ಕೊಂಕ್ಣಿ ಸಮಾಜ್
ಲ್ಹಾನ್, ಪುಣ್ ಕೊಂಕ್ಣಿ ಚಿಂತಾಪ್ ಲ್ಹಾನ್ ಆಸುನ್ ಉರಾನಾಯೆ,
ಬಗಾರ್ ಆಮ್ಚೆಮಧೆಂ ಅಸ್ಚ್ಯಾ ತಾಲೆಂತಾಕ್, ಪ್ರತಿಭೆಕ್ ಆಮಿ
ವಳ್ಕುಂಚೆಂ ತಶೆಂಚ್ ಜೊಕ್ತೊ ಮಾನ್ ದಿಂವ್ಚೊ ಆಮ್ಚೊ ಕಾಯ್ದೊ
ಜಾವ್ನಾಸಾ. ಅಮಿ ಚಡ್ತಾವ್ ಸಂಯ್ಬಿಕ್ ಮೊಸ್ರಾಚೆ ಶಿಕಾರಿ (ಕೊಣಾಚ್ಯಾ
ರುಪಾಚೆರ್ / ಕಾತಿಚೆರ್ / ಶಿಕ್ಪಾಚೆರ್ / ಸಮ್ಜೊಣೆಚೆರ್ /
ಪ್ರತಿಭೆಚೆರ್ ಮೊಸೊರ್ ಕರ್ತಾಂವ್) ದೆಕುನ್ ಜಶೆಂ
ಕುಂಕಾಡ್ ಆಪ್ಲ್ಯಾ ಪಾಂಯಾಂ ಪಂದಾಂ ಉಸ್ತಿಲ್ಲೆಪರಿಂಚ್,
ಆಮ್ಚಿಚ್ಚ್ ಬಡಾಯ್ ಆಮಿ ಉಚಾರ್ತಾಂವ್, ಆಮಿಂ ಬರಯಿಲ್ಲೆಂಚ್
ವಾಚ್ತಾಂವ್ ಶಿವಾಯ್ ಹೆರಾಂಚೆಂ ವಾಚುಂಕ್ ಸಯ್ತ್ ಆಮ್ಕಾಂ
ಸಯ್ರಣ್ ನಾ. ಅಸಲ್ಯಾ ಮನೋಗತೆಂತ್ ಖಂಚೀಯ್ ಭಾಸ್/ಸಾಹಿತ್
ಉದ್ದಾರ್ ಜಾಯ್ನಾ ಬಗಾರ್ ಕುರ್ವೊನ್ ವೆತಾ. ಅಸಲ್ಯಾ
ಪರಿಗತೆಂತ್ ಪ್ರತಿಭಾವಂತ್ ಬರಯ್ಣಾರ್/ಸಾಹಿತಿ ಹೆರ್
ಭಾಸಾಂನಿ ಬರಂವ್ಕ್ ಲಾಗ್ತಾತ್ ವಾ ಕೊಂಕ್ಣೆಂತ್ ಬರಂವ್ಚೆಂಚ್
ಉಣೆಂ ಕರ್ತಾತ್, ಅಶೆಂ ಕೊಂಕ್ಣೆಕ್ ಎಕಾಥರಾಚೆಂ ಲುಕ್ಸಾಣ್
ಮ್ಹಣ್ಯೆತಾ. ಹಾಚೆಂ ಕಾರಣ್ ಭೋವ್ ಸಂಪೆಂ; ಜೊಕ್ತೆಂ ಶಿಕಾಪ್
ಆಸ್ಚೆ ಬರವ್ಪಿ ಕೊಂಕ್ಣೆಂತ್ ಆಸ್ಚೆ ಭೋವ್ ಥೊಡೆ. ಶಿಕಪ್
ಮ್ಹಳ್ಯಾರ್ ಫಕತ್ತ್ ಡಿಗ್ರಿ ನ್ಹಯ್.
ಅಸಲ್ಯಾಂಚಿ ಮಟ್ವಿ ಪುಣ್ ಸವಿಸ್ತಾರ್ ವಳೊಕ್
ಕರುನ್ ದೀಂವ್ಕ್ ಆಮ್ಕಾಂ ಭೋವ್ ಸಂತೊಸ್ ತಸೊಚ್ಚ್ ಅಭಿಮಾನ್
ಭಗ್ತಾ.
