ಬೂಕ್: ಏಕ್ ನವೊ ಸಂಸಾರ್
ಪ್ರಕಾರ್: ಕೊಂಕಣಿ ಮೊಟ್ವ್ಯೊ ಕಾಣಿಯೊ
ಕಾಣಿಯೆಗಾರ್: ಮಾ| ಚೇತನ್ ಲೋಬೊ.
ಪರ್‍ಗಟ್ಣಾರ್: ಆಶಾವಾದಿ ಪ್ರಕಾಶನ್
ಪಾನಾಂ: 154+4
ಮೋಲ್: 250
ಇಸ್ವಿ: 2019

ಸುರ್ವಾತ್: ಖಂಯ್ಚಾಯ್ ಸಾಹಿತ್ಯಾಕ್ ವಾಚ್ತಾನಾ ತೆಂ ಸಾಹಿತ್ಯ್ ಮ್ಹಜ್ಯಾ ಪಸಂದೆಚೆಂ? ಹಾವೆಂ ಖಾಯ್ಸ್ ಕರ್‍ಚೆಂ? ಹಾವೆಂ ಆಶೆಂವ್ಚೆಂ? ಹಾವೆಂ ಬರಂವ್ಚೆಂ? (ಮ್ಹಳ್ಯಾರ್ ಮ್ಹಜ್ಯಾ ವ್ಯಕ್ತಿಗತ್ ಅಭಿರುಚಿಚೆಂ?) ಆಶೆಂ ಹಾಂವ್ ಚಿಂತುಂಕ್ ವಚಾನಾ. ಸಾಹಿತ್ಯಾಕ್ ಹಾಂವ್ ಸಾಹಿತ್ಯ್ ಮ್ಹಣುನ್ ಚಿಂತಾಂ! ಜಾಂವ್ ತೆಂ ಮೆಡಿಚಲ್ ಪ್ರಿಸ್ಕ್ರಿಪ್ಶನ್! ತಶೆಂ ಹೊ ಕಾಣಿಯಾಂ ಜಮೊ. ಏಕ್ ಕಾಣಿ ಮ್ಹಳ್ಯಾರ್ ಆಮಿಂ ತಾಕಾ ಕಾಣಿ ಮ್ಹಣೊನ್ ವೊಲಾಂವ್ಚೆಂ ಮಾತ್ರ್! ಪೂಣ್ ಹಕೀಗತೆಂತ್ ತಿ ಏಕಾ ಜಿವಿತಾನ್ ವಾ ಸಭಾರ್ ಜಿವಿತಾಂನಿ ಸಾರ್‍ಚಿ ಜಿಣಿ! ಜಾಂವ್ ತಿ ರಾಯಾಳ್ ಜಿಣಿ ವಾ ದುರ್ಬಳ್ ಜಿಣಿ! ಜಿಣಿ ಜಿಣಿಚ್! ರಾಯಾನ್‌ಯೀ ತಿ ಜಿಣಿ ಜಿಯೆಂವ್ಕ್ ಆಸಾ ಆನಿ ಭಿಕಾರ್‍ಯಾನ್‌ಯೀ ತಾಚಿ ಜಿಣಿ ಜಿಯೆಂವ್ಕ್ ಆಸಾ. ಆಶೆಂ ಆಸ್ತಾಂ.... ಫಲಾಣೊ ಎಕ್ಲೊ, ರಾಯಾಚ್ಯಾ ಜಿಣಿಯೆಂತ್ ಸಿಂತಿಮೆಂತಾಂ ನಾಂತ್..... ವಾ ದುರ್ಭಳ್ಕಾಯೆಚ್ಯಾ ಜಿಣಿಯೆಂತ್ ಉತ್ಸುಕಾಯ್ ನಾ! ಮ್ಹಳ್ಯಾರ್, ಅಸಲ್ಯಾ ಜಾತಿಕ್ ಕಿತೆಂ ಮ್ಹಣ್ಚೆಂ? ತಾಚ್ಯಾ ಚಿಂತ್ಪಾ ಪರ್ಮಾಣೆಂ ಹಾಂಗಾಸರ್ ದುಬ್ಳೊ ದುಬ್ಳ್ಯಾ ಕುಟ್ಮಾಂತ್ ಜಲ್ಮಾಲ್ಯಾಚಿ ಆನಿ ರಾಯ್ ರಾಯಾಳ್ ಕುಟ್ಮಾಂತ್ ಜಲ್ಮಲ್ಲಿ ಚೂಕ್ ಜಾತಾ ಆನಿ ಸಮಾಜೆಚೆಂ ಸಂತುಲನ್ ಚುಕ್ತಾ. ಆನಿ ಚುಕ್ಲೆಲ್ಯಾ ಸಂತುಲನಾ ಭಿತರ್ಲ್ಯಾ ಸಮಾಜೆ ಥಾವ್ನ್ ಕಿತೆಂ ಖಿರ್‍ಲಾತ್? ರುಕಾ ಆಳ್ಮೆಂ?

"ಏಕ್ ನವೊ ಸಂಸಾರ್!" ಆಯ್ಲೆವಾರ್ ಪರ್ಗಟ್ಲೆಲ್ಯಾ ಕಾಣಿಯಾಂ ಜಮ್ಯಾಚೆಂ ನಾಂವ್. ಬೂಕ್ ಹಾತಾಕ್ ಮೆಳೊನ್ ನಾಂವ್ ವಾಚ್ತಾನಾಚ್ ಹಾವೆಂ ಚಿಂತ್ಲೆಂ.... ಏಕ್ ನವೊ ಸಂಸಾರ್ ಆನಿ ಮಾನಾಧೀಕ್ ಚೇತನ್ ಲೋಬೊ!? ಕೊಂಕ್ಣೆಂತ್ಲ್ಯಾ ಸಭಾರ್ ಸಂಪಾದಕಾಂ ಪಯ್ಕಿಂ ಭೋವ್‍ಚ್ ಥೊಡ್ಯಾ ಸಂಪಾದಾಕಾಂಕ್ ಮಾತ್ರ್ ಹಾಂವ್ ಖರೆ ಸಂಪಾದಕ್ ಮ್ಹಣೊನ್ ಮಾಂದ್ತಾಂ! ತಾಂಚೆ ಪಯ್ಕಿ ಮಾ| ಚೇತನ್ ಲೋಬೊ ಎಕ್ಲೊ. ಅಸಲೊ ಸಂಪಾದಕ್ ಆನಿ ತಾಚೊ ಏಕ್ ನವೊ ಸಂಸಾರ್! (ಡೆಫಿನಿಟಿವ್ ವಾ ಇನ್‍ಡೆಫಿನಿಟಿವ್?) ಕಾಲ್ಪನಿಕ್ ವಾ ನೈಸರ್ಗಿಕ್? ಧಾರ್ಮಿಕ್ ವಾ ನಾಸ್ತಿಕ್? ಆಶಾವಾದಿ (ತಕ್ಲೆ ನಾಂವ್ ಸಾಂಗ್ತಾ ತಶೆಂ) ವಾ ಪರ್‍ದ್ಯಾ ಪಾಟ್ಲೊ ಅಸ್ಪಶ್ಟ್ ನಿರಾಸ್ ವಾದಿ?

ಖಂಯ್ಚೋಯ್ ಬೂಕ್ ಹಾಂವ್ ಹಾತಿಂ ಘೆತಾಂ ತರ್ ತಾಂತ್ಲಿಂ ಲೇಖಕಾಚಿಂ ಉತ್ರಾಂ ಆನಿ ಪಸ್ತಾವನ್ ವಾಚ್ಚಿ ಸವಯ್ ಹಾವೆಂ ಕೆದ್ನಾಂಗೀ ಸೊಡುನ್ ದಿಲ್ಯಾ. ಹಾಂವ್ ಪಯ್ಲೆಂ ಪುಸ್ತಕ್ ವಾಚ್ತಾಂ ತಾಂತ್ಲ್ಯಾ ವಿಚಾರಾಂಕ್ ಪಾರ್‍ಕಿತಾಂ ಉಪ್ರಾಂತ್ ಲೇಖಕಾಚಿಂ ಉತ್ರಾಂ ಆನಿ ಪ್ರಸ್ತಾವನ್ ಪಳೆತಾಂ. ತಶೆಂ ಹ್ಯಾ ಬುಕಾಂತ್ಲೆಂ ಸಾಹಿತ್ಯ್ ವಾಚುಂಕ್ ಆರಂಭ್ ಕೆಲ್ಲ್ಯಾ ಮ್ಹಾಕಾ ಹ್ಯಾ ಪುಸ್ತಕಾಂತ್ಲಿ ಪಯ್ಲಿ ಕಾಣಿ ’ಬದ್ಲಾಲ್ಲೊ ಗಾಂವ್’ ವಾಚ್ತಾನಾ ಏಕ್ ವಿಶೇಶತಾ ದಿಸ್ಲಿ. ಆನಿ ನಿಮಾಣ್ಯಾ ಪಂಗ್ತೆರ್ ಮ್ಹಾಕಾ ಏಕ್ ದೃಶ್ಯ್ ದಿಸ್ಲೆಂ. ತೆಂ ದ್ರಶ್ಯ್ ಕೊಣೆಂ ದೆಖ್ಲಾಂ ತಾಂಕಾಂ ಮಾತ್ರ್ ತೆಂ ಸಮ್ಜಾತಾ. ಮುಂಬಯ್ ಏರ್ ಪೊರ್ಟಾ ಥಾವ್ನ್ ವಿಮಾನ್ ಟೇಕ್ ಆಫ್ ಕರ್‍ತಾನಾ ಭಾಯ್ರ್ ದಿಸ್ಚೆಂ ದೃಶ್ಯ್! ನಿಳ್ಶ್ಯಾ ಟರ್ಪಾಲಿನಾಚಾ ಜೊಪ್ಡ್ಯಾಂ ವಯ್ಲ್ಯಾನ್ ಎಕಾ ನವ್ಯಾ ಸಂಸಾರಾಕ್ ಉಭೊನ್ ವೆಚಾ ವಿಮಾನಾ ಪಂದ್ಲೆಂ ದೃಶ್ಯ್! ಹೆಂ ದೃಶ್ಯ್ ಹಾವೆಂ ಸಭಾರ್ ಪಾವ್ಟಿಂ ವಾಸ್ತವಾಂತ್ ದೆಖ್ಲಾಂ! ಬದ್ಲಾವಣ್ ಜಾಂವ್ಚಾ ಆನಿ ಬದ್ಲಾವಣ್ ಜಾಲ್ಲ್ಯಾ ದೋನ್ ಸಮಾಜೆ ಮಧ್ಲೊ ಹೊ ಬದ್ಲಾವಣ್ ಜಾಂವ್ಕ್ ನಾತ್ಲಲೊ ಸಂಸಾರ್!

