1. ಹ್ಯಾರಿಯಾಬ್ -
ಬಾರ್ಕುರಾಂತ್ ಭೋಜ್ಪುರಿ ಉಲಯ್ತಾತ್ ಮ್ಹಣುನ್ ಅಮ್ಕಾಂ
ಕಳಿತ್ ನಾತ್ಲ್ಲೆಂ, ಹ್ಯೇವಿಶಿಂ ಕಾಂಯ್ ಸಾಂಗ್ಶಾತ್?
ಜ: (ಹಾಸುನ್) ಬಾರ್ಕುರಾಂತ್ ಭೋಜ್ಪುರಿ ಉಲಯ್ನಾಂತ್,
ಹಾಂವ್ ಜಲ್ಮೊನ್ ವ್ಹಡ್ ಜಾಲ್ಲೊಂ ಮುಂಬಯಾಂತ್ ತರ್ಯೀ,
ಮ್ಹಜೊ ಬಾಪ್ ಮೂಳ್ ಬಾರ್ಕುರ್ಚೊ. ಹಾಂವ್ ಚ್ಯಾರ್-ಪಾಂಚ್
ವರ್ಸಾಂಚೊ ಆಸ್ತಾನಾ, ಮ್ಹಜಿ ಆಜಿ (ಅಮಾಯ್) ಭಲಾಯ್ಕೆಂತ್
ಬರಿ ನಾತ್ಲ್ಲಿ ದೆಕುನ್ ಮ್ಹಾಕಾ ಪಪ್ಪಾನ್ ಬಾರ್ಕುರ್
ಧಾಡುನ್, ಥಂಯ್ಚ್ಯಾ ಇಸ್ಕೊಲಾಂತ್ ಪ್ರಾಥಮಿಕ್ ಶಿಕಪ್
ಜೊಡುಂಕ್ ಆವ್ಕಾಸ್ ಕರುನ್ ದಿಲೊ. ಹಾಂವ್ ತಿಸ್ರಿ/ಚೊವ್ತಿ
ಕ್ಲಾಸ್ ಪರ್ಯಾಂತ್ ಬಾರ್ಕುರಾಂತ್ ಶಿಕುನ್ ಆಸ್ತಾನಾ
ಮ್ಹಜ್ಯಾ ಅಜಿಯೆಚೆಂ ಮರಣ್ ಜಾಲೆಂ, ದೆಕುನ್ ಮ್ಹಾಕಾ ಪರತ್
ಮುಂಬಯಾಕ್ ವಚುಂಕ್ ಪಡ್ಲೆಂ, ಆನಿ ಮುಂಬಯಾಂತ್ ಪರತ್ ಹಾಂವ್
ಮರಾಟಿ ಮೀಡಿಯಮಾಂತ್ ಪಯ್ಲೆ ಕ್ಲಾಸಿಕ್ ಭರ್ತಿ ಜಾಲೊಂ ಆನಿ
ಮುಂಬಯಾಂತ್ ಜಶೆಂ ಚಡ್ತಾವಾಂಕ್ ಹೆರ್ ಭಾಸೊ ಶಿಕುಂಕ್
ಆವ್ಕಾಸ್ ಲಾಭ್ಚೆಪರಿಂ ಮ್ಹಾಕಾಯ್ ಮರಾಠಿ, ಹಿಂದಿ, ಭೋಜ್ಪುರಿ
ಆನಿ ಹೆರ್ ಭಾಸೊ ಸಯ್ತ್ ಶಿಕುಂಕ್ ಆವ್ಕಾಸ್ ಲಾಭ್ಲೊ ಆನಿ
ಅಶೆಂ ಮ್ಹಾಕಾ ಭೋಜ್ಪುರಿ ಫಿಲ್ಮ್ ನಿರ್ದೇಶನಾಂತ್ ಆವ್ಕಾಸ್
ಲಾಭ್ಲೊ ಆನಿ ಹಾಂವೆಂ ತೊ ಗಳ್ಸಿಲೊ.
2. ತುಮ್ಕಾಂ ಫಿಲ್ಮ್
ನಿರ್ದೇಶನಾಚಿ ಅಭಿರುಚ್ ಖಂಯ್ ಥಾವ್ನ್ ಆನಿ ಕಸಿ ಸುರು
ಜಾಲ್ಲಿ?
