डॉ. भूषण भावे

[संचालक: साहित्य अकाडेमी कोंकणी]

नित्यानंद नायक हो ताच्या नांवा प्रमाणच नित्य आनंदी आशिल्लो. कोंकणी चळवळींतलें तो रसरसतें चैतन्य आशिल्लो. खऱ्या अर्थान तो कोंकणी खातीर तन- मन- आनी मुखेलपणान धन दिवन वावुरलो. विद्यार्थ्यांची फी भरपा पासून तांकां कोंकणी थळांक भेटीक व्हरप, कोंकणी कार्यावळी आपल्या भुजांर घेवप घडोवन हाडप, अडचल्ल्या कोंकणी कार्यकर्त्यांक मदत करूंक फुडाकार घेवप, जंय कोण ना थंय नित्या आशिल्लो.

हांव, पूर्णानंद च्यारी, जयेश रावत आनी नित्या आमची चौंगाचीय खूब दाट इश्टागत जाल्ली ती कोंकणीच्या एका प्रकल्पाक लागून. तो प्रकल्प निकतोच पूर्ण जावंक पावला. त्या प्रकल्पा निमतान खूब लागींच्यान नित्याक पळोवपाची, अणभवपाची संद मेळ्ळी. एक खूब बरो इश्ट, खूब बरो मनीस, दिलदार व्यक्ती, स्पश्ट वक्तो. ताका कोंकणीचो ध्यास आशिल्लो आनी कोंकणीचोच हुस्को. नित्या एक अजातशत्रू. ताची सर्वधर्मी, सर्वजातीय आनी सर्वगटीय इश्टागत आशिल्ली. सगल्यांच कडेन तितलीच खर आनी घट.

नित्या बगर कोंकणी संवसार चिंतप म्हाकठीण. आत्म्याक सद्गती लाबूं.

उशा राणे

[अध्यक्ष: अखील भारतीय कोंकणी परिशद]

बाब नित्यानंद. .. . .

"नित्या" नांवान वळखुवपी आमचो नित्यानंद. कोंकणी मळावेलो तरणाटो खांबो.प्रसिद्धिचे फाटल्यान वचनासतना मनाकाळजा सावन कोंकणीचे कार्याक स्वताक समर्पित करपी. आपले प्राध्यापक पेशाकय तितलोच न्याय दिवपी.केन्ना धीरगंभीर तर केन्ना खेळकर केन्ना जाण्टो तर केन्ना नेण्टो.युवा संमेलन साहित्य संमेलन गाजोवपी. कोंकणी भाशे संबंधान प्रपत्र सादर करपी.एक कुशल संघटक.तांणी जाय ते संघटनेत जाय ती पदां भुशयल्यात आनी तांका फावो ति न्याय दिला.ते एक फोटोग्राफरय आशिल्ले सैम आनी सुकणी हांचे फोटे काडपाक तांका खूब आवडताले.

कोंकणीचे ते एक निष्ठावंत कार्यकर्ते आशिल्ले.गोंयच न्हय तर गोंयभायल्या सगळ्या कोंकणी संस्था आनी कोंकणी मनीस हांचे कडेन भावनीक संबंध दवरपी आमचो 'नित्या' आज आमचे मदीं ना हें खरेंच दिसना.मन ही गजाल मानूकच तयार ना. नियतीन डाव सादलो.

तांचे आत्म्याक शांती लाभू इतलेच म्हणूंक शकता.

तांचे घरच्यांक हो आघात सोंसप कठीण. तरीय तांचे घरच्यांक हें दुख सोसपाची शक्त मेळूं म्हण मागता.

हेमा नायक

[वरिश्ट कोंकणी साहिती]

2 मे 2020. फांतोड उदेतना एके वायट खबरेन जीव अस्वस्थ केलो. नित्यानंद नायक कोंकणीतलो एक निश्ठावान, निसुवार्ती, हांसत्या मुखामळाचो कार्यकर्तो, ताका 1 मेचे राती कडेन काळजाच्या खर आताकान मरण आयलें. ताचें आमचे कडलें नातें अप्रुपायेचेंच आसलें. रगताच्या नात्यापरसूय आगळें.

