ಜನೆರ್ 22 ತಾರಿಕೆರ್ ಸುರ್ವಾತ್ ಜಾವ್ನ್ ಜನೆರ್ 24  ತಾರಿಕೆರ್ ಪಂಜಿಮ್, ಗೋಯಾಂತ್ ಸಂಪ್ಲೆಲ್ಯಾ ಅಖಿಲ್ ಭಾರತೀಯ್ ಕೊಂಕಣಿ  ಪರಿಶದೆಚಾ ತೀಸಾವ್ಯಾ ಅಧಿವೇಶನಾಂತ್  ಕೊಂಕಣಿ ಲೋಕಾಚಾ ಎಕ್ವಟಾಚಿ ವಾಟ್ ಹ್ಯಾ ವಿಶಯಾಚೆರ್ ಎಕ್ ಭಾಸಾಭಾಸ್ ಆಸಾ ಕೆಲ್ಲಿ.  ಹಾಂತುಂ ಗೊಂಯ್, ಮಂಗ್ಳೂರ್, ಕೆರಳ್, ಮಹಾರಾಷ್ಟ್ರ ಥಾವ್ನ್ ಆಯಿಲ್ಲ್ಯಾ ಪ್ರತಿನಿಧಿನಿ ಭಾಗ್ ಘೆತ್‍ಲ್ಲೊ. ಹ್ಯಾ ಸಂದರ್ಭಾರ್ ದೋನ್ ಉತ್ರಾಂ ಬರಂವ್ಕ್ ಖುಶಿ ವರ್ತಾಂ.

ಆಜ್ ಆಮಿ ಪಳೆಲೆಂ ತರ್, ಕೊಂಕ್ಣಿ ಲೊಕಾಂ ಮಧೆಂ ಅದ್ಲೆ ಬರಿಂ ಎಕ್ವಟ್ ದಿಸೊನ್ ಯೆನಾ.  ಹರ್ಯೆಕಾ ಲಿಪಿಂತ್ ಆಪ್ಲೊಚ್ ಮ್ಹಳ್ಳೊ ಜಾಯ್ತೊ ವಾವ್ರ್ ಜಾರಿ ಆಸಾ ಪುಣ್ ತ್ಯಾ ತ್ಯಾ ಲಿಪಿ ಭಾಯ್ರ್  ಸಂಘಟಿತ್ ಥರಾನ್ ಕಸಲೊಯ್ ಮಹತ್ವಾಚೊ ಕೊಂಕ್ಣಿ ವಾವ್ರ್ ಕೆಲ್ಲೊ ದಿಸಾನಾ. ಎಕಾ ಲಿಪಿಚೆಂ ಸಾಹಿತ್ಯ್ ಆನ್ಯೇಕಾ ಲಿಪಿಚಾ ವಾಚ್ಪ್ಯಾಂಕ್  ಎಕಾ ಪರ್ಕ್ಯಾ ಲಿಪಿಚಾ ಸಾಹಿತ್ಯ ಬರಿಂ ಜಾಲಾಂ.  ಎಕಾ ಲಿಪಿಚಾ ವಾಚ್ಪ್ಯಾಂಕ್ ಆನ್ಯೆಕಾ ಲಿಪಿಚಾ ಬರವ್ಪ್ಯಾ ವಿಶಿಂ ಕಿತೆಂಚ್ ಮಾಹೆತ್ ನಾ. ಎಕ್  ಸಮುದಾಯೆಂತ್ ಚಲ್ಚಾ ಕೊಂಕ್ಣಿ ಕಾರ್ಯಾಕ್ರಮಾ ವಿಶಿಂ, ಹೆರ್ ಲಿಪಿಚಾ ರಸಿಕಾಂಕ್ ಖಬಾರ್ ಆಸಾನಾ.  ಅಸಲ್ಯಾ ಎಕಾ ಪಾಟ್-ಭುಂಯ್ತ್  ಕೊಂಕ್ಣಿ ಭಾಶೆಚೊ ವಿಕಾಸ್ ವ ಕೊಂಕ್ಣಿ ಲೊಕಾಚೊ ಎಕ್ವಟ್ ಜಾಂವ್ಚೊ ತರೀ ಕಸೊ ಹೆಂ ಸವಾಲ್ ಉದೆತಾ.  