-ಸಂ |
ತಾರಿಕ್ ತಿ 22 ಮಾರ್ಚ್
1996 .ಮಂಗ್ಳೂರ್ ಥಾವ್ನ್ ಲಗ್ಭಗ್ 100 ಕಿಲೋಮಿಟರ್ ಪಯ್ಸ್
ಆಸ್ಚ್ಯಾ ಕುಂದಾಪುರಾಂತ್ಲ್ಯಾ ಪ್ರಕ್ರತೆಂತ್ ಸಂಗೀತಾಚಿ
ಭಂವ್ತಣ್ ರಾಜ್ ಕರುನ್ ಆಸ್ಲ್ಲಿ.ಕುಂದಾಪುರ್ ಲಾಗ್ಶಿಲ್ಯಾ
ಪಡುಕೋಣೆ ಮ್ಹುಳ್ಳ್ಯಾ ಹಳ್ಳೆಂತ್ ಆಪ್ಲ್ಯಾ ಸಾತ್ವ್ಯಾ
ಭುರ್ಗ್ಯಾಚ್ಯಾ ಯೆಣ್ಯಾಕ್ ಏನೊಕ್ ಒಲಿವೆರಾ ಆನಿ ಕ್ಯಾಥರಿನ್
ಒಲಿವೆರಾ ಜೊಡೆಂ ರಾಕೊನ್ ಆಸ್ಲ್ಲೆಂ.ತ್ಯಾ ಸಂಗೀತ್ಮಯ್
ದಿಸಾ ಸಂಸಾರಾಚೊ ಉಜ್ವಾಡ್ ದೆಕ್ಲ್ಲೊ ವ್ಯಕ್ತಿಚ್ ಆಜ್
ಕೊಂಕ್ಣಿ ಸಂಗೀತ್ ಶೆತಾಂತ್ ವಿಜ್ಮಿತಾಚೆಂ ತುಫಾನ್
ಉಟಯಿಲ್ಲೊ ಕೊಂಕ್ಣಿ ಪದಾಂ ಘಡ್ಣಾರ್ / ಗಾವ್ಪಿ ವಿಲ್ಸನ್
ಒಲಿವೆರಾ.
ಆಶೆಂ ಪಳೆಂವ್ಕ್ ಗೆಲ್ಯಾರ್ ಪಡುಕೊಣೆ ಗಾಂವಾಂಕ್ ಆಪ್ಲೊಚ್
ಮುಳ್ಳೊ ಇತಿಹಾಸ್ ಆಸಾ.ಸಭಾರ್ ನಾಂವಾಡ್ದಿಕ್ ವ್ಯಕ್ತಿನಿ
ಹ್ಯಾ ಪಡುಕೊಣೆಂತ್ ಜಲ್ಮ್ ಘೆತ್ಲಾ.ಮಾಜಿ ವರ್ಲ್ಡ್
ಬ್ಯಾಡ್ಮಿಂಟನ್ ಚಾಂಪಿಯನ್ ಪ್ರಕಾಶ್ ಪಡುಕೊಣೆ , ತಾಚಿ ಧುವ್
ಪ್ರಖ್ಯಾತ್ ಚಿತ್ರ್ ನಟಿ ದಿಪಿಕಾ ಪಡುಕೊಣೆ , ಪ್ರಖ್ಯಾತ್
ಸಿನೆಮಾ ನಿರ್ದೇಶಕ್ ಗುರುದತ್ತ್ ತಶೆಂಚ್ ಆಪ್ಲ್ಯಾ
ಉಲೊವ್ಣ್ಯಾ ಲಾಗೊನ್ " ಆಂತರಾಷ್ಟ್ರೀಯ್ ಟೊಸ್ಟ್ಮಾಸ್ಟರ್
ಕ್ಲಬ್ " ಹಾಂಚೆ ಥಾವ್ನ್ " ಆಂತರಾಷ್ಟ್ರೀಯ್ ಪ್ರಶಸ್ತಿ
ವಿಜೇತ್ " ರೊನಾಲ್ಡ್ ಒಲಿವೇರಾ ಆಸಲ್ಯಾ ಪ್ರಖ್ಯಾತ್
ಮನ್ಯಾಂಕ್ ಸಂಸಾರಾಚೊ ಉಜ್ವಾಡ್ ದಾಕೋವ್ನ್ ಪಡುಕೊಣೆ ಗಾಂವ್
ಆಜ್ ಧನ್ಯ್ ಜಾಲಾ.
