್ಯಾ ಕುಟ್ಮಾಕ್ ಸರ್ವ್ ನವೆಂಸಾಂವ್
(ಬರೆಂಚ್) ಆಶೆತಾಂ,
ಮಾಯಾಮೊಗಾನ್
- ವಲ್ಲಿ ಕ್ವಾಡ್ರಸ್ [ಜನೆರ್, 2017] |
ಬರ್ಪಾಚೆರ್ ವಾಚ್ಪ್ಯಾಂಚಿ
ಪ್ರತಿಕ್ರಿಯಾ |
| |
|
|
|
|
valleyquadros@gmail.com |
ವಲ್ಲಿ
ಕ್ವಾಡ್ರಸ್:
1984 ಥಾವ್ನ್ ಕೊಂಕ್ಣೆಂತ್ ಮಟ್ವ್ಯೊ ಕಾಣ್ಯೊ,
ಕಾದಂಬರಿ, ಕವಿತಾ, ಲೇಖನಾಂ ಬರವ್ನ್ ಆಯಿಲ್ಲೊ, 2004
ಥಾವ್ನ್ 2011 ಮ್ಹಣಾಸರ್ ದಾಯ್ಜ್.ಕೊಮ್ ಅಂತರ್ಜಾಳಿಚೊ
ಸಂಪಾದಕ್ ಜಾವ್ನ್ ವಾವ್ರ್ ಕೆಲಾ. ಕಾಣಿಕ್, ಉದೆವ್,
ಆಮ್ಚೊ-ಯುವಕ್ ಪತ್ರಾಚ್ಯಾ ಸಂಪಾದಕೀಯ್ ಮಂಡಳಿಂತ್ ವಾವ್ರ್
ಕೆಲ್ಲ್ಯಾ ಹಾಣೆ ’ಕುವೇಯ್ಟ್ಗಾರಾಂಚೊ ಝೆಲೊ ವಿಶೇಸ್ ಅಂಕೊ’,
’ದಿವೊ-ದಾಯ್ಜ್’, ’ಮಿತ್ರ್-ದಾಯ್ಜ್’ ತಶೆಂಚ್ ಕರ್ನಾಟಕ್
ಸಾಹಿತ್ಯ್ ಅಕಾಡೆಮಿಚ್ಯಾ ’ಶೆಕ್ಡ್ಯಾಚ್ಯೊ ಮಟ್ವ್ಯೊ
ಕಾಣ್ಯೊ’ ಬುಕಾಂಚೆಂ ಸಂಪಾದನ್ ಕೆಲಾಂ. MBA
ಪದ್ಯುತ್ತರ್ ಸನದ್ ಜೊಡ್ಲಲೊ, ಪ್ರಸ್ತುತ್ IBM ಕಂಪ್ಣೆಂತ್
ಗ್ಲೋಬಲ್ ಟ್ರಾನ್ಸಿಶನ್ ಪ್ರೋಜೆಕ್ಟ್ ಮ್ಯಾನೆಜರ್ ಜಾವ್ನ್
ವಾವ್ರ್ ಕರುನ್ ಆಸಾ. |
संपादकीय -
१०.
डैवर्शन्स, यू
टर्न आनि लैफ |
आध्ल्या वर्सापरिंच ह्यॆ पाव्टिंयी म्हज्या पर्न्या
घर्च्या पर्न्या वोणदिचेर पर्न्या खिळ्याचेर नवेंच
क्यालेंडर उम्कळाय्लां, हांवे सय्त नवि मुस्ताय्कि
हाड्ल्या पुण अपुट कोंक्णेंत बरयिल्लें माताळें
वाचुन हांव कांय नव्या बोत्लिंत्लें पियेलां म्हण
एदोळ्च्च तुवें निर्णय केलोय तर हें पुर्तें लॆखन
तुजेपासत बरयिल्लें जाव्नासा.
नवें वरस म्हज्या क्यालेंडरांत मात्र पुण म्हज्या
जिण्येंत, म्हज्या चिंत्पांत कित्लें नवेंसांव जालां
वा जांव्चें साध्य? म्हाका मेळ्चो सांभाळ तोच्च,
म्हाका कामाक वचुंक तेंच बस्स/आटो/ट्रॆय्न धरुंक
आसा, तेंच आफिस, तोच्च बोस आनि तेच्च समस्से.
उप्रांत हफ्तो अखॆर जाताना तिच्च इगर्ज, तेच्च
इश्ट, तिंच मिटिंगां आनि सक्कड तेंच तर ’नवें कांय
वालिर जांव्चिं गोंय्टां?’. नवें म्हळ्यार खंच्या
सांता/सांतिणिन संसाराक हाडुन यॆंव्क जाय आस्लें?
