ಕೊಂಕ್ಣಿ
ಕಲಾಕ್ಶೇತ್ರಾಂತ್ ಸುಮಾರ್ ವರ್ಸಾಂ ಹೆವ್ಶಿನ್ ಪ್ರತಿಭೆವಂತ್
ನಟಿ ಅಪ್ರೂಪ್ ಪಳೆಂವ್ಕ್ ಮೆಳ್ತಾಲಿಂ. ಪುಣ್ ಆಮ್ಚೊ ಲೋಕ್
ಶಿಕಪ್ ಜೊಡುನ್ ಉಂಚ್ಲ್ಯಾ ಪಾಂವ್ಡಾರ್ ಪಾವ್ತಾನಾ, ಆತಾಂ
ಚಲಿಯಾಂಕ್ ಸ್ವತಂತ್ರ್ ಥರಾನ್ ವಿವಿಧ್ ಶೆತಾಂನಿ ವೃದ್ಧಿ
ಕರುಂಕ್ ಆವ್ಕಾಸ್ ಲಾಭ್ಲಾ. ತಸೆಂ ಜಾವ್ನ್ ಆಜ್ ಸಭಾರ್
ಪ್ರತಿಭೆವಂತ್ ಚಲಿಯೊ ವೆವೆಗ್ಳ್ಯಾ ಭಾಸೆಚ್ಯಾ ಪಿಂತುರಾನಿಂ
ದಿಶ್ಟಿಕ್ ಪಡ್ತಾತ್. ಆನಿ ಅಸಲ್ಯಾ ಪ್ರತಿಭೆವಂತ್ ನಟಿ ಪೈಕಿ
ಏಕ್ ಪರ್ಜಳ್ಚೆಂ ನೆಕೆತ್ರ್ ಜಾವ್ನಾಸಾ ಸೀಮಾ ಬುತೆಲ್ಲೊ.
"ಪ್ಲಾನಿಂಗ್ ದೆವಾಚೆಂ" ಕೊಂಕ್ಣಿ ಪಿಂತುರಾಂತ್ ಪ್ರಮುಖ್
ನಟಿ ಜಾವ್ನ್ ಪರ್ಜಳ್ಚೆಂ ಕುಂದಾಪುರಾಂತ್ಲೆಂ ನೆಕೆತ್ರ್
ಸೀಮಾ ಬುತೆಲ್ಲೊ, ಕೊಂಕ್ಣಿ ಕಲಾ ಸಂಸಾರಾಂತ್ ಉದೆವ್ನ್
ಯೆಂವ್ಚೆಂ ಏಕ್ ಪ್ರತಿಭೆವಂತ್ ಕಲಾಕರ್. ಹಾಲಿಂತ್ ಕೊಂಕ್ಣಿ
ಭಾಸೆಂತ್ ಕಾಂಯ್ ಥೊಡಿಂ ಉಂಚ್ಲ್ಯಾ ಮಟ್ಟಾಚಿಂ ಪಿಂತುರಾಂ
ಪಡ್ದ್ಯಾರ್ ಪಡ್ಲ್ಯಾಂತ್ ಆನಿ ಮುಖಾರೀಂಯ್ ಯೆಂವ್ಚ್ಯಾರ್
ಆಸಾತ್. ಆಸೆಂ ಆಸ್ತಾಂ ಹ್ಯಾ ಪಿಂತುರಾನಿಂ ಸಭಾರ್ ನಟ್-ನಟಿ
ಕೊಂಕ್ಣೆಂತ್ ಆಮ್ಕಾಂ ಮೆಳ್ಳ್ಯಾಂತ್. ಕೊಂಕ್ಣಿ ಶೆತಾಂತ್ಚ್ಚ್
ನ್ಹಯ್, ಹಿಂದಿ, ಇಂಗ್ಲಿಶ್, ಕನ್ನಡ್, ಮಳಯಾಳಮ್, ತಮಿಳ್
ಆನಿ ತೆಲುಗು ಭಾಸೆಚ್ಯಾ ಪಿಂತುರಾನಿಂಯ್ ಆತಾ’ತಾಂ
ಕೊಂಕ್ಣೆಚಿ ತಾರಾಂ ಪರ್ಜಳ್ತಾತ್.
ಕುಂದಾಪುರ್ಚ್ಯಾ
ಗುಜ್ಜಾಡಿ-ಂತ್ ಶ್ರೀ ವಿ.ವಿ.ಬುತೆಲ್ಲೊ ಆನಿ ಶ್ರೀಮತಿ
ಸಿಲೈನ್ ಬುತೆಲ್ಲೊ ಕುಟ್ಮಾಂತ್ ಜಲ್ಮೊನ್ ಫುಲೊನ್ ವಾಡ್ಲೆಂ.