नित्यानंद केन्ना इश्ट म्हण म्हजें बरें मागपी जावन, तर केन्ना उल्याक पावपी भावावरी, तर केन्ना आदरान वागपी म्हजो भुरगो जाल्लेवरी आमचे कडेन वागत आयला. खंतीन हांव चिंतपाक लागलें, कोंकणिच्या उदरगतिच्या वावरांतली ही फुडाराची पिळगी. हांचेर म्हजो जबरदस्त विश्वास आनी भरवंसो. तांच्या वागपांत दिसून येता कोंकणिची पोटतीडक. नित्याच्या दोन बळीश्ट भुजांची शक्त कोंकणीच्या वावराक लाभल्या. कोंकणी मायभास आंदोलनात नित्यान सक्रिय वांटो घेतला. स्पश्ट आनी सडेतोड उलोवपाक तो केन्नाच भियेलो ना.

भुरग्यांचो ताका खूब मोग. म्हजो चलो धरून सगळ्यांचो तो नित्यमामा. सी.ई.एस महाविद्यालयांत सहयोगी प्राध्यापक आनी कोंकणी विभागाचो मुखेली आशिल्लो. कॉलेजीचे वतीन ताचे लेखकांची भेट वळेरेंत आमचें नाव आसतालेंच आनी अशे तरेन दोन तीन खेपेक तो विद्यार्थ्यांक घेवन वळवय आमगेर आयला. अंदूय आपूण येतलों म्हण लॉकडाउन जावचेआदीं ताणे म्हणिल्लें. ताचें येवप म्हणल्यार बरें दिसतालें.

नित्या कोंकणीत आयलो, भरसलो पूण एकलोच न्ही तर ताचें सगळें कुटूंबच कोंकणीत आयलें. ताच्या वचपांत पेलपाक जावचें ना इतलें दुख्ख काळजांतल्यान दोळ्यांत सांठावलां. ताच्या यादिनी दोळे दुकांनी भरल्यात. सगळ्यांक माया लावन गेलो आमचो नित्या.

मेल्विन रोड्रीगस

[वरिश्ट कोंकणी कवी, कविता ट्रसटाचो मुखेसत]

जिणी सगळी मिस्तेरांची जाल्या. एक्ये कुशीन लॉक‌डौनान जिविताचो अर्थ परत्यान सोदून काडूंक आमकां आपोवणें दिलां. आन्येके कुशीन आयच्या दिसा म्हज्या दोगां खास मनशांच्या मरणान हांव सगळोच व्यस्त जालां, अस्वस्थ जालां. आयच्या दिसा सकाळीं, म्हजो ईष्ट तशें आमीग, दायजीवरल्ड मॅगझिनाचो संपादक हेमाचार्या हाची पतीण आन्ना मस्करेन्हस फाटल्या च्यार वरसां थावन कॅन्सरालागीं झुजोन अंतरली म्हळ्ळे खबरेन आकांत भरताना, खिणान नित्यानंद नायकाच्या मरणाच्ये खबरेन हो आकांत दोडतो जावन जीव सगळो आतां कांय खिणान भस्मून वेता तशें भोगलें.

नित्याची आनी म्हजी वळख कांय बत्तीस वरसां आदली. मांड सोभाण संस्थाच्या सुरवातेच्या दिसांनी आमी गोंयां पावल्यांव तेन्नां कांय तर्नाट्यांची म्हाका वळख जाल्ली. तांतूं श्रीधर कामत, संदेश प्रभुदेसायी, प्रशांत नायक तसल्या सुडसुडीत तरनाट्यां सांगाता नित्या आसल्लो. मागीर चाफ्रा रामनाथीं लेखक सम्मेळाना वेळार अध्यक्ष जाल्ल्यावेळार ही वळख दाट जाली. कोंकणी चळुवळे संबंधीत कांय कार्यक्रमांनी भाग घेवंक तशेंच गोंयां आसचे म्हज्ये भयणीक भेट दीवंक हांव गोंयां पावतालों जाल्ल्यान ही इष्टागत सांबाळून व्हरुंक साध्य जालें.

