ಕೊಂಕಣಿ ಉಲಯ್, ಕೊಂಕಣಿ ಉರಯ್, ಕೊಂಕಣಿ ಆಮ್ಚಿ ಆವಯ್..    कोंकणी उलोय, कोंकणी उरय, कोंकणी आमची आवय..       
Writers Writing
ಸಂಪಾದಕೀಯ್
ಕೊಂಕ್ಣಿ ನಿರಂತರಿ..
ಮನಿಸ್ ಧಾಂವ್ಣಿ..
ಲೇಖನಾಂ
ಪ್ರಗತಿಶೀಲ್ ಬರವ್ಪಿ
ಮುಂಬಯಾಂತ್ ಪ್ರಗತಿಪರ್
ಮುಂಬಯಾಂತ್ಲಿ ಕೊಂಕ್ಣಿ
ಕವಿತಾ
ಬ್ರೊತ (ಪಯ್ಲಿ ಕವಿತಾ)
ಕವಿತಾ (ಹಫ್ತ್ಯಾಚಿ ಕವಿತಾ)

ಕವಿತಾಪಾಠ್ (ಅಧ್ಯಯನ್)

ಚಿತ್ರಾಂ-ವಿಚಿತ್ರಾಂ (ಸ್ಪರ್ಧೊ)
ಕಾಣ್ಯೊ

ಮಟ್ವಿ ಕಥಾ (ಹಫ್ತ್ಯಾಚಿ ಕಾಣಿ)
ನ್ಯಾನೊ ಕಾಣ್ಯೊ (ಜೊ.ಸಿ.ಸಿದ್ದಕಟ್ಟೆ)
ನೈತಿಕ್ ಕಾಣ್ಯೊ
ಅನುವಾದ್ ಕಾಣ್ಯೊ

ವಿಶ್ಲೇಶಣಾಂ

ಮುಗ್ದೊನಾತ್‌ಲ್ಲಿಂ ಗಿತಾಂ

ಸಂವಾದ್
ಏಕ್ ಭೆಟ್ ಏಕ್ ಸಂವಾದ್
ಕೊಂಕ್ಣಿ ಕಾರ್ಯಿಂ

ಆಗ್ರಾರ್ ಕವಿಗೋಶ್ಟಿ
ಕೊಂಕ್ಣಿ ಸಹಮಿಲನ್ 2015

ಅಂಕಣಾಂ
ದಿವ್ಟಿ (ಜಿಯೋ ಆಗ್ರಾರ್)
ಭಲಾಯ್ಕಿ (ಡಾ|ಎಡ್ವರ್ಡ್ ನಜ್ರೆತ್)
ಮನ್ ಕಿ ಬಾತ್ (ಜೆ.ವಿ.ಕಾರ್ಲೊ)

ಸಕಾಳಿಕ್ (ಸ್ಟೀಫನ್ ಕ್ವಾಡ್ರಸ್)

[ವಳೊಕ್]: 4.  ಮಾನಾಧಿಕ್ ಬಾಪ್ ಮೆಲ್ವಿನ್ ಡಿ'ಕುನ್ಹಾ

ಇಂಗ್ಲಿಶಾಂತ್ಲ್ಯಾ ಎಕಾ ಸೊಭಿತ್ ಸಾಂಗ್ಣೆಚೊ ಉಡಾಸ್ ಯೆತಾ ’Simplicity is the sign of greatness', ಮಾ|ಬಾ|ಮೆಲ್ವಿನ್ ಡಿ’ಕುನ್ಹಾವಿಶಿಂ ಜೆದ್ನಾಂಯ್ ಹಾಂವ್ ಚಿಂತಾಂ, ಹಿ ಸಾಂಗ್ಣಿ ಯಾದಿಕ್ ಯೆತಾ, ಕಿತ್ಯಾಕ್ ಮ್ಹಳ್ಯಾರ್ ಉಲಂವ್ಕ್ ಮಾಯಾಮೊಗಾಳ್ ತಶೆಂಚ್ ಸಾದೊ ದಿಸ್ಚೊ ಹೊ ತಿತ್ಲೊಚ್ಚ್ ಗೂಂಡ್ ಚಿಂತ್ಪಿ ಆನಿ ಅಪುರ್ಭಾಯೆಚೊ ಕೊಂಕ್ಣಿ ಮೋಗಿ.