ಎಕ್ವಟಿತ್ ಥರಾನ್ ಕಾಮ್ ಕರುಂಕ್ ಪಯ್ಲಿ ಆನಿ ವ್ಹಡ್ ಅಡ್ಕಳ್ ಜಾವ್ನಾಸಾ ಭಾಶೆಚೆಂ ಪ್ರಮಾಣಿಕರಣ್ ಜಾಂವ್ಕ್ ನಾತ್ಲೆಲೆಂ.  ವಿವಿಧತಾ ಆನಿ ಬಹುಮುಖಿತ್ವ್ ಭಾರತಾಚೆಂ ಖಾಶೆಲೆ ಗೂಣ್ ಜಾವ್ನಾಸಾತ್.  ಪುಣ್ ವಿವಿಧತಾ ಸಬಾರ್ ವಿವಾದಾಂಕ್ ಕಾರಣ್ ಜಾಲ್ಯಾ.  ಸಾದೊ ಬೊಳೊ ಲೋಕ್ ತಾಚೆ ವರ್ವಿಂ ಕಷ್ಟಾತಾ. ಭಾರತಾಂತ್ ಹಿಂದಿ ಆನಿ ಸಾಂಗಾತಾ ಇಂಗ್ಲಿಷ್ ದೋನ್ ಪ್ರಮುಖ್ ಅಧಿಕೃತ್ ಬಾಸೊ ಅಶೆಂ ಮಾಂದುನ್ ಘೆತ್ಲಾಂ. ದೆಕುನ್ ಭಾರತಾಂತ್ ರಾಷ್ಟ್ರ ಭಾಸ್ ಮ್ಹಣೊನ್ ನಾ.  ಪುಣ್ ಹರ್ಯೆಕಾ ರಾಜ್ಯಾಕ್ ಆಪ್ಲಿಚ್ ಮ್ಹಳ್ಳಿ ಎಕ್ ರಾಜ್ಯ್ ಭಾಸ್ ಆಸಾ. ತಶೆಂ ಗೊಂಯ್ಚಿಂ ರಾಜ್ಯ್ ಭಾಸ್ ಕೊಂಕ್ಣಿ ಜಾವ್ನಾಸಾ.  ಥೊಡೆ ಪಾವ್ಟಿಂ ಎಕಾ ರಾಜ್ಯಾಚಿ ಭಾಸ್ ಆನ್ಯೇಕಾ ರಾಜ್ಯಾಚಾ ಲೊಕಾಕ್ ಕಳಿತ್ ಆಸಾನಾ.  ಉದಾಹರಣ್ ದಿಂವ್ಚೆಂ ತರ್ ತಮಿಳ್ ನಾಡುಚಾ ತಮ್ಳಾಂಕ್ ಉತ್ತರ್ ಪ್ರದೇಶಾಚಿ ಹಿಂದಿ ಭಾಸ್ ಸಮ್ಜನಾ. ಹಾಂವ್ ಚಿಂತಾಂ ಅಸಲೊಚ್ ಎಕ್ ಸಮಸ್ಸೊ ಕೊಂಕ್ಣಿ ಭಾಸೆಚೊ ಜಾಂವ್ಕ್ ಪಾವ್ಲಾ.  ಕೊಂಕ್ಣಿ ಉಲವ್ಪಿ ಲೋಕ್ ಕೇರಳಾ ಥಾವ್ನ್ ಗುಜರಾಥ್ ಮ್ಹಣಾಸರ್ ಶಿಂಪಡ್ಲಾ.  ಹರ್ಯೆಕಾ ರಾಜ್ಯಾಂತ್ ಆಪ್ಲಿಚ್ ಮ್ಹಳ್ಳಿ ಎಕ್ ರಾಜ್ಯ್ ಭಾಸ್ ಆಸಾ.  ಕೊಂಕ್ಣಿ ಲೋಕ್ ಅಪ್ಲ್ಯಾ ಕೊಂಕ್ಣೆಂತ್ ತಾತಾಂಚಾ ರಾಜ್ಯ್ ಭಾಶೆಚಾ ಸಬ್ದಾಂಚೊ ಬರೊಚ್ ವಾಪಾರ್ ಕರ್ತಾ. ಪಾವಾನಾತ್‍ಲ್ಲ್ಯಾಕ್ ಹರ್ಯೆಕಾ ಪಂದ್ರಾ ಕಿಲೊ ಮಿಟರಾಂತ್ ಎಕ್ ಉಪ-ಬೊಲಿ ಆಸಾ. ವಿವಿಧ್ ಬೊಲಿಂಚೊ ಮುಖ್ಯಾ ಉದ್ದೇಶ್ ಲೊಕಾಕ್ ಎಕಾಮೆಕಾ ಸಂಪರ್ಕ್ ಕರುಂಕ್, ಎಕಾಮೆಕಾಕ್ ಸಮ್ಜೊನ್ ಘೆಂವ್ಕ್ ಸಲಿಸ್ ಕರ್ಚೊ ಮ್ಹಣ್ಜೆ ಲೊಕಾಕ್ ಎಕ್ವಾಟಾಂವ್ಚೊ ಶಿವಾಯ್ ತಾಂಕಾಂ ವಿಂಗಡ್ ಕರ್ಚೊ ಜಾಂವ್ಕ್ ಪಾವೊ ನಾ.  

ಕೊಂಕ್ಣಿ ಭಾಶೆಂತ್ ಕೆರಳಾಂತ್ ಮಲೆಯಾಳಮ್, ಕರ್ನಾಟಕಾಂತ್ ಕನ್ನಡ ಆನಿ ತುಳು (ಸ್ಥಾನೀಯ್ ಭಾಸ್), ಗೊಯಾಂತ್ ಪೊರ್ಚುಗೀಸ್ ಅನಿ ಮರಾಠಿ, ಮಹಾರಾಷ್ಟ್ರಾಂತ್  ಮರಾಠಿ ಆನಿ ಗುಜರಾಥಾಂತ್ ಗುಜರಾತಿ ಭಾಶೆಚೆ ಸಬ್ಧ್ ಬರ‍್ಯಾಚ್ ಮಾಫಾನ್ ಮಿಸ್ಳೊನ್ ಗೆಲ್ಯಾತ್. ಆಶೆಂ ಭಾಶೆಚೆಂ ಸ್ವರೂಪ್ ಬದಲ್ಲಾಂ. ಎಕಾ ರಾಜ್ಯಾಚಾ ಕೊಂಕ್ಣ್ಯಾಕ್ ಆನ್ಯೇಕಾ ರಾಜ್ಯಾಚಿ ಕೊಂಕ್ಣಿ ಭಾಸ್ ಎಕ್ ಪರ್ಕಿ ಭಾಸ್ ತಶೆಂ ಜಾಲ್ಯಾ.  ಹೊ ಸಮಸ್ಸೊ ಆಮಿ ಚಿಂತ್ಚಾ ಪ್ರಾಸ್ ಚಡ್ ಗಂಭಿರಾಯೆಚೊ ಜಾಲಾ.  ತೀಸಾವ್ಯಾ ಅಧಿವೇಶನಾ ವೆಳಾ ಕೆರಳಾಚಾ ಪ್ರತಿನಿಧಿನಿ ವೆಧಿಚೆರ್ ದಿಲ್ಲಿಂ ಭಾಷಣಾಂ ವ ವಾಚ್‍ಲ್ಲಿಂ ಕವಿತಾ ಬಹುತೇಕ್ ಜಣಾಂಕ್ ಸಮ್ಜಲಿನಾಂತ್ ಆಶೆಂ ಲೋಕ್ ನಿರಾಶಿ ಜಾಲೊ.  ಆಮಿ ಆತಾಂಚ್ ಕಿತೆಂ ತರೀ ಉಪಾಯ್ ಸೊದ್ಲೊ ನಾಂತರ್ ಕ್ರಮೇಣ್ ಹೊ ಸಮಸ್ಸೊ ದುಸ್ರೊಚ್ ಆಕಾರ್ ಘೆಂವ್ಕ್ ಸಾದ್ಯ್ ಆಸಾ. 