ಜ: ಹಾಂವ್ ಭುರ್ಗ್ಯಾಪಣಾರ್ ಥಾವ್ನ್ ಸಾಂಸ್ಕೃತಿಕ್
ಕಾರ್ಯಾಂನಿ ಕಾರ್ಯಾಳ್ ಜಾವ್ನ್ ಆಸ್ತಾಲೊಂ, ಇಸ್ಕೊಲಾಂತ್
ತಶೆಂಚ್ ಹೈಸ್ಕೂಲಾಂತ್ ಸಯ್ತ್. ಉಪ್ರಾಂತ್ ಶಿಕಪ್ ಸಂಪವ್ನ್
ಹಾಂವ್ ರೈಲ್ವೇಂತ್ ಕಾಮ್ ಕರುಂಕ್ ಲಾಗ್ಲ್ಲೊಂಚ್ ಮ್ಹಜ್ಯಾ
ಸಾಂಸ್ಕೃತಿಕ್ ತಾಲೆಂತಾಕ್ ಲಾಗುನ್ ಮ್ಹಾಕಾ ರೈಲ್ವೇಂತ್
ಸಯ್ತ್ ನಟನ್, ನಿರ್ದೇಶನಾಕ್ ಆವ್ಕಾಸ್ ಲಾಭ್ಲೊ ಆನಿ ಆಮಿ
ಸಯ್ತ್ ಕಾಂಯ್ ಶೆಂಭೊರಾಂ ವಯ್ರ್ ಖೆಳ್ ಬರವ್ನ್/ನಟನ್/ನಿರ್ದೇಶನ್
ಕರುನ್ ಇನಾಮಾಂ ಆಪ್ಣಾಯ್ಲ್ಯಾಂತ್.
3. ಕೊಂಕ್ಣಿ ಸಮಾಜ್ ಲ್ಹಾನ್,
ಕೊಂಕ್ಣಿ ಲೊಕಾಚೆಂ ಚಿಂತಾಪ್ ಲ್ಹಾನ್, ಅಶೆಂ ಆಸ್ತಾನಾ
ಕೊಂಕ್ಣಿ ಫಿಲ್ಮಾಚೆಂ ನಿರ್ದೇಶನ್ ಕರುಂಕ್ ತುಮ್ಕಾಂ ಕಶಿ
ವೋಡ್ ಆಯ್ಲಿ ಆನಿ ಹ್ಯೇವಿಶಿಂ ತುಮ್ಚೆ ವಿಚಾರ್ ಕಸಲೆ?
ಜ: ಕೊಂಕ್ಣಿ ಲೊಕಾಚೆಂ ಕಾಳಿಜ್ ವ್ಹಡ್ ದೆಕುನ್. ಸತ್
ಸಾಂಗ್ಚೆಂ ತರ್, ಹಾಂವೆಂ ಮರಾಠಿ ಜಾಂವ್, ಭೋಜ್ಪುರಿ
ಭಾಸೆಂತ್ ಜಾಂವ್ ಇತ್ಲಿಂ ಫಿಲ್ಮಾಂ ನಿರ್ದೇಶನ್ ಕೆಲಿಂ,
ಪುಣ್ ಎಕಾರಿತಿಚೊ ಪರ್ಕಿ ಮ್ಹಳ್ಳೆಪರಿಂ ಆಸ್ಲೊಂ. ಪುಣ್
ಕೊಂಕ್ಣಿ ಫಿಲ್ಮ್ ನಿರ್ದೇಶಕ್ ಜಾವ್ನ್ ಆಜ್ ಮ್ಹಾಕಾ ಜೊ
ಕೊಂಕ್ಣಿ ಲೋಕ್ ವ್ಹಳ್ಕತಾ ಆನಿ ಮಾನ್ ದಿತಾ ತೆಂ ಪಳೆಂವ್ಕ್
ಕಾಳಿಜ್ ಭರುನ್ ಯೆತಾ. ಕೊಂಕ್ಣಿ ಭಾಸ್ ಮೊಗಾಚಿ ಭಾಸ್ ಆನಿ
ಕೊಂಕ್ಣಿ ಲೋಕ್ ಮಾಯಾಮೊಗಾಚೊ ಲೋಕ್ ದೆಕುನ್ ಆಜ್ ಮ್ಹಾಕಾ
ಸಯ್ತ್ ತುಮ್ಚೆಸವೆಂ ಮೆಳ್ಚೊ ಆವ್ಕಾಸ್ ಲಾಭ್ಲಾ ಮ್ಹಣ್ತಾನಾ
ಖಂಡಿತ್ ಜಾವ್ನ್ ಕೊಂಕ್ಣಿ ಫಿಲ್ಮಾಚೆಂ ನಿರ್ದೇಶನ್ ಕರ್ಚಿ
ಮ್ಹಜಿ ಪಯ್ಲಿ ಖಾಯ್ಸ್ ಮ್ಹಣುನ್ ಚಿಂತಾಂ.