ಕಾಂಯ್ 1997-98 ಇಸ್ವೆಂತ್ ಹಾಂವ್ ಮಿರಾರೊಡಾಂತ್ ವಸ್ತಿ ಕರುನ್ ಆಸ್ಲೊಂ, ತವಳ್ ಮಾ|ಬಾ|ಮೆಲ್ವಿನ್ ಡಿ’ಕುನ್ಹಾ ಸಯ್ತ್ ಸಹಾಯಕ್-ವಿಗಾರ್, ಸದಾಂಯ್ ಸಾಂಜೆರ್ ಮಿಸಾಕ್ ವೆತಾಲೊಂ ದೆಕುನ್ ಹಾಂವ್ ಹಾಂಚೆ ಶೆರ್ಮಾಂವ್ ಆಯ್ಕುನ್ ಹಾಂಚ್ಯಾ ಚಿಂತ್ಪಾಚೆರ್ ಪ್ರಭಾವಿತ್ ಜಾಲ್ಲೊಂ. ಥೊಡ್ಯಾ ವರ್ಸಾಂ ಉಪ್ರಾಂತ್ ಮ್ಹಕಾ ಕುವೇಯ್ಟಾಂತ್ ಕಾಮ್ ಲಾಭ್ಲೆಂ ದೆಕುನ್ 2001 ಇಸ್ವೆಂತ್ ಹಾಂವ್ ಕುವೇಯ್ಟಾಕ್ ಪಾವ್ಲೊಂ; ಥಂಯ್ ಮಾ|ಬಾ|ಮೆಲ್ವಿನ್ ಡಿ’ಕುನ್ಹಾ ವಿಗಾರ್ ಜಾವ್ನ್ ಆಸ್ಲೆ. ಕುವೆಯ್ಟಾಂತ್ ಘರಾನ್‍ಘರ್ ಕೊಂಕ್ಣಿ ಬೂಕ್ ಘೆವ್ನ್, ಕೊಂಕ್ಣಿ ಪತ್ರಾಂಕ್ ಪಾಟಿಂಬೊ ವಿಚಾರುಂಕ್ ಆಸಾ ಕೆಲ್ಲ್ಯಾ ’ಕೊಂಕ್ಣಿ ಅಭಿಯಾನ್ ಸಮಿತಿ’ ಮುಖಾಂತ್ರ್ ’ದಿವೊ’ ತಶೆಂಚ್ ಹೆರ್ ಥೊಡ್ಯಾ ಪತ್ರಾಂಕ್ ಥೊಡೊ ಪಾಟಿಂಬೊ ದೀಂವ್ಕ್ ಆಮಿ ಸಕ್ಲ್ಯಾಂವ್ ದೆಕುನ್ ಫುಡ್ಲ್ಯಾ ವರ್ಸಾ ಆಮಿ ಹೆಂ ’ಕೊಂಕ್ಣಿ ಅಭಿಯಾನ್ ಸಮಿತಿಚೊ ವಾವ್ರ್’ ಚಡಂವ್ಕ್ ವ್ಹಡಾ ಹುಮೆದಿನ್ ಭರ್ಲ್ಯಾಂವ್, ಹ್ಯಾ ಅಭಿಯಾನ್ ಸಮಿತಿಚೆಂ ಉಗ್ತಾವಣ್ ಕರುಂಕ್ ಆಯಿಲ್ಲ್ಯಾ ಮಾ|ಬಾ|ಮೆಲ್ವಿನ್ ಡಿ’ಕುನ್ಹಾನ್ ಆಪ್ಲ್ಯಾ ಉತ್ರಾಂನಿ ಏಕ್ ಭಾಸ್ ದಿಲಿ; ’ಆಮ್ಚ್ಯಾ ಕುವೆಯ್ಟಾಂತ್ ಆಸ್ಚ್ಯಾ ಇಗರ್ಜೆ/ಚಾಪೆಲಾಂನಿ ಹರ್ಯೆಕಾ ಹಫ್ತ್ಯಾಂನಿ ಕೊಂಕ್ಣಿ ಮಿಸಾಂ ಸುರು ಕರ್ತಲೊಂ’. ಆನಿ ಥೊಡ್ಯಾಚ್ಚ್ ವೆಳಾನ್ ತಾಂಚ್ಯಾ ಮುಖೇಲ್ಪಣಾಖಾಲ್ ಸುರು ಜಾಲ್ಲ್ಯಾ ಕೊಂಕ್ಣಿ ಮಿಸಾಂನಿ ಆಜ್ ಪಾಸೊನ್ ಹಾರಿ ಹಾರಿಂನಿ ಲೋಕ್ ಜಮ್ತಾ ಮ್ಹಳ್ಳೆಂ ಅಪುಟ್ ಸತ್.

ಉಪ್ರಾಂತ್ ಥೊಡ್ಯಾ ವರ್ಸಾಂನಿ ಹಾಂವ್ ಮಿರಾರೋಡಾಕ್ ಪಾವ್ಲೊಂ; ಕೊಂಕ್ಣಿ ತಾಲೆಂತಾಂಚ್ಯಾ ಸ್ಪರ್ಧ್ಯಾಚೊ ವೊರಯ್ಣಾರ್ ಜಾವ್ನ್, ತವಳ್ ಪರತ್ ಮ್ಹಾಕಾ ಮಾ|ಬಾ|ಮೆಲ್ವಿನಾಕ್ ಭೆಟ್ಚೆಂ ಭಾಗ್ ಫಾವೊ ಜಾಲೆಂ. ಏಕ್ ಯಾಜಕ್ ಜಾವ್ನ್ ಅಪ್ಲಿ ಜವಾಭ್ದಾರಿ ಫಕತ್ತ್ ಧಾರ್ಮಿಕ್ ವಿಚಾರಾಂಕ್ ಸೀಮಿತ್ ಕರಿನಾಸ್ತಾನಾ, ಆಪ್ಲ್ಯಾ ಮೊವಾಳ್/ಮೊಗಾಳ್ ವೆಕ್ತಿತ್ವಾಮುಖಾಂತ್ರ್ ಕೊಂಕ್ಣಿ ಲೊಕಾಕ್, ಕೊಂಕ್ಣಿ ಭಾಸೆಕ್ ತಶೆಂಚ್ ಕೊಂಕ್ಣಿ ಸಂಸ್ಕೃತೆಕ್ ಪಾಟಿಂಬೊ ದಿಂವ್ಚೊ ಹೊ ನಿಜಾಯ್ಕೀ ಏಕ್ ವರ್ತೊ ಕೊಂಕ್ಣಿ ಮೋಗಿ ಮ್ಹಣುಂಕ್ ಮ್ಹಾಕಾ ಭೋವ್ ಚಡ್ ಸಂತೊಸ್ ಆನಿ ಅಭಿಮಾನ್ ಭಗ್ತಾ.