ಸಂಸಾರ್ ತೊಚ್! ತೊ ಕಾಂಯ್ ಬದ್ಲಾನಾ! ಬದ್ಲಾತಾ ಜಾಲ್ಯಾರ್ ಲೇಖಕಾನ್ ಸಂಸಾರಾಕ್ ಪಳಂವ್ಚಿ ನದರ್! ಆನಿ ಹಿಚ್ಚ್ ನದರ್ ಬದ್ಲೊಂಕ್ ಜಾಯ್! ಹ್ಯಾಚ್ ನದ್ರೆಕ್ ಹ್ಯಾ ಕಾಣ್ಯೆ ಜಮ್ಯಾಂತ್ ಬರಯ್ಣಾರಾನ್ ಖೂಬ್ ಗಳ್ಸಿಲ್ಯಾ. ಹಿಚ್ಚ್ ನದರ್ ಹ್ಯಾ ನವ್ಯಾ ಸಂಸಾರಾಚಾ ಜಲ್ಮಾಕ್ ಕಾರಾಣ್ ಜಾಲ್ಯಾ. ದೆಕುನ್ ಹ್ಯಾ ಕಾಣಿಯಾಂಚಾ ಲಾಂಭ್ ರುಂದಾಯೆಂತ್ ಹೊ ಲೇಖಕ್ ಕಿತ್ಲೊ ಸೂಕ್ಶ್ಮ್ ಗ್ರಾಹಿ ಮ್ಹಳ್ಳೆಂ ಸ್ಪಶ್ಟ್ ಕಳ್ತಾ. ತಾಚಿ ಸೂಕ್ಶ್ಮ್ ಗ್ರಾಹಿ ಕಾಣಿಯೆಂತ್ಲ್ಯಾ ಕಾಲ್ಪನಿಕ್ ವ್ಹಾಳ್ಯಾಕ್ ವಾಸ್ತವೀಕ್ ಆನ್ಭೋಗ್ ಜಾವ್ನ್ ಬದ್ಲಿತಾ.

’ಬದ್ಲಾಲ್ಲೊ ಗಾಂವ್!’ ಹಾಂಗಾಸರ್ ಕಥಾನಾಯಕ್ ಆಪ್ಲ್ಯಾ ದೊಳ್ಯಾಂನಿ ತೆಂ ದೃಶ್ಯ್ ಪಳೆತಾ!. ಜೊಪ್ಡ್ಯಾಂ ಸಾಗೊರ್. ಆನಿ ವಿಣ್ಗಿಂ ಭುರ್ಗಿಂ! ಮ್ಹಳ್ಯಾರ್ ವಾಸ್ತವ್. ಹೆಂ ದೃಶ್ಯ್ ಪಳೆಲ್ಯಾ ಉಪ್ರಾಂತ್ ತೊ ಕಥಾನಾಯಕ್ ದೊಳೆ ದಾಂಪ್ತಾ! ಮ್ಹಳ್ಯಾರ್ ಕ್ರಿಯಾ ಆನಿ ಸ್ಟೇಟ್ ಮೆಂಟ್ ದಿತಾ! ಮ್ಹಳ್ಯಾರ್ ಕ್ರಿಯಾತ್ಮಕ್. ಹಾಂಗಾಸರ್ ಹೆ ಸ್ಟೇಟ್ ಮೆಂಟ್ ನಿರಾಸ್‌ಪಣಾಚೆಂ ವ್ಹಯ್! ಕಿತ್ಯಾಕ್ ಮ್ಹಳ್ಯಾರ್ ಅಶಾವಾದ್ ಚಡ್ತಾವ್ ಜಾವ್ನ್ ಭಾವನಾತ್ಮಕ್ ಜಾವ್ನ್ ಆಯ್ಚಾ ಸಮಾಜೆಂತ್ ನಿರಾಸೆಂತ್ ಬದ್ಲಾತಾ ವಾ ಮರ್ಣಾಂತ್ ಸಿಂತಿಮೆಂತಾಂ ಜಾವ್ನ್ ಅಂತ್ಯ್ ಜಾತಾ. ಪುಣ್ ಹಾಂಗಾಸರ್ ವಿಶೇಶತಾ ಮ್ಹಳ್ಯಾರ್ ಹೊ ಕಥಾನಾಯಕ್ ಸಗ್ಳ್ಯಾ ಸಮಾಜೆಕ್‍ಚ್ (ವಾಸ್ತವೀಕ್) ಆಪ್ಲಾ ಆಂಗಾರ್ ಘೆವ್ನ್ ಸಗ್ಳ್ಯಾ ಸಮಾಜೆಕ್‍ಚ್ ಕುರ್ಡ್ಯಾಪಣಾನ್ ಜೆಮ್ ಕಾಡ್ಲೆಲ್ಯಾಬರಿ ದಾಕಂವ್ಚೆಂ! ಜಾಲ್ಯಾರೀ ತಾಚಿ ಪ್ರಜ್ಞಾ (Consciousness) ಮಾತ್ರ್ ಜಾಗೆಂ ರಾವುನ್ ಉಗ್ತ್ಯಾನ್ ಸಂಘರ್ಶ್ಯಾಕ್ ದೆಂವ್ಚೆಂ! (ಉತ್ರಾಂನಿ)

ಹ್ಯಾ ಜಮ್ಯಾಂತ್ಲ್ಯಾ ಚಡ್ತಾವ್ ಕಾಣಿಯಾಂನಿ ಹೊ ಸಂಘರ್ಶ್ ಸ್ಪಶ್ಟ್ ಜಳ್ಕಾತಾ! ಹ್ಯಾ ಸಂಘರ್ಶಾಂತ್ ಪೊಳ್ಕುರ್‍ಪಣ್ ನಾ ವಾ ಭಿವ್ಕುರ್‌ಪಣ್ ನಾ! ವ್ಯಕ್ತಿಪ್ರಧಾನ್ ಜಾಲ್ಲೆ ಪಾತ್ರ್‌ಧಾರಿ ಧಯ್ರಾಧೀಕ್ ಆಸಾತ್. ಪಾತ್ರಧಾರಿ ತೊ ಜಾಂವ್ ವಾ ತೆಂ ಜಾಂವ್! ಕಿತ್ಯಾಕ್ ಮ್ಹಳ್ಯಾರ್ ಹಾಂಗಾಚೊ ಲೇಕಕ್ ತಾಚ್ಯಾ ವಿಚಾರಾಂನಿ ಜಾಂವ್ ತಾಚ್ಯಾ ಸಮ್ಜಣೆಂತ್ ಜಾಂವ್ ತೊ ಸ್ಪಶ್ಟ್ ಆಸಾ.

ಖಂಯ್ಚಾಯ್ ಸಾಹಿತ್ಯಾಂತ್ ಹಾಂವ್ ಜಿಣಿ ಆನಿ ಜಿವಿತಾ ಮಧ್ಲೊ ಫರಕ್ ಕಿತ್ಲೊ ಆಸಾ ತೊ ಮಾತ್ರ್ ಸೊಧ್ತಾಂ! ಭೊವ್ಶಾ ಕೊಂಕ್ಣೆಚಿ ಹಿ ದುರ್ಧೆಶಾ ಜಾಯ್ಜಯ್. ಹಾಂಗಾಸರ್ ನಾಮ್ಣೆಚೆ ಲೇಖಕ್ ಪಾಸೊನ್ ಜಿಣಿ ಮಾತ್ರ್ ಸೊಧ್ತಾತ್! ಕಿತ್ಯಾಕ್ ಮ್ಹಳ್ಯಾರ್ ಜಿಣಿ ಭಾಯ್ಲ್ಯಾನ್ ದಿಸ್ತಾ. ಜಿವಿತ್ ದಿಸಾನಾ! ಜಿಣಿಯೆಕ್ ಮೋಲ್ ಬಾಂದ್ಯೆತಾ. ಜಿವಿತಾಕ್ ಜಾಯ್ನಾ! ಹೆಂ ಮೋಲ್ ಭಾಂಧುಂಕ್ ಜಾಯ್ನಾತ್ಲೆಲ್ಯಾಕ್ ಮೌಲ್ಯಾಂ ಬಾಂದ್ಚೆಂ ಪ್ರಯತ್ನ್ ಹ್ಯಾ ಜಮ್ಯಾಂತ್ ಹಾಂಗಾಚೆ ಕಥಾನಾಯಕ್ ವಾಕಥಾ ನಾಯಕಿ ಹರ್ಯೆಕಾ ಕಾಣಿಯೆಂತ್ ಕರ್‍ತಾತ್! ದಾಕ್ಲ್ಯಾಕ್ ಸಾಂಗ್ಚೆಂ ತರ್ ಸಭಾರ್ ಕಾಣಿಯೊಂ ಎಕಾಮೆಕಾ ತಾಳ್ ಪಡ್ತಾತ್ ವಾ ತೆ ಎಕಾಮೆಕಾಚೆ ಫಾಂಟೆ ಮ್ಹಳ್ಳ್ಯಾಬರಿ ದಿಸ್ಚೆಂ. ಹಾಂಗಾಸರ್ ಎಕಾ ರುಕಾಚ್ಯಾ ವಿವಿಧ್ ಫಾಂಟ್ಯಾಂಚಿ ವಳಕ್ ಜಾತಾ ಮ್ಹಳ್ಳೆಂ ಸತ್ ವೊಪ್ವೊನ್ ಘೆತಾನಾ ಹೆಂಯ್ ಸತ್ ಮಾಂದುನ್ ಘೆಂವ್ಕ್ ಪಡ್ತಾ ಕೀ ವಿವಿಧ್ ರುಕಾಂಚೆಂ ವೈವಿಧ್ಯ್ ಉಣೆಂ ಜಾಲ್ಲೆಂ! ಹಾವೆಂ ಉಣೆಂ ಮ್ಹಳಾಂ. ನಾ ಮ್ಹಣೊನ್ ಸಾಂಗುಂಕ್ ನಾ. ಹೆಂಯ್ ಏಕ್ ವಿಶೇಶತಾ ಮ್ಹಣ್ಯೆತ್. ಹಾಂಗಾಸರ್ ನಾ ಮ್ಹಳ್ಳೆಂ ತೆಂ ಆಸ್ಚೆಂ!