मागीर दुबाय शेराक पावल्या उपरांत नित्या म्हाका मेळना जालो तरी, कांय धा वरसां आदीं मंगळुराक पावून कविता ट्रस्टाच्या वावरांत बुडून गेल्या उपरांत नित्या परत म्हाका मेळ्ळो. फाटल्या दोन वरसां थावन कांय दोन म्हयन्याक फावटीं तरी तो म्हाका फोन करतालो, खबर काडतालो, ताच्या विद्यार्थिंक घेवन मंगळुराक येंवचो आसा, म्हाका भेटुंक तांकां जाय, म्हजेलागीं कविताविशीं चर्चा करुंक जाय - अशें आमचें उलोवणें चलतालें. ताच्या विद्यार्थिंक घेवन मंगळुराक आयिल्ल्या वेळार आमची मुलाकत जाताली.

म्हजी एक कविता गोंय राज्याच्या पाठ‍पुस्तकांत येंवचे खातीर फाटल्या दोन वरसांनी तो सराग म्हजेलागीं संपर्क दवरून आसल्लो. ह्या शैक्षणीक वरसा थावन म्हजी कविता गोंयच्या पाठ‍पुस्तकांनी येतली.

ह्याच जानेरांत कविता ट्रस्टान गोंयच्या मडगांवांत कविता फेस्त मांडून हाडल्लें. दोन‍य दिसांच्या कार्यावळींक तो हाजर आसल्लो. उगतावण सुवाळ्या वेळार, गोंय कोंकणी भाषा मंडळाचो कार्यदर्शी नात्यान माचयेर तो आसल्लो. आपल्या शाळेखातीर आमचीं पुस्तकांय ताणें विकतिं घेतल्लीं.

कोंकणी चळुवळेक ताचें योगदान जायतें आसा. कोंकणिचो खरो सोजेर तो आसल्लो. ताच्या मरणान कोंकणी शेत अनाथ जालां तशें दिसता. इतले बेगीं ताका मर्णान ग्रासूंक नजो आसल्लें.

ताच्या मरणान आमकांय आमचें मरण आमच्या फाटल्यान आपडूंक तयार रावलां म्हळ्ळ्याची जाणीव जांव, आनी आमी करुंक आसल्लें काम सगळें बेगींच सोंपोंवचें त्राण आमकां लाभूं अशें आशेतां.

प्रकाश पर्येंकार

[कोंकणी विभागाचो मुखेसत, गोंय विश्व‌विध्यालय]

तीन दिसां पयलींच फेस बुकाचेर एक फोटो हांवें अपलोर्ड केल्लो. तेतूंत हांसऱ्या तोंडाचो नित्यानंद म्हाका तेकून उबो आसा. कोंकणी विभागान पंदरा दिसांची कार्यशाळा केल्ली. विषय आशिल्लो “लेग्वेंज डोक्युमेंटेशन ॲंड आर्क्वायवींग” अभ्यासू नित्यांनद हावें थंय पळयलो...

आमचे खातीर नित्यानंद म्हटल्यार फायटर. कोंकणिचें कसलेंय काम आसूं एक वावराडी कसो त्या कामाक खांद मारतालो. सगळींच पड्ड्या फाटल्यान रावून. गोवा युवा महोत्सवात तर जीव तोडून काम करतालो. रात दीस कामा फाटल्यांन आसतलो. अंदुच्या शिक्षणीक वर्सा तर तेणे आपल्या सि ई एस महाविद्यालयांत अखिल भारतीय पांवड्यावेले दोन परिसंवाद घडोवन हाडिल्ले. शब्दकोशाचेर तो एका पंगडा वांगडा काम करतालो.

सदांच हांसरें तोंड. सगळ्यांक मोगान हटकुवपी. खबर घेवपी. हालींच तिची एक कविता वायरल जाल्ली.

तेच्या आत्म्याक शांती लाभूं

प्रजल साखरदांडे

[वरिश्ट इतिहास‌कार, प्राध्यापक]

नित्यानंद नायक कोंकणिचो खदेगंत कार‌याकर‍तो आशिल्लो. गोंयची आस्मिताय, कोंकणी आमची आवय‍भास आनी गोंय खातीर पोटीद‍कीन वावुरलो. कसलीच कोंकणी चळवळिकडल्यान ताणे स्वत: खातीर आपेक्षा केलिना. यूव महोत्सव आनी कोंकणिच्या सगळ्या कार‍याक्रमान तो वावुर्तालो. Man behind the scenes कसो. एक बरो ईषट, मोगाळ, जेंट‍ल, नम्र, संवेधन‍शील व्यक्तिमत्व. सगळ्यांक तो आवडतालो. म्हजे History पुसतक Goa Gold Goa Silver Her History Her Heritage from earliest times to २०१९ ताचो हांवे फोटो घाल्लो कारण तो कोंकणी खातीर जीव‍पडून काम कर्तालो. तूं खूब वेगीं गेलो भावा. आंजू आनी हांव तुका अर्गां ओप्तां. जय गोंय जय कोंकणी जय नित्यानंद.