-ಸಂ

ಮಾನಾಧಿಕ್ ಬಾಪ್ ಮೆಲ್ವಿನ್ ಡಿ'ಕುನ್ಹಾ

ಜರ್ ಏಕ್ ಮನಿಸ್ ಲೊಕಾಮೊಗಾಳ್ ಜಾತಾ ತರ್ ಹಾಕಾ ಕಾರಣ್ ತಾಚೆ ಥೈ೦ ಆಸ್ಚಿ ಹರ್ಯೆಕ್ಲ್ಯಾಕ್ ಆಕರ್ಶಿತ್ ಕರ್ಚಿ ಶಾಥಿ, ಹರ್ಯೆಕ್ಲ್ಯಾಕ್ ಸಮಾನ್ ಥರಾನ್ ಲೆಕ್ಚೊ ಗೂಣ್, ಸದಾ೦ ಹಾಸ್ಮುಖ್ ಮುಖಾಮಳ್, ಆನಿ ಏಕ್ ಬರೆ೦ ಮನ್. ಹೆ೦ ಸರ್ವ್ ಗೂಣ್ ಆಸಲ್ಲೊ ಏಕ್ ವ್ಯಕ್ತಿ ಆಮ್ಚೆ೦ ಮಧೆ೦ ಆಸಾ ಆನಿ ತೊ ಜಾವ್ನಾಸಾ ಪ್ರಸ್ತುತ್ ಮೀರಾರೊಡ್ ಫಿರ್ಗಜೆಚೊ ವಿಗಾರ್ ಬಾಪ್ ಮೆಲ್ವಿನ್ ಡಿ ಕುನ್ಹಾ.

ಬಾಪ್ ಮೆಲ್ವಿನ್ ಡಿ ಕುನ್ಹಾ, ಹಾ೦ಚೊ ಜಲ್ಮ್ ೨೮ ಮೇ ೧೯೬೭ -೦ತ್ ಮಡ೦ತ್ಯಾರ್ ಪಿರ್ಗಜೆಚ್ಯಾ ಶ್ರೀ ಆನಿ ಶ್ರೀಮತಿ ಇಗ್ನೆಶಿಯಸ್ ಆನಿ ಕ್ರಿಸ್ತಿನ್ ಡಿ ಕುನ್ಹಾ ಹಾ೦ಚ್ಯಾ ದೇವ್ ಭಿರಾ೦ತಿಚ್ಯಾ ಘರಾಣ್ಯಾ೦ತ್ ಜಾಲೊ.

ತಾ೦ಚೆ೦ ಧಾವಿ ವರ್ಗ್ ಪರ್ಯಾ೦ತ್ಲೆ೦ ಶಿಕಾಪ್ ಮಡ೦ತ್ಯಾರ್ ಇಸ್ಕೊಲಾ೦ತ್ ಸ೦ಪ೦ಯ್ಲೆ ಆನಿ ಕಾರ್ಮೆಲಿ೦ತಾ೦ಚ್ಯಾ ವೊಡ್ತಾ೦ತ್ ವಾಡೊನ್, ಸೆಮಿನರಿ೦ತ್ಲೆ೦ ಫಿಲೊಸೊಫಿ ಶಿಕಾಪ್ ಮೈಸೂರ್ ಪುಶ್ಪಾಶ್ರಾಮಾ೦ತ್ ತಸೆ೦ಚ್ ಸಾ೦. ಫಿಲೊಮೆನಾಸ್ ಕಾಲೆಜಿ೦ತ್ ಉ೦ಚ್ಲೆ೦ ಶಿಕಾಪ್ ಆನಿ ಥಿಯೊಲೊಜಿ ಮ೦ಗ್ಳುರ್ ಸಾ೦. ಜುಜೆ ಸೆಮಿನರಿ೦ತ್ ಜಾಲೆ೦.

ಸಾಸೆರ್ದೊತ್ ಜಾತೆಚ್ಚ್ ೧೯೯೬-೦ತ್ ಥಾವ್ನ್ ೨೦೦೦ ಮ್ಹಣಾಸಾರ್ ಮೀರಾರೊಡ್ ಸಹಾಯಕ್ ವಿಗಾರ್ ಜಾವ್ನ್ ತಾ೦ಚೆ೦ ಮಿಸಾ೦ವ್ ಕಾಮ್ ಸುರು ಜಾಲೆ೦. ೨೦೦೧ ಥಾವ್ನ್ ೨೦೧೦ ಪರ್ಯಾ೦ತ್ ಕುವೈಟಾ೦ತ್ ವಿಗಾರ್ ಜಾವ್ನ್ ಥೈ೦ಚ್ಯಾ ಲೊಕಾಕ್ ಸೆವಾ ದೀವ್ನ್ ಲೊಕಾ ಮೊಗಾಳ್ ಜಾಲೆ. ಉಪ್ರಾ೦ತ್ ಉಜ್ಜೊಡಿ ಮ೦ಗ್ಳುರ್ "ಇನ್ಫೆ೦ಟ್ ಮೇರಿ" ಫಿರ್ಗಜ್ ಬಾ೦ದಲ್ಲಿ ಕೀರ್ತ್ ತಾ೦ಚಿ೦. ಹಾ೦ಗಾ೦ ೩ ವರ್ಸಾ೦ ಸೆವಾ ದೀವ್ನ್ ೨೦೧೫ ವೆರ್ ಪರತ್ ಮೀರಾ ರೊಡ್ ವರ್ಗ್ ಜಾವ್ನ್ ಆಯ್ಲೆ. ತಾ೦ಚಿ ಹಿ ಲ್ಹಾನ್ಶಿ ವ್ಯಕ್ತಿ ಪರಿಚಯ್ ತುಮ್ಚೆ ಮುಖಾರ್ ದವ್ರು೦ಕ್ ಆಮ್ಕಾ೦ ವೊರ್ತಿ ಖುಶಿ ಜಾತಾ.
 