ಹೆಂ ಅತಿರೇಕಕ್ ಖಂಯ್ ಪಾವ್ಲಾಂ ಮ್ಹಳ್ಯಾರ್.... ಹ್ಯಾ ಜಮ್ಯಾಂತ್ಲ್ಯಾ ’ಆಂಗೊವ್ಣ್’ ಮ್ಹಳ್ಯಾ ಕಾಣಿಯೆಂತ್! ಹ್ಯಾ ಕಾಣಿಯೆಂತ್ ಹಾಂತ್ಲೊ ಕಥಾನಾಯಕ್ ಫಕತ್ತ್ ಎಕಾ ಸಮಾಜೆಕ್ ನ್ಹಂಯ್ ಬಗಾರ್ ಸಾರ್ವತ್ರಿಕ್ ಸಮಾಜೆಕ್ ತಿಚ್ಯಾ ದಿಸ್ಪೊಡ್ತ್ಯಾ ಕುರ್ಡ್ಯಾಪಣಾಕ್ ದೀಶ್ಟ್ ಫುಂಕ್ಚಾಂತ್ ಯಶಸ್ವಿ ಜಾಲಾ. ಹಾಂಗಾಸರ್ ತಾಚೊ ವಿಚಾರ್ ಸ್ಪಶ್ಟ್ ಆಸಾ! ತಾಚೊ ಉದ್ದೇಶ್ ಸ್ಪಶ್ಟ್ ಆಸಾ! ಆನಿ ತಾಚೆಂ ಮಿಸಾಂವ್ ಸ್ಪಶ್ಟ್ ಆಸಾ! ಕಾಂಯ್ಚ್ ಸಂಘರ್ಶಾಕ್ ದೆಂವಾನಾಸ್ತಾನಾ ತೊ ಡಿಸ್ಸಾಯ್ಸಿವ್ ಜಾತಾ. ದೆಕುನ್ ತಾಚ್ಯಾ ಮಿಸಾಂವಾಂತ್ ತೊ ಜಿಕ್ತಾ! ತಿತ್ಲೆಂ ಮಾತ್ರ್ ನ್ಹಯ್ ತೊ ಜಿಕ್ಚೆಂ ಕಶೆಂ ಮ್ಹಳ್ಳೆಂ ದಾಕಯ್ತಾ! ಹಾಂಗಾಸರ್ ಜಿಣಿಯೆಚಿ ಜೀಕ್ ಜಾಯ್ನಾ! ದೆಕುನ್ ಹಾಂಗಾಚ್ಯಾ ಕಥಾನಾಯಕಾಕ್ ತಾಚ್ಯಾ ಜಯ್ತಾಚೊ ಫಾಯ್ದೊ ಮೆಳಾನಾ. ಹಾಂಗಾಸರ್ ತೊ ಎಕಾ ಜಿವಿತಾಕ್ ಜಿಕಯ್ತಾ! ದೆಕುನ್ ಜಿಕ್ಲೆಲೆಂ ಜಿವಿತ್ ಆಪ್ಲ್ಯಾ ಜಿಕ್ಲೆಲ್ಯಾ ಆನ್ಭೋಗಾಕ್ ಜಿಣಿಯೆಧ್ವಾರಿಂ ಜೊಡುಂಕ್ ಸಕ್ತಾ ಶಿವಾಯ್ ಜಿಣಿ ಜಿವಿತಾ ದ್ವಾರಿಂ ನ್ಹಯ್! ತಶೆಂ ಮ್ಹಳ್ಯಾರ್.... ಜೀಣ್ ಮಾತ್ರ್ ಬದ್ಲಾತಾ ಶಿವಾಯ್ ಜಿವಿತ್ ನ್ಹಯ್!

ಹೆಂಚ್ ಹ್ಯಾ ಜಮ್ಯಾಂತ್ ಅಟಾಪುಣ್ ಆಸ್ಚೆಂ ಸತ್ ಆನಿ ಭಳಿಶ್ಟ್ ವಿಚಾರ್! ಸಂಸಾರ್ ಕಾಂಯ್ ಬದ್ಲಾತಾ? ನಾ! ಮನ್ಶ್ಯಾಚಿ ಜೀಣ್ ಬದ್ಲಾತಾ! ಬದ್ಲಾವಣ್ ಮನ್ಶ್ಯಾಚೊ ಅವ್ಗುಣ್! ಹ್ಯಾ ಅವ್ಜುಣಾಂಕ್ ಲಾಗೊನ್ ಮನಿಸ್ ತೃಪ್ತಿ ನಾಸ್ತಾಂ ಬದ್ಲಾವಣ್ ಆಶೆತಾ ಜಿವಿತಾಕ್ ಲಾಗೊನ್! ಹಾಂಗಾಚರ್ ಬದ್ಲಾವಣ್ ಮ್ಹಳ್ಳೊ ಸಬ್ದ್ ಮಾತ್ರ್ ಶಾಶ್ವತ್ ಶಿವಾಯ್ ಜಾಲ್ಲಿ ಬದ್ಲಾವಣ್ ಶಾಶ್ವತ್ ನ್ಹಯ್! ತಿ ಆನಿಕ್‌ಯೀ ಜಾಂವ್ಕ್ ಆಸಾ. ಪುಣ್ ಬದ್ಲಾವಣ್ ಖಂಯ್ಚಾ ದಿಶೆನ್? ಹಿ ದಿಶಾ ಆಮ್ಕಾಂ ಹಾಂಗಾಸರ್ ದೊಳೆ ದಾಂಪ್ಲಲೊ ಪಯ್ಲ್ಯಾ ಕಾಣಿಯೆಂತ್ಲೊ ಕಥಾನಾಯಕ್ ದಾಕಯ್ತಾ. ತೊ ದೊಳೆ ಕಿತ್ಯಾಕ್ ದಾಂಪ್ತಾ?

ಖಂಯ್ಚೆಂಯ್ ಸಾಹಿತ್ಯ್ ಮ್ಹಜ್ಯಾ ಮುಕಾರ್ ಭಳಿಶ್ಟ್ ಜಾಂವ್ಚೆಂ ತಾಂತುಂ ಆಟಾಪುನ್ ಆಸ್ಚಾ ತತ್ವ್ ಶಾಸ್ತ್ರಾಂತ್! ಹಾವೆಂ ಹರ್ಯೆಕಾ ಸಾಹಿತ್ಯಾಕ್ ತೆಂ ಸಾಹಿತ್ಯ್ ಕಸಲ್ಯಾ ತತ್ವಾಂಕ್ ಪ್ರತಿಪಾದನ್ ಕರ್‍ತಾ ಮ್ಹಣೊನ್ ಮಾತ್ರ್ ಸೊದ್ಚೆಂ. ಕಿತ್ಯಾಕ್ ಮ್ಹಳ್ಯಾರ್ ಸಾಹಿತ್ಯಾಂತ್ಲೆಂ ವರ್ಣನ್ ಆನಿ ಕಥಾಹಂದಾರ್ ತೆಂ ವಾಚ್ಪ್ಯಾಚಾ ರುಚಿಕ್ ಮಾತ್ರ್! ರೂಚ್ ಥೊಡ್ಯಾಚ್ ಖಿಣಾಂಕ್ ಮಾತ್ರ್! ರೂಚ್ ಮಾಜ್ವಾಲ್ಯಾರೀ ಚಾಕ್ಲೆಲ್ಯಾ ರುಚಿಚಾ ಭಿತರ್‍ಲ್ಯಾ ಸತ್ವಾಕ್ ವೊಂಕೊನ್ ಭಾಯ್ರ್ ಕಾಡುಂಕ್ ಜಾಯ್ನಾ. ಕೆದ್ನಾಂ ಹೆಂ ಭಾಯ್ರ್ ಕಾಡುಂಕ್ ಜಾಯ್ನಾಗೀ ತೆದ್ನಾಂ ಮಾತ್ರ್ ಮತ್ ಮ್ಹಳ್ಳಿ ಸಕತ್ ಡಿಸ್ಟರ್ಬ್ ಜಾತಾ. ಆನಿ ಡಿಸ್ಟರ್ಬೆನ್ಸ್ ಚಿಂತುಂಕ್ ಲಾಯ್ತಾ. ಆನಿ ಚಿಂತಪ್ ಸೊಧುಂಕ್ ಲಾಯ್ತಾ. ಆನಿ ಸೊದ್ನಾಂ ಮಾತ್ರ್ ಟ್ರಾನ್ಸ್ ಫೋರ್ಮೇಶನಾಂತ್ ಬದ್ಲಾವಣ್ ಜಾವ್ನ್ ಜಲ್ಮ್ ಘೆತಾ. ಹಿಚ್ ಬದ್ಲಾವಣ್! ದೆಕುನ್ ಹಿ ಶಾಶ್ವತ್ ನ್ಹಯ್! ತರ್ ಕ್ಷಣಿಕಾಂತೀ ಭಲಾಯ್ಕೆಭರಿತ್ ಜಾಂವ್ಕ್ ಜಾಯ್ ಜಾಲ್ಲ್ಯಾ ಹ್ಯಾ ಬದ್ಲಾವಣಾ ಪಾಟ್ಲ್ಯಾನ್ ಕಸಲೆಂ ತತ್ವ್ ಶಾಸ್ತಿರ್ ಆಟಾಪುಣ್ ಆಸಾ?