विन्सी क्वाड्रस

[अध्यक्ष: दल्गादो कोंकणी आकाडेमी]

Prof. Nityanand Naik haka bhavpurv xrod’dhanjoli

Hanv taka Nitya bab heach nanvan ulo kortalom. Amchi vollokh khub adli. Konknni Bhasha Mandal-achea sabar karyank lagun amchem mellop zatalem, ulovp zatalem ani Konknnichem borench kam’ zatalem ani tantuntleanuch amchem khaxelem natem nirmann zalolem. Nityanand Naik, ek professor, to Cuncolim xikoitalo. Halinch tachea xikxok vevsayant taka boddtti mell’lloli ani hea novea xikxonnik vorsa thaun Ph.D. korunk tannem aplem nanv nond kel’lem. Tannem kednam tori mhaka mhunnlolem yad zata, “Mhaka Dr. Nityanand Naik mhonn mhoji vollokh ghoddoiloli zai.” Ani hi vollokh anik 3-4 vorsam bhitor ghoddchi asli. Tachem hem sopon ordear urlem ani taka Dr. Nityanand Naik mhunnpak ami fottovle.

Nityanandak hanvem khoro onnbhovla to Konknni Bhasha Mandal-chea Goa Yuva Mohotsovant, Goa Konknni Akademi-chea Yuva Sahitya Sommelonant ani Konknnichea vaurant. Ek boro songhottok ani ulovpi, kovi ani tornatteancho sangati. To tornatto astanam zoxe vichear progott kortalo, tachem tornatteponn sompunui tiech toreche vichear to azunui progott kortalo. Tornatteam vixim tachem ulovp ani tankam Konknni bhaxe koddem haddpacho tacho aunddo azunui sompunk naslo. To jie kolejint xikoitalo, thoim Sahitya Akademin ghoddoun haddlolea eka porisonvadant vantto ghevpachi mhaka sond mell’lli. Tedea vellar tachem bhurgeam koddlem natem hanvem pollelem. Tanchi kolej ayojok sonstha zalolean, to tankam margdorxon kortalo. Konn eka bhurgean mhaka sanglem, to apli khuxalkai legit bhurgeam koddem vantt’ttalo mhonn. Halinch taka boddtti mell’lloli tednam tannem aplie kolejintlea vidyarthiam borabor khuxalkai monoiloli. Aplie kolejintlea bhurgeak khuinsorui yox mell’llem zalear, tea bhurgea poros taka chodd khuxalkai zatali. Hem hanvem-i onnbhovlem. Mhaka Sahitya Akademicho puroskar jahir zalo tednam mhaka kallzak bhavpi utramni porbim bhettovpi Nitya ek aslo.

Dedd voros fattim ami Gujarat-chea Bhuj vattharant Sahitya Akademin ghoddoun haddlolea North East and Western Writer’s Meet-a khatir gelole. Amche borabor Prof. Bushan Bhave, Prof. Purnanad Chari ani Kovi Ramesh Ghadi asle. Tea vellar ami thoinchea bazarant gele. Nitya kitlo khuxal ani umedi dislo. Don disanchi karyavoll sompoun amakm sokallim nov vorancher viman’tollar pavunk zai aslem. Hanv begin bhair toyar zaun ravlom. Thoddea vellan bakiche aile punn Nityanand ailoch nam. Taka utthoun haddcho poddlo. Magir somzolem to usram nhidonk gel’lean taka utthpak vell zalolo. To kitlo bhavnik ani aplea khasgi vichearamni khuim tori ghusmott’tta hachi il’lixi jholok mell’lli. Kitak Mumboi pavtokoch Gõyant yeunk vimanak uxir zalo. Thoim Mumboichea viman’tollar tache sangata sumar 6-7 voram sarlim tim yadgaruch mhunnchim poddttolim. Tache bhitor ulounchi ek vegllich kola asli.