ಆಸಲ್ಯಾ ಪರಿಸರಾಂತ್ ವಾಡ್ಲ್ಲೊ ವಿಲ್ಸನ್ ಲ್ಹಾನ್ಪಣಾರ್
ಥಾವ್ನ್ಚ್ ಸಂಗೀತಾಂತ್ ಯಶಸ್ವೆಚಿ ಮೊರ್ ಮಾರುನ್ ಮುಖ್ಲ್ಯಾ
ದಿಸಾಂನಿ ಏಕ್ ಪ್ರಖ್ಯಾತ್ ಗಾಯಕ್ ಜಾಂವ್ಚಿಂ ಖುಣಾಂ
ದಾಕೊವ್ನ್ ಆಯ್ಲಾ.ವಿಲ್ಫಿ ಆನಿ ಜೆರೊಮಾಚೊ ಕಟ್ಟಾ ಆಭಿಮಾನಿ
ಜಾವ್ನಾಸ್ಲ್ಲ್ಯಾ ವಿಲ್ಸನಾಕ್ ತಾಚ್ಯಾ ವ್ಹಡಿಲಾಂನಿ ,
ಪಾಂಚ್ ಭಾವಾಂನಿ ಆನಿ ದೊಗಾಂ ಭಯ್ಣ್ಯಾಂನಿ ದಿಲ್ಲ್ಯಾ
ಸಹಕಾರಾ ನಿಮ್ತಿಂ ತಾಂಚಿಂ ಪದಾಂ ಸಾರ್ವಜನಿಕ್ ವೇದಿನಿ
ಗಾಂವ್ಕ್ ಪ್ರಚೋದನ್ ಮೆಳ್ಳೆಂ.ಹ್ಯಾ ಮದೆಂ ಆಪ್ಲಿ ಲಿಖ್ಣಿ
ಮಟ್ವ್ಯಾ ಕಾಣಿಯಾಂ ತೆವ್ಶಿನ್ ಘುಂವ್ಡಾಯಿಲ್ಲ್ಯಾನ್ ಲೇಖಕ್
ಮ್ಹಣೊನ್ ಪರಿಚಿತ್ ಜಾಲ್ಲೊ ವಿಲ್ಸನ್ ಏಕ್ ಆಪೂರ್ವ್
ದೆಣ್ಯಾಂನಿ ಭರ್ಲ್ಲೊ ವ್ಯಕ್ತಿ ಪದಾಮ್ ಘಡ್ಣಾರ್ ಆನಿ
ಮಧುರ್ ತಾಳ್ಯಾಚೊ ಗಾವ್ಪಿ ಮ್ಹಣೊನ್ ತಾಚ್ಯಾ ಲಾಗ್ಶಿಲ್ಯಾ
ಮನ್ಶ್ಯಾಂಕ್ ಮಾತ್ರ್ ಕಳಿತ್ ಆಸ್ಲ್ಲೆಂ.ಆಸ್ಪಾಸ್ಚ್ಯಾ
ಗಾಂವಾಂನಿ ಜಾಂವ್ಚ್ಯಾ ನಾಟಕಾಂನಿ / ಸಂಗೀತ್ ಸ್ಪರ್ದ್ಯಾಂನಿ
ಬೊರೊ ಗಾವ್ಪಿ ಮ್ಹಳ್ಳ್ಯಾ ಹೊಗ್ಳಿಕೆ ಸವೆಂ ಇನಾಮಾಂ
ಆಪ್ಣಾಯ್ತಾಲೊ ತರೀ ಆಪ್ಣೆಂ ಗಾಂವ್ಚಿಂ ಪದಾಂ ಆಪ್ಣೆಂಚ್
ಲಿಖುನ್ ತಾಳೊ ಬಸಯಿಲ್ಲಿಂ ಮ್ಹಣೊನ್ ಸಾಂಗೊಂಕಿ
ದಾಕ್ಶೆಂವ್ಚ್ಯಾ ಹಾಚೆಂ ಕಲಾದೆಣೆಂ ಕಳ್ಶೆ ಪಂದಾಚ್ ಲಿಪೊನ್
ಉರ್ಲೆಂ. ಆಪ್ಲ್ಯಾ ಭಾವ್-ಬೈಣ್ಯಾಂಚ್ಯಾ ಆನಿ