ಲೋಕ್ ಉಲಯ್ತಾನಾ ಆಪ್ಲಿ ಉಪ-ಭಾಸ್ ವಾಪಾರ್ತಾ ತರೀ ಛಾಪ್‍ಲ್ಲಿ ಭಾಸ್ ಎಕಾಚ್ ಥರಾಚಿ ಆಸ್ಲ್ಯಾರ್ ತಿ ಸರ್ವಾಂಕ್ ಸಮ್ಜತಾ.  ಉಲೈಲ್ಲೆಂ ಉತರ್ ಸಂದರ್ಭಾ ಪರ್ಮಾಣೆ ಸಮ್ಜಾತಾ. ಸಮ್ಜಾಲೆಂ ನಾಂತರ್  ಉಲವ್ಪ್ಯಾ ಲಾಗಿಂ ಪರತ್ ವಿಚಾರ್ನ್ ಸಮ್ಜೊನ್ ಘೆವ್ಯೆತಾ.  ಪುಣ್ ಬರೈಲೆಲಿ ಸಂಗತ್ ವಾಚ್ತಾನಾ ಬರವ್ಪಿ ಮುಕಾರ್ ಆಸಾನಾ.  ಆನಿ ಬರವ್ಪ್ಯಾ ಲಾಗಿಂ ವಿಚಾರ್ನ್ ಸಮ್ಜೊನ್ ಘೆಂವ್ಚೆಂ ಸವಾಲ್ ನಾ.  ದೆಕುನ್ ಬರ್ಪಾಂತ್ ಸಮಾನತಾ ಅತೀ ಗರ್ಜೆಚೆಂ. ಸರ್ವಾಂಕ್ ಸುಲಭಾಯೆನ್ ಸಮ್ಜೊಂಚೆ ತಸಲಿ ಎಕ್ ಸಾಮಾನ್ಯ್ ಸರಳ್ ಭಾಸ್, ಸಗ್ಳ್ಯಾ ಉಪ ಬೊಲಿಂತ್ಲೆಂ ಸಾಮಾನ್ಯ್, ಸರಳ್ ಸಬ್ಧ್ ಸಾಂಭಾಳ್ನ್, ಎಕ್ ವ್ಹಾಳ್ತಾ  ತಸಲಿ ಅಪುಟ್ಟ್ ಕೊಂಕ್ಣಿ ಭಾಸ್ ಬೋವ್ ಗರ್ಜೆಚಿ. ಭಾಶೆಚೆಂ ಪ್ರಮಾಣಿಕರಣ್ ಕರ್ಚೆಂ ಸಲಿಸ್ ನಹಿಂ.  ಸರ್ವ್ ಕೊಂಕ್ಣ್ಯಾಂಕ್ ಆಪ್ಲ್ಯಾ ಮಾಂಯ್ ಭಾಶೆ ಖಾತಿರ್ ಇಲ್ಲೊಸೊ ತ್ಯಾಗ್ ಕರುಂಕ್ ಪಡ್ತೊಲೊ.  ಕಿತೆಂ ಬರೆಂ ಆನಿ ಕಿತೆಂ ವಾಯ್ಟ್ ತೆಂ ಉಗ್ತ್ಯಾ ಮನಾನ್ ಮಾಂದುನ್ ಘೆಂವ್ಕ್ ಪಡ್ತೆಲೆಂ.  ಸರ್ವ್ ರಾಜ್ಯಾಂಚಾ ಭಾಶಾ ಪಂಡಿತಾಂಕ್  ಸಾಂಗಾತಾ ಹಾಡ್ನ್, ಉಗ್ತ್ಯಾ ಮನೋಭಾವನ್, ಜಾತ್ ಕಾತ್, ಪ್ರಾದೇಶಿಕತಾ ಬಗ್ಲೆಕ್ ದವರ್ನ್ ತರ್ ವಾವ್ರ್ ಕೆಲೊ ಎಕ್ ಪ್ರಮಾಣಿಕ್ ಕೊಂಕ್ಣಿ , ಜಿ ಹರ್ಯೆಕಾ ಕೊಂಕ್ಣ್ಯಾಕ್ ಸಮ್ಜಾ ಸಾರ್ಕಿ, ಎಕ್ ಕೊಂಕ್ಣಿ ಭಾಸ್ ಜಾಂವ್ಕ್ ಪಾವ್ತೆಲಿ.  ಉದಾಹರಣಾಕ್ ಹಿಂದಿ ಭಾಶೆಂ ತ್ ಚಾಳಿಸಾಂ ವಯ್ರ್ ಉಪ ಬೊಲಿ ಆಸಾತ್.  ಪುಣ್ ಹಿಂದಿ ಬರಂವ್ಚಿ ರೀತ್ ಎಕ್.  ತಶೆಂಚ್ ಕನ್ನಡ ಭಾಶೆಂ ತ್ ಸಬಾರ್ ಬೊಲಿ ಆಸಾತ್.   ಪುಣ್ ಬರಂವ್ಚಿ ರೀತ್ ಆನಿ ವ್ಯಾಕರಣ್, ಸಭ್ದಾಕೋಶ್ ಸರ್ವ್ ಪ್ರಮಾಣಿಕ್ ಭಾಶೆಂತ್ ಛಾಪ್ಲ್ಯಾತ್.  ಕೊಂಕ್ಣೆಂತ್ ಸಬಾರ್ ಉಪ ಬೊಲಿ ಆಸಾತ್ ಮಾತ್ರ್ ನಹಿಂ, ತಿ ಬರಂವ್ಚಿ ಲಿಪಿ ವಿವಿಂಗಡ್.  ಹ್ಯಾ ಕಾರಣಾಕ್ ಲಾಗೊನ್ ಪತ್ರಾಂ, ಸಾಹಿತ್, ಚಲನ್ ಚಿತ್ರಾಂ, ನಾಟಕಾಂಕ್ ಜಾಯ್ತ್ ತ್ಯಾ ಮಾಪಾನ್ ವಾಚ್ಪಿ ವ ಪ್ರೇಕ್ಷಕ್  ಮೆಳಾನಾಂತ್.   ಎಕ್ ಪ್ರಮಾಣಿಕ್ ಭಾಸ್ ಜರ್ ತರ್ ಆಸ್‍ಲ್ಲಿ, ಕೇರಳಾ ಥಾವ್ನ್ ಗುಜರಥಾ ಮ್ಹಣಾಸರ್ ಸರ್ವ್ ಕೊಂಕ್ಣಿ ಲೋಕ್ ತಾಕಾ ಪಾಟಿಂಬೊ ದಿತೊ ಆಸ್‍ಲ್ಲೊ.  ಚಡ್ ಆನಿ ಚಡ್ ಸಾಹಿತ್ ಉಬ್ಜಾತೆಂ ಆನಿ ಆಮಿ ಸರ್ವ್ ಎಕ್ ಮ್ಹಳ್ಳೊ ಮನೋಭಾವ್ ಯೆತೊ.  ಆಜ್ ತಶೆಂ ನಾ ಹಿ ವ್ಹರ್ತ್ಯಾ ಬೆಜಾರಾಯೆಚಿ ಗಜಾಲ್. ಕೊಂಕ್ಣಿ ಎಕ್ವಟಾಚಿ ದುಸ್ರಿ ಅಡ್ಕಳ್ ಮ್ಹಳ್ಯಾರ್ ಭಾಶೆಚಾ ಉಚ್ಚಾರಾಚೆಂ ಪರಕ್.  ದೆಕುನ್ ದೋನ್ ಪ್ರದೇಶಾಚೆ ದೋಗ್ ಕೊಂಕ್ಣೆ ಸಾಂಗಾತಾ ಮೆಳ್ತಾನಾ ತೆ ಕೊಂಕ್ಣಿ ಉಲಂವ್ಕ್ ಪಾಟಿಂ ಕರ್ತಾತ್ ಆನಿ ಖಂಚಾಯ್ ಸಾಮಾನ್ಯ್ ಭಾಶೆಂತ್ ವ್ಹವಹಾರ್ ಕರ್ತಾತ್. ಎಕ್ ಸಾಮಾನ್ಯ್ ಬರ್ಪಾ ರೀತ್ ಆಯ್ಲಿ ತರ್ ಉಚ್ಚಾರ್ ಕರ್ಚಿ ರೀತ್ ಆಪಾಪಿಂಚ್ ಬದ್ಲಾತೆಲಿ.   