“Vincy, tuka Bhasha Mandal-acho ‘Stombh-Lekhok’ Puroskar favo zala, porbim!” Hi batmi divpi legit Nitya aslo. To kitliech pautti amger yeun gela punn hanv tanger kednanch pavlo nam hi atam khont urtoli. “Vincy, matxem porikxonn korunk zai aslem.” Kitlem khaltiponn? “Pustokam vhorpak hanv yetam,” he sarkim vidhanam hanv kortalom, tednam to mhunnttalo, “Naka, naka, hanvuch tujea ghora koddem haddun pavoitam.” Oso dusream koddem lhanponnan vagpi ani Konknnichea kamant aspaun ghevpi Nitya bab aiz amche modem okosmat nam zalolean kallzak khub dukhkh zalem. Tachi protima dolleam mukha veli kednanch ‘nam’ zaunchi nam.

Prof. Nityanand Naik, mhojea bhavasarkea ixttak Devan aplie vengent gheuncho ani tachea otmeak xanti diunchi, itlench hea vellar prarthon ani taka lagun Konknni mollar thoddem riteponn uprastolem, tem bhorun kaddunk amkam, Konknni Mogiank Devan boll diunchem hem magnnem.

आर.एस.भास्कर

[वरिश्ट कोंकणी कवी]

याद - एक इश्टागत सुरवतीची!

नित्यानंद गेलें ही खबर आज सकाळी म्हाका पावली तेन्ना मन खप्प जालें. ते एक बरें मित्र आशिल्लें. आमची इश्टागत केन्ना सुरु जालीं, याद येना. एक पावटी ते आपलें कोळेजीतल्या विध्यार्थ्यांक घेवन लेखकांकडेन भेटेक म्होण आमच्या घरा कडेन पावलें. ही याद आजून जिती उरल्या. उपरांत सबार पावटी आमी एकमेकांकडेन मेळ्ळे आनी ही मैत्री वाडत आयली. एक पावटी सेमिनारा खातीर ताचा कोळेजींत बी वचपाचें पडलें. ते कोंकणी भाशा मंडळाचें सचीव बी आशिल्लें.

कोंकणी चळवळींत सक्रीयपणान वावरून आशिल्लें नित्या आज आमचें मदीं ना म्हळ्ळेंले खूब दुखाची गजाल.

अन्वेषा सिंगबळ

[वरिश्ट कोंकणी वावराडी]

एक सांकव मोडला.

जो सांकव वेग वेगळ्या पिळगेच्या कोंकणी चळवळेचो, जो सांकव कोंकणी भाशिकांच्या वेग वेगळ्या बोलिंचो, जो सांकव देश‌भर शिंपडलेल्या कोंकणी लोकांचो. विध्यार्थिंक मोगाचो शिक्षक जावनासलो, भुरग्यांक अभ्यास‌क्रमाच्याकी चडतीत गिन्यान वांटुंक सदांच आयतो आसचो, म्हजेतसल्याक कोंकणीक फुडल्या जनांगाक वरुंक थेंको जाल्लो, म्हज्या तालेंतांचेर भर्वसो दवर‌ल्लो, केदनांच कोणाचेर कसलोच विवाद नातलो, अजात शत्रू, मायामोगाळ, निश्पक्ष‌पाती कोंकणी सोजेर बाब नित्य नायकाविशीं उलवंक उत्रां उणीं पावतीत. तो आमकां सांडून गेला तें दूक कोंकणीक लांब काळ परयांत भग्तेलें. ताच्या अत्म्याक शांती लाभूं.

शैलॆंद्र मेहता

[वरिश्ट कोंकणी कवी]