ದುಸ್ರೆಂ - ಆಮ್ಚೊ ಜಾಯ್ತೊ ಲೋಕ್ ಮ್ಹಾಕಾ ಸೊಧುನ್ ಯೆತಾ
ಆನಿ ಮ್ಹಾಕಾ ವ್ಹಳ್ಕತಾ. ಹಾಂವ್ ಏಕ್ ನಿರ್ದೇಶಕ್,
ಫಿಲ್ಮಾಚೊ ಹೀರೊ/ಹಿರೋಯಿನ್ ಹಾಂಕಾಂ ಲೊಕಾಂನಿ ವ್ಹಳ್ಕುಂಚೆಂ
ಆನಿ ಮೆಳ್ಚೆಂ ಸಹಜ್ ಪುಣ್ ನಿರ್ದೇಶಕಾಕ್ ಚಡ್ತಾವ್ ಜಾವ್ನ್
ವ್ಹಳ್ಕುಂಚೆ ಉಣೆಂ, ಕಿತ್ಯಾಕ್ ಮ್ಹಳ್ಯಾರ್ ತಾಚೊ ವಾವ್ರ್
ಪರ್ದ್ಯಾಪಾಟ್ಲೊ. ಪುಣ್ ಕೊಂಕ್ಣೆಂತ್ ಎಕ್ ನಿರ್ದೇಶಕ್
ಜಾಲ್ಲೆನಿಮ್ತಿಂ ಆಜ್ ಲೋಕ್ ಮ್ಹಾಕಾ ವ್ಹಳ್ಕತಾ ತೆಂ ಮ್ಹಜೆಂ
ನಶಿಬ್ ಮ್ಹಣ್ ಹಾಂವ್ ಮಾಂದುನ್ ಘೆತಾಂ.
4. ಕೊಂಕ್ಣಿ ಫಿಲ್ಮಾಂ ಹೆರ್
ಫಿಲ್ಮಾಂಸವೆಂ ತುಲನ್ ಕರ್ತಾನಾ ಖಂಚ್ಯಾ ಪಾಂವ್ಡಾರ್ ಆಸಾತ್
ಮ್ಹಣ್ತಾತ್ ತುಮಿ? ಕೊಂಕ್ಣೆಂತ್ ಸಿಂತಿಮೆಂತಾಂ ಮಾತ್ರ್
ಶಿವಾಯ್ ವೃತ್ತಿಪರ್ ಚಿಂತಪ್ ನಾ ಮ್ಹಣ್ತಾಂ ಹಾಂವ್, ತುಮಿ
ಕಿತೆಂ ಮ್ಹಣ್ತಾತ್?
ಜ: ವ್ಹಯ್ ಸಿಂತಿಮೆಂತಾಂ ಜರೂರ್ ಆಸಾತ್, ಕಿತ್ಯಾಕ್
ಮ್ಹಳ್ಯಾರ್ ಕೊಂಕ್ಣಿ ಕಲಾಕಾರ್ ಚಡ್ತಾವ್ ಸಿಂತಿಮೆಂತಾಳ್,
ಆನಿ ಕೊಂಕ್ಣೆಂತ್ ವೃತ್ತಿಪರತಾಯ್ ಹಾಡಂವ್ಕ್ ಸಾಧ್ಯ್ ಆಸಾ.