ಎಕ್ ಸಾಮಾನ್ಯ್ ಭಾಸ್ ಕಶೆಂ ಎಕ್ವಟಿತ್ ಕರುಂಕ್ ಸಕ್ತಾ ತಶೆಂಚ್ ವಿವಿಂಗಡ್ ಕರುಂಕೀ ಸಕ್ತಾ ಹೆಂ ಮತಿಂತ್ ದವರ್ಚೆಂ ಅತೀ ಗರ್ಜೆಚೆಂ.  ತೇಗ್ ಜಣ್ ಕೊಂಕ್ಣೆ ಸಾಂಗಾತಾ ಮೆಳ್ತಾನಾ ದೋಗ್ ಎಕಾ ಪ್ರದೇಶಾಚೆ ಮ್ಹಣ್ಜೆ ಉದಹರಣಾಕ್ ದೋಗ್ ಕೆರಳಾಚೆ ಆನಿ ಎಕ್ಲೊ ಮಹಾರಾಷ್ಟ್ರಾಚೊ ಮ್ಹಣ್ ಚಿಂತ್ಯಾ.  ಭಾಸ್ ಎಕ್ ತರೀ ಕೆರಳಾಚೆ ದೊಗೀ ಕೊಂಕ್ಣೆ ಸಾಂಗಾತಾ ಉಲಯ್ತಾನಾ, ಮಹಾರಾಷ್ಟ್ರಾಚೊ ತಾಕಾ ತಿ ಕೊಂಕ್ಣಿ ಸಮ್ಜನಾ ದೆಕುನ್ ತಾಂಚೆಂ ಥಾವ್ನ್ ವಿಂಗಡ್ ವ್ಹಚೊನ್ ಆಪ್ಣಾಬರಿಂ ಉಲಂವ್ಚಾ ಇತರ್ ಕೊಂಕ್ಣಿ ಮನ್ಶ್ಯಾಕ್ ಸೊಧುನ್ ವ್ಹೆತೊಲೊ. ಹೆಂ ಸಹಜ್ ಕಿತ್ಯಾಕ್ ಮ್ಹಳ್ಯಾರ್ ಭಾಸ್ ಅನುವಂಶಿಕತಾ ಆನಿ ಕುಳಿಯೆಚ್ಯಾಕೀ ವರ್ತಿ ಜಾವ್ನಾಸಾ.