ನೈತಿಕತಾ! ಆನಿ ವೈಚಾರಿಕತಾ! ನೈತಿಕತೆಚಾ ಸತಾಂಕ್ ವೈಚಾರಿಕ್ ಪಾತ್ಯೆಣಿ ಜಾವ್ನ್ ಹೊ ಲೇಖಕ್ ಹಾಂಗಾಚ್ಯಾ ಕಾಣಿಯಾಂಕ್ ಘುಂತಾ. ಆಶೆಂ ಘುಂತಾನಾ ಹಾಂಗಾಚೊ ಕಥಾನಾಯಕ್ ವಾ ಕಥಾನಾಯಕಿ ಚಡ್ತಾವ್ ಜಾವ್ನ್ ನೈತಿಕ್ ಬರ್‍ಯಾಕ್ ಆನಿ ವಾಯ್ಟಾಕ್ ದೊನಾಂಯ್ಕಿ ವಳ್ಕಾತಾ ಜಾಲ್ಲ್ಯಾನ್ ವೈಚಾರಿಕ್ ಪಣಾಂತ್ ನೈತಿಕ್ ಸತಾಂ ವಯ್ರ್ ತಾಚಿ ಪಾತ್ಯೆಣಿ ಧೃಡ್ ಆಸ್ತಾ! ಹಾಕಾ ಸಾರ್‍ಕೆಂ ಉದಾಹರಣ್ ’ಕಾಂಟಾಳ್‍ಲ್ಲೆಂ ದಿರ್ವೆಂ’ ಕಾಣಿ. ನೈತಿಕತಾ ವಾ ನೈತಿಕ್ ಜವಾಬ್ದಾರಿ ಮ್ಹಳ್ಳ್ಯಾ ತತ್ವಾಕ್ ಹಾಂವ್ ಡೆಫ಼ಿನೇಶನ್ ದೀಂವ್ಕ್ ಸಕ್ತಾಂ! ಪೂಣ್ ಹಾಕಾ ಏಕ್ ನಿರ್ಧಿಶ್ಟ್ ಅರ್ಥ್ ನ್ಹಯ್! ಕಿತ್ಯಾಕ್ ಮ್ಹಳ್ಯಾರ್ ನೈತಿಕತಾ ಅಲ್ಟಿಮೇಟ್ಲಿ ಚಡ್ತಾವ್ ಜಾವ್ನ್ ಮೋರಲ್ ಸಾಯನ್ಸಾ ವಯ್ರ್ ಹೊಂದೊನ್ ಆಸ್ತಾ. (ಹೆಂ ಗರ್ಜ್ ನ್ಹಯ್ ಮೊರಾಲಿಟಿಚೊ ಅರ್ಥ್ ವ್ಯಕ್ತಿಗತ್ ಜಾವ್ನ್ ಘೆಂವ್ಕ್ ಜಾತಾ) ಆನಿ ಹೆಂಚ್ ಪ್ರತಿಪಾದನ್ ಕರ್‍ಚೆಂ ಸರ್ವೆ ಸಾಮಾನ್ಯ್! ಕಿತ್ಯಾಕ್ ಮ್ಹಳ್ಯಾರ್ ಮನಿಸ್ ತಾಣೆಂ ಜಿಯೆಂವ್ಚ್ಯಾ ಸಮಾಜೆಕ್ ವೊಳ್ಸಾಲ್ಲೊ ಆಸ್ತಾನಾ ತಾಣೆ ಆಚರ್‍ಚುಂಚಾ ಮೊರಾಲಿಟಿಂತ್ಲ್ಯಾ ನೈತಿಕ್ ವಿಚಾರಾಂಕ್ ವೊಳ್ಸಾಜೆ ಮ್ಹಣೊನ್ ಕಾಂಯ್ ನಾ. ಕಿತ್ಯಾಕ್ ಮ್ಹಳ್ಯಾರ್ ಹಾಂಗಾಸರ್ ಸಮಾಜ್ ಮ್ಹಳ್ಯಾರ್ ಯುನಿವರ್ಸಲ್ ಜಾವ್ನ್ ಆಸ್ತಾ ಆನಿ ನೈತಿಕತಾ ತಾಣೆಂ ಜಿಯೆಂವ್ಚ್ಯಾ ಸಮಾಜೆಚ್ಯಾ ಎಕಾ ವಾಂಟ್ಯಾಚಿ ಆಚರ್‍ಸುಂಚಿ ಜವಾಬ್ದಾರಿ! ಹಿ ಜವಾಬ್ದಾರಿ ಸೊಡ್ಲ್ಯಾರ್ ಆನಿ ಧರ್‍ಲ್ಯಾರ್ ಆನಿ ಬದ್ಲಿಲ್ಯಾರ್ ಸಮಾಜೆಕ್ ಲುಕ್ಸಾಣ್ ಕಾಂಯ್ ನಾ. ಪುಣ್ ಸಮಾಜೆಂತ್ಲ್ಯಾ ವ್ಯಕ್ತಿಕ್ ಜಾತಾ. ವ್ಯಕ್ತಿಕ್ ಜಾತಾ ಮ್ಹಣ್ತಾನಾ ವ್ಯಕ್ತಿಚಿ ಜಿಣಿ ಆನಿ ಜಿವಿತಾ ಮಧ್ಲೊ ಗಾಂಚ್ ದುರ್ಬಳ್ ಜಾತಾ. ಆನಿ ತಾಚಿ ಪಾತ್ಯೆಣಿ ಮೊರ್‍ತಾ. ಹ್ಯಾ ವೆಳಾರ್ ಹಾಚೊ ಪರಿಣಾಮ್ ಸಮಾಜೆರ್ ಪಡ್ತಾ ಆನಿ ಸಮಾಜೆಂತ್ ದುಶ್ಕ್ರತ್ಯಾಂ ಆರಂಭ್ ಜಾತಾತ್. ದೆಕುನ್ ಹಾಂಗಾಸರ್ ಹ್ಯಾ ಜಮ್ಯಾಂತ್ ನೈತಿಕತಾ ಆನಿ ವೈಚಾರಿಕತಾ ಸಮಾಸಮ್ ಜಿಣಿಯೆ ಸತಾಂ ಜಾವ್ನ್ ವ್ಹಾಳ್ತಾತ್. (ವೈಚಾರಿಕತೆಕ್ ಸೊಡ್ಲ್ಯಾರ್ ನೈತಿಕತೆಚಿ ದಿಶಾ ವಿಂಗಡ್‍ಚ್ ಜಾತಾ) ಹೆಂಚ್ ಹ್ಯಾ ಕಥಾ ಜಮ್ಯಾಂತ್ ಜಾತಾ ತಿತ್ಲೆಂ ಸಮ್ಜಾಂವ್ಕ್ ಪ್ರಯತ್ನ್ ಕೆಲಾಂ. ದೆಕುನ್‍ಚ್ ಹಾಂಗಾ ಪ್ರಸ್ತುತ್ ಕೆಲ್ಲ್ಯಾ ಹರ್ಯೆಕಾ ಕಾಣಿಯೆಂತ್ಲ್ಯಾ ಜಿವಿತಾಂತ್ ವ್ಯಕ್ತಿಚ್ ಪ್ರಧಾನ್ ಜಾವ್ನ್ ಆಸಾ. ಆನಿ ಜಿಣಿಯೆಚ್ಯಾಕೀ ಜಿವಿತಾಕ್ ಚಡ್ ಮಹತ್ವ್ ದಿಲಾಂ. ಆನಿ ಹಾಚೆಚ್ ಖಾತಿರ್ ಲೇಖಕಾನ್ ಜಿವಿತ್ ಫುಲಂವ್ಚಿ ಸೊಂಪಿ ವಾಟ್ ಜಾವ್ನ್ ನೈತಿಕತೆಕ್ ವಿಂಚ್ಲಾಂ. ಆಶೆಂ ನೈತಿಕ್ ಸತಾಂಕ್ ವೈಚಾರಿಕ್ ಪಣಾಚಿ ಪಾತ್ಯೆಣಿ ಜಾವ್ನ್ ಘೆತ್ಲ್ಯಾರ್ ಸಮಾಜೆಂತ್ ಜಿಯೆಂವ್ಚಾ ಮನ್ಶ್ಯಾಚೆಂ ಜಿವಿತ್ ಮಾನಾಚೆಂ ಆನಿ ಗೌರವಾಚೆಂ ಜಾವ್ನ್ ಭಲಾಯ್ಕೆಭರಿತ್ ಸಮಾಜ್ ರಸ್ಚಾ ವಾವ್ರಾಕ್ ಹ್ಯಾ ಲೇಖಕಾನ್ ಹಾತ್ ಘಾಲಾ ಮ್ಹಣ್ಯೆತ್.

ಹಾಕಾ ಪೂರಕ್ ಜಾವ್ನ್ ಲೇಖಕಾನ್ ಹಾಂಗಾಸರ್ ನೈತಿಕ್ ಸತಾಂಕ್ ವೈಚಾರಿಕ್ ಪಾತ್ಯೆಣೆಚಾ ಥಳಾರ್ ನೈತಿಕ್ ಸತಾಂಕ್ ಫಕತ್ತ್ ಸಮಾಜೆಂತ್ ಏಕ್ ಜವಾಬ್ದಾರಿ ಶಿವಾಯ್ ತಿಂ ಕಾನೂನಾಂ ನ್ಹಯ್ ಮ್ಹಣೊನ್ ಸ್ಪಶ್ಟ್ ದಾಕವ್ನ್ ದಿಂವ್ಚೆಂ! ದೆಕುನ್ ಹ್ಯಾ ಜಮ್ಯಾಂತ್ ಕಾನೂನಾಂ ವಾ ವತ್ತಡ್ ಖಂಯ್ಚರೀ ಜಿಕಾನಾಂತ್. ತಿಂ ಸಲ್ವಾತಾತ್. ಹೆಂ ಮೋರಲ್ ಪೊಲಿಸ್ ಮ್ಹಣೊನ್ ಸ್ವ ವೊಲಾವ್ನ್ ಘೆಂವ್ಚಾ ಮನ್ಶ್ಯಾಂಕ್ ಏಕ್ ದೇಖ್ ವಾ ಜಾಗ್ವಣ್ ಜಾತಾ.