ಆಧಿಂ ಏಕ್ ಫಿಲ್ಮ್ ಕಾಡ್ಚೆಂ ಮ್ಹಳ್ಯಾರ್ ಭೋವ್ ಕಶ್ಟಾಂಚೆಂ
ಕಾಮ್ ಜಾವ್ನಾಸ್ಲೆಂ, ಪುಣ್ ಆಜ್ ತಾಂತ್ರಿಕತಾ ಇತ್ಲಿ
ಸಲೀಸಾಯೆನ್ ಲಾಭ್ತಾ ಮ್ಹಳ್ಯಾರ್ ಉಣ್ಯಾ ಬಜೆಟಿಂತ್ ಸಯ್ತ್
ಬರೆಂ ಫಿಲ್ಮ್ ಕಾಡುಂಕ್ ಸಾಧ್ಯ್ ಆಸಾ. ಹಾಂವೆಂ ’ನಶಿಬಾಚೊ
ಖೆಳ್’ ಫಿಲ್ಮಾಂತ್ ಕಾಂಯ್ ಪಂಚ್ವೀಸ್ ಠಕ್ಕೊ ವಾವ್ರ್ ಕೆಲಾ,
ಸೋಫಿಯಾಂತ್ ಪನ್ನಾಸ್ ಥಕ್ಕೊ ವಾವ್ರ್ ಕೆಲಾ, ಫುಡೆಂ
ಆವ್ಕಾಸ್ ಲಾಭ್ಲೊ ತರ್ ಶೆಂಭೊರ್ ಠಕ್ಕೊ ವಾವ್ರ್ ಕರುನ್
ಧಾಖಯ್ತಲೊಂ ಮ್ಹಳ್ಳೊ ಭರ್ವಸೊ ಮ್ಹಾಕಾ ಆಸಾ.
5. ಕೊಂಕ್ಣೆಂತ್ ಇತ್ಲೆಂ ಬರೆಂ
ನಟನಾಚೆಂ ತಾಲೆಂತ್ ತುಮಿ ಸೊಧುನ್ ಕಾಡ್ಲಾಂ ತರ್ಯೀ
ಕೊಂಕ್ಣೆಂತ್ ತಾಲೆಂತಾಚೊ ಬೊರ್ಗೊಳ್ ಆಸಾ ಮ್ಹಣ್ ತುಮ್ಕಾಂ
ಭಗ್ತಾ?
ಜ: ಭಿಲ್ಕುಲ್ ನಾ, ಕೊಂಕ್ಣೆಂತ್ ಯಥೇಶ್ಟ್ ಮಾಪಾಚೆಂ
ತಾಲೆಂತ್ ಆಸಾ, ನಶಿಬಾಚೊ ಖೆಳ್ ಫಿಲ್ಮಾಂತ್ ಚ್ಯಾರ್
ಅಪುರ್ಭಾಯೆಚಿಂ ತಾಲೆಂತಾಂ ಪರ್ಜಳ್ಳಿಂ, ಸೋಫಿಯಾ ಫಿಲ್ಮಾಂಕ್
ಆನಿ ದೋನ್ ತಾಲೆಂತಾಂ ಮೆಳ್ಳಿಂ, ಕೊಂಕ್ಣೆಂತ್ ಜಾಯ್ತೆಂ
ತಾಲೆಂತ್ ಆಸಾ, ಆನಿ ಜೊಕ್ತೊ ಆವ್ಕಾಸ್ ಲಾಭ್ಲೊ ತರ್
ಕೊಂಕ್ಣಿ ಸಮಜ್ ತಸ್ಲ್ಯಾ ತಾಲೆಂತಾಕ್ ಸಯ್ತ್ ವಳ್ಕುಂಕ್
ಲಾಗ್ತಲೊ ಮ್ಹಳ್ಳೊ ಮ್ಹಜೊ ಭರ್ವಸೊ.
ಕೊಂಕ್ಣೆಂತ್ಲ್ಯಾ ಫಿಲ್ಮಿ ತಾಲೆಂತಾನ್ ಮ್ಹಾಕಾ ಸಂಪರ್ಕ್
ಕರುಂಕ್ ಮ್ಹಜಿ
ಇಮೇಯ್ಲ್.
6. ತುಮ್ಕಾಂ ಫಿಲ್ಮ್
ನಿರ್ದೇಶನಾಕ್ ಪ್ರೇರಣ್ ಆನಿ ಮಾರ್ಗ್ದರ್ಶನ್ ಕಶೆಂ ಲಾಭ್ಲೆಂ
ಮ್ಹಣ್ ಸಾಂಗ್ಶಾತ್?