ಕೊಂಕ್ಣಿ ಲೊಕಾಕ್ ಎಕ್ವಟಾಂವ್ಚೆಂ ಕಾಮ್ ಕೊಂಕ್ಣಿ ಸಂಘ್ – ಸಂಸ್ಥ್ಯಾನಿಂ ಸುಲಭಾಯೆನ್ ಕರ್ಯೆತಾ.  ಎಕಾ ಸಮುಧಾಯಾಚಾ ಕೊಂಕ್ಣಿ ಫುಡಾರ‍್ಯಾನಿಂ ಇತರ್ ಸಮುದಾಯೆಚಾ ಫುಡಾರ‍್ಯಾಂಚೊ ಸಂಪರ್ಕ್ ಕರಿಜಾಯ್.  ಆಪ್ಲ್ಯಾ ಸಾಂಸ್ಕೃತಿಕ್ ಕಾರ್ಯಕ್ರಮಾನಿಂ ಕಲಾಕಾರಾಂಕ್ ಅದಲ್ ಬದಲ್ ಕರುಂಕ್ ಜಾಯ್.  ಸಂಗೀತ್ ಕಾರ್ಯಕ್ರಮಾಂ ಕರುಂಕ್ ಜಾಯ್.  ಸಂಗೀತಾಕ್ ಭಾಸ್ ವ ಲಿಪಿ ಲಾಗು ಜಾಯ್ನಾ.  ಎಕಾಮೆಕಾ ಕೊಂಕ್ಣೆಂತ್ ಉಲಂವ್ಚಿ ಸವಯ್ ಕರುಂಕ್ ಜಾಯ್.  ಸಮ್ಜನಾ ಮ್ಹಣ್ ಉಲಯ್ನಾಸ್ತಾನಾ ರಾವ್ಲ್ಯಾರ್ ಜಾಂವ್ಚೆಂ ನಾ.  ಸುರ್ವಾತ್ ಕರ್ಚಿ ಗರ್ಜೆಚೆಂ.  ಉಪ್ರಾಂತ್ ಅಪಾಪಿಂಚ್ ಸಮ್ಜಾತೆಲೆಂ.  ಸಂಘ್-ಸಂಸ್ಥ್ಯಾ ಮಧೆಂ ಎಕ್ವಟ್ ದಿಸೊನ್ ಯೆನಾ.  ಸರ್ವ್ ಸಮುದಾಯೆಂಚಾ ಸಂಘ್-ಸಂಸ್ಥ್ಯಾನಿಂ ಸಾಂಗಾತಾ ಮೆಳೊನ್ ಕಾರ್ಯಕ್ರಮಾ ಆಸಾ ಕರುಂಕ್ ಜಾಯ್. ಹಾಂಗಾಸರ್ ಎಕ್ ಅಡ್ಕಳ್ ಮ್ಹಳ್ಯಾರ್ ಎಕಾಮೆಕಾಚೊ ಸಂಪರ್ಕ್ ನಾ.  ಕಸಲೆಂಚ್ ಸಂಪರ್ಕ್ ಮಾಧ್ಯಮ್ ನಾ.  ಆಪಾಪ್ಲ್ಯಾ ಲಿಪಿಚಾ ಪತ್ರಾನಿಂ ಆನಿ ಅಂತರ್ಜಾಳಿನಿ ತಾತಾಂಚಾ ಕಾರ್ಯಕ್ರಮಾಂಚೊ ಪ್ರಸಾರ್ ಜಾತಾ ತರೀ  ಸಮುದಾಯಾ ಭಾಯ್ರ್ ತಾಚೊ ಪ್ರಸಾರ್ ಬಿಲ್ಕುಲ್ ಜಾಯ್ನಾ.  ಎಕಾಮೆಕಾಚಿ ವಳಕ್ ಸಮೇತ್ ಆಸಾನಾ.  ಥೊಡೆ ಪಾವ್ಟಿಂ ತಿಯಾತ್ರಾಚೆಂ ಸಂವಾದ್ ಸಾರ್ಕೆ ಸಮ್ಜಾನಾಂತ್ ವ ಉತ್ರಾಂಚೊ ಉಚ್ಚಾರ್ ಸಮ್ಜನಾ ಅಶೆಂ ಆಯ್ಕೊಂಕ್ ಮೆಳ್ತಾ. ದೆಕುನ್ ಎಕಾ ಸಮುದಾಯಾಚೊ ಲೋಕ್ ಆನ್ಯೇಕಾ ಸಮುದಾಯಾಚಾ ಕಾರ್ಯಕ್ರಮಾಂಕ್ ಹಾಜಿರ್ ಜಾಯ್ನಾಂತ್.  ಭಾಶೆಚಿ ವೈವಿಧ್ಯತಾ ಎಕಾಚ್ಚಾಣೆ ಸಂಪೂರ್ಣ್ ಥರಾನ್ ಪಯ್ಸ್ ಕರುಂಕ್ ಅಸಾದ್ಯ್.  ಪುಣ್ ಸುಲಭಾಯೆನ್ ಎಕಾಮೆಕಾಕ್ ಆರ್ಥ್ ಜಾಂವ್ಚೆ ಬರಿಂ ಪುಣಿ ಕರುಂಕ್ ಜಾಯ್.  ಸಾಂಸ್ಕೃತಿಕ್ ಹಂತಾರ್ ವಿವಿಧ್ ಪ್ರದೇಶಾಂಚಾ ನಾಟಕಿಸ್ತ್, ಕಲಾಕಾರ್ ಆನಿ ಗಾವ್ಪ್ಯಾನಿಂ ಸಾಂಗಾತಾ ಮೆಳೊನ್ ತಾಂಚಿಂ ಕಲಾ ಪ್ರದರ್ಶನಾ ಸಾಮುಹಿಕ್ ಥರಾನ್ ಆಸಾ ಕರುಂಕ್ ಜಾಯ್.