 
1. ತುಮಿ ಮಾಂಯ್‌ಗಾಂವಾಥಾವ್ನ್ ಹಜಾರೊಂ ಮಯ್ಲಾಂ ಪಯ್ಸ್ ಆಸಾತ್ ತರ್‌ಯೀ ತುಮ್ಚ್ಯಾ ಕಾಳ್ಜಾಂತ್ ಕೊಂಕ್ಣೆಚೊ ಖತ್ಕತೊ ಮೋಗ್ ಅಜೂನ್ ಜಿವಾಳ್ ಆಸಾ. ಖರೆಂಪಣಿಂ ಆಮಿಂ ತುಮ್ಚೆಥಾವ್ನ್ ಶಿಕಾಜಯ್ - ಫಕತ್ತ್ ಶಿಕಪ್ ಜೊಡ್ತಚ್ಚ್ ಆಪ್ಲಿ ಆವಯ್‌ಭಾಸೆಕ್ ವಿಸರ್ನ್ ಸೊಡ್ಚೆಂ ನ್ಹಯ್. ತುಮ್ಕಾಂ ಕೊಂಕ್ಣಿ ಭಾಸೆಚೆರ್ ಇತ್ಲೊ ಮೋಗ್ ಆನಿ ಮಯ್ಪಾಸ್ ಕಿತ್ಯಾಕ್ ಮ್ಹಣ್ ಸಾಂಗ್ಶ್ಯಾತ್?

ಜ: ಮಾ೦ಯ್ ಭಾಸ್ ತಿ ಮಾ೦ಯ್ ಭಾಸ್....ಕೆದಾಳಾಚ್ಚ್ ವಿಸ್ರೊ೦ಕ್ ಜಾಯ್ನಾ, ಆಮ್ಚೆ ಸಾವ್ಳೆ ಬರಿ. ಕೊ೦ಕ್ಣಿ ಭಾಸ್ ಆನಿ ಸ೦ಸ್ಕ್ರತಿ ಆಮ್ಚೆ ಪಾಟ್ಲ್ಯಾನ೦ಚ್ ಆಸೊ೦ಕ್ ಜಾಯ್. ಕೊ೦ಕ್ಣಿ ಭಾಸ್ ಮಾಕಾ ಆಸ್ಮಿತಾಯ್ ದಿತಾ. ತ್ಯಾ ದೆಕುನ್ ಕೊ೦ಕ್ಣಿ ಭಾಸೆ ಥೈ೦ ಮಾಕಾ ಅಭಿಮಾನ್.
 
2. ದಿಸಾನ್‌ದೀಸ್ ಕೊಂಕ್ಣಿ ಭಾಸ್ ಉಲಯ್ತೆಲೆ ಉಣೆಂ ಜಾಂವ್ಚ್ಯಾ, ಆನಿ ಇಂಗ್ಲಿಷ್ ಭಾಸೊ ಉಲಯ್ತೆಲ್ಯಾಂಚೊ ಸಂಖೊ ಚಡೊನ್ ಯೆಂವ್ಚ್ಯಾ ಹ್ಯಾ ಕಾಳಾರ್ ತುಮಿ ಅಪುಟ್ ಕೊಂಕ್ಣಿ ಭಾಸೆಂತ್ ಉಲಯ್ತಾತ್ ಮಾತ್ರ್ ನ್ಹಯ್ ಹೆರಾಂಕ್ ಸಯ್ತ್ ಕೊಂಕ್ಣಿ ಭಾಸೆಂತ್ ಉಲಂವ್ಕ್ ಪ್ರೇರಿತ್ ಕರ್ತಾತ್. ಹ್ಯೇ ವಿಶಿಂ ತುಮ್ಚೆ ವಿಚಾರ್ ಸಾಂಗ್ಶ್ಯಾತ್?

ಜ: ಕಿತ್ಲ್ಯೊ ಭಾಸೊ ತು೦ ಶಿಕ್ತಾಯ್ ಆನಿ ಉಲಯ್ತಾಯ್ ತಿತ್ಲಿ ತುಜಿ ಗ್ರೇಸ್ತ್ ಕಾಯ್ ಚಡಯ್ತಾ. ಚಡ್ ಆನಿ ಚಡ್ ಭಾಸೊ ಶಿಕ್ಚಿ ಮಾಕಾ ಉರ್ಬಾ ಆನಿ ಗೆಲ್ಲೆಕಡೆ ತಿ ಭಾಸ್ ಶಿಕ್ಚಿ ಆನಿ ಸ೦ಸ್ಕ್ರತಿ ಸಾ೦ಬಾಳ್ಚಿ ತಸೆ೦ಚ್ಚ್ ಮಾ೦ಯ್ ಭಾಸ್ ಘಟ್ ಕರ್ಚಿ ಮ್ಹಜಿ ಆಶಾ. 
 