ಪಿ.ಯು.ಸಿ. ಪರ್ಯಾಂತ್ ಗಂಗೊಳ್ಳಿಂತ್ ಶಿಕೊನ್ ಉಪ್ರಾ೦ತ್
ಕುಂದಾಪುರ್ ಭಂಡಾರ್ಕಾರ್ಸ್ ಕಾಲೆಜಿಂತ್ ಬಿ.ಎ. ಪದ್ವಿ
ತಾಣೆ ಜೊಡ್ಲಿ ಆನಿ ಉಪ್ರಾಂತ್ ಮೈಸೂರ್ ಯುನಿವೆರ್ಸಿಟಿ
ಥಾವ್ನ್ ಎಮ್.ಬಿ.ಎ. ಕರುನ್ ಆತಾಂ ಸದ್ದ್ಯಾಕ್
ಬೆಂಗ್ಳುರಾಂತ್ ಏಕಾ ಪ್ರಾಖ್ಯಾತ್ ಐ.ಟಿ. ಕಂಪೆನೀಂತ್
ಪ್ರೊಡಕ್ಟ್ ಮೆನೆಜರ್ ಜಾವ್ನ್ ವಾವ್ರ್ ದೀವ್ನ್ ಆಸಾ.
ಕೊಂಕ್ಣಿ, ಕಾನಡಿ, ಇಂಗ್ಲಿಶ್, ಹಿಂದಿ, ಮರಾಟಿ, ತಮಿಳ್ ಆನಿ
ಮಳಯಾಳಮ್ ಭಾಸೊ ಸಯ್ತ್ ಉಲಂವ್ಕ್ ಸಕ್ತಾ.
ವಿವಿಧ್ ತಾಲೆಂತಾನಿ
ಅವ್ವ್ಹಲ್ ಆಸ್ಲ್ಲೆಂ ಸೀಮಾ, 1992 -ಂತ್ ಥಾವ್ನ್ಂಚ್
ಕನ್ನಡಾ ಆನಿ ಕೊಂಕ್ಣಿ ಕಲಾ ಕ್ಶೇತ್ರಾನಿಂ ನಾಂವ್ ಜೊಡುಂಕ್
ಲಾಗ್ಲೆಂ. 2006-ಂತ್ "ಸ್ಮಯ್ಲ್" ಟಿ.ವಿ. ಹಾಂತುಂ
ಕಾರ್ಯಾನಿರ್ವಾಹಕಿ ಜಾವ್ನ್ ವಿವಿಧ್ ಪ್ರದರ್ಶನಾ ತಾಣೆ
ಚಲವ್ನ್ ವೆಲ್ಯಾಂತ್. ಪ್ರಖ್ಯಾತ್ ನಿರ್ದೆಶಕ್ ವಿನೊದ್
ಗಂಗೊಳ್ಳಿ ನಿರ್ದೆಶಿತ್ "ಡ್ರೀಮ್ ಗರ್ಲ್" ಮ್ಹಳ್ಳ್ಯಾ
ಟೆಲೆ-ಪಿಂತುರಾಂತ್ ತಾಣೆ ನಟನ್ ಕೆಲಾಂ. ಆನಿ ತಾಚೆ
ಉಪ್ರಾಂತ್ ತಾಣೆ ಪಾಟಿಂ ಪಳೆಲ್ಲೆಂ ನಾಂ.
ಹವ್ಯಾಸಿ
ಪ್ರತಿರೂಪಕ್ (ಮೊಡೆಲ್) ಜಾವ್ನಾಸ್ಚೆಂ ಸೀಮಾ ಬುತೆಲ್ಲೊ, "ಸೌತ್
ಇಂಡಿಯಾ ಕ್ವೀನ್"
2015-ಂತ್ ಸೌತ್ ಇಂಡಿಯಾ ಕ್ವೀನ್ -"ಮೊಸ್ಟ್
ಬಿವ್ಟಿಫುಲ್ ಐಜ್" ವಿಭಾಗಾಂತ್ ಪಯ್ಲೆಂ ಸ್ಥಾನ್, ಆನಿ
’ಸೌತ್ ಇಂಡಿಯಾ ಕ್ವೀನ್ ಪ್ರಥಮ್ ರನ್ನರ್ಅಪ್’ ತಸೆಂಚ್ "ಮಿಸ್ಸ್
ಕರ್ನಾಟಕಾ" ಹಾಂತುಂಯ್ "ಪ್ರಥಮ್ ರ್ರನ್ನರ್ಅಪ್" ಜಾವ್ನ್
ವಿಂಚೊನ್ ಆಯ್ಲೆಂ. ಎದೊಳ್ಚ್ ಆನ್ಯೇಕ್ ಎಡ್ ಫಿಲ್ಮಾನಿಂ,
ಮ್ಯುಸಿಕ್ ವಿಡಿಯೊ ಆನಿ ಪ್ರಿಂಟ್ ಮಿಡಿಯಾನಿಂ ತೆಂ ಝಳ್ಕೊನ್
ಆಸಾ.
ಪ್ರಸ್ತುತ್ ವೆಗಿಂಚ್
ಪಡ್ದ್ಯಾರ್ ಯೆಂವ್ಚ್ಯಾ "ಪ್ಲಾನಿಂಗ್ ದೆವಾಚೆಂ" ಕೊಂಕ್ಣಿ
ಆನಿ "ಹಶ್" ಮ್ಹಳ್ಳ್ಯಾ ಕನ್ನಡಾ ಪಿಂತುರಾನಿ ಪ್ರಮುಖ್ ನಟಿ
ಜಾವ್ನ್ ಕಾಮ್ ಕರುನ್ ಆಸಾ.
-
ಪ್ರಸನ್ನ ನಿಡ್ಡೋಡಿ.
|