ಕೊಂಕ್ಣಿ ಲೋಕಾನ್ ಪರಿಷದೆಚಾ ಆಧಿವೇಶನಾಂಕ್, ಫೆಸ್ತಾಂ ಆನಿ ಸಮ್ಮೇಳನಾಂಕ್ ಹಾಜರ್ ಜಾಂವ್ಕ್ ಜಾಯ್.  ಥಂಯ್ಸರ್ ಇತರ್ ರಾಜ್ಯಾಂಚಾ ಕೊಂಕ್ಣಿ ಫುಡಾರ‍್ಯಾಚಿಂ, ಕಲಾಕಾರಾಚಿಂ, ಕವಿಚಿಂ, ಗಾವ್ಪ್ಯಾಚಿಂ ಭೆಟ್ ಜಾತಾ, ಇತರ್ ಪ್ರದೇಶಾಚಿಂ ಸಾಂಸ್ಕೃತಿಕ್ ಕಾರ್ಯಾಕ್ರಮಾಂ ಪಳೆಂವ್ಕ್ ಮೆಳ್ತಾತ್.  ಸಾಹಿತ್ ಆಚಾರ್-ಪಾಚಾರ್  ಜಾತಾ.  ಈಷ್ಟ್ ಮೆಳ್ತಾತ್ ಆನಿ ಹೊ ಸಂಪರ್ಕ್ ಕೊಂಕ್ಣಿ ಎಕ್ವಟಾ ಖಾತಿರ್ ಎಕ್ ಬುನ್ಯಾದ್ ಜಾಂವ್ಕ್ ಪಾವ್ತಾ.

ಟಿ. ವಿ. ವ ರೆಡಿಯೊ ಮಾರಿಫಾತ್ ಬರಿಂ ಮನೋರಂಜನ್  ಕಾರ್ಯಾಕ್ರಮಾಂ ಆಸಾ ಕರುಂಕ್ ಜಾಯ್.  ಚಲನ್ ಚಿತ್ರಾಂ ಆಸಾ ಕರುಂಕ್ ಜಾಯ್.  ಕೊಂಕ್ಣೆಂತ್ ಆಜ್ ಕಾಲ್ ಚಲನ್ ಚಿತ್ರಾಂ ನಾಂ ಬರಾಬರ್ ಜಾಲ್ಯಾಂತ್.  ವಿವಿಧ್ ಕಲಾ ಆನಿ ಸಾಂಸ್ಕೃತಿಕ್ ಮಾಧ್ಯಮಾಂಚಾ ಮುಖಾಂತ್ರ್ ವಿವಿಧ್ ಪ್ರದೇಶಾಂಚಾ ಆನಿ ಸಮಾಜೆಂಚ್ಯಾ ಕೊಂಕ್ಣಿ ಲೋಕಾಕ್ ಸಾಂಗಾತಾ ಹಾಡುಂಕ್ ಹರ್ಯೆಕಾ ಸಂಘ್-ಸಂಸ್ಥ್ಯಾನ್ ಮೆಳೊನ್ ವಾವ್ರ್ ಕರುಂಕ್ ಜಾಯ್.  ಸಕ್ಡಾಂಕ್ ತರ್ಕಾಕ್ ಆವ್ಕಾಸ್ ದಿವ್ನ್, ಸರ್ವಾಂಚ್ಯೊ ಆಭಿಪ್ರಾಯೊ ಘೆವ್ನ್ ಚಲ್ಚೆಂ ಬರೆಂ. ಆಮಿ ಕಿತ್ಲೆ ಚಡ್ ಎಕಾಮೆಕಾಕ್ ಮೆಳ್ತಾಂವ್, ಎಕಾಮೆಕಾಂಚಾ ಕಾರ್ಯಕ್ರಮಾಂಕ್ ಹಾಜರ್ ಜಾತಾಂವ್, ತಿತ್ಲೊ ಚಡ್ ಆಮ್ಚೆ ಮಧ್ಲೊ ಅಂತರ್ ಆನಿ ವ್ಯತ್ಯಾಸ್ ಉಣೆಂ ಜಾತೊಲೊ.  ಆಮ್ಚಿಂ ಕಾರ್ಯಕ್ರಮಾಂ ಪಕತ್ತ್ ಆಪಾಪ್ಲ್ಯಾ ಸಂಘ್-ಸಂಸ್ಥ್ಯಾಂಕ್ ಸೀಮಿತ್ ಕರಿನಾಸ್ತಾನಾ, ಹೆರಾಂ ಸಂಘ್-ಸಂಸ್ಥ್ಯಾಂ ಸಾಂಗಾತಾ ಎಕ್ವಟಿತ್ ಥರಾನ್ ಕೆಲಿಂ ತರ್ ಆಮ್ಕಾಂ ಪ್ರೇಕ್ಷಕ್ ಲಾಬ್ತೆಲೆ.  ಆಮಿ ಸರ್ವ್ ಕೊಂಕ್ಣೆಂ ಮ್ಹಳ್ಳ್ಯಾ ಭಾವನಾಕ್ ಪ್ರಾಮುಖ್ಯತಾ ದಿಲಿ ತರ್ ಸರ್ವ್ ಅಡ್ಕಳಿ ಆಪಾಂಪಿಂಚ್ ಪಯ್ಸ್ ಜಾತೆಲೆ.  ವಿವಿಂಗಡ್ ಕೊಂಕ್ಣ್ಯಾಚೊ ಸಂಪರ್ಕ್ ಚಡೊನ್ ಆಯಿಲ್ಲೆ ಪರಿಂಚ್ ತಾಂಚ್ಯಾ ಉಚ್ಚಾರ್ ಕರ್ಚಾ ರಿತಿರ್ ಅಂತರ್ ಉಣೊ ಜಾತೊಲೊ. ಸಂಘ್-ಸಂಸ್ಥ್ಯಾನಿಂ ಪಕತ್ತ್ ಆಪಾಪ್ಲ್ಯಾ ಸಮಾಜೆಂತ್ ವಿವಿಧತಾ ಹಾಡ್ಚೆ ವರ್ನಿ ಸಂಘಟಿತ್ ಥರಾನ್ ವಾವ್ರ್ ಕೆಲೊ ತರ್ ಲೋಕಾಂಚೊ ಎಕ್ವಟ್ ವಾಡ್ಚಾಂತ್ ಆನಿ ಭಾಶೆಚಿ ಉದರ್ಗತಿ ಜಾಂವ್ಚಾಂತ್ ದುಬಾವ್ ನಾ.