3. ಮಿರಾರೋಡ್ ಫಿರ್ಗಜೆಂತ್ ಸಹಾಯಕ್ ವಿಗಾರ್ ಜಾವ್ನ್ ತುಮಿ ತುಮ್ಚೆಂ ಮಿಸಾಂವ್ ಸುರು ಕೆಲ್ಲೆ ಥಾವ್ನ್, ಪರ್ಗಾಂವಾಂತ್ಲ್ಯಾ ಕುವೇಯ್ಟಾಂತ್ ಸಯ್ತ್ ತುಮಿ ಕೊಂಕ್ಣಿ ಭಾಸೆಚ್ಯಾ ಪ್ರಚಾರಾಕ್ ಜಾಯ್ತೊ ಪಾಟಿಂಬೊ ತಶೆಂಚ್ ಪ್ರೇರಣ್ ದಿಲಾಂ. ತುಮ್ಚ್ಯಾ ಮಿಸಾಂವಾಂತ್ ಕೊಂಕ್ಣಿ ಅಡ್ಕಳ್ ಮ್ಹಣ್ ಭಗ್ಲಾಂಗೀ?

ಜ: ಭಾಸ್ ಕೆದ್ನಾ೦ಚ್ಚ್ ಆಡ್ಕಳ್ ಜಾಯ್ನಾ, ಬಗಾರ್ ಆಮ್ಕಾ೦ ಗ್ರೇಸ್ತ್ ಕರ್ತಾ, ಆಧಾರ್ ದಿತಾ. ಪರ್ಗಾವಾ೦ತ್ ಕುವೆಯ್ಟಾ೦ತ್ ಮಾ೦ಯ್ ಭಾಸೆಚೊ ಲೊಕ್ ಮಸ್ತ್ ಆಸಾ ಆನಿ ತೊ ಬರ್ಪೂರ್ ಮಾ೦ಯ್ ಭಾಸೆ ಖಾತಿರ್ ವಾವುರ್ತಾ ತ್ಯಾ ವರ್ವಿ ಕೊ೦ಕ್ಣಿ ಭಾಸ್ ಮಾಕಾ ಪ್ರೇರಿತ್ ಕರ್ತಾ ಮ್ಹಜೆ೦ ಮಿಸಾ೦ವ್ ಕಾಮ್ ಸಲಿಸ್ ಜಾತಾ.
 
4. ಇಂಗ್ಲಿಶ್ ಭಾಸ್ ಶಿಕ್ಪ್ಯಾಂಚಿ ಭಾಸ್, ಆನಿ ಕೊಂಕ್ಣಿ ಭಾಸ್ ಉಣೆ ಶಿಕ್ಪ್ಯಾಂಚಿ ಭಾಸ್ ಮ್ಹಳ್ಳೆಂ ಚಿಂತಾಪ್ ಮತಿಂಚ್ ಥಾಪುನ್ ಘೆವ್ನ್, ಫಕತ್ತ್ ಇಂಗ್ಲಿಶ್ ಭಾಸೆಚ್ಯಾ ಗುಲಾಮ್‌ಗಿರಿಂತ್ ದೀಸ್ ಸಾರ್ತೆಲ್ಯಾಂಚೆರ್ ತುಮ್ಚಿ ಕಸಲಿ ಅಭಿಪ್ರಾಯ್?

ಜ: ಶಿಕ್ಪ್ಯಾ೦ಚಿ ಆನಿ ಉಣ್ಯಾ ಶಿಕ್ಪ್ಯಾ೦ಚಿ ಭಾಸ್ ಮ್ಹಳ್ಳೊ ಭೇದ್ ಭಾವ್ ಕೆದಿ೦ಕಚ್ಚ್ ಆಸೊ೦ಕ್ ನ್ಹಜೊ. ಫಕತ್ತ್ ಆಶೀರ್ ಮನೊಭಾವಾಚ್ಯಾನಿ ಆಸೆ೦ ಚಿ೦ತ್ಚೆ. ಸಕ್ಕಡ್ ಭಾಸಾ೦ಕ್ ಮಹತ್ವ್ ಆಸಾ. ಇ೦ಗ್ಲಿಶ್ ಭಾಸ್ ಅ೦ತರ್ದೆಶೀಯ್ ಜಾ೦ವ್ಕ್ ಪುರೊ ಪೂಣ್ ಕೊ೦ಕ್ಣಿ ಆಮ್ಚಿ೦ ಮಾ೦ಯ್ ಭಾಸ್.
 
5. ತುಮಿ ದೇಸಾಂತ್ ತಶೆಂಚ್ ವಿದೇಶಾಂತ್ ಜಾಯ್ತ್ಯಾ ಕೊಂಕ್ಣಿ ಸಂಸ್ಥ್ಯಾಂಚೊ ವಾವ್ರ್ ಪಳೆಲಾ, ಪಾರ್ಕಿಲಾ. ಕೊಂಕ್ಣಿ ಭಾಸೆಚ್ಯಾ, ಕೊಂಕ್ಣಿ ಸಂಸ್ಕೃತೆಚ್ಯಾ ಉದರ್ಗತೆಕ್ ತಾಂಚೊ ವಾವ್ರ್ ಪಾವ್ತಾ ಮ್ಹಣ್ ತುಮ್ಕಾಂ ಭಗ್ತಾ?

: ವ್ಹಯ್, ದೇಶಾ೦ತ್ ಜಾಯ್ತೆ ಜಣ್ ಕೊ೦ಕ್ಣೆ ಖಾತಿರ್ ವಾವುರ್ತಾತ್ ತಸೆ೦ಚ್ಚ್ ವಿದೆಶ್ಯಾ೦ತಯ್ ಕೊ೦ಕ್ಣಿ ಭಾಸೆಕ್ ಚಡ್ ಪ್ರೊತ್ಸಾಹ್ ಮೆಳ್ತಾ. ಹೆ೦ ಕಾಮ್ ಸಕ್ಡಾ೦ಚೆ೦, ಥೊಡ್ಯಾ೦ಚೆ೦ ಮಾತ್ರ್ ನ್ಹಹಿ.
 