ಜ: ಮ್ಹಜ್ಯಾ ಪತಿಣೆಚೊ ಮಾವ್ಳೊ ಹಿಂದಿಚೊ ನಾಮ್ಣೆಚೊ
ನಿರ್ದೇಶಕ್ ’ಲಾರೆನ್ಸ್ ಡಿ’ಸೋಜ್’ (1991 ಇಸ್ವೆಂತ್ ಸುಪರ್ಹಿಟ್
ಹಿಂದಿ ಫಿಲ್ಮ್ 'ಸಾಜನ್' ನಿರ್ದೇಶಕ್), ಆನಿ
ಹಾಚೆಥಾವ್ನ್ ಮ್ಹಾಕಾ ಜಾಯ್ತೆಂ ಶಿಕುಂಕ್ ಮೆಳ್ಳೆಂ, ತಶೆಂಚ್
ಮ್ಹಜ್ಯಾ ನಟನ್/ನಿರ್ದೇಶನಾಚಿ ಸುರ್ವಾತ್ ಜಾಲ್ಲಿಚ್ಚ್
ಮರಾಠಿ ರಂಗ್ಮಾಂಚಿಯೆರ್, ಮರಾಠಿ ನಾಟಕಾಂನಿ ಮ್ಹಾಕಾ
ಜಾಯ್ತೆಂ ಶಿಕುಂಕ್ ಮೆಳ್ಳೆಂ.
7. ಕೊಂಕ್ಣೆಂತ್ ತುಮ್ಚೆ
ವ್ಹಡ್ಲೆಂ ಸ್ವಪಾಣ್ ಕಸಲೆಂ?
ಜ: ಕೊಂಕ್ಣೆಂತ್ ಏಕ್ ಉಂಚ್ಲೆಂ ಫಿಲ್ಮ್ ಕಾಡುಂಕ್ ಜಾಯ್,
ಕೊಂಕ್ಣಿ ಫಿಲ್ಮಾಕ್ ಸಯ್ತ್ ’ಓಸ್ಕರ್’ ಪುರಸ್ಕಾರಾಕ್
ಪಾವಂವ್ಕ್ ಜಾಯ್ ಮ್ಹಳ್ಳೆಂಚ್ಚ್ ಮ್ಹಜೆಂ ವ್ಹಡ್ಲೆಂ
ಕೊಂಕ್ಣಿ ಸ್ವಪಾಣ್.
8. ಹೆಂ ಸಾಧ್ಯ್ ಜಾಂವ್ಚೆಂ
ಸ್ವಪಾಣ್ ಮ್ಹಣ್ ತುಮ್ಕಾಂ ಭಗ್ತಾ?
ಜ: ಕಿತ್ಯಾಕ್ ಸಾಧ್ಯ್ ಜಾಂವ್ಕ್ ನ್ಹಜೊ? ಆಜ್ ಬರೆಂ ಬಂಗಾಲಿ
ಫಿಲ್ಮ್, ಬರೆಂ ಮರಾಠಿ ಫಿಲ್ಮ್ ಸಯ್ತ್ ’ಓಸ್ಕರ್’
ಪುರಸ್ಕಾರಾಕ್ ಪಾವ್ತಾನಾ ಕೊಂಕ್ಣೆಂತ್ ಸಯ್ತ್ ಬರೆಂ ಫಿಲ್ಮ್
ಕಾಡುಂಕ್ ಭಿಲ್ಕುಲ್ ಸಾಧ್ಯ್ ಆಸ್ತಾನಾ ಕಿತ್ಯಾಕ್ ಆಮಿ
ಫುಡ್ಲೆಂ ಚಿಂತಾಪ್ ಚಿಂತುಂಕ್ ನ್ಹಜೊ?
9. ಕೊಂಕ್ಣೆಂತ್ ತುಮ್ಕಾಂ
ಆಯ್ಕುಂಕ್ ಮೆಳ್ಲ್ಲಿ ಖೊಡ್/ಠೀಕಾ ಸಾಂಗ್ಶಾತ್?