ವ್ಯಕ್ತಿ ಪ್ರಧಾನ್ ಮ್ಹಣ್ತಾನಾ ಸಮಾಜೆಂತ್ಲ್ಯಾ ಹರ್ಯೆಕಾ ವ್ಯಕ್ತಿಚೆರ್ ಜವಾಬ್ದಾರಿ ಆಸ್ಚಿ ಸಹಜ್! ಹಿ ಜವಾಬ್ದಾರಿಚ್ ಹ್ಯಾ ಜಮ್ಯಾಚೆಂ ಪ್ಲಸ್ ಪಾಯಿಂಟ್! ದೆಕುನ್‍ಚ್ ಹ್ಯಾ ಜಮ್ಯಾಂತ್ಲೊ ಕಥಾ ನಾಯಕ್ ಕಾಣಿಯೆಚಾ ಆರಂಭಾಯೆರ್ ವಾಚ್ಪ್ಯಾಚೊ ಸಂಭಂಧ್ ಜೊಡಿನಾಸ್ತಾನಾ ಜಲ್ಮಾತಾ! ಕೋಣ್ ಖಂಯ್ ಕಿತೆಂ ಮ್ಹಳ್ಳೆಂ ತೊ ಕಳಯ್ನಾಸ್ತಾನಾಚ್ ಹಾಜರ್ ಜಾತಾ. ಪೂಣ್ ಫುಡೆಂ ವೆತಾನಾ ತೊ ವಾಚ್ಪ್ಯಾಚೊ ದಾಯ್ಜಿ ಮ್ಹಳ್ಳೊ ಆನ್ಭೋಗ್ ದಿತಾ ಆನಿ ಅಖೇರಿಕ್ ಪಾವ್ತಾನಾ ತೊ ವಾಚ್ಪ್ಯಾಚಿ ಏಕ್ ಸರೊನ್ ಗೆಲ್ಲಿ ಸಾವ್ಳಿ ಮ್ಹಳ್ಳ್ಯಾಬರಿ ಜಾಗಯ್ತಾ ಆನಿ ತ್ಯಾ ಸಾವ್ಳೆನ್ ಚಲೊನ್ ಆಯಿಲ್ಲಿ ವಾಟ್ ದಾಕವ್ನ್ ಹಿ ತುಜಿ ವಾಟ್ ಸಾರ್ಕಿ? ಮ್ಹಳ್ಳೆಂ ಸವಾಲ್ ವಿಚಾರ್‍ತಾ. ಹೆಂ ಸವಾಲ್ ವಿಚಾರುಂಕ್ ಹಾಂಗಾಸರ್ ಬರವ್ಪ್ಯಾನ್ ವಿಂಚ್‍ಲ್ಲಿ ವಾಟ್ ನೈತಿಕ್ ವಿಚಾರಾಂಚಿ. ಹಿಚ್ ವಾಟ್ ಸಾರ್‍ಕಿ ವಾ ಪ್ರಭಲ್ ವಾ ಅಂತಿಮ್ ಮ್ಹಣೊನ್ ನ್ಹಯ್! ಪುಣ್ ಹಿ ವಾಟ್ ಸಾಮಾಜಿಕ್ ಜಾವ್ನ್ ಚಡ್ ಸೊಂಪಿ! ಆಶೆಂ ಮ್ಹಣ್ತಾನಾ ಹಾಂಗಾಸರ್ ಲೇಖಕಾನ್ ಸಮಾಜೆಂತ್ಲ್ಯಾ ಆರ್ಥಿಕತೆಕ್ ಮಹತ್ವ್ ದೀಂವ್ಕ್ ನಾ ವಾ ತಾಕಾ ಪ್ರಾಥಮಿಕ್ ಮಹತ್ವ್ ದೀಂವ್ಕ್ ನಾ ಮ್ಹಳ್ಳೆಂಯ್ ಸತ್! ಕ್ಯಾಪಿಟಾಲಿಸಮ್ ಸಂಸಾರಾಂತ್ ತೆಂಯ್ ಡೆಮೋಕ್ರಾಸಿಂತ್ಲ್ಯಾ ಕ್ಯಾಪಿಟಾಲಿಸ್ಟಿಕ್ ಸಮಾಜೆಂತ್ಲಿ ಹರ್ಯೆಕ್ ಜೀವಿ ಆರ್ಥಿಕತೆಕ್‍ಚ್ ಚಡ್ ಮಹತ್ವ್ ದಿತಾಸ್ತಾನಾ ನೈತಿಕ್ ಜವಾಬ್ದಾರೆಕ್ ಕೊನ್ಶ್ಯಾಕ್ ಲೊಟ್ತಾ. ಹೆಂ ಕೊನ್ಶ್ಯಾಕ್ ಲೊಟ್ಲೆಲ್ಯಾಕ್ ಪರ್ತ್ಯಾಕ್ ಉಕ್ಲುನ್ ದವರ್‍ಚೆಂ ಕಾಮ್ ಹಾಂಗಾಸರ್ ಲೇಖಕಾನ್ ಕೆಲಾಂ ಮ್ಹಳ್ಳೆಂ ಮಾತ್ರ್ ಸ್ಪಶ್ಟ್!

ಹಿ ಸ್ಪಶ್ಟತಾ ಹ್ಯಾ ಜಮ್ಯಚಾ ನಿಮಾಣ್ಯಾ ಕಾಣಿಯಾಂನಿ ಝಳ್ಕಾತಾ; ’ಬಾಬಾಕ್ ಏಕ್ ಚೀಟ್!’, ’ಮಾತಾರೊ ಘೊಡೊ’, ’ಝಡ್ತಿ’, ’ಕಾಂಟಾಳ್‍ಲ್ಲೆಂ ದಿರ್ವೆಂ!’ ಅಸಲ್ಯಾ ಕಾಣಿಯಾಂನಿ ನೈತಿಕತೆಚೆ ಸಾಮಾಜಿಕ್ ಜವಾಬ್ದಾರೆಭರಿತ್ ವಿಚಾರ್ ಉಗ್ಡಾಪೆ ಜಾತಾತ್ ಆನಿ ಸಂಘರ್ಶ್ ದಿಸ್ತಾ. ವಿಂಚವ್ಣ್ ದಿಸ್ತಾ! ವಿಂಚವ್ನ್ ಜಯ್ತಾಚಿ ವಾ ಸಲ್ವಣೆಚಿ ಮ್ಹಳ್ಳೆಂ ಸ್ಪಶ್ಟ್ ನಾ! ಜಾಂವ್ಕ್ ಪುರೊ ಹಾಂಗಾಸರ್ ಜಯ್ತ್ ಆನಿ ಸಲ್ವಣ್ ಮಹತ್ವಾಚೆಂ ನ್ಹಯ್! ಬಗಾರ್ ನೈತಿಕ್ ಮೌಲ್ಯಾಂಭರಿತ್ ಜಿಣಿ ಮಹತ್ವಾಚಿ! ಪುಣ್ "ಆಂಗವ್ಣ್" ಮ್ಹಳ್ಳ್ಯಾ ಕಾಣಿಯೆಂತ್ ವಿಚಾರಾಂನಿ ಪಾತ್ಯೆವ್ನ್ ಆಯ್ಲೆಲ್ಯಾ ವಾ ಪಾಳುನ್ ಆಯ್ಲೆಲ್ಯಾ ರಿತಿಂಕ್ ಆನಿ ರೆಗ್ರ್ಯಾಂಕ್ ಅಸಂಭವೀಕ್‌ಪಣಿಂ ನ್ಯಾಯ್ ಜೊಡುನ್ ದಿಂವ್ಚೆಂ..... ತೆಂಯ್ ಇತ್ಲ್ಯಾ ಸ್ಪಶ್ಟ್ ಆನಿ ಸಂಘರ್ಶಾ ವಿಣೆಂ! ಮೆಚ್ವಾಜಯ್ ಜಾಲ್ಲೊ ವಿಶಯ್ ಹೊ! ಹ್ಯಾ ವಿಚಾರಾಂಕ್ ಉಕ್ಲುನ್ ಧರ್‍ಲೆಲ್ಯಾ ಲೇಖಕಾಕ್ ಜರೂರ್ ಮಾನ್ ಭಾಗಂವ್ಕ್ ಜಾಯ್! ಕಿತ್ಯಾಕ್ ಮ್ಹಳ್ಯಾರ್ ಹಾಂಗಾಸರ್ ಲೇಖಕ್ ಅಪುಣ್‍ಚ್ ಕಥಾನಾಯಕ್ ಜಾವ್ನ್ ಆಪ್ಲ್ಯಾಚ್ ದೋನ್ ಸೈಂಬಾಂ ಮಧೆಂ ಝುಜಾಕ್ ದೆಂವ್ತಾ. ಏಕ್..... ಆಪ್ಣಾಯಿಲ್ಲೆಂ ಧಾರ್ಮಿಕ್ ಸೈಂಭ್! ಆನಿ ದುಸ್ರೆಂ ಜಾಲ್ಮಾಚೆಂ ಧಾರ್ಮಿಕ್ ಸೈಂಭ್! ಹಾಂಗಾಸರ್ ಸೈಂಭ್ ವಯುಕ್ತಿಕ್ ಜಾವ್ನ್ ಎಕ್‍ಚ್! ಪುಣ್ ವ್ಯಕ್ತಿಗತ್ ಜಾವ್ನ್ ದೋನ್! ಹೆಂ ವ್ಯಕ್ತಿಗತ್ ಜಾವ್ನ್ ಘೆತ್‍ಲ್ಲ್ಯಾ ವರ್ವಿಂ ಹಾಂಗಾಸರ್ ವಿಂಚವ್ಣೆಕ್ ಪಯ್ಲೆಂ ಸ್ಥಾನ್. ದೆಕುನ್‍ಚ್ ಹಾಂಗಾಚಿ ವಿಂಚವ್ಣ್ ಸಮಾಜೆಂತ್ಲ್ಯಾ ನಾಜೂಕ್ ಮ್ಹಳ್ಳ್ಯಾ ವಿಚಾರಾ ವಯ್ರ್ ಇತ್ಲ್ಯಾ ಸುಲಾಭಾಯೆನ್ ಜಿಕ್ತಾ. ಆನಿ ಜಿವಿತಾಚಿ ಸಾರ್ಕಿ ವಾಟ್ ದಾಕಯ್ತಾ! ಬೋವ್ಶ್ಯಾ ಹ್ಯಾ ಪುಸ್ತಾಕಾಚಾ ಮುಖಪಾನಾರ್ ದಿಸ್ಚೆಂ ವಿಶಾಲ್ ದರ್ಯಾಂತ್ ಪಯ್ಣ್ ಕರ್‍ಚೆಂ ಎಕ್ಸುರೆಂ ಹೊಡೆಂ ಹೊಚ್ ಭರ್ವಸೊ ಪಾಚಾರ್‍ತಾ.