6. ತುಮಿ ಕುವೇಯ್ಟಾಂತ್ ಕೊಂಕ್ಣಿ ಮೀಸ್ ಸುರು ಕೆಲ್ಲೆಥಾವ್ನ್ ಆಜ್ ಪಾಸೊನ್ ಕುವೇಯ್ಟಾಂತ್ ಹರ್ಯೆಕಾ ಕೊಂಕ್ಣಿ ಮಿಸಾಂಕ್ (ತೀನ್ ಇಗರ್ಜೆಂನಿ) ಲೋಕ್ ಚಡೊನ್ ಯೆತಾ. ಹೆಂ ಚಿಂತಾಪ್ ತುಮ್ಕಾಂ ಕಶೆಂ ಆಯ್ಲೆಂ?

ಜ: -ಕುವೈಟಾ೦ತ್ ಘರ್ ಖಾತೆಚೊ ಗಾ೦ವ್ಚೊ ಜಾಯ್ತೊ ಲೊಕ್ ಆಸಾ, ಆನಿ ತಾ೦ಚೆ ಖಾತಿರ್ ಥೈ೦ ೩ ಇಗರ್ಜೆನಿ೦ ಹಾ೦ವೆ೦ ಕೊ೦ಕ್ಣಿ ಮಿಸಾ೦ ಸುರು ಕೆಲಿ೦. ಕೊ೦ಕ್ಣಿ ಲೊಕಾ೦ಚೊ ಎಕ್ವಟ್ ಜಾಲೊ. ಪಯ್ಲೆ೦ ಫಕತ್ತ್ ಕಾಥೆದ್ರಾಲಾ೦ತ್ ಕೊ೦ಕ್ಣಿ ಮೀಸ್ ಆಸ್ತಾಲೆ೦.
 
7. ಬದ್ಲೊನ್ ಯೆಂವ್ಚ್ಯಾ ಹ್ಯಾ ತಾಂತ್ರಿಕ್ ಕಾಳಾರ್, ತಾಂತ್ರಿಕತೆಚೊ ಆಧಾರ್ ಘೆವ್ನ್ ಕೊಂಕ್ಣಿ ಭಾಸೆಕ್ ಉರ್ಜಿತ್ ಕರುಂಕ್ ಸಾಧ್ಯ್  ಮ್ಹಣ್ ತುಮ್ಕಾಂ ಭಗ್ತಾ? ಹ್ಯೇವಿಶಿಂ ತುಮ್ಚೆ ವಿಚಾರ್ ಕಸಲೆ?

ಜ: ತಾ೦ತ್ರಿಕಾತೆ ಮುಖಾ೦ತ್ರ್ , ಆಧುನಿಕ್ ಪಿಳ್ಗೆಕ್ ಅನಿಕಿ ಸುಲಾಭಾಯೆನ್ ಕೊ೦ಕ್ಣಿ ಭಾಸ್ ವಾಪರು೦ಕ್ ಆನಿ ವಾ೦ಟು೦ಕ್ ಸಲಿಸ್ ಜಾತಾ. ಮಾಧ್ಯಮಾ೦ಚೊ ಫಾಯ್ದೊ ಸಕ್ಡಾನಿ೦ ಆಪ್ಣಾ೦ವ್ಕ್ ಜಾಯ್ ಮ್ಹಣ್ ಮಾಕಾ ಭಗ್ತಾ.
 
8. ಕೊಂಕ್ಣಿ ಸಮಾಜೆಕ್ ಆಧಾರ್ ದಿಂವ್ಚೆಪಾಸತ್, ಬೆಕಾರಿಂಕ್ ಕಾಮಾ ಸೊಧುನ್ ದಿಂವ್ಚೆಪಾಸತ್, ಪಿಡೇಸ್ತಾಂಕ್ ಬರಿಂ ವ್ಹಖ್ತಾಂ ದಿಂವ್ಚೆಪಾಸತ್ ಆಮ್ಚ್ಯಾ ಕೊಂಕ್ಣಿ ಸಂಸ್ಥ್ಯಾಂನಿ ವಾವ್ರ್ ಕರುಂಕ್ ತುಮಿ ಉಲೊ ದಿಲ್ಲೊ ಆನಿ ಹ್ಯಾ ಉಲ್ಯಾಕ್ ಪಾಳೊ ದೀವ್ನ್ ಪರ್ಗಾಂವಾಂತ್ ಜಾಯ್ತ್ಯಾ ಸಂಸ್ಥ್ಯಾಂನಿ ತಶೆಂಚ್ ಮುಖೆಲ್ಯಾಂನಿ ವಾವ್ರ್ ಕೆಲ್ಲೊ. ಹ್ಯೇವಿಶಿಂ ತುಮ್ಚೆಂ ಸ್ವಪಾಣ್ ಕಸಲೆಂ?

ಜ: "Each one reach one"-ಮ್ಹಳ್ಳ್ಯಾಸಾ೦ಗ್ಣೆಬರಿ೦ ಹರ್ಯೆಕಾ ಸ೦ಸ್ಥ್ಯಾನಿ ಗರ್ಜೆವ೦ತಾ೦ಕ್ ಪಾವ್ಲ್ಯಾರ್ ಕಿತ್ಲೆ೦ ಬರೆ೦ಪಣ್ ಜಾಯ್ನಾ..? ಬರ್ಯಾ ಕಾಮಾಕ್ ಕೆದಿ೦ಚ್ಚ್ ಪಾಟಿ೦ ಪಳೆ೦ವ್ಚೆ ನ್ಹಹಿ....ಹೆ೦ಚ್ಚ್ ಮ್ಹಜೆ೦ ಸಪಾಣ್.
 