ಖಂಚೀಯ್ ಎಕ್ ಲಿಪಿ ಭಾಶೆ ವರ್ನಿ ವರ್ತಿ ನ್ಹಯ್. ಲಿಪಿ ಸಾಹಿತ್ಯ್ ಬರಂವ್ಚೆಂ ಕೇವಲ್ ಎಕ್ ಸಾಧನ್ ಮಾತ್ರ್.  ಬರಯಿಲ್ಲ್ಯಾ ಸಾಹಿತ್ಯಾಕ್ ಪಾವೊತೆ ವಾಚ್ಪಿ ನಾಂತ್ ತರ್ ಬರೊವ್ನ್ ಪಾಯ್ಧೊ ಕಿತೆಂ?  ವಾಚ್ಪ್ಯಾಂಚೊ ಪಾಟಿಂಬೊ ಜಾಯ್ ತರ್ ಸಕ್ಡಾಂಕೀ ಸುಲಭಾಯೆನ್ ವಾಚುನ್, ಸಮ್ಜೊಂವ್ಚಿಂ ಸಾದಿ ಭಾಸ್ ಗರ್ಜೆಚಿ.  ಕೊಂಕ್ಣಿ ಮನಿಸ್ ಪ್ರಮುಖ್ ತೀನ್ ಲಿಪಿ ಜಾಣಾಂತ್.  ದೆಕುನ್ ಪ್ರಮಾಣಿಕ್ ವಾಚಾಪ್ ಖಂಚಾಯ್ ಲಿಪಿಂತ್ ತೆಂ ಆಸೊಂ ತಾಕಾ ಖಾಯ್ಸ್ ಕರ್ತೆಲೆ.  

ಸರ್ವ್ ಕೊಂಕ್ಣ್ಯಾಂಕ್ ಸಲಿಸಾಯೆನ್ ವಾಚುನ್, ಸಮ್ಜೊನ್ ಘೆಂವ್ಚಾ ತಸಲ್ಯಾ ಎಕಾ ದಿಸಾಳ್ಯಾ ಪತ್ರಾಚಿ ಆತೀ ಗರ್ಜ್ ಆಸಾ. ಆನಿ ತಾಚೊ ಆಭಾವ್ ದಿಸೊನ್ ಯೆತಾ.  ಪ್ರಮಾಣಿಕ್ ಕೊಂಕ್ಣಿ ಭಾಶೆಂತ್ ಎಕ್ ದಿಸಾಳೆಂ ಪಾಯ್ಸ್ ಕೆಲೆಂ ತರ್ ತಾಕಾ ಬರೊಚ್ ಪಾಟಿಂಬೊ ಮೆಳಾತ್. ಪ್ರಮಾಣಿಕ್ ರೀತ್ ಆಪ್ಣಾಯ್ಲೆ ಉಪ್ರಾಂತ್ ಭಾಶೆಕ್ ಎಕ್ ನಿರ್ಧಿಷ್ಟ್ ಲಿಪಿ ಠರಾಯ್ಲಿ ತರ್ ಭಾಶೆಕ್ ಕಸಲೆಂಚ್ ಭಾದಕ್ ಜಾಂವ್ಚೆಂ ನಾ.  ಭಾಶೆ ಸಂಬಂದಿತ್ ನಕಾರಾತ್ಮಕ್ ವಾವ್ರ್ ಅಧಿಕೃತ್ ಲಿಪಿಚಾ ಪಾಯ್ಧ್ಯಾಚೆಂ ಜಾಂವ್ಚೊ ಸಂಭವ್ ಆಸಾ.  ಸರ್ವಾನಿಂ ವಾಪರ್ಚಾ ಇಂಗ್ಲಿಷ್ ಭಾಶೆಕ್ ಸಮೇತ್ ಆಪ್ಲಿಚ್ ಮ್ಹಳ್ಳಿ ಲಿಪಿ ನಾ. ಇಂಗ್ಲಿಷ್ ರೊಮಿ ಲಿಪಿಂತ್ ಬರಯ್ತಾತ್.  ತಶೆಂಚ್ ಹಿಂದಿ ಭಾಶೆಕ್ ದೆವ್ ನಾಗರಿ ಲಿಪಿಂತ್ ಬರಯ್ತಾತ್.  ದೆಕುನ್ ಲಿಪಿಚೊ ವಾದ್ ಆಮಿ ಬಗ್ಲೆಕ್ ದವರ್ನ್ ಭಾಶೆಚೆಂ ಪ್ರಮಾಣಿಕರಣ್ ಕರ್ಚೊ ವಾವ್ರ್ ಸುರ‍್ವಾತ್ ಕೆಲೊ ತರ್ ಭಾಶೆಕ್ ಹಿತಾಚೆಂ ಜಾವ್ನಾಸಾ. 