ದೇಶ್-ವಿದೇಶಾಂತ್ಲ್ಯಾ ಕೊಂಕ್ಣಿ ಮೊಗಿಂಚ್ಯಾ ಪ್ರೊತ್ಸಾಹಾನ್
ಆಪ್ಲೆಂ ಲಿಪ್ಲ್ಲೆಂ ದೆಣೆಂ ಸಮಾಜೆ ಮುಕಾರ್ ದವರುಂಕ್ ಜಿಕ್ಲ್ಲೊ
ವಿಲ್ಸನ್ ಒಲಿವೇರಾ ಆಜ್ ಸಗ್ಳ್ಯಾ ಉಡುಪಿ ಜಿಲ್ಲ್ಯಾ ಥಾವ್ನ್
ಕೊಂಕ್ಣಿ ಪದಾಂ ಘಡುನ್ ಗಾಂವ್ಕ್ ಆರಂಭ್ ಕೆಲ್ಲೊ ಪ್ರಥಮ್
ವ್ಯಕ್ತಿ ಮುಳ್ಳ್ಯಾ ಖ್ಯಾತೆಕ್ ಪಾತ್ರ್ ಜಾಲಾ.
ಆಮಿಂ ವಿಲ್ಸನಾಚ್ಯಾ ಮಧುರ್ ತಾಳ್ಯಾಂಕ್ ಆಯ್ಕೊಂಕ್
ಲಾಗ್ಲ್ಯಾರ್, ಕೊಂಕ್ಣಿ ಸಂಗೀತಾಚೊ ಬಾಪಯ್ , "ಕೊಂಕಣ್
ಕೊಗುಳ್" ದೆ.ವಿಲ್ಫಿ ರೆಬಿಂಬಸ್ ಹೊ ಆಮ್ಚ್ಯಾ ದೆಗೆಕ್
ಬಸೊನ್ ಪದಾಂ ಗಾವ್ನ್ ಆಸ್ಚೊ ಆನ್ಭೊಗ್ ಜಾತಾ.ವಿಲ್ಸನಾಚಿಂ
ಪದಾಂ ಭೊವ್ ಆರ್ಥಭರಿತ್ ಜಾವ್ನ್ ಕಾಳ್ಜಾಕ್ ನಾಟ್ವೊಂಚ್ಯಾ
ತಸಲಿಂ ಆನಿ ತಾಳೊ ಗೊಡ್ಸಾಣೆನ್ ಭರೊನ್ ಸುಮಧುರ್
ಜಾವ್ನಾಸಾ.ಥೊಡ್ಯಾ ವರ್ಸಾಂ ಆದಿಂ ದೆ.ವಿಲ್ಫಿ ರೆಬಿಂಬಸಾಕ್
ತಾಚೊ ಕೊಂಕ್ಣಿ ಸಂಗೀತ್ ಕ್ಷೇತ್ರಾಂತ್ ಉತ್ತಾರಾಧಿಕಾರಿ
ಕೋಣ್ ಮುಣೊನ್ ವಿಚಾರ್ಲ್ಲ್ಯಾಕ್ ಕೊಂಕಣ್ ಕೊಗುಳೆನ್
ಕಿತೆಂಚ್ ದಾಕ್ಷೇಣ್ ನಾಸ್ತಾನಾ ಶ್ರೀ ವಿಲ್ಸನ್ ಒಲಿವೆರಾಚೆಂ
ನಾಂವ್ ಸಾಂಗ್ಲ್ಲೆಂ.ತೆದಾಳಾಚ್ ಕೊಂಕ್ಣಿ ಸಂಗೀತ್ ಮೊಗಿಂಕ್
ಉದೇವ್ನ್ ಯೆಂವ್ಚ್ಯಾ ಹ್ಯಾ ನೆಕೆತ್ರಾ ಥಾವ್ನ್ ಮೆಳೊನ್
ಆಸ್ಚ್ಯಾ ಮಹಾನ್ ಸಂಗೀತ್ ಕಾಣಿಕೆಚೊ ಫರ್ಮಳ್ ಮೆಳ್ಲ್ಲೊ.