9. ಸದಾಂಚ್ ಕೊಂಕ್ಣಿ ಭಾಸ್ ತುಮಿ ಉಲಯ್ತಾತ್, ತುಮ್ಚ್ಯಾ ತೊಂಡಾರ್ ಸದಾಂಚ್ ’ಕೊಂಕ್ಣಿ ಹಾಸೊ’ ಪಳೆಂವ್ಕ್ ಮೆಳ್ತಾತ್. ಹಾಚೆಂ ಸೀಕ್ರೆಟ್ ಕಿತೆಂ ಮ್ಹಣ್ ಸಾಂಗ್ಶ್ಯಾತ್?

ಜ: ಸೀಕ್ರೆಟ್ ಕಾ೦ಯ್ ನಾ೦, ಕೊ೦ಕ್ಣಿ ಭಾಸೆ ಥೈ೦ ಆಸಲ್ಲೊ ಆಭಿಮಾನ್ ಆನಿ ಮೋಗ್....
 
10. ಮುಂಬಯಾಂತ್, ಪ್ರತ್ಯೇಕ್ ಜಾವ್ನ್ ಮಿರಾರೋಡಾಂತ್ ಜಾಯ್ತೊ ಕೊಂಕ್ಣಿ ಲೋಕ್ ಆಸಾ, ಆನಿ ಕೊಂಕ್ಣಿ ಲೊಕಾಚ್ಯಾ ಎಕ್ವಟಾಕ್ ಕೊಂಕ್ಣಿ ಸಂಸ್ಥ್ಯಾಂನಿ ತಶೆಂಚ್ ಮುಖೆಲ್ಯಾಂನಿ ಕಸಲಿಂ ಮೆಟಾಂ ಕಾಡುಂಕ್ ಜಾಯ್?

ಜ: ರಜೆ ದಿಸಾನಿ೦ ಕೊ೦ಕ್ಣಿ ಭಾಸ್ ಆಮ್ಚ್ಯಾ ಭುರ್ಗ್ಯಾ೦ಕ್ ಶಿಕೊ೦ವ್ಕ್ ಕೊ೦ಕ್ಣಿ ಶಿಭಿರಾ೦, ಕೊ೦ಕ್ಣಿ ಕಾರ್ಯಿ೦, ಕೊ೦ಕ್ಣಿ ಮಿಸಾ೦, ಕ್ರೀಯಾಳ್ ರಿತಿನ್ ಮಾ೦ಡುನ್ ಹಾಡುನ್, ಚಡ್ ಮಾಪಾನ್ ಲೊಕಾನ್ ಭಾಗ್ ಘೆ೦ವ್ಕ್ ಉತ್ತೆಜಿತ್ ಕರು೦ಕ್ ಜಾಯ್ ಆನಿ ಘರಾ೦ನಿ೦ ಭುರ್ಗ್ಯಾ೦ ಸ೦ಗಿ೦ ಕೊ೦ಕ್ಣಿ ಉಲ೦ವ್ಕ್ ಜಾಯ್.
 
11. ಕೊಂಕ್ಣಿ ಸಾಹಿತ್ಯಾವಿಶಿಂ ತುಮ್ಚೆ ವಿಚಾರ್ ಕಸಲೆ? ಕೊಂಕ್ಣಿ ಪತ್ರಾಂ, ಕೊಂಕ್ಣಿ ವಾಚ್ಪಿ, ಕೊಂಕ್ಣಿ ಬರವ್ಪಿ ಜೊಕ್ತ್ಯಾ ಮಾಪಾನ್ ಆಪಾಪ್ಲಿ ಜವಾಭ್ದಾರಿ ಪಾಳ್ತಾ ಮ್ಹಣ್ ತುಮ್ಕಾಂ ಭಗ್ತಾ?

ಜ: ಕೊ೦ಕ್ಣಿ ಸಾಹಿತ್ಯ್ ವಾಡೊನ್ ಆಸಾ. ಆಜ್ ಕಾಲ್ ಸಭಾರ್ ಅ೦ತರಜಾಳಿ೦ ಆನಿ ಕೊ೦ಕ್ಣಿ ಪತ್ರಾ೦ ಆಸಾತ್. ಪೂಣ್ ಸಕ್ಡಾ೦ಕ್ ಬರ೦ವ್ಚೆ೦ ದೆಣೆ ದೆವಾನ್ ಫಾವೊ ಕರು೦ಕ್ ನಾ೦. ಜರ್ ಕೊಣಾಥೈ೦ ಹಿ೦ ದೆಣಿ೦ ಆಸಾತ್ ತಾಣಿ೦ ಅನಿಕೀ ಚಡ್ ಮಾಫಾನ್ ಹಾಚೊ ಫಾಯ್ದೊ ಜೊಡ್ಯೆತ್.
 
12. ಕೊಂಕ್ಣಿ ಅಂತರ್‌ಜಾಳಿವಿಶಿಂ ತುಮ್ಚೆ ವಿಚಾರ್ ಕಸಲೆ?

ಜ: ಅ೦ತರ್ ಜಾಳ್ ಏಕ್ ವೊರ್ತೆ೦ ಬೆಸಾ೦ವ್ ಮ್ಹಣ್ಯೆತ್, ಕಿತ್ಯಾಕ್ ಆಜ್ ಕಾಲ್ ಹ್ಯಾ ವರ್ವಿ೦ ಜಾಯ್ತೆ೦ ಬರೆಪಣ್ ಜಾವ್ನ್ ಆಸಾ. ಆನಿ ಚಡ್ ಕರುನ್ ಯುವಜಣಾನಿ೦ ಹಾಚೊ ಫಾಯ್ದೊ ಜೊಡು೦ಕ್ ಜಾಯ್.
 