ಆಟಾಪ್ಲೆಲ್ಯಾ ವಿಚಾರಾ ಉಪ್ರಾಂತ್: ಹ್ಯಾ ಜಮ್ಯಾಂತ್ಲ್ಯೊ ಚಡ್ತಾವ್ ಕಾಣಿಯೊಂ ವಾಸ್ತವಾಂತ್ ವ್ಯಕ್ತಿಗತ್ ಜಾವ್ನ್ ಉಭ್ಯೊ ಆಸಾತ್ ತರೀ ಖಂಯ್ಚರೀ ವಯುಕ್ತಿಕ್ ಜಾವ್ನ್ ರಾವೊಂಕ್ ನಾಂತ್. ವಯುಕ್ತಿಕಾಚಾ ಪರ್ದ್ಯಾ ಥಾವ್ನ್ ಭಾಯ್ರ್ ಯೇವ್ನ್ ಸಮಾಜ್ ಮುಖಿ ಜಾವ್ನ್ ಯೂನಿವರ್ಸಲ್ ರುಪಾರ್ ದರ್ಶನ್ ದಿತಾತ್. ಜಾಯ್ತ್ಯಾಂಕ್ ಸಾಹಿತ್ಯಾಂತ್ ಭಾವುಕತೆಚಿ ಆನಿ ಉತ್ಸುಕಾಯೆಚಿ ಗರ್ಜ್ ಆಸಾ ಮ್ಹಣೊನ್ ದಿಸ್ತಾ ಜಾಂವ್ಕ್ ಪುರೊ. ತಸಲ್ಯಾಂಕ್ ಹೊ ಕಾಣಿಯಾಂ ಜಮೊ ಫಕತ್ತ್ ಜವಾಬ್ದಾರಿ ಮಾತ್ರ್ ಗರ್ಜ್ ಮ್ಹಣೊನ್ ದಾಕಯ್ತಾ. ಕಿತ್ಯಾಕ್ ಮ್ಹಳ್ಯಾರ್ ಜಿಣಿ ಕಸಲ್ಯಾ ತತ್ವಾಂಚೆರ್ ಭಾಂದುನ್ ಹಾಡ್ಲ್ಯಾ ಮ್ಹಳ್ಳ್ಯಾಚೆಂ ದರ್ಶನ್ ಜಿವಿತ್ ಸೊಂಪೆಪಣಿ ದಾಕಯ್ತಾ. ಹಾಕಾ ಸಾಕ್ಸ್ ’ಕಾಂಟಾಳ್‍ಲ್ಲೆಂ ದಿರ್ವೆಂ’ ಕಾಣಿ. ಕಾಣಿ ಆನಿ ವಿಚಾರ್ ಪರ್‍ನೊ ತರೀ ಭಲಾಯ್ಕೆಭರಿತ್ ಸಮಾಜೆಕ್ ಸದಾಂಕಾಳ್ ಗರ್ಜೆಚೊ. ಹ್ಯಾ ಜಮ್ಯಾಂತ್ಲ್ಯಾ ಕಾಣಿಯಾಂಕ್ ವ್ಹಾಳಯಿಲ್ಲಿ ರೀತ್ ಸಾಂಗ್ಚಿ ತರ್ ರುಕಾರ್ ಥಾವ್ನ್ ಜಡ್ಲೆಲಿ ಖೊಲಿ ಸಭಾರ್ ವೊತಾಂಕ್ ಭಾಜೊನ್ ಭಾಜೊನ್ ಆಪಡ್ತಾನಾ ಪುಟ್ತಾ ಮ್ಹಳ್ಳ್ಯಾ ತಸಲಿ. ವಾಚ್ಪ್ಯಾಕ್ ಧರ್‍ನ್ ದವರ್ಚಿ ಮ್ಹಳ್ಳ್ಯಾ ಉತಳ್ ಉಲೊಣ್ಯಾಚಿ ನ್ಹಯ್! ಬಗಾರ್ ಆನ್ಭೋಗಾಂತ್ಲ್ಯಾ ಅನುಭವಾಕ್ ಪೀಳ್ನ್ ಕಾಡ್ಲೆಲ್ಯಾ ನಾರ್‍ಲಾ ರೊಸಾಬರಿ! ಹರ್ಯೆಕಾ ಕಾಣಿಯೆಂತ್ ಆನ್ಭೋಗಾಚೊ ಪೆಳೊ ಉಸಯಿಲ್ಲೊ ದಿಸ್ತಾ. ತೆಂಯ್ ಲ್ಹಾನ್ ಲ್ಹಾನ್ ಸಂಗ್ತೆಂಕ್ ಇತ್ಲ್ಯಾ ಸೂಕ್ಶ್ಮಾಯೆನ್ ಪಾರ್ಕಿಲ್ಲೆಂ ಸ್ಪಶ್ಟ್ ಕಳ್ತಾ. ಆಪ್ಣಾಯಿಲ್ಲ್ಯಾ ಧಾರ್ಮಿಕ್ ಸೈಂಬಾಂತೀ ಅಸಲೊ ಅನ್ಭೋಗ್? ತೊ ಜಾಲ್ಯಾರೀ ಜವಾಬ್ದಾರಿ ಭರಿತ್! ಅಸಲೊ ಅನ್ಭೋಗ್ ಜಾಯ್ತ್ಯಾಂಕ್ ಮಾರ್ಗ್‍ದರ್ಶನ್ ಜಾಂವ್ದಿ ಮ್ಹಣೊನ್ ಆಶೆತಾಂ. ಅನ್ಯೇಕ್ ಸಂತೊಸಾಚಿ ಗಜಾಲ್ ಮ್ಹಳ್ಯಾರ್ ಆಶಾವಾದಾಕ್ ಉಗ್ತ್ಯಾನ್ ಪಾಚಾರ್‍ಚೆ ವಿಚಾರ್ ನಿರಾಸಾಂತ್ ಬದ್ಲಾನಾಂತ್ ವಾ ಸಾಮಾಜೆಂತ್ ರಡೊನ್ ವಿಳಾಪ್ ಕರಿನಾಂತ್! ಅನಿ ಪ್ರತ್ಯೇಕ್ ಜಾವ್ನ್ ಮೆಚ್ವೊಂಕ್ ಜಾಯ್ ಜಾಲ್ಲೆಂ ಕಿತೆಂಗೀ ಮ್ಹಳ್ಯಾರ್ ಹಾಂಗಾಚೆ ನೈತಿಕತೆಚೆ ವಿಚಾರ್ ಖಂಯ್ಚರೀ ಧರ್ಮಾಕ್ ವಾ ಧಾರ್ಮಿಕತೆಕ್ ಪಾಂಗ್ರುನ್ ರಾವ್ಲೆಲೆ ನಾಂತ್. (ಹಾಂಗಾಸರ್ ಬರಯ್ಣಾರ್ ಧಾರ್ಮಿಕ್ ಜಾಲ್ಲ್ಯಾನ್). ಆರಂಭಿಕ್ ಕಾಣ್ಯೊಂ ಅಚಾನಕ್ ಸಂಕೀರ್ಣ್ ಜಾಲ್ಲೊ ಆನ್ಭೋಗ್ ದಿತಾತ್. ರಚ್ಲೆಲ್ಯಾ ಪಾತ್ರಾಂನಿ ಸಂಸ್ಕ್ರತೆಚೆಂ ದರ್ಶನ್..... ರಾಜಕೀಯ್ ಇನ್‍ಫ್ಲುಯೆನ್ಸ್..... ಆರ್ಥಿಕತೆಚಿ ಹತಾಶಾ..... ಮ್ಹಳ್ಳೆಂ ಥೊಡೆಂ ಉಣೆಪಣ್ ಆಸಾ. ಫುಡ್ಲ್ಯಾ ವೆಳಾಕಾಳಾಂತ್ ತೆಂ ಭರ್‍ತಿ ಜಾತೆಲೆಂ ಮ್ಹಣೊನ್ ಚಿಂತಾಂ! ಆನಿ ಲೇಖಕಾಚಾ ಫುಡಾರಾಕ್ ಸರ್ವ್ ಬರೆಂ ಮಾಗ್ತಾಂ!

- ಮೆಲ್ವಿನ್ ಜೆ. ವಾಸ್. ಕೆಲರಾಯ್.(ಫೆಬ್ರೆರ್, 2020)

ಮೆಲ್ವಿನ್ ಜೆ. ವಾಸ್. ಕೆಲರಾಯ್: ದಾಯ್ಜ್.ಕೊಮ್‌ಚೊ ಸಹ-ಸಂಪಾದಕ್ (2004-2009) ಜಾವ್ನ್ ವಾವ್ರ್ ಕೆಲ್ಲೊ ಮೆಲ್ವಿನ್ ಜೆ. ವಾಸ್, ಏಕ್ ವಿಶಿಷ್ಟ್ ಶಯ್ಲೆಚೊ ಕಥಾಕಾರ್, ವಿಶ್ಲೇಷಕ್, ಕವಿ, ಸಮೀಕ್ಷಕ್. ಸಭಾರ್ ಸಾಹಿತಿಕ್ ಸ್ಪರ್ಧ್ಯಾಂನಿ ಇನಾಮಾಂ ಆಪ್ಣಾಯಿಲ್ಲೊ ಹೊ ಏಕ್ ಅಂಕಣ್‌ಕಾರ್ ತಶೆಂಚ್ ಬರೊ ವಾಚ್ಪಿ. ಕುವೆಯ್ಟಾಂತ್ ಆಶಾವಾದಿ ಪ್ರಕಾಶನಾನ್ ಚಲಯಿಲ್ಲ್ಯಾ ಕವಿತಾಪಾಠಾಂನಿ ಸಭಾರ್ ಕೊಂಕಣಿ ಬುಕಾಂಚೆರ್ ತಾಣೆಂ ಸಮೀಕ್ಷಾ ಕೆಲ್ಯಾತ್. ಪಯ್ಣಾರಿ-ವೀಜ್ ಹಾಣಿಂ ಮಾಂಡುನ್ ಹಾಡ್‌ಲ್ಲ್ಯಾ ರಾಶ್ಟ್ರೀಯ್ ಮಟ್ಟಾಚ್ಯಾ ದೊನ್‌ಯೀ ಸಾಹಿತಿಕ್ ಸ್ಪರ್ಧ್ಯಾಂನಿ ಇನಾಮಾಂ ಆಪ್ಣಾಯ್ಲ್ಯಾಂತ್.

बूक: एक नवो संसार
प्रकार: कोंकणी मट्व्यो काणियो
काणियेगार: मा| चेतन लोबो.
पगट्णार: आशावादी प्रकाशन
इसवी: २०१९
पानां: १५४+४
मॊल: २५०

सुर्वात: खंयचाय साहित्याक वाचताना तें साहित्य म्हज्या पसंदेचें? हावें खायस कर‍चें? हावें आशेंवचें? हावें बरंवचें? (म्हळ्यार म्हज्या व्यक्तिगत अभिरुचिचें?) आशें हांव चिंतुंक वचाना. साहित्याक हांव साहित्य म्हणून चिंतां! जांव तें मेडिचल प्रिसक्रिपशन! तशें हो काणियां जमो. एक काणी म्हळ्यार आमीं ताका काणी म्हणोन वोलांवचें मात्र! पूण हकीगतेंत ती एका जिवितान वा सभार जिवितांनी सार‍ची जिणी! जांव ती रायाळ जिणी वा दुरबळ जिणी! जिणी जिणीच! रायान‌यी ती जिणी जियेवंक आसा आनी भिकार‍यान‌यी ताची जिणी जियेवंक आसा. आशें आसतां.... फलाणो एकलो, रायाच्या जिणियेंत सिंतिमेंतां नांत..... वा दुर्भळकायेच्या जिणियेंत उत्सुकाय ना! म्हळ्यार, असल्या जातीक कितें म्हणचें? ताच्या चिंत्पा पर्माणें हांगासर दुबळो दुबळ्या कुटमांत जल्माल्याची आनी राय रायाळ कुटमांत जल्मल्ली चूक जाता आनी समाजेचें संतुलन चुक्ता. आनी चुकलेल्या संतुलना भितरल्या समाजे थावन कितें खीर‍लात? रुका आळमें?