ಹಾಂಗಾ ಏಕ್ ಕೊಂಕ್ಣಿ ಸಂಗೀತ್ ನೆಕೆತ್ರ್ ದೇಶಾಂ ಥಾವ್ನ್
ದೇಶಾಂತ್ , ಸಂಸಾರಾಚ್ಯಾ ಹರ್ಯೇಕ್ ಕೊನ್ಶಾಂತ್ ನಿಧಾನಾಯೆನ್
ತರೀ ಆಪ್ಲಿಚ್ ಮುಳ್ಳಿ ಮೋರ್ ಮಾರುನ್ ದಿಸಾಂದಿಸ್ ಮುಳ್ಳ್ಯಾ
ಬರಿ ಪ್ರಜ್ವಳುನ್ ಯೆಂವ್ಚೆಂ ದಿಸೊನ್ ಯೆತಾ.ತಾಚಿಂ ಪದಾಂ
ವಿಂಚ್ಣಾರ್ ಆನಿ ಆರ್ಥಾಭರಿತ್ , ತಾಚಿಂ ಉತ್ರಾಂ ಆಪ್ರೂಪಾಚಿಂ
ಆನಿ ಉತ್ತೀಮ್ , ತಾಚೊ ತಾಳೊ ಮಧುರ್ ಆನಿ ಪ್ರೇಕ್ಷಕಾಂಕ್
ವ್ಹಡುನ್ ದರ್ಚ್ಯಾ ತಸಲೊ.ತಾಚೊ ಕೊಂಕ್ಣೆಚೊ ಮೋಗ್ ಸಂಪೂರ್ಣ್
ಕಾಳ್ಜಾಂತ್ಲೊ ಆನಿ ಮೀತ್ ಮೇರ್ ನಾತ್ಲ್ಲೊ.ಮಂಗ್ಳೂರ್ ,
ಬೆಂಗ್ಳೂರ್ ಆನಿ ಮುಂಬಯ್ ತಸಲ್ಯಾ ಶಹರಾಂತಿ ಸಂಗೀತಾಂತ್
ಜೀವನ್ ಸಾರುಂಕ್ ಹ್ಯಾ ಉಂಚಾಯೆಕ್ ಪಾವೊಂಕ್ ಮೆಳ್ಚೆ
ಆವ್ಕಾಸ್ ಆನಿ ಸವ್ಲತಾಯೊ ಪಡುಕೋಣೆ ತಸಲ್ಯಾ ಹಳ್ಳೆಂತ್
ಮೆಳಾನಾಂತ್ ತರೀ ಆಪ್ಲ್ಯಾ ದ್ರಡ್ ಮಿನತೆನ್ ಆನಿ
ಪರಿಶ್ರಮಾಂತ್ ಸಂಸಾರಾಂತ್ಲ್ಯಾ ಹರ್ ಕೊಂಕ್ಣಿ ಮೊಗಿಂಚ್ಯಾ
ಕಾಳ್ಜಾಂತಿ ಜಾಗೊ ಕರುನ್ ಬಸ್ಲ್ಲ್ಯಾ ಶ್ರೀ ವಿಲ್ಸನಾಕ್
ಸರ್ವ್ ಉಲ್ಲಾಸ್ ಫಾವೊ.ಆಜ್ ಕುಂದಾಪುರಾಂತ್ ಸಿಟಿ ಚಾಯ್ಸ್
ಮುಳ್ಳೆಂ ದಫ್ತರ್ ಘಾಲುನ್ ಆಪ್ಲೊ ದಿಸ್ಪಡ್ತೊ ಗ್ರಾಸ್
ಜೊಡುನ್ ಘೆಂವ್ಚೊ ವಿಲ್ಸನ್ ಆಪ್ಲಿಂ ವ್ಹಡಿಲಾಂ ,
ಭಾವ್-ಭಯ್ಣಿ , ಪತಿಣ್ ಶರ್ಮಿಳಾ ತಶೆಂಚ್ ಭುರ್ಗೊ
ಸ್ಟುವರ್ಟ್ ಪಿರೇರಾ ಆಪ್ಲ್ಯಾ ಜೈತಾಕ್ ಕಾರಣ್ ಮುಣೊನ್
ಸಾಂಗ್ತಾನಾ ,ಆಜ್ ಆಪುಣ್ ಕೊಂಕ್ಣಿ ಸಂಗೀತ್ ಸಂಸಾರಾಂತ್ ಉಬೊ
ರಾವೊಂಕ್ ಕೊಂಕಣ್ ಕೊಗುಳ್ ದೆ.ವಿಲ್ಫಿ ರೆಬಿಂಬಸ್ ಹಾಚೆಂ
ಉತ್ತೇಜನ್ ಆನಿ ಸ್ಪೂರ್ತಿ ಕಿತ್ಲಿ ಕಾರಣ್ ತೆಂ ಸಾಂಗೊಂಕ್
ಕಿತೆಂಚ್ ದಾಕ್ಶೆನಾಂ.