13. ಏಕ್ ಕೊ೦ಕ್ಣಿ ಮೋಗಿ ಜಾವ್ನ್ ಕೊ೦ಕ್ಣಿ ಲೊಕಾಕ್ ತುಮ್ಚೆ ಸ೦ಧೇಶ್ ಕಸಲೆ?

ಜ: ಕೊ೦ಕ್ಣಿ ಭಾಸೆ ಥೈ೦ ಅಭಿಮಾನ್ ದವರ್ನ್ ಆಮ್ಚಿ ಭಾಸ್ ಆನಿ ಸ೦ಸ್ಕ್ರತಿ ಆಮಿ೦ ಖ೦ಯ್ ಪಾವ್ಲ್ಯಾರೀ ಆಮ್ಚೆ೦ ದಿರ್ವೆ೦ ಜಾ೦ವ್ಕ್ ಜಾಯ್. ಹೆರಾ೦ ಸ೦ಗಿ೦ ವಾ೦ಟು೦ಕ್ ಜಾಯ್, ಪ್ರತೇಕ್ ಜಾವ್ನ್ ಆಮ್ಚ್ಯಾ ಭುರ್ಗ್ಯಾ೦ಕ್  ಆಮಿ೦ ಕೊ೦ಕ್ಣಿ ಭಾಸೆಚಿ ಅಭಿರೂಚ್ ದಾಖ೦ವ್ಕ್ ಜಾಯ್, ಘರಾನಿ೦ ಕೊ೦ಕ್ಣಿ ಭಾಸ್ ಉಲ೦ವ್ಕ್ ಜಾಯ್.
 

[ಮಾ|ಬಾ|ಮೆಲ್ವಿನ್ ಡಿ’ಕುನ್ಹಾಸವೆಂ ಸಂದರ್ಶನ್ ಘೆತಾತ್; ಪ್ರಸನ್ನ ನಿಡ್ಡೋಡಿ ಆನಿ ಅರುಣ್ ನೊರೊನ್ಹಾ]

- ಪ್ರಸನ್ನ ನಿಡ್ಡೋಡಿ.

 

ಪ್ರಸನ್ನ ನಿಡ್ಡೋಡಿ: ಕೊಂಕ್ಣಿ ವರ್ತುಲಾಂತ್ ಏಕ್ ನಾಟಕಿಸ್ತ್/ನಿರ್ದೇಶಕ್, ಕವಿ/ಲೇಖಕ್/ಕಾಣ್ಯೆಗಾರ್ ಜಾವ್ನ್ ವ್ಹಳ್ಕೆಚೊ ಜಾಲ್ಲೊ ’ಹಿಲರಿ ಡಿ’ಸಿಲ್ವಾ’ ಏಕ್ ಕೊಂಕ್ಣಿ ಸಾಹಿತಿಕ್ ಮೋಗಿ ತಶೆಂಚ್ ಸಕ್ರಿಯ್ ವಾವ್ರಾಡಿ. ಸಮಾಜಿಕ್ ಸ್ಪಂದನ್ ಹಾಚ್ಯಾ ಬರ್ಪಾಂನಿ ಉಟೊನ್ ದಿಸ್ಚೊ ವಿಶಯ್. ಕೊಂಕ್ಣಿ ಪತ್ರಾಂನಿ ತಶೆಂಚ್ ಅಂತರ್‌ಜಾಳಿಂನಿ ಹಾಚಿಂ ಬರ್ಪಾಂ ಪರ್ಗಟ್ಲ್ಯಾಂತ್. ಕೊಂಕ್ಣೆಶಿವಾಯ್ ಹೆರ್ ಭಾಸಾಂತ್ಲೆಂ ಸಾಹಿತ್ ಸಯ್ತ್ ತೊ ಅಧ್ಯಯನ್ ಕರುನ್ ಆಸಾ.

 
 
 

   

2004 ಥಾವ್ನ್ 2011 ಪರ್ಯಾಂತ್ ಕಾರ್ಯಾಳ್ ಆಸ್‌ಲ್ಲ್ಯಾ ದಾಯ್ಜ್.ಕೊಮ್ ಚೆರ್ ಪರ್ಗಟ್‌ಲ್ಲ್ಯಾ ವಿಂಚ್ಣಾರ್ ಸಾಹಿತಾಕ್ ಆಮಿ ಫುಡಿಲ್ಯಾ ದಿಸಾಂನಿ ಪಯ್ಣಾರಿ ವಾಚ್ಪ್ಯಾಂಕ್ ಲಾಭಯ್ತೆಲ್ಯಾಂವ್.
ಆಧ್ಲೆ ಆಂಕ್ಡೆ


ರೊನಾಲ್ಡ್ ಒಲಿವೆರಾ


ವಿಲ್ಸನ್ ಒಲಿವೆರಾ


ಡೊ.ವಿನ್ಸಿ ಪಾಂಬೂರ್

ಆಶಾವಾದಿ ಪ್ರಕಾಶನ್
ಪ್ರಗತಿಶೀಲ್ ಬರಯ್ಣಾರ್

Buffer Email Facebook Google LinkedIn Print



Copyright 2003 - 2016
All rights reserved. This site is property
Ashawadi Prakashan.
All poinnari.com content are copyrighted and may not be copied / modified in any way.
Send questions or comments to:
editor@poinnari.com
  [Archive / Links]