ಜ: ಸತ್ ಸಾಂಗ್ಚೆಂ ತರ್, ಕೊಂಕ್ಣಿ ಲೋಕ್ ದಾಕ್ಶೆಣೆಚೊ ಆನಿ
ಸಾದೊ, ಫಕತ್ತ್ ಬರೆಂಪಣಾವಿಶಿಂ ಉಲ್ಲೇಕ್ ಕರ್ತಾ ಆನಿ
ಉಣೆಪಣಾವಿಶಿಂ ಉಲಯ್ನಾ, ಪುಣ್ ಏಕ್ ಜವಾಭ್ದಾರೆಚೊ
ನಿರ್ದೇಶಕ್ ಜಾವ್ನ್ ಎಕಾ ಫಿಲ್ಮಾಂತ್ ಜಾಲ್ಲ್ಯೊ ಚುಕಿ
ಹಾಂವೆಂ ದೆಖ್ಲ್ಯಾತ್ ಆನಿ ತಾಚೆಂ ಸುಧ್ರಾಪ್ ಕರ್ಚೆಂ
ಪ್ರೇತನ್ ಸಯ್ತ್ ಕೆಲಾಂ ಆನಿ ಏಕ್ ಕಲಾಕಾರ್ ಜಾವ್ನ್ ಅಸಲ್ಯಾ
ಸಮಾಜೆಕ್ ಬರೆಂಚ್ ದಿಂವ್ಚೆಂ ಮ್ಹಜೆಂ ಕಾಮ್ ಜ್ಯಾರಿ
ಆಸ್ತೆಲೆಂಚ್.
10. ’ನಶಿಬಾಚೊ ಖೆಳ್’
ಫಿಲ್ಮಾಂತ್ ಇತ್ಲೆಂ ಬರೆಂ ಮಕ್ಕರ್ ಆಸಾ ಮ್ಹಳ್ಯಾರ್ ಲ್ಹಾನ್ಪಣಾರ್
ದೊತೊರ್ನೆಚ್ಯಾ ಕ್ಲಾಶೆಂತ್ ಸಿಸ್ಟೆರಿನ್ ಸರ್ವಾಂಕ್
ಜೆಜುವಿಶಿಂ ದೋನ್ ವಾಖ್ಯ್ ಸಾಂಗುಂಕ್ ಕೆಲ್ಲೊ ಉಡಾಸ್ ಯೆತಾ,
ಎಕ್ಲ್ಯಾಚಿ ಜವಾಬ್ ಜಾವ್ನಾಸ್ಲಿ; ’ಜೆಜು ಕ್ರೀಸ್ತಾಂವ್,
ಜೆಜು ಕೊಂಕ್ಣಿ ಉಲಯ್ತಾ’. ಫಿಲ್ಮಾಚ್ಯಾ ಸುರ್ವಾತೆಂತ್
ಪಾದ್ರಿಚ್ಯಾ ಉಲವ್ಪಾನ್ ಫಿಲ್ಮಾಕ್ ಏಕ್ ಮೇಟ್ ಸಕ್ಲಾ
ದೆಂವಯ್ಲೆಂ, ಕೊಂಕ್ಣಿ ಫಿಲ್ಮ್ ಕ್ರಿಸ್ತಾಂವಾಂಚೆಂ,
ಮಂಗ್ಳುರ್ಗಾರಾಂಚೆಂ ಮಾತ್ರ್ ನ್ಹಯ್. ಇತ್ಲೆಂಚ್ ನ್ಹಯ್,
ಕೊಂಕ್ಣಿ ಭಾಸೆಚೊ ಖಚ್ರೊ ಜಾಲಾ, ಫಿಲ್ಮಾಂತ್ ವ್ಹಾಪಾರ್
ಜಾಲ್ಲಿ ಭಾಸ್ ಸೊಡ್ಯಾಂ, ಫಿಲ್ಮಾಚೆಂ ನಾಂವ್ ಸಯ್ತ್ ಎಕ್ಚ್ಚ್
ಸಾರ್ಕೆಂ ನಾ. ಹ್ಯೇವಿಶಿಂ ತುಮ್ಚೆ ವಿಚಾರ್?
ಜ: ವ್ಹಯ್, ತೆಂ ಸಾರ್ಕೆಂ, ಜಾಯ್ತ್ಯೊ ಚುಕಿ (ತಾಂತ್ರಿಕ್
ಚುಕಿ ಸಯ್ತ್) ಆಸಾತ್, ವ್ಹಾಪಾರ್ ಜಾಲ್ಲೆ ಭಾಸೆಂತ್ ಜಾಂವ್,
ಸಂಭಾಶಣಾಂನಿ ಜಾಂವ್ ವಾ ಉತ್ರಾಂನಿ. ಹ್ಯೇ ಪಾಸತ್ ಆಮಿ ಮೆಟಾಂ
ಕಾಡ್ಲ್ಯಾಂತ್ ಆನಿ ಜೊಕ್ತ್ಯಾ ಮನ್ಶ್ಯಾಂಚಿ ಕುಮೊಕ್ ಆಮಿ
ಘೆವ್ನ್ ಹ್ಯೊ ಸರ್ವ್ ಚುಕಿ ಸುಧ್ರಾಂವ್ಕ್ ಮೆಟಾಂ
ಕಾಡ್ಲ್ಯಾಂತ್.