ಆಸಲ್ಯಾ ಏಕ್ ಸಾದ್ಯಾ ಆನಿ ಖಾಲ್ತ್ಯಾ ಕೊಂಕ್ಣಿ ಸಂಗೀತ್ಗಾರಾಕ್
ಕೊಂಕ್ಣಿ ವಾಚ್ಪ್ಯಾಂ ಮುಖಾರ್ ದವರುಂಕ್ "ಪಯ್ಣಾರಿ"
ಆಭಿಮಾನ್ ಪಾವ್ತಾ ತಶೆಂಚ್ ತಾಚ್ಯಾ ಮುಖ್ಲ್ಯಾ ಸರ್ವ್
ಯೋಜನಾಂನಿ ತಾಕಾ ಬೊರೆಂ ಮಾಗ್ತಾ.
ಶ್ರೀ ವಿಲ್ಸನ್ ಒಲಿವೆರಾಚ್ಯಾ ವಾವ್ರಾ ವಯ್ರ್ ತಶೆಂಚ್
ಗೌರವಾಂ ವಯ್ರ್ ಏಕ್ ಝಳಕ್ :
ಸಾಧರ್ ಕೆಲ್ಲ್ಯೊ ಸಂಗೀತ್ ಸಾಂಜೊ : 42
ಪಯ್ಲಿ ಸಂಗೀತ್ ಸಾಂಜ್ 1994 ,10 ಫೆಬ್ರೆರಾಂತ್
ಪಡುಕೊಣೆಂತ್ ತಾಣೆಂಚ್ ಘಡ್ಲ್ಲ್ಯಾ ಕೊಂಕ್ಣಿ ಪದಾಂ
ಮುಖಾಂತ್ರ್ ಆರಂಬ್ ಜಾವ್ನ್ ಮುಖ್ಲ್ಯಾ ವರ್ಸಾಂನಿ ಮಂಗ್ಳೂರ್
, ಬೆಂಗ್ಳೂರ್ , ಮುಂಬಯ್ , ದುಬಾಯ್ ಆಬುಧಾಬಿ , ಕುವೈಟ್ ,
ಬಾಹ್ರೇಯ್ನ್ ಆನಿ ಖಟಾರ್ ಗಾಂವಾಂನಿ ಪ್ರದರ್ಶಿತ್ ಜಾಲ್ಯೊ
ತರ್ 42 ಸಂಗೀತ್ ಸಾಂಜ್ 2016 ,17 ಜನೆರಾ ದೀಸ್ ಚೌಡಯ್ಯ
ಮೆಮೊರಿಯಲ್ ಸಭಾಂಗಣ್ ಬೆಂಗ್ಳೂರಾಂತ್ ಪ್ರದರ್ಶಿತ್ ಜಾಲಿ
ತರ್ ಆತಾಂ ಹ್ಯಾ ವರ್ಸಾಚ್ಯಾ ದಿವಾಳಿ ಫೆಸ್ತಾ ಸಂದರ್ಬಿಂ 3
ದಿಸಾಂ ಭಿತರ್ 5 ನಾಯ್ಟಾಂಚೆ ಪ್ರದರ್ಶನ್ ದೀವ್ನ್
ಮುಂಬಯಾಂತ್ಲ್ಯಾ ಕೊಂಕ್ಣಿ ಸಂಗೀತ್ ಪ್ರೇಮಿಚಿಂ ಕಾಳ್ಜಾಂ
ಜಿಕೊಂಕ್ ಭಾಯ್ರ್ ಸರ್ಲಾ.
ಉಜ್ವಾಡಾಕ್ ಆಯಿಲ್ಲ್ಯೊ ಸಂಗೀತ್ ಕೊವ್ಳ್ಯೊ : ಸಾತ್
ಪಯ್ಲಿ ಕೊವ್ಳಿ : ಡಿಶೆಂಬರ್ 25 ,1997 ವೆರ್ ಉಗ್ತಾವಣ್
ಜಾಲಿ.