ಮನಿಸ್  ಆಪ್ಲ್ಯಾ ಜಿವನಾಂತ್ ಪಾರಂಪರಿಕ್ ರಿತಿನ್ ವಾಪಾರ್ನ್ ಆಯಿಲ್ಲಿ ವಾಟ್ ಬದ್ಲುಂಕ್ ಎಕಾಛ್ಚಾಣೆ ತಯಾರ್ ಜಾಯ್ನಾ.  ಪುಣ್ ತ್ಯಾ ಬದ್ಲಾವಣೆ ಥಾವ್ನ್ ಮೆಳ್ಚೊ ಪಾಯ್ಧೊ, ಆನಿ ತಶೆಂ ಕೆಲೆಂ ನಾಂತರ್ ಜಾಂವ್ಚೊ ನಷ್ಟ್ ಹೆಂ ತಾಚಾ ತಿಳುವಳ್ಕೆಕ್ ಹಾಡ್ಚಿ ಗರ್ಜ್.  ಎಕ್ ಪ್ರಮಾಣಿಕ್ ಭಾಶೆ ಸಾಂಗಾತಾ ಎಕ್ ಸಾಮಾನ್ಯ್ ಲಿಪಿ ಸ್ವೀಕಾರ್ ಕರ್ಚೆ ಬರಿ ಸ್ಥಾನಿಕ್ ಕೊಂಕ್ಣಿ ಪುಡಾರ‍್ಯಾನಿಂ ಉಗ್ತ್ಯಾ ಮನಾನ್, ನಿಸ್ವಾರ್ಥ್ ಭಾವನಾನ್ ಭಾಶೆಚಾ ಬರೆಪಣಾ ಖಾತಿರ್ ನಿರ್ಣಯ್ ಘೆತ್ಲೊ ತರ್ ತಾಚೊ ಪ್ರತಿಫಳ್ ಸರ್ವ್ ಕೊಂಕ್ಣಿ ಲೋಕಾಕ್ ಲಾಭ್ತೊಲೊ.  ಕೊಂಕ್ಣಿ ಭಾಶೆಕ್ ಸಂವಿಧಾನಾಚೊ ದರ್ಜೊ ಮೆಳೊನ್ ವರ್ಸಾಂ ಜಾಲಿಂ ಸಬಾರ್, ಪುಣ್ ಆನಿಕೀ ಭಾಶೆಚಾ ಸರ್ವಾಂಗಿಣ್ ಉದರ್ಗತೆಕ್ ಆಸಾತ್ ಅಡ್ಕಳ್ಯೊ ಅಪಾರ್. ದೆಕುನ್ ಸರ್ವ್ ಸಂಘ್-ಸಂಸ್ಥ್ಯಾನಿಂ ಜಾತ್-ಕಾತ್, ಮತ್-ಧರ್ಮ್, ಊಂಚ್-ನೀಚ್, ಆಮಿ ಕೆರಳಾಚೊ, ಆಮಿ ದಕ್ಶಿಣ್ ವ ಉತ್ತರ್ ಕನ್ನಡಾಚೆ, ಆಮಿ ಗೊಂಯ್ಕಾರ್, ಆಮಿ ಮಾಹಾರಾಷ್ಟ್ರಾಚೆ ಮ್ಹಳ್ಳೆ ಪ್ರಾದೇಶಿಕ್ ವಿಚಾರ್ ಪಯ್ಸ್ ಕರ್ನ್, ಆಮಿ ಸಗ್ಳೆ ಕೊಂಕ್ಣೆ ಮ್ಹಳ್ಳ್ಯಾ ವಿಶಾಲ್ ಮನೋಭಾವನ್ ವಾವ್ರ್ ಮುಂದರ್ಸುಂಚೊ ವೇಳ್ ಆತಾಂ ಆಯ್ಲಾ.  ಹಿ ಜವಾಬ್ಧಾರಿ ಆಮಾ ಸರ್ವಾಂಚಿ ಜಾವ್ನಾಸಾ. ಆಮ್ಚೆ ಸರ್ವ್ ಸಂಘ್-ಸಂಸ್ಥೆ ಎಕ್ ಜಾವ್ನ್ ಹೊ ವಾವ್ರ್ ಸಂಘಟಿತ್ ಥರಾನ್ ಕರುಂಕ್ ಪೆಚಾಡ್ತಿತ್ ತರ್ ಹ್ಯಾ ವಾವ್ರಾಂತ್ ಯಶಸ್ವಿ ಮೆಳ್ಚಾಂತ್ ದುಬಾವ್ ನಾ.

- ಲಾರೆನ್ಸ್ ಡಿ’ಸೋಜ್, ಕಮಾನಿ [ಜನೆರ್, 2016]

[2016 ಜನೆರ್ 22 ಥಾವ್ನ್ 24 ಪರ್ಯಾಂತ್ ಗೊಯಾಂತ್‌ಲ್ಯಾ ಪಣಜಿಂತ್ ಚಲ್‌ಲ್ಲ್ಯಾ 30ವ್ಯಾ ಅಖಿಲ್ ಭಾರತೀಯ್ ಕೊಂಕಣಿ ಸಾಹಿತಿಕ್ ಪರಿಶದೆಂತ್ ವಾಚ್‌ಲ್ಲೆಂ ಲೇಖನ್]

lawrencekamani@gmail.com

ಲಾರೆನ್ಸ್ ಡಿ’ಸೋಜ್, ಕಮಾನಿ: ಮುಂಬಯಾಂತ್ ಏಕ್ ವಾವ್ರಾಡಿ, ನಿರ್ದೇಶಕ್, ಲೇಖಕ್ ಜಾವ್ನ್ ಸರ್ವ್ ಕೊಂಕ್ಣಿ ಲೊಕಾಕ್ ಮೊಗಾಳ್ ಜಾಲ್ಲೊ ಹೊ ಏಕ್ ಉಲವ್ಪಿ ತಶೆಂಚ್ ಕೊಂಕ್ಣಿ ಭಾಸೆಚೊ ಹುಸ್ಕೊ ಆನಿ ಮಾಯಾಮೋಗ್ ಆಸ್ಚೊ ಕಲಾಕಾರ್. ಸಂಯ್ಬಾಂತ್ ಭೋವ್ ಸಾದೊ ಆನಿ ಮಾಯಾಮೊಗಾಳ್ ವೆಕ್ತಿತ್ವಾಚೊ ತಶೆಂಚ್ ಕೊಂಕ್ಣಿ ವಾವ್ರ್ ಕರ್ತೆಲ್ಯಾಂಕ್ ಸದಾಂಚ್ ಪಾಟಿಂಬೊ ದಿಂವ್ಚೊ. ವೆವೆಗ್ಳ್ಯಾ ಸಂಘಟನಾಂನಿ ಜಾಯ್ತೊ ಕೊಂಕ್ಣಿ ವಾವ್ರ್ ಹಾಣೆಂ ಕೆಲಾ.

ಲಾರೆನ್ಸ್ ಡಿ’ಸೋಜಾಚಿಂ ಹೆರ್ ಬರ್ಪಾಂ

1. ಮುಂಬಯಾಂತ್ಲೊ ಕೊಂಕ್ಣಿ ವಾವ್ರ್