रुपड्यांच्या संवसारांत वावुरताना खरीं मुखामळां क्वचितूच दिसतात. तान भूक विसरून, कसलीच अपेक्षा दवरीनासतना मानांय कशे वावुरपी प्रामाणिक आनी निष्ठावंत कार्यकर्ते म्हळ्यार कसलेय चळवळीची, संस्थेची वा कार्यावळीची फकत बुन्याद न्हय तर चैतन्य लेगीत. अशे उत्सवमूर्ती सहज सांपडनात. तांचेविणा कसलोच उत्सव परिपूर्ण नासता कारण उत्सव बरेभशेन जांवचो हाची जापसालदारकी ताणीं स्वयंस्फूर्तपणाने स्वताचेर घेतिल्ली आसता. आपल्या वावरांतल्यान हे मनीस फकत आपल्याक दिल्लें आनी करीन दिससारकेंच काम करीनात पूण भोंवतणीं आशिल्ल्यांक आपल्या स्वभावान सदांच प्रेरणा दित रावतात, कार्यप्रवण करतात आनी हेरांच्या खांदावयलो भार आपल्या खांदार घेतात. कोणाकूच सत दिसचेना अशे परिस्थितींत तुं पयसावलो. तुजो तो नित्या ब्रँड हांसो आनी तुजे थांय आशिल्ली नमळाय हांचें दर्शन आतां जांवचेंना. खुबशें उलोवपासारकें आशिल्लें तें उरलें हाचे चुटमुटे सदांच आसतले. पूण कोंकणी चळवळीच्या इतिहासांत तुं उरतलो अजरंवर आनी तुजी स्फूर्त घेवन मांय कोंकणीच्या खळ्यार सदांकाळ उबे रावतले नवे उमेदीचे नवे राखणे, हातूंत मातुय दुबाव ना.

डा बि. देवदास पै

[संयोजक, विद्यापीठ सांजे म्हविद्यालय मंगळूर]

नित्यानंद आमच्यान इतलें बेगीन नित्य अद्रश्य जातलो अशें कांय सपणांतूय हांवे आटयलें ना. मंगळूर विद्यापीठन आयोजन करीत आसले एक राष्ट्रीय परिसंवादाचे पूूूर्व तयारीचो वाव्रांत खूब मदद करून कार्यावळ घडवचे पयलेंच आमका सगळ्यांक सोडून पयस पयस पावलो. नित्यानंदाले आत्माक शांतीदायक आनी भावपूर्ण श्रद्धांजली अरपण करता.
 

प्रकाश द. नायक

[वरिश्ट कोंकणी साहिती]

नित्या म्हणल्यार नित्यानंद नायक. ताची म्हजी पयली भेट खंय जाली तें याद जायना. पूण म्हाका दिसता, 2003 त. वळवयंत जाल्ल्या कोंकणी भाशा मंडळ आयोजीत 9व्या गोवा युवा महोत्सवात आसत.
हांव कोंकणी चळवळींत 1979 सावन आसा. तेन्ना कोंकणी कडेन जे जे आत्मियतेन ओडटात तितलेय आमचे ह्या तत्वा प्रमाणे नित्या कोंकणी चळवळींत कसो मुरला आनी रिगला तें पळयल्ल्यान तो म्हाका खूब भावत गेलो. तो सदांच माचये फाटल्यान रावून काम करपी. मितभाशी. अजातशत्रू. सौम्य उलोवपी. मनीस संग्राहक. खंयूय वचूं तो 'एक फोटो मारूया?' म्हण विचारतालो. कारण त्या फोटवांचे संग्रह करून ताका मनीस जोडपाचे आसताले. एकेक मनशाचें काळीज जोडपाचे आसताले. खंयूय मेळूं, प्रकाशबाब, असो उलो मारून हातांत हात घेवन तो घट्ट धरून हालोवप आनी उलयता उलयता दुसऱ्या हातान कंबराक वेटाळप ही ताची खासीयत आसली.

तुमी ताचो खंयचोय फोटो काडात, तो तुमकां मदीं आशिल्लो सहसा दिसचोना. खंयतरी फाटल्यान वा कुशीक वचून उबो राविल्लो वा कुशीनसो बशिल्लो दिसतलो. ताका 'बडेजाव' म्हणटात तो नाशिल्लोच अशें दाखवपी ही करणी.

नित्याक रात आनी दीस फकत कोंकणीचोच ध्यास. तो मनान आनी तनान फकत कोंकणीचोच ध्यास घेवन जगतालो.

स म्हयन्यांफांटी तो आनी डॉ. पुर्णा (च्यारी) अकस्मात म्हज्या घरा आयले. वरभर बसले. तांणी जेश्ठ लेखक पुंडलीकबाबांची खबरबात केली. नित्यान उठ्ठना म्हणिल्ली तीं वाक्यां आयजूय म्हाका याद जातात. 'ताचे खातीर आमकां कितें तरी करूंक जाय. तूं केन्नाय उलो मार आमी पावलेच म्हणून समज. प्रकाशबाब, ताचे खातीर पयशांची लेगीत कसलीच चिंता करिनासतना सरळ हुस्क्यामेकळे सांग. ताचे खातीर आमी कितेंय करपाक तयार आसात.' आनी आयज तोच नित्या कोणाक कसलीच जाग दाखयनासतना अनंतांत विलीन जाता....