ದುಸ್ರಿ ಕೊವ್ಳಿ : ಸೆಪ್ಟೆಂಬರ್ 8 ,2001 ವೆರ್ ಉಗ್ತಾವಣ್
ಜಾಲಿ.
ತಿಸ್ರಿ ಕೊವ್ಳಿ : ಆಗೋಸ್ತ್ 15 ,2004 ವೆರ್ ಉಗ್ತಾವಣ್
ಜಾಲಿ.
ಚವ್ತಿ ಕೊವ್ಳಿ : "ಬೊಂಬಯ್ಚೆಂ ಚೆಡುಂ "ಮೇ 5 ,2009 ವೆರ್
ಉಗ್ತಾವಣ್ ಜಾಲಿ.
ಪಾಂಚ್ವಿ ಕೊವ್ಳಿ :"ತುವೆಂ ಗಾಯ್ತಾನಾ" ಒಕ್ಟೊಬರ್ 22
,2010 ವೆರ್ ಉಗ್ತಾವಣ್ ಜಾಲಿ.ಕೊಂಕಣ್ ಕೊಗುಳ್ ದೆ.ವಿಲ್ಫಿ
ರೆಬಿಂಬಸಾಕ್ ಸಮರ್ಪಿತ್ ಕೆಲ್ಲ್ಯಾ ಹ್ಯಾ ಕೊವ್ಳೆಂತ್
ಕೊಂಕಣ್ ಕೊಗುಳೆಕ್ ತಶೆಂಚ್ ಬಜ್ಪ್ಯಾಂ ಏರ್ ಇಂಡಿಯಾ ವಿಮಾನ್
ಆವ್ಘಡಾಂತ್ ಮರಣ್ ಪಾವ್ಲ್ಲ್ಯಾಂಕ್ ಗಾಯಿಲ್ಲಿಂ ಪದಾಂ
ಸಗ್ಳ್ಯಾಂಚ್ಯಾ ಮೆಚ್ವಾಣೆಕ್ ಪಾತ್ರ್ ಜಾಲ್ಯಾಂತ್.
ಸವಿ ಕೊವ್ಳಿ : " ಒ ಮೊಜ್ಯಾ ಭಾಂಗಾರಾ " ಜನೆರ್ 12 ,2012
ವೆರ್ ಉಗ್ತಾವಣ್
ಸಾತ್ವಿ ಕೊವ್ಳಿ : " ನವಿಕರಣ್ " ಸಪ್ಟೆಂಬರ್ 8 ,2014
ವೆರ್ ಉಗ್ತಾವಣ್
ಪ್ರಶಸ್ತ್ಯೊ :
ಕೊಂಕಣಿ ಕಲಾ ಸಮಾಜ್ ಪುರಾಸ್ಕಾರ್ - 1995
ಕರ್ನಾಟಕ ಕೊಂಕಣಿ ಸಾಹಿತ್ಯ್ ಆಕಾಡೆಮಿ - 2003
ದಿವೊ ಸಾಹಿತ್ಯ್ ಪುರಸ್ಕಾರ್ - 2008
ಕೊಂಕಣಿ ಸರ್ದಾರ್ ಪುರಸ್ಕಾರ್ - 2009
ಬಿರುದ್ :
ಎಕ್ಸ್ಪ್ರೇಷನ್ಸ್ ಬಾರ್ಕೂರ್ ಹಾಂಚೆ ಥಾವ್ನ್ " ಕೊಂಕಣಿ
ಸರ್ಧಾರ್"
K.V.W.A ಕುವೈಟ್ ಹಾಂಚೆ ಥಾವ್ನ್ " ಕೊಂಕಣ್ ಮಾಣಿಕ್ "
ಸನ್ಮಾನ್ :
ಕರ್ನಾಟಕ ಸಂಘ - ಶಾರ್ಜಾ , ಯು.ಎ.ಇ.
ಕರಾವಳ್ ಮಿಲನ್ ದುಬಾಯ್ , ಯು.ಎ.ಇ.
K.V.W.A ಕುವೈಟ್
- ನಾನು ಮರೋಲ್ - ತೊಟ್ಟಾಮ್
|