11. ’ಸೋಫಿಯಾ’ ಕೆದ್ನಾಂ
ಕೊಂಕ್ಣಿ ಲೊಕಾಕ್ ಪಳೆಂವ್ಕ್ ಮೆಳ್ತೆಲೆಂ?
ಜ: ’ಸೋಫಿಯಾ’ ಫಿಲ್ಮಾಚೆಂ ಶೂಟಿಂಗ್ ಸಂಪ್ಲಾಂ, ಆತಾಂ
ಎಡಿಟಿಂಗ್ ಚಲುನ್ ಆಸಾ, ಪಾಸ್ಕಾಚೆಂ ಫೆಸ್ತ್ ಜಾತೆಚ್ಚ್
ಹೆಂ ಫಿಲ್ಮ್ ಕೊಂಕ್ಣಿ ಸಮಾಜೆಸಮೊರ್ ಘೆವ್ನ್ ಯೆಂವ್ಚಿ
ಆಮ್ಚಿ ತಯಾರಾಯ್ ಚಲುನ್ ಆಸಾ.
12. ತುಮಿ ’ಪಯ್ಣಾರಿ.ಕೊಮ್’
ವಾಚ್ತಾತ್? ಪಯ್ಣಾರಿ.ಕೊಮ್ ಚ್ಯಾ ವಾಚ್ಪ್ಯಾಂಕ್ ತುಮ್ಚೆ
ಸಂಧೇಶ್ ಕಸಲೆ?
ಜ: ಸರಾಗ್ ಜಾವ್ನ್ ವಾಚುಂಕ್ ಜಾಯ್ನಾ ಪುಣ್ ಅಪ್ರೂಪಾಯೆನ್
ಪಯ್ಣಾರಿ.ಕೊಮ್ ವಾಚ್ತಾಂ, ಪಯ್ಣಾರಿ ವಾಚುಂಕ್ ಧರ್ಲ್ಲೆಂಚ್
ಮ್ಹಜ್ಯಾ ಕೊಂಕ್ಣಿ ಭಾಸೆಚಿ ಜಾಣ್ವಾಯ್ ಚಡ್ಲ್ಯಾ ಮ್ಹಣುಂಕ್
ಸಂತೊಸ್ ಪಾವ್ತಾಂ. ಪಯ್ಣಾರಿ.ಕೊಮ್ ವಾಚ್ಪ್ಯಾಂಕ್ ಮ್ಹಜೆ
ಸಂಧೇಶ್ ’ಆಮಿ ಸರ್ವಾಂ ಆಮ್ಚ್ಯಾ ಆವಯ್ಭಾಸ್ ಕೊಂಕ್ಣೆಕ್
ಕಿತೆಂ ನಾ ಕಿತೆಂ ತರೀ ಪಾಟಿಂಬೊ ದಿವ್ಯಾಂ, ಅನಿ ಹಿ ಭಾಸ್
ಅನಿಕ್ಯೀ ಗ್ರೇಸ್ತ್ ಜಾಂವ್ಚ್ಯಾಕ್ ಸರ್ವ್ ಮಿನತ್ ಕರ್ಯಾಂ’.
13. ದೇವ್ ಬರೆಂ ಕರುಂ
ಹ್ಯಾರಿಯಾಬ್, ತುಮಿ ದಿಲ್ಲ್ಯಾ ತುಮ್ಚ್ಯಾ ಅಮೊಲಿಕ್ ವೆಳಾ
ಖಾತಿರ್.
ಜ: ತುಮ್ಕಾಂಯ್ ದೇವ್ ಬರೆಂ ಕರುಂ, ಮ್ಹಾಕಾ ಸೊಧುನ್ ಮ್ಹಾಕಾ
ಮೆಳುಂಕ್ ಆಯಿಲ್ಲ್ಯಾಕ್.
[ಹ್ಯಾರಿ
ಫೆರ್ನಾಂಡಿಸಾಸವೆಂ ಪ್ರಸನ್ನ ನಿಡ್ಡೋಡಿ ಆನಿ ವಲ್ಲಿ
ಕ್ವಾಡ್ರಸ್]
-
ಪ್ರಸನ್ನ ನಿಡ್ಡೋಡಿ.
|