शालांत मंडळाच्या कोंकणी इकरावेच्या पुस्तकाचें संपादन करपाची जापसालदारकी ताचेकडेन आसली. तो उच्च माध्यमीक अभ्यास मंडळाचो एक वांगडी आसलो आनी हांव माध्यमीक अभ्यास मंडळाचो वांगडी आशिल्ल्यान शालांत मंडळान आमची एक जोडबसका आपयल्ली. चार म्हयन्यांफांटी जाल्ले ते बसकेंत हांव ताचेकडेन म्हाका कांय गजाली पटनात तेविशीं विवादात्मक उलयल्लो. तेन्ना तांणी थंडसाणीन म्हणिल्लें, 'प्रकाशबाब, आसू आतां. तुमची पोटतिडक कळटा म्हाका. आमी सगले कोंकणीचेच. कोंकणीचो वावर करतना कोण चुकतात तांकां माफ करून आमी फुडें या.'

- नित्या, अशें थंडसाणेन काम करप तुज्या सारकें कोणाक जमलेंना आनी ह्यान मुखारूय कोणाक जमचेंना. तितलेच थंडसाणेन तूं ह्या संवसाराचो निरोप घेवन गेलो, सासणा खातीर...

चार वर्सांफांटी ह्याच प्राध्यापक नित्यान म्हाका कुंकळ्ळीचेआपले सी ई एस कॉलेजींत कविसंमेलनात मुखेल सोयरो
म्हण व्हेल्लो. कार्यावळीच्या समारोपाक तेन्नाचे तांचे प्राचार्य एल् डी नायक हांचे हस्तुकी म्हाका एक भेटवस्त दिल्ली. घराकडेन येवन ती भेटवस्त
उसोवन पळयली. पळय जाल्यार ती वस्त वणटी वयली घड्याळ आसली. रोकडीच ती हांवें वणटीर हुमकाळायली. जेन्ना जेन्ना हांव ते घड्याळीर वरां पळयतालो तेन्ना तेन्ना म्हाका त्या सी ई एस कॉलेजीची, प्राचार्याची, कुंकळ्ळी गांवाची, कविसंमेलनाची आनी प्राध्यापक नित्यानंद नायकाची सहज याद जाताली.

ती घड्याळ वरावराक आवाज करीत, टोले दित वाजता. आतां त्या प्रत्येक टोल्याटोल्याच्या आवाजांत नित्या, त्या प्राध्यापक नित्यानंद नायक नांवाच्या अज्रंवर, संजीवन, चिरंतन आनी शाश्वत कोंकणी पुताची याद येतली.

नित्या, तुज्या वचपांत कोंकणी मनीस गळसणून गेला. ताका नवी शक्त आनी धैर्य येवंचें अशें त्या सर्वसाक्षी सैमाकडेन मागता आनी तुज्या आत्म्याक चिरंतन शांती मेळची. इतलेंच....

आतूल पांडीत

[वरिश्ट कोंकणी समीक्षक]

नित्यानंद : नित्य आनंदी

कोंकणी मळा वयलो एक तळमळीचो आनी निश्ठावंत कार्यकर्तो नित्य़ानंद नायक आमकां सोडून गेल्ल्याची खबर सकाळीं उठल्या बरोबर कानार पडली आनी मन सुन्न जालें. आदीं विस्वासूच बसना जालो पूण मागीर अनंतबाबाक विचारून खात्री केली.

नित्यानंद! सदांच हांसतमुख. सगल्यां कडेन हांसून खेळून वागपी. दाखयलिपय करिनासतना मनाक पट्टा तें उलोवन वचपी, पूण उलयतना कोणाचें काळीज दुखचें ना हाची जतनाय घेवपी. प्रसिध्दी पासून सदांच पयस रावपी पूण कोंकणीच्या वावरांत निस्वार्थीपणान खांद मारपी. कोणेंय कितेंय म्हणूं आपलें काम तोंड धांपून करीत रावपी. व्हड आसूं वा ल्हान आसूं सगल्यां कडेन नमळायेन वागपी, आदरान उलोवपी. अशीं नित्याचीं कितलिंशींच रुपां.