"एक नवो संसार!" आयलेवार पर्गटलेल्या काणियां जम्याचें नांव. बूक हाताक मेळोन नांव वाचतानाच हावें चिंतलें.... एक नवो संसार आनी मानाधीक चेतन लोबो!? कोंकणेंतल्या सभार संपादकां पयकीं भोव‍च थोड्या संपादाकांक मात्र हांव खरे संपादक म्हणोन मांदतां! तांचे पयकी मा| चेतन लोबो एकलो. असलो संपादक आनी ताचो एक नवो संसार! (डेफिनिटीव वा ईन‍डेफिनिटीव?) काल्पनीक वा नैसर्गीक? धार्मीक वा नासतीक? आशावादी (तकले नांव सांग्ता तशें) वा पर‍द्या पाटलो अस्पश्ट निरास वादी?

खंयचोय बूक हांव हातीं घेतां तर तांतलीं लेखकाचीं उत्रां आनी पसतावन वाच्ची सवय हावें केदनांगी सोडून दिल्या. हांव पयलें पुसतक वाचतां तांतल्या विचारांक पार‍कितां उपरांत लेखकाचीं उत्रां आनी प्रसतावन पळेतां. तशें ह्या बुकांतलें साहित्य वाचुंक आरंभ केल्ल्या म्हाका ह्या पुसतकांतली पयली काणी ’बदलाल्लो गांव’ वाचताना एक विशेशता दिसली. आनी निमाण्या पंग्तेर म्हाका एक दृश्य दिसलें. तें द्रश्य कोणें देखलां तांकां मात्र तें समजाता. मुंबय एर पोर्टा थावन विमान टेक आफ कर‍ताना भायर दिसचें दृश्य! निळश्या टर्पालिनाचा जोपड्यां वयल्यान एका नव्या संसाराक उभोन वेचा विमाना पंदलें दृश्य! हें दृश्य हावें सभार पावटीं वासतवांत देखलां! बदलावण जांवचा आनी बदलावण जाल्ल्या दोन समाजे मधलो हो बदलावण जावंक नातललो संसार!

संसार तोच! तो कांय बदलाना! बदलाता जाल्यार लेखकान संसाराक पळंवची नदर! आनी हिच्च नदर बदलोंक जाय! ह्याच नद्रेक ह्या काण्ये जम्यांत बरयणारान खूब गळसिल्या. हिच्च नदर ह्या नव्या संसाराचा जल्माक काराण जाल्या. देकून ह्या काणियांचा लांभ रुंदायेंत हो लेखक कितलो सूक्ष्म ग्राही म्हळ्ळें स्पश्ट कळता. ताची सूक्ष्म ग्राही काणियेंतल्या काल्पनीक व्हाळ्याक वासतवीक आनभोग जावन बदलिता.

’बदलाल्लो गांव!’ हांगासर कथानायक आपल्या दोळ्यांनी तें दृश्य पळेता!. जोपड्यां सागोर. आनी विणगीं भुर्गीं! म्हळ्यार वासतव. हें दृश्य पळेल्या उपरांत तो कथानायक दोळे दांप्ता! म्हळ्यार क्रिया आनी स्टेट मेंट दिता! म्हळ्यार क्रियात्मक. हांगासर हे स्टेट मेंट निरास‌पणाचें व्हय! कित्याक म्हळ्यार अशावाद चडताव जावन भावनात्मक जावन आयचा समाजेंत निरासेंत बदलाता वा मर्णांत सिंतिमेंतां जावन अंत्य जाता. पूण हांगासर विशेशता म्हळ्यार हो कथानायक सगळ्या समाजेक‍च (वासतवीक) आपला आंगार घेवन सगळ्या समाजेक‍च कुर्ड्यापणान जेम काडलेल्याबरी दाकंवचें! जाल्यारी ताची प्रज्ञा (Consciousness) मात्र जागें रावून उग्त्यान संघर्श्याक देंवचें! (उत्रांनी)

ह्या जम्यांतल्या चडताव काणियांनी हो संघर्श स्पश्ट जळकाता! ह्या संघर्शांत पोळकूर‍पण ना वा भिवकूर‌पण ना! व्यक्तिपरधान जाल्ले पात्र‌धारी धयराधीक आसात. पात्रधारी तो जांव वा तें जांव! कित्याक म्हळ्यार हांगाचो लेकक ताच्या विचारांनी जांव ताच्या समजणेंत जांव तो स्पश्ट आसा.

खंयचाय साहित्यांत हांव जिणी आनी जिविता मधलो फरक कितलो आसा तो मात्र सोधतां! भोवशा कोंकणेची ही दुर्धेशा जायजय. हांगासर नामणेचे लेखक पासोन जिणी मात्र सोधतात! कित्याक म्हळ्यार जिणी भायल्यान दिसता. जिवीत दिसाना! जिणियेक मोल बांद्येता. जिविताक जायना! हें मोल भांधुंक जायनातलेल्याक मौल्यां बांदचें प्रयत्न ह्या जम्यांत हांगाचे कथानायक वाकथा नायकी हऱ्येका काणियेंत कर‍तात! दाकल्याक सांगचें तर सभार काणियों एकामेका ताळ पडतात वा ते एकामेकाचे फांटे म्हळ्ळ्याबरी दिसचें. हांगासर एका रुकाच्या विवीध फांट्यांची वळक जाता म्हळ्ळें सत वोपवोन घेताना हेंय सत मांदून घेवंक पडता की विवीध रुकांचें वैविध्य उणें जाल्लें! हावें उणें म्हळां. ना म्हणोन सांगुंक ना. हेंय एक विशेशता म्हण्येत. हांगासर ना म्हळ्ळें तें आसचें!

हें अतिरेकक खंय पावलां म्हळ्यार.... ह्या जम्यांतल्या ’आंगोवण’ म्हळ्या काणियेंत! ह्या काणियेंत हांतलो कथानायक फकत्त एका समाजेक न्हंय बगार सार्वत्रीक समाजेक तिच्या दिस्पोडत्या कुर्ड्यापणाक दीश्ट फुंकचांत यशस्वी जाला. हांगासर ताचो विचार स्पश्ट आसा! ताचो उद्देश स्पश्ट आसा! आनी ताचें मिसांव स्पश्ट आसा! कांयच संघर्शाक देंवानासताना तो डिस्सायसीव जाता. देकून ताच्या मिसांवांत तो जिक्ता! तितलें मात्र न्हय तो जिकचें कशें म्हळ्ळें दाकयता! हांगासर जिणियेची जीक जायना! देकून हांगाच्या कथानायकाक ताच्या जयताचो फायदो मेळाना. हांगासर तो एका जिविताक जिकयता! देकून जिकलेलें जिवीत आपल्या जिकलेल्या आनभोगाक जिणियेध्वारीं जोडुंक सक्ता शिवाय जिणी जिविता द्वारीं न्हय! तशें म्हळ्यार.... जीण मात्र बदलाता शिवाय जिवीत न्हय!

हेंच ह्या जम्यांत अटापूण आसचें सत आनी भळिश्ट विचार! संसार कांय बदलाता? ना! मनश्याची जीण बदलाता! बदलावण मनश्याचो अवगूण! ह्या अवजुणांक लागोन मनीस तृप्ती नासतां बदलावण आशेता जिविताक लागोन! हांगाचर बदलावण म्हळ्ळो सब्द मात्र शाश्वत शिवाय जाल्ली बदलावण शाश्वत न्हय! ती आनीक‌यी जावंक आसा. पूण बदलावण खंयचा दिशेन? ही दिशा आमकां हांगासर दोळे दांपललो पयल्या काणियेंतलो कथानायक दाकयता. तो दोळे कित्याक दांप्ता?

खंयचेंय साहित्य म्हज्या मुकार भळिश्ट जांवचें तांतूं आटापून आसचा तत्व शासत्रांत! हावें हऱ्येका साहित्याक तें साहित्य कसल्या तत्वांक प्रतिपादन कर‍ता म्हणोन मात्र सोदचें. कित्याक म्हळ्यार साहित्यांतलें वर्णन आनी कथाहंदार तें वाचप्याचा रुचीक मात्र! रूच थोड्याच खिणांक मात्र! रूच माज्वाल्यारी चाकलेल्या रुचिचा भितर‍ल्या सत्वाक वोंकोन भायर काडुंक जायना. केदनां हें भायर काडुंक जायनागी तेदनां मात्र मत म्हळ्ळी सकत डिसटरब जाता. आनी डिसटरबेन्स चिंतुंक लायता. आनी चिंतप सोधुंक लायता. आनी सोदनां मात्र ट्रान्स फोर्मेशनांत बदलावण जावन जल्म घेता. हीच बदलावण! देकून ही शाश्वत न्हय! तर क्षणिकांती भलायकेभरीत जावंक जाय जाल्ल्या ह्या बदलावणा पाटल्यान कसलें तत्व शासतीर आटापूण आसा?