हाडुन आय्ल्यारी कोणें आम्कां पावित करुंक जाय
आस्लें? (माफ करा - आमि जांव्न कितेंच करिनांव,
आम्कां हेरांनिंच कितेंय करिजाय म्हळ्ळे चिंतप
आम्च्या कट्ट्यांत भरुन गेल्ले आमि देकुन सांग्तां)
आम्च्या घरांत्ल्या मेजांनि बोत्ल्यो नव्यो येतित
पुण आम्चे दीस्पड्ते विचार बदल्नांत, आम्च्या
बाल्कनिंत्ल्यो चट्ट्यो बदल्तित पुण आम्च्या
चिंत्पाचि दिशा बदल्ना, आम्कां सर्वांक बद्लावण
जाय़ पुण आमि जाव्न बद्लुंक सकानांव. देकुन दिसान्दीस
आम्च्या चिंत्पाच्या शेळेर्पणाचो परिणाम भगुन
आसांव.
आतां म्हाका विचार्येता ’ह्या लॆखनाचें माताळें
खंच्या अर्थान अपुट कोंक्णि भासेच्या उत्रांनि
बरयिल्लें?’, हेंच सवाल हांव्यी चिंतुन आसां,
कोंक्णि म्हळ्यार कितें, कोंक्णि कोणाक आनि
कित्याक पडोन गेलां? विचारा ’सौत केनरा कोंकणि
असॊसियॆशन’, वा ’म्यांगलॊर कोंकणि वेल्फॆर
असॊसियॆशन’, व ’युनाय्टेड कोंकणि रैटर्स असॊसियॆशन’
हांतुं कोंक्णि खंय आसा? फकत्त कोंक्णि सभ्द वापार
केल्यार (घासुंक/पुसुंक) कोंक्णि जाता? त्यॆ
अर्थान हांवें वापर केल्ल्या माताळ्यार ’आनि’
म्हळ्ळो सभ्द अपुट कोंक्णेचो.
[माफ करा, हें हांवें खंच्याय एका निर्दिश्ट
संघटनाक उद्दॆशुन बरयिल्लें न्हय, पुण आमि
आप्णायिल्ल्या चिंत्पाचेर मात्सो उज्वाड फांकंव्चा
इराद्यान थोडिं नांवां धाख्ल्याक घेत्ल्यांत]
माताळें आसुं आतां ’ब्युरॊक्रासि’ पळेयां, कोंक्णि
लोकाक वर्सान वरस ऎक कार्यें (सांस्कृतिक) आसा
कर्च्या एकाच्च शेवोटांत आस्चिं असलिं डोंबराट
कोंक्णि संघटनां अम्च्या कोंक्णेंत कित्लिं नांत?
आनि वर्साक ऎक सांस्कृतिक कार्यें कर्चें कांय
इगर्ज मातेचो नवो उपादेस म्हळ्ळेपरिं भर्वसुन, त्यॆ
पासत थोड्या बोडांक एक्टांव्न हुद्दे/पद्वि/अधिकार
आप्णांव्क एकाथराचो ’दोरि वोड्चो स्पर्धो’ कांय नवो?.
तो आस्ल्यार हांव ना, हांव आस्ल्यार अनि कोण ना
म्हळ्ळें चिंतप नवें? पुण हें कित्याक म्हळ्ळें
सवाल कोणेंय केलां? कोणेंय सोड्यां तुवें केलांय?
प्रस्तुत काळार कोंक्णि कार्यिं म्हळ्यार संप्यान
व्याख्यान दितां; ’कांय ऎक-दॊन पत्रांनि कार्याचि
कळव्णि धाड्चि, गर्ज पड्ल्यार जाहीरात दीव्न ति
कळव्णि पर्गट्चि (कित्याक म्हळ्यार जाहीरात
दिल्यार संपादकांक बोल्सांत घाल्लेपरिं, देकुन
कोणाय्चिय ठिका पर्गट जाय्ना) आनि नम्यार्लेल्या
दिसा त्या कार्याक येतेले धा-पंद्रा बोडां, आनि
तांतुं भारा-तेरा (चोव्दा आसुंक्यी पुरो) जणांक
वेदिचेर बसंव्चें आनि तस्वीरो काड्च्यो, मेळ्ल्ल्या
मेळ्ल्ल्याक वेदिचेर आपव्न फुल दिव्न उप्रांत
पत्रांनि ’मान केलो’ म्हण गाजंव्चेंच कोंक्णि
कार्यिं जाल्यांत. आनि असल्या कार्याक कोंक्णि लॊक
यॆना म्हण रुदान. आतां सांगा - हांतुं कांय
नवेसांव आसा? हिच्च संस्कृति/परंपरा मुखारुन वेता,
लाद्रु धा वर्सां अध्यक्ष, पेद्रु पंद्रा वर्सा
अध्यक्ष, उप्रांत दुम्गा, कय्तान म्हणुन कोंक्णेचें
सत्त्यानास. पुण हांगासर हांकां कोंक्णि कलाकार
कोण म्हळ्ळें कळित ना, कोंक्णि भाशा मंडळ म्हळ्ळ्या
संस्थ्याचि वर्दि (मिनुट) सय्त इंग्लिशांत जाता -
हाच्याकी वर्ति कोंक्णेचि खेळ्कुळाय आनि खंय्चर आसा
सांगा.