कोंकणीची कसलीय कार्यावळ आसूं नित्या आसतालोच. तो माचयेर उणो आनी पड्ड्या फाटल्यानच चड बोवाळटालो. जाणट्यां कडेन जाणटो जावन आनी भुरग्यां कडेन भुरगो जावन वागपाची कला ताका सादिल्ली आनी हाकाच लागून नित्यानंद सगल्यांचो नित्या जाल्लो. सगल्यां कडेन आपलेपणान उलोवपाचे ताचे वागणुकेक लागून तो सगल्यांक आपलोसोच दिसतालो.

आयज तो आमचे मदीं ना. ताचीं विंगड विंगड रुपां आमच्या दोळ्यां सामकार नाचतात, ताच्यो गोड यादी आमच्या दोळ्यांत अचळय दुकां हाडटात. ताका नमळायेचीं आर्गां दिवया आनी ताच्या आत्म्याक शांती मेळूं अशें मागुया. आमच्यांनी आनी कितें करूं येता?

रमेश घडी

[वरिश्ट कोंकणी कवी]

नित्या गेलो आनी दिसलें
आयज म्हजो फाटलो भाव गेलो...

प्रोफेसर नित्यानंद नाईक...आमचो मोगाल नित्या, आनंदाचो ..चैतन्याचो एक अखंड व्हांवपी झरो. भोवतणीच्या सगळ्या मनशांक जिखून घेवपाचो वर घेवंनूच जल्मांक आयिल्लो नित्या..

नित्याची आनी म्हजी वळख, इस्टागत फक्त फाटल्या साडेतीन वर्सांची पुण ही इस्टागत सासणाची ...अनंत काळाची भासता तीतकी घट्ट जाल्लीं .
तो मडगाव पच्छिम गोयांत आनी हांव साळगावा उत्तर गोयांत .. आमचे मेळप जरी चड फावट जाय नासलें तरीय फोन, वॉटसअँप ..फेसबूक पोस्ट असल्या माध्यमांतल्यान आमचो नेमान संवाद जातालो. बरीं कविता, लेख पोस्ट करतकच, हांवें गावांत कितेंय सामाजिक कार्य करतकच ताची प्रतिक्रिया, तोखणाय सदाच आसतालीच.

तशें नित्या सगळ्यांचे बरेच उलवपी, बरेंच चितपी..एक अजातशत्रू असो हो मनीस, आपूण काळोखांत रावून दुसऱ्यांक उजवाडांत हाडपाक सदा वावूरपी.

मडगावा रविंद्रभवनांत आशील्लें कार्यावळीक मुद्दाम वचपा फाटल्यान नित्या खूप दिसानीं मन मेकळो उलोवंक मेळटलो हें म्हजें खुप फावटी कारण आसतालें.

कोंकणीचो वावर हो ताचो स्वभावधर्म जाल्लो. कोंकणीचो वावर करतना आपुण कितें व्हडलें काम करतां अशें ताका केदनाच दिसनाशील्लें..एक विधात्यान निर्मून दिल्लें आपूण कर्म करता अशें चितपी कर्मयोग्याच्या पावड्यार तो पाविल्लो.
ह्या भांगराचे काळीज आशील्ल्या इस्टाक देवाचें अशें अचकित आपवणें येतलें अशें सपनांत लेगीत चितूंक नाशील्लें.

आमी भूज गुजराताक राश्ट्रीय साहित्यिक मेळ्याक गेल्ले तेन्नां आमच्या फोटवाक पळोवंन हांवें हासत म्हळें ' पळय नित्या फोटवांत आमीं दोगूंय टफ भाव कशे दिसतात '..
'भाव कशे खंय ...आमी दोगूय भावूच म्हरे, तू व्हडलो हांव धाकलो '..
ताणेन म्हाका खेम घालीत म्हणील्लें .
आमी ही भावकी सदाच सांबाळली..पूण असो अचकित आमका रडयत हो धाकलो भाव वयतलो हें मात सपणांत लेगीत चितूंक नाशिल्ले.
नित्या शॉक दिवंन गेल्लो. ह्या इश्टाक विसरप ह्या जल्मांत शक्य नां.
ईश्वर ताच्या आत्म्यांक शांती दिवं.

ದಾಯ್ಜ್.ಕೊಮ್