नैतिकता! आनी वैचारिकता! नैतिकतेचा सतांक वैचारीक पात्येणी जावन हो लेखक हांगाच्या काणियांक घुंता. आशें घुंताना हांगाचो कथानायक वा कथानायकी चडताव जावन नैतीक बर‍याक आनी वायटाक दोनांयकी वळकाता जाल्ल्यान वैचारीक पणांत नैतीक सतां वयर ताची पात्येणी धृड आसता! हाका सार‍कें उदाहरण ’कांटाळ‍ल्लें दिर्वें’ काणी. नैतिकता वा नैतीक जवाब्दारी म्हळ्ळ्या तत्वाक हांव डेफ಼िनेशन दीवंक सक्तां! पूण हाका एक निर्धिश्ट अर्थ न्हय! कित्याक म्हळ्यार नैतिकता अल्टिमेटली चडताव जावन मोरल सायन्सा वयर होंदोन आसता. (हें गर्ज न्हय मोरालिटिचो अर्थ व्यक्तिगत जावन घेवंक जाता) आनी हेंच प्रतिपादन कर‍चें सर्वे सामान्य! कित्याक म्हळ्यार मनीस ताणें जियेंवच्या समाजेक वोळसाल्लो आसताना ताणे आचर‍चुंचा मोरालिटिंतल्या नैतीक विचारांक वोळसाजे म्हणोन कांय ना. कित्याक म्हळ्यार हांगासर समाज म्हळ्यार युनिवर्सल जावन आसता आनी नैतिकता ताणें जियेंवच्या समाजेच्या एका वांट्याची आचर‍सुंची जवाब्दारी! ही जवाब्दारी सोडल्यार आनी धर‍ल्यार आनी बदलिल्यार समाजेक लुक्साण कांय ना. पूण समाजेंतल्या व्यक्तीक जाता. व्यक्तीक जाता म्हणताना व्यक्तिची जिणी आनी जिविता मधलो गांच दुरबळ जाता. आनी ताची पात्येणी मोर‍ता. ह्या वेळार हाचो परिणाम समाजेर पडता आनी समाजेंत दुश्क्रत्यां आरंभ जातात. देकून हांगासर ह्या जम्यांत नैतिकता आनी वैचारिकता समासम जिणिये सतां जावन व्हाळतात. (वैचारिकतेक सोडल्यार नैतिकतेची दिशा विंगड‍च जाता) हेंच ह्या कथा जम्यांत जाता तितलें समजावंक प्रयत्न केलां. देकून‍च हांगा प्रसतूत केल्ल्या हऱ्येका काणियेंतल्या जिवितांत व्यक्तीच प्रधान जावन आसा. आनी जिणियेच्याकी जिविताक चड महत्व दिलां. आनी हाचेच खातीर लेखकान जिवीत फुलंवची सोंपी वाट जावन नैतिकतेक विंचलां. आशें नैतीक सतांक वैचारीक पणाची पात्येणी जावन घेतल्यार समाजेंत जियेंवचा मनश्याचें जिवीत मानाचें आनी गौरवाचें जावन भलायकेभरीत समाज रसचा वावराक ह्या लेखकान हात घाला म्हण्येत.

हाका पूरक जावन लेखकान हांगासर नैतीक सतांक वैचारीक पात्येणेचा थळार नैतीक सतांक फकत्त समाजेंत एक जवाब्दारी शिवाय तीं कानूनां न्हय म्हणोन स्पश्ट दाकवन दिंवचें! देकून ह्या जम्यांत कानूनां वा वत्तड खंयचरी जिकानांत. तीं सलवातात. हें मोरल पोलीस म्हणोन स्व वोलावन घेंवचा मनश्यांक एक देख वा जाग्वण जाता.

व्यक्ती प्रधान म्हणताना समाजेंतल्या हऱ्येका व्यक्तिचेर जवाब्दारी आसची सहज! ही जवाब्दारीच ह्या जम्याचें प्लस पायिंट! देकून‍च ह्या जम्यांतलो कथा नायक काणियेचा आरंभायेर वाचप्याचो संभंध जोडिनासताना जल्माता! कोण खंय कितें म्हळ्ळें तो कळयनासतानाच हाजर जाता. पूण फुडें वेताना तो वाचप्याचो दायजी म्हळ्ळो आनभोग दिता आनी अखेरीक पावताना तो वाचप्याची एक सरोन गेल्ली सावळी म्हळ्ळ्याबरी जागयता आनी त्या सावळेन चलोन आयिल्ली वाट दाकवन ही तुजी वाट सार्की? म्हळ्ळें सवाल विचार‍ता. हें सवाल विचारुंक हांगासर बरवप्यान विंच‍ल्ली वाट नैतीक विचारांची. हीच वाट सार‍की वा प्रभल वा अंतीम म्हणोन न्हय! पूण ही वाट सामाजीक जावन चड सोंपी! आशें म्हणताना हांगासर लेखकान समाजेंतल्या आर्थिकतेक महत्व दीवंक ना वा ताका प्राथमीक महत्व दीवंक ना म्हळ्ळेंय सत! क्यापिटालिसम संसारांत तेंय डेमोक्रासिंतल्या क्यापिटालिसटीक समाजेंतली हऱ्येक जीवी आर्थिकतेक‍च चड महत्व दितासताना नैतीक जवाब्दारेक कोनश्याक लोटता. हें कोनश्याक लोटलेल्याक पर्त्याक उकलून दवर‍चें काम हांगासर लेखकान केलां म्हळ्ळें मात्र स्पश्ट!

ही स्पश्टता ह्या जम्यचा निमाण्या काणियांनी झळकाता; ’बाबाक एक चीट!’, ’मातारो घोडो’, ’झडती’, ’कांटाळ‍ल्लें दिर्वें!’ असल्या काणियांनी नैतिकतेचे सामाजीक जवाब्दारेभरीत विचार उगडापे जातात आनी संघर्श दिसता. विंचवण दिसता! विंचवन जयताची वा सलवणेची म्हळ्ळें स्पश्ट ना! जावंक पुरो हांगासर जयत आनी सलवण महत्वाचें न्हय! बगार नैतीक मौल्यांभरीत जिणी महत्वाची! पूण "आंगवण" म्हळ्ळ्या काणियेंत विचारांनी पात्येवन आयलेल्या वा पाळून आयलेल्या रितिंक आनी रेगऱ्यांक असंभवीक‌पणीं न्याय जोडून दिंवचें..... तेंय इतल्या स्पश्ट आनी संघर्शा विणें! मेचवाजय जाल्लो विशय हो! ह्या विचारांक उकलून धर‍लेल्या लेखकाक जरूर मान भागवंक जाय! कित्याक म्हळ्यार हांगासर लेखक अपूण‍च कथानायक जावन आपल्याच दोन सैंबां मधें झुजाक देंवता. एक..... आपणायिल्लें धार्मीक सैंभ! आनी दुस्रें जाल्माचें धार्मीक सैंभ! हांगासर सैंभ वयुक्तीक जावन एक‍च! पूण व्यक्तिगत जावन दोन! हें व्यक्तिगत जावन घेत‍ल्ल्या वर्वीं हांगासर विंचवणेक पयलें स्थान. देकून‍च हांगाची विंचवण समाजेंतल्या नाजूक म्हळ्ळ्या विचारा वयर इतल्या सुलाभायेन जिक्ता. आनी जिविताची सार्की वाट दाकयता! बोवश्या ह्या पुसताकाचा मुखपानार दिसचें विशाल दऱ्यांत पयण कर‍चें एक्सुरें होडें होच भर्वसो पाचार‍ता.

आटापलेल्या विचारा उपरांत: ह्या जम्यांतल्यो चडताव काणियों वासतवांत व्यक्तिगत जावन उभ्यो आसात तरी खंयचरी वयुक्तीक जावन रावोंक नांत. वयुक्तिकाचा पर्द्या थावन भायर येवन समाज मुखी जावन यूनिवर्सल रुपार दर्शन दितात. जायत्यांक साहित्यांत भावुकतेची आनी उत्सुकायेची गर्ज आसा म्हणोन दिसता जावंक पुरो. तसल्यांक हो काणियां जमो फकत्त जवाब्दारी मात्र गर्ज म्हणोन दाकयता. कित्याक म्हळ्यार जिणी कसल्या तत्वांचेर भांदून हाडल्या म्हळ्ळ्याचें दर्शन जिवीत सोंपेपणी दाकयता. हाका साक्स ’कांटाळ‍ल्लें दिर्वें’ काणी. काणी आनी विचार पर‍नो तरी भलायकेभरीत समाजेक सदांकाळ गर्जेचो. ह्या जम्यांतल्या काणियांक व्हाळयिल्ली रीत सांगची तर रुकार थावन जडलेली खोली सभार वोतांक भाजोन भाजोन आपडताना पुटता म्हळ्ळ्या तसली. वाचप्याक धर‍न दवर्ची म्हळ्ळ्या उतळ उलोण्याची न्हय! बगार आनभोगांतल्या अनुभवाक पीळन काडलेल्या नार‍ला रोसाबरी! हऱ्येका काणियेंत आनभोगाचो पेळो उसयिल्लो दिसता. तेंय ल्हान ल्हान संग्तेंक इतल्या सूक्ष्मायेन पार्किल्लें स्पश्ट कळता. आपणायिल्ल्या धार्मीक सैंबांती असलो अनभोग? तो जाल्यारी जवाब्दारी भरीत! असलो अनभोग जायत्यांक मार्ग‍दर्शन जांवदी म्हणोन आशेतां. अन्येक संतोसाची गजाल म्हळ्यार आशावादाक उग्त्यान पाचार‍चे विचार निरासांत बदलानांत वा सामाजेंत रडोन विळाप करिनांत! अनी प्रत्येक जावन मेचवोंक जाय जाल्लें कितेंगी म्हळ्यार हांगाचे नैतिकतेचे विचार खंयचरी धर्माक वा धार्मिकतेक पांग्रून रावलेले नांत. (हांगासर बरयणार धार्मीक जाल्ल्यान). आरंभीक काण्यों अचानक संकीर्ण जाल्लो आनभोग दितात. रचलेल्या पात्रांनी संसक्रतेचें दर्शन..... राजकीय ईन‍फ्लुयेन्स..... आर्थिकतेची हताशा..... म्हळ्ळें थोडें उणेपण आसा. फुडल्या वेळाकाळांत तें भर‍ती जातेलें म्हणोन चिंतां! आनी लेखकाचा फुडाराक सर्व बरें माग्तां!

- मेलवीन जे. वास. केलराय.(फेबरेर, २०२०)

मेलवीन जे. वास. केलराय: दायज.कोम‌चो सह-संपादक (२००४-२००९) जावन वावर केल्लो मेलवीन जे. वास, एक विशिषट शयलेचो कथाकार, विशलेषक, कवी, समीक्षक. सभार साहितीक स्पर्ध्यांनी इनामां आपणायिल्लो हो एक अंकण‌कार तशेंच बरो वाचपी. कुवेयटांत आशावादी प्रकाशनान चलयिल्ल्या कवितापाठांनी सभार कोंकणी बुकांचेर ताणें समीक्षा केल्यात. पयणारी-वीज हाणीं मांडून हाड‌ल्ल्या राश्ट्रीय मट्टाच्या दोन‌यी साहितीक स्पर्ध्यांनी इनामां आपणायल्यांत.