कोंक्णि कार्यिं जाल्यार आनि ताका टिकेट आसा
जाल्यार ताचो भोंगोस्तोळ अन्यॆक दुरंत, माहेत पत्रां
(लीफ-लेटां) तयार जांव्चि इंग्लिशांत, कळव्णि/वर्दि
जांव्चि इंग्लिशांत. उप्रांत खब्रेवर्दि सय्त ’इंग्लिशांत’,
कोणाक कोंक्णि जाय, ते बसोन जाय जाल्यार तर्जण करा,
पर्गट करा वा फोंडांत पडोन मोरा म्हळ्ळें चिंताप
चिंतेले कोंक्णि कार्भारि. आनि कोंक्णि उद्दार
जाय्त? थोड्यांक धांव्णेंत जिकुंक आसा देकुन ’मांड
कुर्पोण’ म्हळ्ळ्या वस्तुक सय्त दोड्या अर्थाच्या
संभाशणांनि प्रदर्शन करुन ’धाख्लो केला’ म्हण
दांग्रो मार्तात. लॊक कांठाळ्ळा तर्यी तेच्च
नाटकांक फकत्त पॊशक मेळ्तात म्हणुन लोकांक
धाखय्तात. आनि असल्या कोंक्णि मत्भारिं थाव्न
कोंक्णि कित्तुन पाव्तलि म्हळ्ळें तुमिंच चिंता.
ऎक नाटक ’क्वालिटि (गुण्मट्ट) वर्विं चलुंक जाय
शिवाय संखो (क्वांटिटि) वर्विं न्हय’. आतां एका
सांग्णेचो उडास येता, हाग्ताना एक्लो भुर्गो भाक्रि
खातालो देकुन ताच्ये आवय्न सांग्लें खंय ’अळे पुता,
हाग्ताना भाक्रि खाय्नाका’, आनि पुतान जाप दिलि
खंय ’हांव बुडव्न खातां, तुं कितें कर्ताय?’, आम्चा
कोंक्णेंत सय्त तेंच जालां, बुडव्न खातेलेच्च
मुखेलि तर, लोकां थाव्न कितें अपॆक्शा करुयेता
म्हळ्ळें तुमिंच चिंतुन पळेया.
आतां म्हाका
चा.फ्रा.दे’कॊस्ताच्या एका कवितेंत्ल्या उत्रांचो
उडास येता ’गायेन सर्गाक
गेल्यारि कितें दितलि? ऎक थापो शेण मात्र न्हय?’,
हांगासर तेच्च खास्ताचे जर संघटनाचे मुखेलि जाव्न,
फकत्त वेदिचिं कार्यिं (लोकाक जमंव्चें आनि अप्णान
वेदिचेर बोस्चें, उप्रांत पत्रांनि खब्रो पर्गट्चें,
फॆस्बुकांनि, वाट्सापानि वांट्चें) म्हण चिंत्चे
हेच्च ’गायेच्या चिंत्पाच्यानि’
नवें वरस कोणाक नवेंसांव हाडुं कोणाक ना हाडुं पुण
तुका आनि म्हाका पुणिं कांय इल्लें नवेंसांव हाडुं
म्हणुन अशेतां, तुका आनि तुज्या कुट्माक सर्व
नवेंसांव (बरेंच) आशेतां,
मायामोगान
- वल्लि
क्वाड्रस (जनेर
२०१७) |
|
valleyquadros@gmail.com |
वल्लि
क्वाड्रस: १९८४ थाव्न कोंक्णेंत मट्व्यो काण्यो,
कादंबरि, कविता, लॆखनां बरव्न आयिल्लो, २००४ थाव्न
२०११ म्हणासर दाय्ज.कोम अंतर्जाळिचो संपादक जाव्न
वाव्र केला. काणिक, उदेव, आम्चो-युवक पत्रांनि
संपादकीय वाव्र केल्ल्या हाणे ’कुवॆय्ट्गारांचो
झेलो विशॆस अंको’, ’दिवो-दाय्ज’, ’मित्र-दाय्ज’
तशेंच कर्नाटक कोंक्णी साहित्य अकाडेमिच्या
’शेक्ड्यांच्यो मट्व्यो काण्यो’ बुकाचें संपदन केलां.
MBA शिकाप जोडुन सद्द्याक IBM कंपेनिंत ग्लॊबल
ट्रान्सिशन प्रॊजेक्ट म्यानेजर जाव्न वाव्र करुन
आसा. |
|
|
ದಾಯ್ಜ್.ಕೊಮ್ |
|
2004 ಥಾವ್ನ್
2011 ಪರ್ಯಾಂತ್ ಕಾರ್ಯಾಳ್ ಆಸ್ಲ್ಲ್ಯಾ
ದಾಯ್ಜ್.ಕೊಮ್ ಚೆರ್
ಪರ್ಗಟ್ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ
ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್
ಲಾಭಯ್ತೆಲ್ಯಾಂವ್. | |
| |
|
|